Monday, February 6, 2023

አገር አቀፍ ምርጫ ዘንድሮ እንዲካሄድና ቦርዱ ዝግጅት እንዲጀምር ተወሰነ

- Advertisement -spot_img

በብዛት የተነበቡ

በኮሮና ወረርሽኝ ምክንያት በ2012 ዓ.ም. ሳይካሄድ የቀረው አገር አቀፍ ምርጫ፣ ዘንድሮ እንዲካሄድ የሕዝብ ተወካዮች ምክር ቤት ወሰነ፡፡

የሕዝብ ተወካዮች ምክር ቤት ባለፈው ሳምንት ከጤና ሚኒስቴር በቀረበለት ምክረ ሐሳብ ዝርዝር ምርመራ አድርጎ የውሳኔ ሐሳብ እንዲያቀርብለት ለሕፃናት፣ ወጣቶችና ማኅበራዊ ጉዳዮች ኮሚቴ በዋናነት እንዲሁም ለሕግ፣ ፍትሕና ዴሞክራሲ ጉዳዮች ቋሚ ኮሚቴ በተባባሪነት መምራቱ ይታወሳል፡፡

በዚህ መሠረት ቋሚ ኮሚቴዎቹ በጋራ ያዘጋጁትን ምክረ ሐሳብ፣ ማክሰኞ መስከረም 12 ቀን 2013 ዓ.ም. ለምክር ቤቱ አቅርበዋል፡፡ ባቀረቡት ምክረ ሐሳብም የኮሮና ወረርሽኝ አገራዊ የጤና ሥጋት ቢሆንም፣ ቀደም ሲል ከነበሩ ትንበያዎች አንፃር በመንግሥት በተደረገ ጥረት ከፍተኛ ባለመሆኑ፣ የዓለም የጤና ድርጅት በተነበየው መሠረት ወረርሽኙ ወደፊትም በዓለም ደረጃ ሊቆይ የሚችል ስለሆነና በአገር አቀፍ ደረጃ የቫይረሱን ሥርጭት ለመከካል የተፈጠረው አቅም ያደገ በመሆኑ ምርጫው በ2013 ዓ.ም. በጥንቃቄ እንዲካሄድ ብለዋል፡፡

በመሆኑም የኮሮና ወረርሽኝን ለመከላከል ከግምት ውስጥ ያስገባ የሥነ ምግባር ደንብና ማስፈጸሚያ መመርያ ብሔራዊ ምርጫ ቦርድ አዘጋጅቶ ወደ ትግበራ መግባት የሚያስችለው ሁኔታ ስለመኖሩ፣ ከጤና ሚኒስቴር ምክረ ሐሳብ መረዳት በመቻሉ በዚህ መሠረት ምርጫው እንዲፈጸም ቋሚ ኮሚቴዎቹ የውሳኔ ሐሳብ አቅርበዋል፡፡

በዚህ መነሻ ብሔራዊ ምርጫ ቦርድ አስፈላጊውን የመከላከል ዕርምጃ እየወሰደና ተገቢውን የምርጫ ቅድመ ዝግጅት እንዲያደርግ፣ እንዲሁም ለዚሁ የሚረዳውን የምክር አገልግሎት ከጤና ሚኒስቴርና ከኢትዮጵያ ኅብረተሰብ ኢንስቲትዩት በመውሰድና በጋራ በመሥራት የ2013 ዓ.ም. ምርጫ ለማካሄድ ሥራውን እንዲጀምር ምክረ ሐሳብ አቅርበዋል፡፡

ምክር ቤቱ የቀረበለትን የውሳኔ ሐሳብ በአንድ ተቃውሞ በስምንት ድምፀ ተዓቅቦ በአብላጫ ድምፅ አፅድቆታል፡፡ በነሐሴ 2012 ዓ.ም. ሊካሄድ የነበረው አገር አቀፍ ምርጫ በፌዴሬሽን ምክር ቤት የሕገ መንግሥት ትርጉም ውሳኔ ከመራዘሙ አስቀድሞ፣ ምርጫ ቦርድ ወረርሽኙ ባለበት ሁኔታ ውስጥ ምርጫ እንዲካሄድ ሁለት የምርጫ አካሄድ ቢሆኖች ለሕገ መንግሥት አጣሪ ጉባዔ አስረድቶ ነበር፡፡

በወቅቱም ሁለት ቢሆኖችን አቅርቦ የነበረ ሲሆን፣ ሁለተኛው ቢሆን የኮሮና ወረርሽኝ በኢትዮጵያ የሚቀጥልና ቦርዱ በተለያዩ ገደቦች ሥር ሆኖ ምርጫውን እንዲያካሂድ በውስን የምርጫ በጀቱ በ2.5 ቢሊዮን ብር እንደሚጨምር፣ ነገር ግን ምርጫውን በጥንቃቄ ማካሄድ እንደሚችል አስታውቆ ነበር፡፡

በወቅቱ እወስዳቸዋለሁ ካላቸው ጥንቃቄ የተሞላባቸው የምርጫ ሒደቶች መካከል፣ የመራጮች ምዝገባ በአንድ ምርጫ ጣቢያ ብቻ 1,000 ሰው እንዲመዘገብ ማድረግ አንዱ ነው፡፡

ይህንን ሲያደርግም የምርጫ ጣቢያዎች ቁጥር ቀድሞ ከተያዘው በአሥር ሺሕ ሊጨምር እንደሚችል፣ ለእነዚህ ተጨማሪ አሥር ሺሕ ምርጫ ጣቢያዎች ከ30 ሺሕ በላይ የምርጫ አስፈጻሚዎች እንደሚያስፈልጉ ገልጾ ነበር፡፡

ለድምፅ መስጫው ቀን ከሚያስፈልጉ አምስት ምርጫ አስፈጻሚዎች በተጨማሪ ሁለት የጤና ጥንቃቄ አስፈጻሚዎችና ሠልፍ ተቆጣጣሪ ሠራተኞች የሚያስፈልጉ ስለሆነ፣ በተጨማሪነት ከሚሳተፉት አሥር ሺሕ የምርጫ ጣቢያዎች ጋር በአጠቃላይ 420 ሺሕ የምርጫ አስፈጻሚዎች እንደሚያስፈልጉት መግለጹ ይታወሳል፡፡

spot_img
- Advertisement -

ትኩስ ጽሑፎች

ተዛማጅ ጽሑፎች

- Advertisement -
- Advertisement -