Saturday, October 1, 2022
ሌሎች ዓምዶች
    - Advertisement -
    - Advertisement -
    ዜናየትግራይ ክልል ምክር ቤት ሕገ መንግሥቱን አሻሻለ

    የትግራይ ክልል ምክር ቤት ሕገ መንግሥቱን አሻሻለ

    ቀን:

    የምክር ቤቱን መቀመጫዎች ወደ 190 ከፍ አድርጓል

    ሐሙስ ሐምሌ 30 ቀን 2012 ዓ.ም. ዘጠነኛ አስቸኳይ ጉባዔውን ያካሄደው የትግራይ ብሔራዊ ክልላዊ መንግሥት ምክር ቤት፣ የክልሉን ሕገ መንግሥት ማሻሻሉን አስታወቀ፡፡

    በዚህ ማሻሻያ መሠረትም የክልሉ የምርጫ ሥርዓት አሁን ካለበት የአብላጫ ድምፅ ሥርዓት ወደ ቅይጥ ትይዩ እንዲሻሻል ወስኗል፡፡ በተሻሻለው ሕግ መሠረትም የክልሉ ምክር ቤት መቀመጫ ቁጥር እንደሚጨምር ታውቋል፡፡

    በምክር ቤቱ የሕገ መንግሥት ማሻሻያ መሠረት የምርጫ ሥርዓቱ ወደ ቅይጥ ትይዩ የሚቀየር ሲሆን፣ 80 በመቶ መቀመጫ አሁን በሥራ ላይ ባለው የአብላጫ ድምፅ ሥርዓት የሚቀጥል ነው፡፡ ቀሪው 20 በመቶ ደግሞ በቅይጥ ትይዩ አማካይነት የሚያዝ እንደሆነ ተገልጿል፡፡

    ከዚህ ጋር ተያይዞም ማሻሻያውን መሠረት አድርጎ የክልሉ ምክር ቤት የመቀመጫዎች ብዛት በ38 መቀመጫዎች የሚጨምር ሲሆን፣ ይህም የክልሉን ምክር ቤት መቀመጫዎች ብዛት ወደ 190 ያደርሰዋል፡፡ ከዚህም ውስጥ 152 መቀመጫዎች አሁን ባለው የአብላጫ ድምፅ ሥርዓት ውድድር የሚያዙ ሲሆን፣ ቀሪዎቹ 32 መቀመጫዎች ደግሞ በቅይጥ ትይዩ ሥርዓት የሚያዙ ይሆናሉ፡፡

    እንዲህ ያለው የምርጫ ሥርዓትን በክልሉ ለመተግበር የተወሰነው የመራጮች ድምፅ እንዳይባክንና በክልሉ ምክር ቤትም የተለያዩ ሐሳቦች እንዲስተናገዱ ካለው ቁርጠኝነት መሆን፣ የክልሉ ምክትል ርዕሰ መስተዳደር ደብረ ጺዮን ገብረ ሚካኤል (ዶ/ር) ለምክር ቤቱ አስረድተዋል፡፡

    የአገሪቱን የምርጫ ሥርዓት ለመቀየር ከዚህ ቀደም የተለያዩ ድርድሮች ሲካሄዱ መቆየታቸው የሚታወስ ሲሆን፣ በተለይ ከ2008 ዓ.ም. ጀምሮ በመላ አገሪቱ ከተቀሰቀሰው ሕዝባዊ አመፅ ጋር ተያይዞ የያኔው ገዥ መንግሥት የኢትዮጵያ ሕዝቦች አብዮታዊ ዴሞክራሲያዊ ግንባር (ኢሕአዴግ) የፖለቲካ ምኅዳሩን ለማስፋት በሚል፣ እስከ ምርጫ ሥርዓት እስከ መቀየር የሚደርስ ማሻሻያ እንደሚያደርግ ቃል ገብቶ እንደነበር ይታወሳል፡፡

    በተለይ የ2009 ዓ.ም. የጋራ ምክር ቤቶችን በንግግር የከፈቱት የቀድሞው ፕሬዚዳንት ሙላቱ ተሾመ (ዶ/ር)፣ የአገሪቱን የምርጫ ሥርዓት እስከ ማሻሻል የሚደርስ ተሃድሶ በመንግሥት አማካይነት እንደሚከናወን ቃል ገብተው እንደነበር አይዘነጋም፡፡ በተመሳሳይ የቀድሞው ጠቅላይ ሚኒስትር ኃይለ ማርያም ደሳለኝ የ2009 ዓ.ም. የመንግሥታቸውን ዕቅድ ባቀረቡበት ወቅት፣ መንግሥት ከሚያከናውናቸው ዓበይት ተግባራት መካከል የአገሪቱን የምርጫ ሥርዓት ማሻሻል አንዱና ዋነኛው እንደሚሆን ቃል ገብተው እንደነበር እንዲሁ የሚታወስ ነው፡፡

    በዚህም መሠረት ኢሕአዴግና 15 ያህል የተቃዋሚ ፖለቲካ ፓርቲዎች ባደረጉት ድርድር፣ የአገሪቱ የምርጫ ሥርዓት ቅይጥ ትይዩ እንዲሆን ተስማምተው ነበር፡፡ በዚያ ስምምነት መሠረትም 80 በመቶ የሚሆነው የሕዝብ ተወካዮች ምክር ቤት መቀመጫ በአብላጫ ድምፅ እንዲያዝ ተስማምተው የነበረ ሲሆን፣ ቀሪው 20 በመቶ ደግሞ በቅይጥ ትይዩ ሥርዓት እንዲያዝ ተስማምተው ነበር፡፡

    ይህ ስምምነት ተፈጻሚ ሳይሆን በኢሕአዴግ ውስጥ የተከሰተውና ዓብይ አህመድን (ዶ/ር) ወደ ግንባሩ ሊቀመንበርነት ያመጣው የአመራር ለውጥ፣ ጉዳዩ በእንጥልጥል እንዲቀር አድርጎታል፡፡ 

    - Advertisement -

    ይመዝገቡ

    spot_img
    spot_img