Thursday, February 2, 2023
- ማስታወቂያ -
- ማስታወቂያ -

ንግድ ባንክ ‹‹ገበታ ለአገር›› ፕሮጀክቶች የ1.1 ቢሊዮን ብር ድጋፍ አበረከተ 

- ማስታወቂያ -

ተዛማጅ ፅሁፎች

እስካሁን የፋይናንስ ተቋማቱ ከ1.5 ቢሊዮን ብር በላይ መዋጮ አበርክተዋል

የኢትዮጵያ ንግድ ባንክ ‹‹ገበታ ለአገር›› ለተሰኘውና ለሦስት ፕሮጀክቶች ማስፈጸሚያ የሚውል የ1.1 ቢሊዮን ብር ድጋፍ አበረከተ፡፡ እስካሁን ከተሰጡ ድጋፎች ከፍተኛው ሆኖ ተመዝግቧል፡፡

የንግድ ባንክ አመራሮችና ሠራተኞች ያበረከቱትን የ1.1 ቢሊዮን ብር የገንዘብ ድጋፍ፣ የባንኩ ፕሬዚዳንት አቶ አቤ ሳኖ፣ የቦርድ ሰብሳቢ አቶ ተክለወልድ አጥናፉና የባንኩ የሠራተኞች ማኅበር አቶ ኦላኒ ሳቀታ በተገኙበት ለጠቅላይ ሚኒስትር ዓብይ አህመድ (ዶ/ር) በቼክ አስረክበዋል፡፡

ባንኩ የሰጠው የገንዘብ ድጋፍ የባንኩ ቦርድ ማኔጅመንትና ሠራተኞች ለፕሮጀክቱ ይዋል ብለው የሰጡትን የሚያጠቃልል ነው፡፡

የጎርጎራ፣ ወንጂና ኮይሻን ፕሮጀክቶች ለማልማት ጠቅላይ ሚኒስትር ዓብይ (ዶ/ር) ባደረጉት ጥሪ መሠረት የፕሮጀክቶችን ጠቀሜታ ታሳቢ በማድረግ የተሰጠ ስለመሆኑ ተገልጿል፡፡

የባንኩ ቦርድ ማኔጅመንትና ሠራተኞች ለዚህ ከፍተኛ መጠን ላለው ድጋፍ ጠቅላይ ሚኒስትሩ ምሥጋናቸውን አቅርበዋል፡፡ ድጋፍ በተሰጠበት ወቅት የባንኩ ዳይሬክተሮች ቦርድ ሰብሳቢ አቶ ተክለወልድ አጥናፉ፣ ጠቅላይ ሚኒስትሩ ላቀረቡት ጥሪ የ‹‹ገበታ ለአገር›› ፕሮጀክት የልማት ጥሪ የኢትዮጵያ ንግድ ባንክ ቀዳሚውን ድርሻ ወስዶ ምላሽ መስጠቱ ከአንድ ትልቅ የፋይናንስ ተቋም የሚጠበቅ ነው ማለታቸውን ባንኩ ባሠራጨው መረጃ አመልክቷል፡፡

አቶ አቤ ሳኖም ለእነዚህ ፕሮጀክቶች ለቀረበው ጥሪ ባንኩን የሚመጥን ዕገዛ ማድረግ መቻላቸውን ጠቁመው ‹‹ትልቅ ኩራት ይሰማናል›› ማለታቸው ተገልጿል፡፡ የባንኩ መሠረታዊ ሠራተኞች ማኅበር ፕሬዚዳንትም አቶ ኦላኒ ሰቀታ በተመሳሳይ ለአገራዊ ልማት ጥሪ የባንኩ ሠራተኞች የራሳቸውን አሻራ ማሳረፋቸው ደስታ የሚፈጥር መሆኑን አመላክተዋል፡፡

የኢትዮጵያ ንግድ ባንክ ከዚህ ቀደምም ለሸገር ፕሮጀክት ያበረከተውን የግማሽ ቢሊዮን ብር ድጋፍ የሚያስታውሰው የባንኩ መረጃ፣ የገበታ ለአገር ፕሮጀክት ሲጠናቀቅ ቱሪዝምን ከማስፋፋትና ገጽታን ከመገንባት ባሻገር ለነዋሪዎች ምቹ አካባቢን ከመፍጠር አኳያ ትልቅ ፋይዳ እንዳለው በማመን ጭምር የገንዘብ ድጋፍ መደረጉንም ጠቅሷል፡፡

በገበታ ለአገር ሥር ያሉትን ሦስት ፕሮጀክቶችን ለማልማት ጥሪ ከተላለፈ ወዲህ የፋይናንስ ተቋማት የገንዘብ ድጋፍ ጎልቶ እየታየ ሲሆን፣ እስካሁን ከግል የፋይናንስ ተቋማት አዋሽና ዳሸን ባንክ እያንዳንዳቸው 30 ሚሊዮን ብር በመለገስ ቀዳሚውን ድርሻ ሲይዙ፣ እስካሁን ከግል የፋይናንስ ተቋማት ድጋፍ ያደረጉ 12  ባንኮች፣ የኢንሹራንስ ኩባንያዎች፣ እንዲሁም የኢትዮጵያ ልማት ባንክና መድን ድርጅት የሰጡትን ጨምሮ የፋይናንስ ተቋማቱ የሰጡት ድጋፍ ከ1.5 ቢሊዮን ብር በላይ እንደደረሰ መረጃዎች ያሳያሉ፡፡

ገበታ ለአገር ፕሮጀክት በአማራ ክልል ለቱሪስት መስህብ የሆነውንና የጣና ሐይቅ አብዛኛውን ክፍሉን የሚያዳርሰውን የጎሮጎራ አካባቢ፣ በደቡብ ክልል የኮይሻ ጥብቅ ደን መገኛ በሆነውና የጨበራ ጩርጩራ ብሔራዊ ፓርክ የሚገኝበትን አካባቢ፣ እንዲሁም በኦሮሚያ የወንጪ ወንዝ የሚገኝበትን አካባቢ ማዕከል ያደረጉ የቱሪዝም ማስፋፊያ ሥራዎችን ለማካሄድ በጠቅላይ ሚኒስትሩ፣ የአምስትና የአሥር ሚሊዮን ብር ዋጋ ያላቸው የራት ፕሮግራሞችን ጨምሮ ልዩ ልዩ የድጋፍ ጥሪዎች መደረጋቸው ይታወሳል፡፡

በታላቁ ቤተ መንግሥት ውስጥ የአንድነት ፓርክን ጨምሮ፣ በሸገር ወንድማማቾች ፓርክ እንዲሁም በእንጦጦ ተራራ ላይ የተገነባው የእንጦጦ ፓርክ በተመሳሳይ መንገድ በሕዝብና በተለያዩ ድርጅቶች ድጋፍ መገንባታቸው ይታወቃል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች