Saturday, June 15, 2024
- ማስታወቂያ -
- ማስታወቂያ -

በንግድ ባንክ ለሚካሄደው የመዋቅር ጥናት ከተወዳደሩ 40 የውጭ ኩባንያዎች አራቱ ለመጨረሻው ዙር አለፉ

spot_img

ተዛማጅ ፅሁፎች

የኢትዮጵያ ንግድ ባንክን እንደ አዲስ ለማዋቀር የሚያስችለውን ዝርዝር ጥናትና አዲስ አደረጃጀት ለማዘጋጀት በወጣው ዓለም አቀፍ ጨረታ መሠረት ለውድድር ከቀረቡት 40 ኩባንያዎች ውስጥ፣ የመጨረሻዎቹ አራት ኩባንያዎች መለየታቸው ታወቀ፡፡ አሸናፊው ኩባንያ ከሳምንት በኋላ ይፋ እንደሚደረግ ተገልጿል፡፡

በዓለም አቀፍ ደረጃ በፋይናንስ ተቋማት አማካሪነታቸው የሚታወቁ ኩባያዎችን በመጋበዝ ለጨረታ ባወጣው ጥሪ መሠረት፣ እስከ ጨረታው መዝጊያ ድረስ 40 ኩባንያዎች የጨረታ ሰነዶችን አስገብተው ነበር፡፡ ከተጫራቾቹ ውስጥ ለመጨረሻው ዙር ውድድር አራት ኩባንዎች መለየታቸውን የሪፖርተር ምንጮች አስታውቀዋል፡፡

ንግድ ባንክን ሥር ነቀል በሆነና በአዲስ አደረጃጀት መልሶ እንዲዋቀር የሚያስችለውን ጥናት ለማካሄድ ከአራቱ ኩባንያዎች አሸናፊውን በመለየት ሥራውን ለመስጠት የንግድ ባንክ ዳይሬክተሮች ቦርድ በአንድ ሳምንት ጊዜ ውስጥ ውሳኔ ያሳልፋል ተብሎ እንደሚጠበቅ የሪፖርተር ምንጮች ገልጸዋል፡፡   

ምንጮች ለመጨረሻ ውድድር የቀሩትን አራት ኩባንያዎች ማንነት ከመግለጽ ቢቆጠቡም፣ ኩባንያዎቹ በዓለም አቀፍ ደረጃ የሚንቀሳቀሱ የፋይናንስ ተቋማት በማማከርና ጥናት በማካሄድ የሚታወቁ ስለመሆናቸው ጠቅሰዋል፡፡ የኩባያዎቹን መረጃዎችና የጨረታ ውጤታቸውን በመመልከት አሸናፊው ኩባንያ በባንኩ ቦርድ ተለይቶ በመጪው ሳምንት ይፋ እንደሚደረግ ይጠበቃል፡፡

የአገሪቱን ብሎም ዓለም አቀፍ የጨረታ ሕጎችን መሠረት የሚያደርገው የጨረታ ሒደት፣ አሸናፊው ማሸነፉ ከተገለጸለት በኋላ በሚሰጠው ቀነ ገደብ ውስጥ በጨረታው አሸናፊ የሆነበትን የሥራ ዝርዝር አዘጋጅቶ በማቅረብ ሥራውን እንደሚጀምር ተጠቅሷል፡፡ የንግድ ባንክን የእስከዛሬ ጉዞና ያሉበትን ችግሮች በመፈተሽ የሚታዩበትን ችግሮች ተንትኖ ማሳወቅ ከአማካሪ ኩባንያው የሚጠበቀው ሥራ ነው፡፡ በዚህ መነሻም ንግድ ባንክ በአዲስ አደረጃጀት እንደሚዋቀር ይጠበቃል፡፡ ሥር ነቀል ለውጥ ለማምጣት ታልሞ የኢትዮጵያ ንግድ ባንክ እንደ አዲስ ለማደራጀት የሚሠራው ሥራ የባንኩን የእስከዛሬ ችግሮች ለመቅረፍ ያስችላል ተብሎ እንደታመነበትም እየተነገረ ነው፡፡

አዲሱ አደረጃጀት በአገር ውስጥ ብቻ ሳይሆን፣ በዓለም አቀፍ ደረጃ ባንኩን ተወዳዳሪ በሚያደርግ መልኩ አደረጃጀቱን መቅረፅ የሚኖርበት ሲሆን፣ አዲሱን አደረጃጀት ለመተግበር የባንኩ ዳይሬክተሮች ቦርድና ለዚሁ ሥራ ባንኩ ያቋቋመው ኮሚቴ ካፀደቁ በኋላ የመጨረሻው ውሳኔ በመንግሥት የሚሰጥበት ይሆናል፡፡ የኢትዮጵያ ንግድ ባንክ በአሁኑ ወቅት አጠቃላይ እሴቱ አንድ ትሪሊየን የደረሰና ከአገሪቱ የባንክ ገበያ ከ60 በመቶ በላይ የሚሆን በመያዝ መንግሥታዊ ተቋም ነው፡፡  

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች