Wednesday, July 24, 2024
- ማስታወቂያ -
- ማስታወቂያ -

ኦሮሚያ ኢንተርናሽናል ባንክ በአንድ ቢሊዮን ብር ባለ 33 ወለል ሕንፃ ሊገነባ ነው

ተዛማጅ ፅሁፎች

ኦሮሚያ ኢንተርናሽናል ባንክ በአዲስ አበባ፣ ጎማ ቁጠባ እየተባለ በሚጠራው አካባቢ በሚገኝ ይዞታው ላይ ባለ 33 ወለል የዋና መሥሪያ ቤት ሕንፃ ለመገንባት መዘጋጀቱን አስታወቀ፡፡

ከአንድ ቢሊዮን ብር በላይ ወጪ እንደሚጠይቅ የተገመተውን ሕንፃ ለመገንባት የአገር ውስጥ ኩባንያዎችን የሚያካትት ዓለም አቀፍ ጨረታ ያወጣ ሲሆን፣ የጨረታው አሸናፊ እንደታወቀ በአፋጣኝ ግንባታው እንደሚጀመር ባንኩ አስታውቋል፡፡

ሪፖርተር ከባንኩ ባገኘው መረጃ መሠረት፣ ቀድሞ ጎማ ቁጠባ አክሲዮን ማኅበር ይባል በነበረውና በታዋቂው ገብረ ሥላሴ ኦዳና ቤተሰቦቻቸው ሥር ይተዳደር በነበረው ይዞታ ላይ አዲሱ ሕንፃ እንደሚገነባ ታውቋል፡፡ ጤና ሚኒስቴር ፊት ለፊት ወይም አምስተኛ ፖሊስ ጣቢያ አቅራቢያ የሚገኘው ይህ ቦታ 2,300 ካሬ ሜትር ሥፋት አለው፡፡

ኦሮሚያ ኢንተርናሽናል ባንክ፣ ሠንጋ ተራ አካባቢን በማዕከልነት ይዞ፣ ከሜክሲኮ እስከ ልደታ ባለው መሥመር የፋይናንስ ዲስትሪክት የሚል መጠሪያ እያተረፈ በመጣው አካባቢ ዋና መሥሪያ ቤቱን ዕውን እስኪያደርግ ድረስ ይህንን ይዞታ በጊዜያዊነት እንደሚጠቀምበት አስታውቋል፡፡

እንደ መሸጋገሪያ ወይም በጊዜያዊነት የሚጠቀምበትን ዋና መሥሪያ ቤት ለማስገንባት፣ መስከረም 2013 ዓ.ም. የሚካሄደው ጨረታ ውጤቱ ይፋ ከተደረገ በኋላ ባሉት ሁለት ዓመታት ውስጥ ለማጠናቀቅ አቅዷል፡፡ ከጥቂት ዓመታት በፊት በአፍሪካ ጎዳና፣ ጌቱ ኮሜርሺያል አካባቢ በገዛው ሕንፃ ላይ የሚገኘውን ዋና መሥሪያ ቤት አዲስ ወደ ሚገነባው ሕንፃ ያዛውራል፡፡

ዋናውን የዋና መሥሪያ ቤት ሕንፃ በሠንጋ ተራ አካባቢ እንደሚያስገነባ ያስታወቀው ባንኩ፣ በጎማ ቁጠባ ከሚገነባው ሕንፃ የበለጠ ስፋትና ግዝፈት እንደሚኖረው ጠቅሷል፡፡ ለሕንፃ ግንባታ የሚውል ቦታ እያፈላለገ እንደሚገኝ የገለጸው ኦሮሚያ ኢንተርናሽናል ባንክ፣ ቦታውን በእጁ እንዳስገባ ጎን ለጎን ሕንፃውን የማስጀመር ዕቅድ እንዳለው ጠቅሷል፡፡ የጎማ ቁጠባ ይዞታውን ያገኘው ከጎማ ቁጠባ ወይም ከኦዳ ኩባንያ ጋር ባደረገው ስምምነት መሠረት ሲሆን፣ ለይዞታው ግዥ በዓይነት ክፍያ በመፈጸም በርካታ የአክሲዮን ድርሻዎችን እንዳቀረበ ተሰምቷል፡፡   

በሠንጋ ተራ አካባቢ የዋና መሥሪያ ቤት ሕንፃ ግንባታቸውን በዚህ ዓመት እንደሚያጠናቅቁ ከሚጠበቁት ውስጥ ዘመን፣ ኅብረትና ንብ ኢንተርናሽናል ባንኮች ይጠቀሳሉ፡፡ የእነዚህ ባንኮች ሕንፃዎች በመደዳ የሚገኙ ሲሆን፣ ረዣዥም በመሆናቸውም ከመንትዮቹ የአዋሽ ባንክ ሕንፃዎች ትይዩ የሚገኙ በመሆናቸውም የሜክሲኮ አካባቢን ገጽታ ከወዲሁ እንደቀየሩት ይታያል፡፡ ረዥሙና ባለ 46 ወለሉ የኢትዮጵያ ንግድ ባንክ ሕንፃም ከእነዚህ ሕንፃዎች ብዙም ሳይርቅ፣ ከኢትዮጵያ ሆቴል ጎን የሚገኝ የአዲስ አበባ አዲስ ድምቀት ለመሆን እየተቃረበ ይገኛል፡፡  

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች