Sunday, June 23, 2024
- ማስታወቂያ -
- ማስታወቂያ -

አዋሽ ባንክ አዲሶቹን የብር ኖቶች ለሁሉም ቅርንጫፎቹ ማድረሱን አስታወቀ

spot_img

ተዛማጅ ፅሁፎች

በአሁኑ ወቅት በሥራ ላይ ካሉ የግል ባንኮች መካከል በቀዳሚነት የሚቀመጠው አዋሽ ባንክ፣ የብር ኖት ለውጡን ከ99 በመቶ በላይ ቅርንጫፎቹ ማዳረስ መቻሉንና ብሔራዊ ባንክ የተረከበውን ከአራት ቢሊዮን ብር በላይ አዲስ የብር ኖት ማሠራጨቱን አስታወቀ፡፡ ባንኩ የብር ኖት ለውጡን በተመለከተ እያከናወነ ስላለው ሥራና ባንኩ ከሰሞኑ ውሳኔ ላይ በደረሰባቸው ጉዳዮች ላይ በሰጠው መግለጫ አዲሱን የብር ኖት ባንኩ ካለው 473 ቅርንጫፎቹ ውስጥ 470 በሚሆኑት ማድረስ መቻሉንም አስታውቋል፡፡

ይህም ማለት ባንኩ ካሉት ቅርንጫፎች 99.4 በመቶ በሚሆኑት አዲሱን የባንክ ኖት በመቀየር ላይ መሆኑን የገለጹት የባንኩ ዋና ሥራ አስፈጻሚ አቶ ፀሐይ ሽፈራው፣ እስካሁንም ከኢትዮጵያ ብሔራዊ ባንክ የተረከበውን ከ4.07 ቢሊዮን ብር በላይ አዲሱን የብር ኖት በማስታወስ ባንኩ ከብሔራዊ ባንክ በሰጠው ኃላፊነት ለሌሎች ባንኮችም አዲሱን ኖት አሠራጭቷል፡፡

በሁሉም የአገሪቱ ክፍሎች ባሉት ቅርንጫፎቹ ከማሠራጨት ባሻገር ከብሔራዊ ባንክ የተረከበውን አዳዲስ የብር ኖቶችን ለሌሎች የግል ባንኮችም አሠራጭቷል፤››  ያሉት ዋና ሥራ አስፈጻሚው በዚህም መሠረት ከብሔራዊ ባንክ ከተረከበው 4.07 ቢሊዮን ብር ውስጥ 2.13 ቢሊዮን ብር አዳዲስ የብር ኖቶችን አሠራጭቷል፡፡

እንዲህ የለውን ኃላፊነትም በአዲስ አበባ፣ በአዳማ፣ በሐረር፣ በሻሸመኔ፣ በጅማና በነቀመቴ ከተሞች ባሉት ስድስት ኢሹ ቅርንጫፎቹ በመታገዝ አገልግሎቱን በአጭር ጊዜ ውስጥ በፍጥነት ሊያዳርስ ችሏል ተብሏል፡፡ አዋሽ ባንክ የብር ኖት ለውጡን ተከትሎ የኢትዮጵያ ብሔራዊ ባንክ ባወጣው መመርያ መሠረት የአዳዲሶቹ የብር ኖቶች ቅያሪ መስከረም 6 ቀን 2013 ዓ.ም. በአዲስ አበባ በሚገኙ ቅርንጫፎቹ በመጀመር፣ የመጀመርያው የግል ባንክ እንደነበርም ገልጸዋል፡፡ መግለጫው እስከተሰጠበት መስከረም 15 ቀን 2013 ዓ.ም. ድረስ አዳዲሶቹ የብር ኖቶች ያልደረሳቸው በምዕራብ ቀጣና ጽሕፈት ቤት ስር የሚኙ ሙጊ፣ ከማሺ እና ኖሌ ካባ ብቻ መሆናቸውን ያስታወሱት አቶ ፀሐይ፣ ለእነሱም ዓርብ መስከረም 15 ቀን 2013 ዓ.ም. ይደርሳቸዋል ብለዋል፡፡ ይህም ባንኩ በዚህ የገንዘብ ለውጥ ሒደት በከፍተኛ ሁኔታ መንቀሳቀሱን ያሳያል ተብሏል፡፡

የዚህ የብር ኖት ለውጥ የባንኮች ተቀማጭ ገንዘብ መጠንን እያሳደገ ስለመሆኑ በዚህ በአጭር ጊዜ የተስተዋለ ስለመሆኑም አስረድተዋል፡፡ እንደ አቶ ፀሐይ ገለጻ በብር ኖቱ ለውጥ ሒደት መመርያ መሠረት ገንዘብ ለመለወጥ የሚቀርብ ደንበኛ አዳዲስ አካውንቶችን በመክፈት በባንክ የተቀማጭ ገንዘብ መጠን ከቀዳሚው ጊዜ በተለይ ከፍ ስለማለቱም አስታውሰዋል፡፡ በዚህ የገንዘብ መቀየር ሒደት እንደ ሥጋት የሚታየው የፎርጅድ ገንዘብን ተቆጣጥሮ የመለየት ሥራ ትኩረት ተሰጥቶት እየተሠራ መሆኑንም አመልክተዋል፡፡

የብር ኖቱ ለውጥ  ከተጀመረ ወዲህ ባንካቸው ፎርጅድ ብር ኖትን የመለየቱ ሥራ በአግባቡ እየተከናወነ በመሆኑ ከፎርጅድ ብር ጋር ተያይዞ የገጠማቸው ነገር ባይኖርም፣ በየዕለቱ ግን የሁለት መቶ ሦስት መቶ ፎርጅድ የብር ኖቶች ሊያጋጥም ይችላል፡፡ ሆኖም እነዚህን ፎርጅድ ብቻ ለሚመለከተው አካል ሪፖርት እያደረጉ ከመሆን ውጪ ይህንን ያህል የጎላ ችግር እንዳላጋጠመ ጠቁመዋል፡፡

የብር ኖት ለውጡ ኢኮኖሚያዊ ጠቀሜታው ከፍተኛ ስለመሆኑ ያስረዱት ዋና ሥራ አስፈጻሚው፣ በተለይ የባንክ ኢንዱስትሪው ዘርፍ በጎ አስተዋጽኦ ይኖረዋል ብለዋል፡፡

በአቶ ፀሐይ የዓርቡ መግለጫ ይፋ ያደረጉት ሌላው ጉዳይ ደግሞ የባንኩ ዳይሬክተሮች ቦርድ ውሳኔ ላይ ደረስንበት ያሉትን የገንዘብ ድግፍ ነው፡፡ አዋሽ ባንክ ምንም እንኳን ለትርፍ የተቋቋመ የግል ፋይናንስ ተቋም ቢሆንም አገራዊ ማኅበራዊ ግዴታውን በመወጣትም በግንባር ቀደምትነት የሚጠቀስ መሆኑን ያመለከቱት አቶ ፀሐይ፣ ቦርዳቸው አሁን ደረሰበት ያሉት ውሳኔ በጠቅላይ ሚኒስትሩ ይፋ የተደረገውና በኦሮሚያ በወንጪ ሐይቅ፣ በአማራ በጎርጎራና በደቡብ ክልል በኮይሻ ለመሥራት ለተቀረጸው የገበታ ለአገር ፕሮጀክት 30 ሚሊዮን ብር ማበርከቱ ነው፡፡ ይህ ድጋፍ ለእያንዳንዱ ፕሮጀክት አሥር አሥር ሚሊዮን ብር እንዲደርስ ያስችላል፡፡

ባንኩ ይህንን ዕርምጃ የወሰደው በሁሉም ክልሎች ያለውን ተቀባይነት የበለጠ ለማገዝና በየትኛውም የአገሪቱ ክፍል ለማካሄድ የልማት ፕሮግራም አጋር መሆኑን ለማሳየት ጭምር ነው ተብሏል፡፡

ከዚህም ሌላ ባለፈው ዓመት በአዲስ አበባ ከተማ አስተዳደር ተቀርጾ ተግባራዊ ለሆነው ለተማሪዎች የመማሪያ ቁሳቁሶችን የማሟላት ሥራን በሰፊው ደግፏል፣ ዘንድሮም ለተማሪዎች ምገባ ፕሮግራምና ለትምህርት ግብዓቶች ማሟያ የብር ሦስት ሚሊዮን የገንዘብ ድጋፍ ማድጉንም አስታውቀዋል፡፡

እንዲህ ያለው የማኅበራዊ ኃላፊነት ለተለያዩ ፕሮጀክቶች ያከናወነ ሲሆን፣ በቅርቡ የመጀመርያውን ምዕራፍ የውኃ ሙሌት በድል መጠናቀቅን በማስመልከትና ለቀሪው የግድቡ ግንባታ አለኝታነቱን ለመግለጽ በብር 25 ሚሊዮን የቦንድ ግዥን በምሳሌነት ጠቅሰዋል፡፡ ‹‹ለሸገር ማስዋብ ፕሮጀክትም የብር 15 ሚሊዮን የገንዘብ ድጋፍ በማድረግ አሻራውን አኑሯል፣ ላለፉት ሁለት ዓመታት ለጠቅላይ ሚኒስትሩ አረንጓዴ አሻራ ጥሪ ምላሽ ለመስጠት ከፍተኛ በጀት በመመደብ የችግኝ ተከላ መርሐ ግብር አከናውኗል፤›› ብለዋል፡፡ እንቦጭን ለማስወገድ የአሥር ሚሊዮን ብር ድግፍ የኮሮና ቫይረስን የሚያደርሰውን ተፅዕኖ ለመቋቋምና ለቅድመ ጥንቃቄ ሥራ በብሔራዊ ደረጃ ለተቋቋመው የብሔራዊ የኮሮና መከላከል ኮሚቴ የብር አሥር ሚሊዮን የገንዘብ ድጋፍ አድርጓል፣ በአገር አቀፍ ደረጃ በጠቅላይ ሚኒስትሩ በተላለፈው የማዕድ መጋራት ጥሪም ከፍተኛ የገንዘብ ድጋፍ አበርክቷል ያሉት አቶ ፀሐይ፣ ባንካቸው እንዲህ ባለው በጎ ተግባራት የሚሰጠው ድጋፍ ለአገር ድጋፍና ዜጎችንም ተጠቃማ እንዲሆኑ በማሰብ ጭምር ነው፡፡

አዋሽ ባንክ በተለያዩ ጊዜያት በመንግሥት ዕውቅናና ምሥጋና የተቸረው መሆኑን በማስታወስም ከአገሪቱ ከሚንቀሳቀሱ ከፍተኛ የግብር ከፋዮች ተርታ የተሠለፈ መሆኑን በስታወስም በ2012 በጀት ዓመት ብቻ ከ1.3 ቢሊዮን ብር በላይ ግብር ከፍሏል፡፡ በዚህ አፈጻጸም የዓመቱ ታማኝና ከፍተኛ ግብር ከፋይ በመባል በፕላቲኒየም ደረጃ በጠቅላይ ሚኒስትር ዓብይ አህመድ (ዶ/ር) የዕውቅና ሽልማት ተበርክቶለታል፤›› ብለዋል፡፡

አዋሽ ባንክ በኢንዱስትሪው ውስጥ 26 ዓመታትን የዘለቀና ከ1983 ዓ.ም. ወዲህ የመጀመርያው የግል ባንክ በመሆን ሥራ የጀመረ ነው፡፡

በ2012 በጀት ዓመት ከታክስ በፊት ከ4.3 ቢሊዮን ብር በላይ በማትረፍ ከ16ቱ የግል ባንኮች ከፍተኛ የሚባለውን ትርፍ በሒሳብ ዓመቱ ያገኘ ነው፡፡ ባንኩ አጠቃላይ ዓመት ከ76 ቢሊዮን ብር በላይ የደረሰ ሲሆን በዚህም ከግል ባንኮች ከፍተኛ የሀብት መጠን የያዘ ባንክ ያደርገዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች