Sunday, June 16, 2024
- Advertisement -
- Advertisement -

ልናገርየጅምላ ግድያና የአገራችን ዕጣ ፈንታ

የጅምላ ግድያና የአገራችን ዕጣ ፈንታ

ቀን:

በአርዓያ ጌታሁን ተክለአቢብ

በኦሮሚያ ክልል በቡራዩ ያሟሸዉ ፍጅት በጥቅምት 2012 ዓ.ም. የ87 ሰዎችን ሕይወት ቀጥፎ በመጨረሻም በሰኔ ወር የድምፃዊ ሃጫሉ ሁንዴሳን ግድያ ተከትሎ እጅግ ዘግናኝና መጠነ ሰፊ ዕልቂት ሲያስከትል አስተውለናል። ይህንን እየተደጋገመ፣ እያደገና እየተስፋፋ የመጣ ጉዳይ ከምንጩ ማድረቅ እስካልተቻለ ድረስ ነገ በምን ደረጃ ጎልብቶ ዕልቂት ሊያመጣ እንደሚችል ከወዲሁ መገመት ከባድ ላይሆን ይችላል። ህሊና ላለው ሰው በብሔር፣ በሃይማኖትና ሌሎች ነገሮችን መሠረት በማድረግ በንፁኃን ዜጎች ላይ የሚደርስ ጭፍጨፋና ለዓመታት የተፈራን ንብረት በሰዓታት ዉስጥ ሲወድም እንደማየት የሚሰቀጥጥ ድርጊት አለ ብዬ አላምንም። ማንኛውም ኢትዮጵያዊ በአገሩ በምድሩ ላይ በየትኛውም ክልል የመኖርና ንብረት የማፍራት መብቱ ተነፍጎት መፈናቀሉ አልበቃ ብሎ፣ ወደ ጭፍጨፋና ንብረት ወደ ማውደም መሸጋገሩ እንዲሁ በደፈናው “አሳዛኝ” ነው በሚል ወይም በማውገዝ ብቻ የሚታለፍ ጉዳይ አይደለም።  

እነዚህ ከቅርብ ጊዜ ወዲህ የሚፈጸሙት የጅምላ ግድያዎች (Mass killings) ታልመውና የተወሰነ የኅብረተሰብ ክፍል ላይ ያነጣጠሩ (በብሔርና በሃይማኖት) እንደሆኑ በስፋት እየተዘገበ ይገኛል። ይህ ደግሞ የዘር ማጥፋት ወንጀል (Genocide) ወደሚል አንድምታ ያመራል። በእርግጥ እስከማውቀው ድረስ በገለልተኛ አጣሪ ተመርምሮ “የዘር ማጥፋት” ወንጀል ተፈጽሟል በሚል ድምዳሜ ላይ የተደረሰበት የጅምላ ጭፍጨፋ የለም። ያም ሆነ ይህ ቢያንስ በ2012 ዓ.ም.  በሰኔ ወር ላይ የድምፃዊ ሃጫሉን ሞት ተከትሎ የተፈጸመው የጅምላ ግድያ በዘፈቀደ የተደረገ ሳይሆን፣ ስም ዝርዝር ተይዞ በማንነታቸው ብቻ ተመርጠው በቤታውዉ ውስጥ እንዳሉ ንፁኃን ግለሰቦች የግድያ ሰለባ እንደተደረጉ ከተለያየ አቅጣጫ ያጣሩ ሰዎች ምስክርነታቸውን ሰጥተዋል። በመንግሥት መዋቅር ውስጥ በኃላፊነት ደረጃ የሚገኙ አንዳንድ ግለሰቦችም ይህንኑ አረጋግጠዋል።

- Advertisement -

ሁሉም የዘር ማጥፋት ወንጀሎች የጅምላ ግድያዎች ናቸው። ሁሉም የጅምላ ግድያዎች ግን የዘር ማጥፋት ወንጀሎች ናቸው ማለት አይቻልም። በጥቅሉ ጅምላ ግድያ ከፍተኛ ቁጥር ባላቸውና በውጊያ ላይ ያልተሰማሩ ሰዎች ላይ የሚፈጸም ግድያ ነው። ምን ያህል ቁጥር ያለዉ ሰው ሲገደልና አፈጻጸሙስ በምን ያህል ጊዜ ዉስጥ ሲከናወን ነው ጅምላ ግድያ ተብሎ የሚፈረጀው የሚለው ነጥብ ላይ ለመድረስ አንድ ወጥ የሆነ ስምምነት ላይ መድረስ አዳጋች ሊሆን ይችላል።

የዘር ማጥፋት ወንጀል በመንግሥት የሚፈጸም ሲሆን የጥቃቱ ሰለባ የሚሆኑት በዘር (Race)፣ በብሔር (Ethinicity)፣ በሃይማኖት (Religion) ወይም በቋንቋ (Language) የተሳሰሩ ሰዎች ናቸው። ከፍተኛ ጥላቻ የሚንፀባረቅበትና ፍጹም ጭካኔ የተሞላበት ጭፍጨፋ ስለሆነ በእጅጉ የተወገዘ ነው። አፍሪካን ጨምሮ ዓለማችን በርካታ የዘር ማጥፋት ወንጀሎችን አስተናግዳለች። ለምሳሌ ናዚ ጀርመን በአይሁዶች ላይ፣ የቦስኒያ ሰርቦች በቦስኒያ ሙስሊሞች ላይ፣ የሱዳን መንግሥት በዳርፉር ላይ፣ ሩዋንዳ በቱትሲዎች ላይ … የዘር ማጥፋት ወንጀሎች ተፈጽመዋል። የዘር ማጥፋት ወንጀል ዓለም አቀፍ ወንጀል እንደ መሆኑ መጠን የትም አገር ቢፈጸም በዓለም አቀፍ ሕግ መሠረት በሌላ አገር ሊታይና ሊዳኝ ይችላል።

ይህ በእንዲህ እያለ ከዘር ማጥፋት ወንጀል በተጓዳኝ ፖሊቲሳይድ (Politicide)፣ ዴሞሳይድ (Democide) እና ክላሲሳይድ (Classicide) የሚባሉ የጅምላ ግድያ ዓይነቶች አሉ። ፖሊቲሳይድ (Politicide) የሚባለዉ እንደተለመደው የሆኑ ቡድኖች የሚገደሉበት ሆኖ በዘር ማጥፋት ኮንቬንሽን (Genocide Convention) ድንጋጌ ዉስጥ የማይሸፈን ሲሆን ነው። እንዲህ ዓይነት ግድያዎች የሚፈጸሙት በመንግሥት አካል ሆኖ የፖለቲካ ይዘት አላቸው። ዴሞሳይድ (Democide) በመንግሥት ወይም ከፍተኛ ሥልጣን ባለው አካል ሆን ተብሎ በሚሰጥ ትዕዛዝ ባልታጠቁ ወይም ትጥቅ በፈቱ ግለሰቦች ላይ የሚፈጸም ግድያ ነው። የዚህ ዓይነት አገዳደል ከፍርድ አካላት ውጭ ባሉ ተቋማት/አካላት በሚሰጥ ትዕዛዝ የሚፈጸም ግድያን (Extrajudicial Summary Killings) ስለሚጠቀልል በአገራችን በተለምዶ 60ዎቹ እየተባሉ በሚጠሩት የአፄ ኃይለ ሥላሴ ባለሥልጣናት ላይ የተፈጸመውን የጅምላ ግድያ ይጨምራል። በመጨረሻም ክላሲሳይድ (Classicide) ሆን ተብሎና ሥልታዊ በሆነ መንገድ የአንድ መደብ (Social Class) አካል የሆኑ ሰዎች ላይ በከፊል ወይም በሙሉ ለመደምሰስ የሚፈጸም የጅምላ ግድያ ዓይነት ነው። ለምሳሌ በቻይናና በሰሜን ቬትናም በመሬት ከበርቴዎች ላይ የተወሰደውን ዓይነት የግድያ ዕርምጃ  ማለት ነው።

ለጅምላ ግድያ የሚሰጡት የተለያዩ ስያሜዎች የክፋቱን ደረጃና የጉዳቱን መጠን ለማስቀመጥ ካልሆነ በስተቀር፣ የድርጊቱን ፈጻሚዎች የጥፋት ደረጃ ከማቅለል ጋር የሚያያዝ አይደለም። ምንም ዓይነት ስያሜ ይሰጠው የጅምላ ግድያ በሰው ልጅ ላይ ሊፈጸም የሚችል እጅግ የከፋና የሚሰቀጥጥ ወንጀል መሆኑ አያጠያይቅም። ከሁሉም በላይ የዘር ማጥፋት ወንጀል የበለጠ የከፋና መጠነ ሰፊ በመሆኑ በየትም አገር ዳግም ሊከሰት የማይገባ ፍጹም አረመኔያዊ ድርጊት ነዉ።

የጅምላ ግድያ በምንም መንገድ እንደ ሌላ ወንጀል አጥፊዎችን በመቅጣት ብቻ የሚቆም አይደለም። በሌሎች አገሮች እንደታየው እያደገና እየተስፋፋ የሚመጣ ጉዳይ ነው። ስለሆነም ጉዳዩን ቀለል አድርጎ በማየት እንደ ተራ የብሶት መገለጫ አድርጎ በመቁጠር ወይም ከዚህ ብሔር ይህንን ያህል ሰዎች፣ ከዚያ ብሔር ደግሞ ያንን ያህል ሰዎች ናቸው የሞቱት በሚል እንደ ሒሳብ ሕግ “ማጣፋት” የሚመስል ትንታኔ መስጠት አንድም የችግሩን ጥልቀት ያለመረዳት፣ ወይም የራስን ብሔር ከጅምላ ተጠያቂነት ለማዳን የሚደረግ ርብርብ ከመሆን ባሻገር ወደፊት ተባብሶ ሊመጣ የሚችለውን ችግር ከመፍታት አኳያ የሚፈይደው አለ ብዬ አላምንም። ስለሆነም  ቆም ብሎ የጥንስሱ መጀመሪያ ላይ አበክሮ በመሥራት ችግሩን ከሥሩ ነቅሎ መጣልን ይጠይቃል። አለበለዚያ ግን “ራስን መከላከል” በሚል ዘይቤ ወይም “በሰይጣናዊ የብቀላ መንፈስ በመሞላት” ወይም ደግሞ በአሁኑ ጊዜ እንደምናየው በቄሮ (ወይም ኦነግን አምላኪዎች) ላይ የተዘራው ክፉ ሐሳብ የዛሬ ተበዳዮችም ላይ በተመሳሳይ እንዲዘራ ቢደረግ፣ ማንም በቀላሉ ሊያቆመው በማይችል ደረጃ ፍጅትን እንዳያስከትል ሥጋት አለኝ። በእርግጥ ከእግዚአብሔር ምሕረት ቀጥሎ ኢትዮጵያዊ ጨዋነት እዚያ ደረጃ እንደማያደርሰን እምነት አለኝ። የሆነው ሆኖ ለግንዛቤ እንዲረዳ የቡሩንዲንና የሩዋንዳን ልምድ እንደ ምሳሌ ማንሳቱ ጠቃሚ ይመስለኛል። በዚያዉም የጅምላ ግድያ በታሪክ ሒደት ዉስጥ ምን ያህል እንደ ሰንሰለት እንደሚያያዝና ከጊዜ ወደ ጊዜ እንዴት እየተስፋፋና እየከፋ እንደሚሄድ መረዳት ያስችላል።

ሩዋንዳና ቡሩንዲ ተመሳሳይ ብሔር/ጎሣ ያላቸው እንደ መንትያ ሊቆጠሩ የሚችሉ ሁለት ጎረቤት አገሮች ናቸው። ሁለቱም አገሮች ውስጥ የሚገኙት ብሔረሰቦች ሁቱ፣ ቱትሲና ኢዋ ናቸው። ከሁሉም በላይ የሚያስደንቀው የብሔር ስብጥሩም ተመሳሳይ ይዘት አለው። ማለትም ሁቱ ከ85 እስከ 86 በመቶ፣ ቱትሲ ከ14 እስከ 13 በመቶ፣ እንዲሁም ኢዋ አንድ በመቶ ናቸው። በሁለቱም አገሮች ተመሳሳይ ቋንቋ ይነገርባቸዋል። ሁለቱም አገሮች በተለያዩ ጊዜያት የዘር ማጥፋት ጭፍጨፋ አስተናግደዋል። እንዲሁም ሁለቱም አገሮች ውስጥ በሚያጋጥም ቀውስ ምክንያት እጅግ ከፍተኛ ቁጥር ያላቸው ዜጎች ወደ ጎረቤት አገሮች ለስደት ተዳርገዋል።

በቡሩንዲ ከተፈጸሙ የዘር ማጥፋት ወንጀሎች መካከል እ.ኤ.አ. የ1972 እና የ1993  ተጠቃሾች ናቸው። በ1972 በቱትሲ የበላይነት የሚመራው ጦርና መንግሥት በአገሪቱ  በሚኖሩ ሁቱዎች ላይ ዘር ማጥፋት ፈጽሟል። በዚህ ጭፍጨፋ ያለቁ ሰዎች ከ100,000 እስከ 150,000 ሲገመቱ አንዳንዶች ግን እስከ 300,000 ድረስ ያደርሱታል። እንዲሁም በ1993 ቱትሲዎች ከፍተኛ ቁጥር ባላቸው ሁቱዎች ተጨፍጭፈዋል። ይህንንም ክስተት የዓለም አቀፍ አጣሪ  ኮሚሽን (International Commission of Inquiry) የዘር ማጥፋት ነው ሲል ፈርጆታል።

ሩዋንዳ ለዓመታት ከፍተኛ በሆነ የጎሳ ውጥረት ውስጥ አልፋለች። ብዙዎችም ለስደት ተዳርገዋል። በርካታ ግድያዎችንም አስተናግዳለች። በመጨረሻም እ.ኤ.አ. 1994 ለሰው ልጆች ህሊና እጅግ የሚከብድና ዘግናኝ የሆነ የዘር ማጥፋት ለመከሰት በቅቷል። በ100 ቀናት ውስጥም 800,000 ቱትሲዎች በሁቱዎች ተጨፍጭፈዋል። በእርግጥ ከተገደሉት ውስጥ ለዘብተኛ ሁቱዎችና የኢዋ ጎሳ አባላትም ይገኙበታል። የሆነው ሆኖ ይህን ጭፍጨፋ በስፋት ያካሄደው በወቅቱ የገዥው ፓርቲ (MRND) የወጣት ክንፍ የነበረውና በሒደት ወደ ሚሊሺያ የተቀየረው ኢንተራሃምዌ (Interahamwe) ይባል የነበረው ነው።

በማንነት ላይ ተመሥርቶ የሚደረግ እንቅስቃሴ ተፈጥሮዓዊ የሆነውን የሰው ልጅ ምክንያታዊነትና ሚዛናዊነትን ስለሚያጠፋ በዚያ መንፈስ ሆነው ወደ ማጥቃት በሚሸጋገሩበት ጊዜ የአውሬነት ባህሪ ይላበሳሉ። ስለዚህም ነው ለማውራትና ለመጻፍ በሚከብድ ሁኔታ ክቡር የሆነውን የሰው ልጅ አካል እስከ መቆራረጥ ደረጃ በሩዋንዳ ዕልቂትም ሆነ በእኛም አገር እስከ መከሰት የደረሰው።

በእንደዚህ ጊዜ የእምነት ተቋማት ድርጊቱን ማውገዝና የማዳን ተግባር መፈጸም ይጠበቅባቸዋል። በሩዋንዳ የሆነው ግን በተቃራኒው ነው። እንደ እ.ኤ.አ. 1999 ሂዩማን ራይት ዎች ዘገባ በዚህ ፍጅት ላይ የእምነት ተቋማት እጃቸው እንደነበረበት ተረጋግጧል። ለዚህም የኢንታሃማ ቤተ ክርስቲያን (Ntarama Church) ተጠቃሽ ነው። እ.ኤ.አ. ሚያዚያ 15 ቀን 1994 በዚህ ቤተ ክርስቲያን ተጠልለዉ የነበሩ 5,000 ቱትሲዎች በቆንጨራ፣ በእጅ ቦምብ፣ በመሣሪያና ከእነ ሕይወታቸዉ በማቃጠል በጅምላ ተጨፍጭፈዋል። በወቅቱ የካቶሊክ ቤተ ክርስቲያን የነበረው ይህ ተቋም በአሁኑ ጊዜ ወደ መታሰቢያነት ተቀይሯል። እንደ ምንሰማው የእኛ አገር የእምነት ተቋማት ግን ከጥቃት ላመለጡ ሰዎች መጠጊያ በመሆን የዕርዳታ እጃቸውን ዘርግተውላቸዋል። በዚህም ሊመሠገኑና በርቱ ሊባሉ ይገባል። በእርግጥ አንዳንድ እምነታቸውን በጎሰኝነት የለወጡና ህሊናቸውን ለጥቅም ካስገዙ የኢትዮጵያ ኦርቶዶክስ ተዋህዶ ቤተ ክርስቲያን አባቶች መካከል “ … ሰዎቹ የተገደሉት ለእየሱስ ሲሉ ሳይሆን ምኒሊክን እያሉ ነው … ” እስከ ማለት የደረሱ አሳፋሪዎችም ይገኙበታል።  

ትናንትና የተፈጸመው ዓይነት ጭፍጨፋ እንዳይደገም በሩዋንዳ ጠንከር ያሉ ሥራዎች ተሠርተዋል። ከእነዚህም መካከል መታወቂያ ላይ ብሔር እንዳይጻፍ ተደርጓል። ከዚያም በላይ ስለብሔር ማውራት በራሱ ሕገወጥ ነው። በዚህ አቋም ላይ አንዳንዶች መንግሥትን ደም መፋሰስ እንዳይኖር በማሰብ የተደረገ ነው በማለት ሲደግፉት፣ ሌሎች ደግሞ ይህ ዓይነት አካሄድ እውነተኛ ዕርቅን እንደሚገታና በራሱ ሌላ ውጥረት በመፍጠር ወደፊት ሌላ ዕልቂት እንዳያቀጣጥል ሥጋታቸውን ይገልጻሉ።

የሆነው ሆኖ የሩዋንዳ ዕልቂት ከሩብ ዓመት በላይ ያስቆጠረ ቢሆንም፣ ዛሬም ድረስ ስለተፈጸመው ሰቆቃ በተለያየ መንገድ መዘገቡ አልቀረም። አሁንም ፊልሞች፣ ዶክመንተሪዎች፣ የምርምር ጽሑፎች፣ ወዘተ በመሠራት ላይ ናቸው። በዚህም የአጥፊዎች ስም ይጠቀሳል፣ የጭካኔውና የግፉ መጠን ይወሳል፣ ልጆች በልጅነት አዕምሮዋቸውን በቤተሰቦቻቸው ላይ ሲፈጸም ያዩትን ይጽፋሉ፣ ይተርካሉ፡፡ ይህ ሁሉ ሲሆን ያንን ሰቆቃ የፈጸሙትና በሕይወት ያሉትም ጭምር ያ አጸያፊ ታሪካቸው ሲነገር፣ ሲተረክና ሲወገዝ ለማየትና ለመስማት በቅተዋል። ምን ስሜት ሊፈጥርባቸው እንደሚችል ማንም ሰው መገመት ይችላል። ለምሳሌ ያህል አንድ ሰው መጥቀስ እፈልጋለሁ።   

ሰላስቲን ሃብንሹቲ ይባላል። አንምሪ እማምና የተባለች የጎረቤቱን ሁለት ልጆች በቆንጨራ በጭካኔ ገድሎባታል። እሱም አምኗል። እናም በዚህና በሌሎች ሰዎች ላይ በፈጸመው ግድያ ምክንያት አሥር ዓመት ተፈርዶበት እስሩን ጨርሶ ወጥቷል። ይህ ግለሰብ በአንድ ወቅት ቢቢሲ ባዘጋጀው ዶክመንተሪ ፊልም ላይ ቀርቦ፣ “ … ልጆች ኃጢያት የሌለባቸው መላዕክት ናቸው። የእነሱ መሞት ኢፍትሐዊ ሲሆን በወቅቱ የነበረው አይዶሎጂና መጥፎ አመራር ውጤት ነዉ። እናም እነዚህ ልጆች ፍትሕ ተነፍጓቸዋል። እኔም ራሴን እንድጠላና በኃፍረት ለመሸማቀቅ ተዳርጌአለሁ … ” በማለት ፀፀት በሚያሰቃየው የሰለለ ድምፅ ገልጿል። ምንም እንኳን ግለሰቡ ጥፋቱን አምኖ ከዕልቂቱ የተረፉትን ሰዎች እየዞረ ይቅርታ መጠየቁን ቢናገርም፣ ተበዳዮችን ባየ ቁጥር እየተሳቀቀ ፊቱን ሸፍኖ እንደሚያልፍና ራሱን እንደ ጨካኝ ገዳይ እንደሚቆጥር አልደበቀም። በሌላም በኩል ውድ ልጆቿን የገደለባት እማምና ይህንን አረመኔ ግለሰብ ሠፈር ዉስጥ ባየችው ቁጥር ልቧ እንደሚመታ፣ መላ ሰውነቷን ቅዝቃዜ እንደሚሰማትና እንደሚያንዘፈዝፋት በማልቀስ ገልጻለች። በዚያ ብቻ አልተወሰነችም። እሷንም እንደ ልጆቿ አንድ ቀን  ይገድለኛል በሚል ፍራቻ ውስጥ እንደምትገኝ ልብ በሚነካ ስሜት ተናግራለች። በነገራችን ላይ እማምና በዚህ አረመኔ የተገደሉባትን ጨምሮ አራት ልጆቿና ባለቤቷ በዓይኗ እያየች የታረዱባት ምስኪን ሴት ነች።  

ወደ አገራችን ስንመጣ በፖለቲከኞችና “አክቲቪስት” ነን ባዮች በሚፈጸም ትርክትና እኩይ ቅስቀሳ ተገፋፍተው ንፁኃን ሰዎችን ጭካኔ በተሞላበት ሁኔታ የሚገድሉና ንብረት የሚያወድሙ ሰዎች ቆም ብለዉ ሊያስቡ ይገባል። ዛሬን ያመለጡ ቢኖሩም ወደፊት አንድ ቀን በሕግ መጠየቃቸው አይቀርም። ከዚያም በላይ የፈሰሰው የንፁኃን ደም እንደ ሰላስቲን ዕድሜያቸውን በሙሉ እየተከተለ ሰላም እንደሚነሳቸው አያጠራጠርም። ያኔ ከጀርባ ሆነው የሚቀሰቅሱዋቸውና በውሸት ትርክት የሚሞሏቸው ሰዎች አንዳቸውም ከጎናቸው ሆነው ለማፅናናት አይበቁም። እንዲያውም ፊታቸውን አዙረው በተቃራኒ ጎን እንደሚቆሙ ከመሰል የታሪክ ፍሰት መረዳት ይቻላል።

ጊዜ ዛሬ ብቻ አይደለም። ትናንትም ሆነ ነገ በጊዜ ባቡር ውስጥ ነው ያሉት። ዛሬ ላይ ሆኖ ጊዜው የእኛ ነው በሚል ዕብሪት የሚፈጸም ወንጀል ነገ ሌላ ገጽታ እንደሚኖረው አያጠራጥርም። ዛሬ በቄሮ ስም የሚፈጸመው የጅምላ ግድያ፣ ሰውን ከቀየው ማፈናቀል፣ የንፁኃን ንብረት ማውደም፣ ዝርፊያ፣ ወዘተ ነገ ላይ ሲደረስ እንደ ዛሬዉ የሚያስፎክር፣ የሚያኩራራና ደረትን ገልብጦ የሚያስኬድ ተግባር ሆኖ አይዘልቅም። ዛሬ “ቄሮ” ነኝ እያለ የሚኩራራ ሰው ነገ በቄሮነቱ አፍሮ ራሱን ለመደበቅ ሲሯሯጥ ቢገኝ አይገርምም። ትናንት በጊዜያቸው አይነኬ የነበሩት ግዙፎቹ የደርግ አባላት ምን እንደ ደረሰባቸዉ ዓይተናል። በቅርቡም ወያኔ ላይ የደረሰውን ዓይተናል። ብዙዎቻችን አንድ ጉዳይ ለመጨረስ በቢሮክራሲ ውጣ ውረድ ስንላጋ ባለጊዜዎቹ የ“ጊዜውን ቋንቋ” በመናገራቸው ብቻ ያልጠየቁትንም ጭምር ሲፈጸምላቸው ስንታዘብ ኖረናል። ትናንትና ሲኩራሩበትና የተዘጋን ኬላ ያስከፍት የነበረ “ቋንቋ” ዛሬ ግን በአደባባይ ተናግረው ማንነታቸው እንዳይታወቅ ሲውተረተሩ ቢታዩ አያስደንቅም። ምክንያቱም የጊዜ ጉዳይ ነው። ትናንት ሌላ ዛሬ ሌላ …

“አክቲቪስት” በሚል ሽፋን አንዱን ሕዝብ ከሌላው ለማጫረስ የሚደረጉ ንግግሮችና ጽሑፎች ነገ ተጠያቂነት ማስከተላቸው አይቀርም። በመሠረቱ አክቲቪስቶች የሕዝብን ጉዳይ ወደ አደባባይ ይዘው በመውጣት ታግለው የሚያታግሉ፣ ራሳቸዉን ለመስዋዕትነት የሚያስቀድሙ፣ ቆራጥና ሚዛናዊነት የሚንፀባረቅባቸው ሀቀኛና የመርህ ሰዎች ይመስሉኝ ነበር። የእኛ አገር አክቲቪስቶች ግን ከጥቂቶች በስተቀር መሥፈርቱን የሚያሟሉ አይደሉም። የሚያነሱት ጉዳይ ከሕዝብ የመነጨ አይደለም። ግራ ቀኙን በማየት የሰውን ቀልብ በመሳብ ተከታይ እናፈራበታለን የሚሉትን አጀንዳ ነው ሕዝቡ ላይ የሚጭኑት። አንዳንዶቹማ በግል ሕይወታቸው የተሸንፉበትንና በራሳቸው ድክመት አልሳካ ያላቸውን ጉዳይ ወደ አደባባይ በማምጣት የሕዝብ አጀንዳ ለማስመሰል ሲውተረተሩ ይታያሉ። ውሸትማ ዋና መሣሪያቸው ነው። መተጣጠፍንና ማስመሰልን በእጅጉ ተክነውበታል። በዚያ ላይ ኃላፊነት ስለማይሰማቸው የሚያደርጉት ንግግርም ሆነ ጽሑፍ ስለሚያስከትለው ጉዳት  መጨነቅ አይፈልጉም። ከሁሉም የሚያሳዝነኝ እነሱን ተከትለው ለጥፋት የሚሰማሩት ናቸው። እርስ በርሱ የሚጋጭና ወጥነት የጎደለዉ አካሄድ ሲከተሉ እንኳን ትናንትና እንደዚህ ስትሉ ወይም ስታደርጉ አልነበረም ወይ በማለት አለመጠየቃቸው ይገርመኛል። ለማንኛውም ሁሉንም ልቦና ይስጣቸው ከማለት በስተቀር ምን ማለት ይቻላል?! እግዚአብሔር ኢትዮጵያን ይጠብቃት!

ከአዘጋጁ፡- ጽሑፉ የጸሐፊውን አመለካከት ብቻ የሚያንፀባርቅ መሆኑን እየገለጽን፣ በኢሜይል አድራሻቸው [email protected] ማግኘት ይቻላል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የምግብ ዋጋ ንረት አጣዳፊ ዕርምጃ ያስፈልገዋል!

መንግሥት የሚቀጥለውን ዓመት በጀት ይዞ ሲቀርብ በአንገብጋቢነት ከሚነሱ ጉዳዮች...

ከባለአንድ ዋልታ ወደ ባለብዙ ዋልታ የዓለም ሥርዓት የመሸጋገራችን እውነታ

በአብዱ ሻሎ አንገት ማስገቢያ እ.ኤ.አ. በፌብሩዋሪ 2022 የሩሲያ መንግሥት በዩክሬን ‹‹ልዩ...

የኢትዮጵያ ኦርቶዶክስ ተዋሕዶ ቤተ ክርስቲያን የውጭ ግንኙነት የሺሕ ዘመናት ታሪኳና እሴቶቿን የሚመጥን መሆን ይኖርበታል

(ክፍል አንድ) በተረፈ ወርቁ (ዲ/ን) እንደ መንደርደሪያ ለዛሬው የግል ትዝብቴንና ታሪክን ላዛነቀው...

ከአገር ግንባታ ጋር የተያያዙ ወሳኝ የቅርብ ታሪካችን አንጓዎች

በታደሰ ሻንቆ በአያሌው የተመረጡና ልጥ የሌላቸው ነጥቦች የተደራጁበት ይህ ታሪክ...