Sunday, June 23, 2024
- Advertisment -
- Advertisment -

እኔ ፈራሁ

በምትኩ በቀለ

በባህሪዬ ፈሪ (Phobistic) ነገር ነኝ፡፡ በተለይም የሕመም ፍርሃት (Nosophobia)፡፡ በዚህ ባህሪዬ የተነሳ ሊጠናቀቅ የሦስት አሥር ቀናት በቀሩት የ2012 ዓ.ም. ብቻ ጤና ፍለጋ (መንፈሳዊ ሥፍራዎችን ሳልጨምር) ቢያንስ ከአሥር ጊዜያት በላይ የሕክምና መስጫ ማዕከላትን ደጆች እረግጫለሁ፡፡

ከእነዚህ የሕክምና ማዕከላት መፍትሔ ለማግኘት በመሻት በተጠቀሰው ዓመት ብቻ ለካርድ ማውጫ፣ ለምርመራ፣ ለመድኃኒት መግዣ ወዘተ ቢያንስ ከአሥራ አምስት ሺሕ ብር በላይ ወጪ አውጥቻለሁ፡፡ ቤተሰብ ለሚያስተዳድር አንድ የመንግሥት  ሠራተኛ ያለ ዕቅድ ይኼን ያህል ገንዘብ በአንድ ዓመት ውስጥ ማውጣት ምን ያህል ከባድ መሆኑን  ምናልባት የደረሰበት ነው የሚያውቀው፡፡ ይበልጥ ደግሞ ከአራስ ቤት ተደራራቢ ወጪ ጋር እንዲህ ያለው ተደጋጋሚ ክስተት የሚፈጥረውን ተጨማሪ  ቀውስ መገመት ቀላል ሒሳብ ነው፡፡

እንዲህ ሆኖ በጤና መቆየት ‹‹ተመስገን›› ቢያሰኝም ካልጠፋ ቀን መጋቢት 4 ቀን 2012 ዓ.ም. በሠላሳ ዘጠነኛ ዓመት የልደት ቀኔ ዋዜማ እንደ ሌሎቹ አገሮች ሁሉ እኛም አገር ሰተት ብሎ በመግባት የጥፋት በትሩን ማሳረፍ የጀመረው የኮሮና ቫይረስ ለእንደኔ ዓይነቱ በርጋጋ ሰው የዕለት ተዕለት ሥጋት ከሆነብኝ ድፍን አምስት ወራት ተቆጠሩ፡፡

እኔም ሆንኩ ባለቤቴ በሽታው መፍትሔ እስኪያገኝ ድረስ መንግሥት በወሰነው መሠረት ከሥራ ገበታችን ርቀን በተቻለ መጠን ከቤት ባለመውጣት ለራሳችንም ሆነ ለሌሎች ሰዎች መፍትሔ ናቸው የተባሉትን ጥንቃቄዎች እያደረግን እንገኛለን፡፡

ይሁንና እንደኔ ላለ ሥራ ለለመደ ሰው ለወራት ቤት በመዋልና በማደር መቆዘሙ በራሱ የሚፈጥረው ጭንቀት የሕመሜ አንዱ ምክንያት እንደሆነ ባላጣውም፣ ቀን እስኪያልፍ በተቻለኝ አቅም ሁሉ በመኖሪያ አካባቢዬ የሚከናወኑ ማኅበራዊ አገልግሎቶችን በመከወን ይኼን ክፉ ጊዜ በጥንቃቄ ለመሻገር እየጣርኩ እገኛለሁ፡፡

እንዳለመታደል ሆኖ መኖሪያዬ በከተማችን ከሚገኙት የጋራ መኖሪያ ቤቶች በአንዱ በመሆኑና በእነዚህ የመኖሪያ ቤቶች የሚመራው የኑሮ ዘይቤ አስቸጋሪነት ማለትም የመኖሪያ ሕንፃው ያረፈበት ምቹ ያልሆነ አካባቢያዊ ሁኔታ፣ በግቢያችን ውስጥ የሚከሰቱት በርካታ ተደራራቢና አሰልቺ ችግሮች (የሰኔ 23 ቀኑን አገራዊ ችግር ጨምሮ) እኔንና እንደእኔ በግል ተነሳሽነት የመፍትሔ አካል ለመሆን እየጣርን ለምንገኝ ጥቂት ግለሰቦችና ውስን የግቢው ኮሚቴዎች መደበኛ ሊባል በሚችል ደረጃ ሥራ ከሆነብን ዓመታት ተቆጥረዋል፡፡ በእነዚህ ዓመታት ውስጥ ቀን ከሌት እየተገናኙ በጋራ መምከር የመከርንባቸውን ጉዳዮች መተግበር ችግኝ መትከል፣ ፍሳሽ ማስወገድ፣ አሸዋ ማስነጠፍ፣ ግቢ ማፅዳት፣ ጥበቃ መቅጠር፣ የመዋጮ ገንዘብ መሰብሰብ፣ የተበላሹ የኤሌክትሪክ መስመሮችን ማስቀየር፣ በአካባቢው የተሰማሩ አጥፊዎችን በመክሰስ ለሕግ አስከባሪ አካላት አሳልፎ መስጠትና ሌሎችም በርካታ በጎ ተግባራትን እያከናወንኩ ሰዋዊ ግዴታዬንና ማኅበራዊ ኃላፊነቴን በመወጣት መንፈሳዊ ዕርካታን ማግኘት ደመወዜ ሆኗል፡፡ እኔም ሆንኩ አጋሮቼ በአንድ መልኩ በጋራ የመኖሪያ ግቢያችን ውስጥ ለሚነሱ ችግሮች የመፍትሔ አካል ሆነን መገኘታችን ቢያስደስተንም በሌላ መልኩ ይኼንን በጎ፣ ልማታዊና አርአያነት ያለው ተግባራችንን ከማደናቀፍም ባለፈ ከሰሞኑ ከአሥር በማያንሱ የግቢያችን ነዋሪዎች ላይ የተገኘው የኮሮና ቫይረስ በግቢው ማኅበረሰብ፣ በእኛም ሆነ በቤተሰቦቻችን ላይ ከፍተኛ ሥጋት ፈጥሮብናል፡፡

የጋራ መኖሪያ ቤቶቻችን እጅግ ተቀራራቢዎች ከመሆናቸውም ባሻገር የመተላለፊያ ኮሪደሮቹ መጥበብ፣ የደረጃ መወጣጫ መደገፊያዎቹ ከብረት የተሠሩ መሆናቸው ደግሞ ከሌሎች ለቫይረሱ ከሚያጋልጡ ማኅበራዊ ግንኙነቶቻችን ባለፈ አካላዊ ርቀትን ላለመጠበቅና በንክኪ ቫይረሱ በቀላሉ ከአንዱ ወደ አንዱ እንዲተላለፍ የሚያደርጉብን ዓበይት ምክንያቶች ናቸው፡፡ በግቢያችን ውስጥ ሰባት ሕንፃዎች የሚገኙ ሲሆን በአንድ ሕንፃ ላይ ሠላሳ አባወራዎች ከነቤተሰቦቻችን እንኖራለን፡፡ አንድ አባወራ በአማካይ ሁለት ቤተሰብ ቢያስተዳድር የቫይረሱ ሥርጭት በዚሁ ካልተገታ በግቢያችን ውስጥ በትንሹ ከስድስት መቶ በላይ ነዋሪዎች በቀላሉ ለቫይረሱ እንጋለጣለን፡፡ ከሁሉም በላይ የእያንዳንዱ ነዋሪ የመግቢያ በር ይበልጥ መቀራረብ ደግሞ ሌላው ሥጋት ነው፡፡ ይኼውም የእኔ ቤት የመግቢያ በር ከጎረቤቴ የመግቢያ በር ያለው ርቀት በወጉ አንድ ሜትር ከሃምሳ ሳንቲ ሜትር እንደማይሞላ ለአፍታ በሬ ሲከፈት ከቤተሰቦቹ አፈትልኮ በቅጽበት ቤቴ ውስጥ የሚገኘው የጎረቤቴ ልጅ የዘወትር ተግባር ምስክር ነው፡፡

በደህናው ጊዜ ይህ የሁለት ዓመት ሕፃን በዚሁ ተግባሩ አንድ ዓመት ያልሞላት ልጄን እቅፍ አድርጎ በመሳም በሕፃን አንደበቱ ስሟን እየጠራ የመጫወት ልምድ ነበረው፡፡ በዚሁ ምክንያት ሕፃኑን ለመጠበቅ ተከታትለው የሚመጡት ታላቅ ወንድሙና ወላጅ እናቱ ደግሞ ከእኔም ሆነ ከባለቤቴ ጋር ሰላምታ በመለዋወጥ፣ ቡና በመጠጣት፣ ‹‹ተቀመጡ፣ ተጫወቱ፣ እንብላ፣ እንጠጣ›› በምንላቸው ኢትዮጵያዊ እሴቶቻችን አማካይነት ተላምደናል፡፡ አሁን ግን የጊዜ ጉዳይ ሆነና እነዚህን ልማዶቻችንን እንዳንቀጥል የሚያስገድድ ፈተና ከፊታችን ተደቅኗል፡፡ ጎረቤቴ የሆነችው የዚህ ሕፃን ልጅ እናት ሥራዋ የሕፃናት ልብስ መሸጥ ነው፡፡ በመሆኑም በሳምንት አንድ ቀን ራቅ ካለ ሥፍራ ልብሶችን ይዛ በመምጣት በሳምንት ሦስት ቀን ደግሞ ዘወትር ማክሰኞ፣ ሐሙስና ቅዳሜ አቅራቢያችን የሚገኝ ጉሊት በመሄድ ንግዷን ታከናውናለች፡፡ የልጆች ልብስ ነጋዴነቷ በግቢያችን በመታወቁ ቤት ለቤት እየሄደችም ለግቢው ነዋሪዎች መሸጥ ከጀመረች ሰነባብታለች፡፡ ባለቤቴም ብትሆን ለልጃችን የሚሆኑ ልብሶችን ከመግዛት በዘለለ የዋጋዋን አለመወደድና የልብሶቹን ጥራት ለሌሎች ጓደኞቻችን በማስተዋወቅ ለፈጠረችላት ተጨማሪ የገበያ ዕድል ከምሥጋናና ችሮታ ባለፈ ጥብቅ ወዳጅነትን መሥርተዋል፡፡

ዛሬ ግን ይህችው ጎረቤቴ ከጋራ የመኖሪያ ግቢያችን ውስጥ የኮቪድ-19 ኮሮና ቫይረስ ምልክት ታይቶባቸው ከተመረመሩትና በእርግጥም ቫይረሱ እንዳለባቸው ከተረጋገጠባቸው ሰዎች መካከል ከአንደኛዋ ጋር የቤት ለቤት ግብይት እንዳከናወነች ስሰማ በፈሪ ባህሪዬ ላይ ሥጋቱ ይበልጥ አየለ፡፡ በዛው ምሽት ይህችው ጎረቤቴ ቤታችን በመምጣት በአንዳች ምክንያት ከባለቤቷ ጋር ላከበሩት በዓል መታሰቢያነት የቆረሱትን ኬክ እንድንቀምስላቸው በሰሀን ይዛልን መምጣቷ ይበልጥ አስበረገገኝ፡፡ ምን እንደምል ጨነቀኝ፣ ነገር ግን ይህ ጉዳይ የመሆን ወይም ያለመሆን ህልውናዊ ጥያቄ በመሆኑ መወሰን እንዳለብኝ ተሰማኝ፡፡ በመሆኑም በወቅታዊ ችግር ምክንያት ኬኩን መመገብ እንደማንፈልግ በትህትና በመግለጽ ይዛው እንድትመለስ አደረግኩ፡፡

ባለቤቴ በሁኔታው ደነገጠች፣ እኔም ድርጊቴ ልክ ነው ወይስ ተሳስቻለሁ በሚል ከራሴ ጋር ሙግት ገጠምኩ፡፡ በአንድ በኩል ያላጣጣምኩት ትኩስ ትዳር፣ ስጦታ የሆነችኝ የአሥራ አንድ ወር ልጄ፣ በሥራ ያልተረጐምኩትና በቅርቡ የጨረስኩት የሁለተኛ ዲግሪ ዕውቀት፣ በጅምር የተውኳቸው ሥራዎቼ፣ ዕቅዶቼና በርካታ ነገሮች በህሊናዬ ተመላለሱብኝ፡፡ በሌላ በኩል ጎረቤቴ ማዕድ አጋሩ ተብሎ በሚሰበክበት በዚህ ዘመን በቅንነት ያመጣችልንን ኬክ እንደያዘች በምንተ ዕፍረት ቤቷ ስትመለስ የሚፈጠርባት የሞራል ድቀት አሳሰበኝ፡፡ ባለቤቷና ልጆቿም ቢሆኑ ነገሩን በአዎንታ ባለመመልከት ለእኛ የሚኖራቸውን ስሜት ሳስበው ሁኔታው ዘገነነኝ፡፡ ግና ምን ማድረግ ይቻላል ጊዜው ያመጣብን ጠንቅ ነው፡፡ እንግዲያማ ከሥራ ገበታችንም ሆነ ከቤተሰቦቻችን ተገልለን በቤታችን መቆየቱ ፋይዳው ምን ላይ ነው? በተለይም አዘውትረን ከምንስማት እናት ቤተ ክርስቲያን መራቃችንስ ምን ፋይዳ አለው?

እኔም ሆንኩ ባለቤቴ ምንም እንኳን በቤት ውስጥ የተለመደ ዘወትራዊ ጸሎታችንን ከማድረስ ባንቦዝንም በሰንበት ቤተ ክርስቲያን ከመሳለም ልምዳችን ተገድበን ግድ ሲሆንብን ብቻ አልፎ አልፎ ሰው በማይበዛባቸው ቀናት ልጃችንን ለማስቆረብ የቤተ ክርስቲያንን ቅጥር መርገጥ ከጀመርን ሰነባበትን፡፡ ለዓመታዊ የንግሥ በዓላት እንኳን ከቤት ተነስቶ ቤተ ክርስቲያን የመሄድ ሞላራላችን ዛገ፡፡ ቤተ ክርስቲያን በሄድንባቸው አጋጣሚዎች በሰንበት ትምህርት ቤት ወጣቶች አስተባባሪነትና በቅዱስ ሲኖዶሱ ውሳኔ እየተተገበሩ የሚገኙ ቫይረሱን የመቆጣጠር ተደናቂ ተግባራት አስመስጋኝ ናቸው፡፡ በቅዳሴ ሰዓት በቤተ ክርስቲያኑ ውስጥ ለሚገኙ ምዕመናን እየዞረ የሚደረገው የወንጌል ማሳለም (ማሳም) ሥርዓት ለጊዜው መቆሙ ቤተ ክርስቲያናችን ከወሰደችው የመፍትሔ ዕርምጃዎች አንዱና ወሳኝ የበሽታውን ሥርጭት መግቻ (መቆጣጠሪያ) ዓብይ ተግባር ነው፡፡

በአንጻሩ በምዕመናን ዘንድ በቸልተኝነት እየተተገበሩ የሚገኙ አንዳንድ ሁኔታዎች ነገሩን አለባብሰው ቢያርሱ እንዳያሰኝብን እሠጋለሁ፡፡ ለምሳሌ እኔኑ ጨምሮ በርካታ የክርስትና እምነት ተከታዮች የግላችን የሆነ የቅዳሴ ጠበል መጠጫ ዕቃ ከቤታችን ይዘን ከመምጣት ይልቅ ቤተ ክርስቲያኗ ያዘጋጀችውን የጋራ የሆኑ የቅዳሴ ጠበል መጠጫ ኩባያዎችን በጋራ መጠቀም፣ አልፎ አልፎ የአፍና የአፍንጫ መሸፈኛ ጭንብል ሳያደርጉ የቤተ ክርስቲያኗ ቅጥር ግቢና ቤተ መቅደስ ውስጥ መግባት፣ አካላዊ ርቀትን ሳይጠብቁ ልጆችን በሽሚያና በንክኪ ማቁረብ (ማስቆረብ)፣ መስቀልን ጨምሮ ሕንፃ ቤተ ክርስቲያናትን፣ ምስለ ቅዱሳን፣ ጻድቃን፣ ሰማዕታትንና ምስለ እግዚአብሔርን መሳም (መሳለም) ከጊዜው ሁኔታ ጋር የማይስማማና በዓለም አቀፍ ደረጃ እየተወሰደ ከሚገኘው ጥንቃቄ ጋር የሚቃረን፣ በምዕመኑ ላይ ሥጋትና ጥርጣሬ የሚያጭር መሆኑ ነጋሪ አያሻውም፡፡ ምንም እንኳን ከላይ የተገለጹት መንፈሳዊ ግልጋሎቶች በዘመናት ውስጥ ፈውስን ከፈጣሪ የተቸርንባቸው ቅዱስ ተግባራት ቢሆኑም በቀላሉ መታረም የሚችሉትንና ለጊዜው መተው የምንችላቸውን አገልግሎቶች በመተግበር በግድየለሽነትና እግዚአብሔር ያውቃል በሚል አጉል ብሂል ለራስም ሆነ ለማኅበረሰቡ ጠንቅ የሚሆኑ ተግባራትን ማከናወን አገራችንንም ሆነ እምነታችንን የሚያቆረቁዝ፣ የተስፋ ጉዟችንን የሚገታና አጉል የሚያደርግን አባባልና ተግባራት ናቸውና አሁንም በሚመለከታቸው አካላት ልዩ ትኩረት ሊሰጣቸው ይገባል፡፡

በሽታው በባህሪው ከማኅበራዊ ሕይወት የሚያራርቅ መሆኑ እርግጥ ነው፡፡ ግና እንደኛ ያለ፣ ተጋግዞ አስክሬን በመሸከም ግብዓተ መሬትን የሚያስፈጽም፣ አካፋ በመቀባበል አፈር የሚያለብስ፣ ከአንድ ሰሃን ንፍሮ እየዘገነ በመብላት ነብስ ይማር ማለትን ልማድ ላደረገ ማኅበረሰብ ምን ያህል ፈታኝ እንደሆነ በቀላሉ መገንዘብ ይቻላል፡፡

በመሆኑም ይኼንን ክፉ ጊዜ ለማለፍ ሁላችንም መፍትሔ ናቸው የተባሉትን መንገዶች በመተግበር ራሳችንንም ሆነ ማኅበረሰባችንን ከወረርሽኙ መጠበቅ ይገባናል፡፡ በተለያዩ የመገናኛ ብዙኃን በተደጋጋሚ የሚመከሩትን ምክሮች መቀበሉም አንዱ የመፍትሔ አቅጣጫ ነው፡፡ ይሁንና ከሰሞኑ በአገራችን በተለያዩ ዕቅዳዊና ድንገታዊ አጋጣሚዎች ማኅበረሰባችንን ለቫይረሱ ይበልጥ ተጋላጭ ያደረጉ ሁነቶች ዛሬ እየተከፈለ ያለውንና በመጪዎቹ ወራት የምንከፍላቸው የሕይወት ዋጋዎች ማሳያ ናቸው፡፡ የድምፃዊ ሃጫሉ ሁንዴሳን ሕልፈት ተከትሎ በአገራችን አንዳንድ አካባቢዎች በተፈጠረው ግርግር የነበረው መዘናጋት፣ የድምፃዊውን አስክሬን በመሸኘት ሒደት ውስጥ የነበረው አካላዊ ንክኪና መቀራረብ የቅርብ ጊዜ ትውስታዎች ናቸው፡፡ በዚህም ሳያበቃ ሐምሌ 26 ቀን 2012 ዓ.ም. በአገር አቀፍ ደረጃ በተለያዩ ቦታዎች የተደረገው የችግኝ መትከል ሥነ ሥርዓት በዕለቱ ‹‹ድምፃችን ለግድባችን›› በሚል መፈክር ከነበረው ድርብ ፕሮግራም ጋር ልጓሙን በበጠሰ ስሜታዊነት ጥንቃቄ በጎደለው ሁኔታ በከተማችን የተደረገው ትዕይንተ ሕዝብ ተጨማሪ የሕይወት ዋጋ በማስከፈል መጪውን ጊዜ ብርሃን አልባ እንዳያደርጉብን እሠጋለሁ፡፡

በዚህ አያያዛችን ከቀጠልን የኮሮና ቫይረስ ከጤና ችግርም በላይ ጥብቅ የሆነውን ማኅበራዊ መስተጋብራችንን በመናድ ትናንት በየቤታችን እየተጠራራን፣ እየተገባበዝን በአንድ ገበታ ተጎራርሰን እንዳልተመገብን ዛሬ በጥርጣሬ የጎሪጥ እንድንተያይ፣ መንፈሳዊ ሰብዕናችንን በመሸርሸር ተጠራጣሪዎችና እምነት አልባዎች እንድንሆን፣ በአገራችን ህልውናዊ  ጥያቄዎች ላይ አንድ እንዳንሆን፣ እንድንከፋፈልና እንድንለያይ በማድረግ እየፈጠረ ያለው አሉታዊ ተፅዕኖና እያስከተለብን ያለው ማኅበራዊ ቀውስ ምን ያህል ሊጎዳን እንደሚችል አስባችሁታል? የእናንተን አላውቅም እኔ ግን ፈራሁ፡፡

ከአዘጋጁ፡- ጽሑፉ የጸሐፊውን አመለካከት ብቻ የሚያንፀባርቅ መሆኑን እንገልጻለን፡፡

spot_imgspot_img
- Advertisment -

በብዛት የተነበቡ ፅሁፎች

Related Articles