Monday, June 24, 2024
- ማስታወቂያ -
- ማስታወቂያ -

አማራ ባንክ መሥራች ጉባዔውን በውክልና ሊያካሂድ ነው

spot_img

ተዛማጅ ፅሁፎች

የባለአክሲዮኖቹ ቁጥር ከ155 ሺሕ በላይ መድረሱን አስታውቋል

በምሥረታ ላይ የሚገኘው አማራ ባንክ አክሲዮን ማኅበር፣ የምሥረታ ጉባዔውን በውክልና ለማካሄድ መወሰኑን፣ እንዲሁም ባለአክሲዮኖች ለ34 አደራጆች ውክልና እንዲሰጡ ጠየቀ፡፡

የባንኩ አደራጅ ቦርድ ሊቀመንበር አቶ መላኩ ፈንታ ሐሙስ ጥቅምት 26 ቀን 2013 ዓ.ም. በሰጡት መግለጫ፣ ቁጥራቸው ከ155 ሺሕ በላይ የደረሰው ባለአክሲዮኖችን በአንዴ ለመሰብሰብ ስለማይቻል፣ የምሥረታ ጠቅላላ ጉባዔን በውክልና እንዲያካሄድ መወሰናቸውን ገልጸዋል፡፡ ለዚህም አስፈላጊ ሁኔታዎች መመቻቸታቸውን አስታውቀዋል፡፡

ባንኩ የአክሲዮን ሽያጩን እስከ ሚያዝያ 7 ቀን 2012 ዓ.ም. ድረስ በማካሄድ፣ የመሥራቾች ጠቅላላ ጉባዔ ሚያዝያ 24 ቀን 2012 ዓ.ም. ለማካሄድ የሚያስችለውን ዝግጅት አጠናቆ የነበረ መሆኑን ያስታወሱ አቶ መላኩ፣ የኮሮና ወረርሽኝን ለመከላከል የአስቸኳይ ጊዜ አዋጅ ወጥቶ፣ ማንኛውም ስብሰባ እንዳይካሄድ ክልከላ በመደረጉ ጉባዔውን ሊያካሄድ እንዳልቻለ አክለዋል፡፡

መሥራች ጠቅላላ ጉባዔ ለማከናወን የሚያስችል ሁኔታ እስኪፈጠርና ከመንግሥት ተለዋጭ ውሳኔ እስከሚሰጥ ድረስ ባንኩ፣ የባንክ ሥራ ፈቃድ አግኝቶ ወደ ሥራ ለመግባት የሚያስችሉት የቅድመ ሥራዎች የተከናወነ መሆኑን፣ አሁን ባለው ሁኔታ ግን ባንኩን ወደ ሥራ ለማስገባት የምሥረታ ጉባዔውን በውክልና ለማካሄድ ጥሪ አቅርቧል፡፡

ጉባዔውን በውክልና ለማካሄድ በተለይም ውክልና ለመስጠት በሕግ ሥልጣን ከተሰጠው የሰነዶች ምዝገባና ማረጋገጫ ኤጀንሲ የሥራ ኃላፊዎች ጋር በተደረገው መግባባት በአንፃራዊነት ቀልጣፋ፣ ምቹና አስተማማኝ በሆነ መንገድ ሥራ ለመጀመር የሚያስችል ሆኖ በመገኘቱ በውክልና ጉባዔውን ያካሂዳል፡፡

በመሆኑም ከአማራ ባንክ አደራጆች ውጪ በራሳቸው ለመረጡት ሰው ውክልና የሚሰጡ ባለአክሲዮኖች፣ ምርጫና በራሳቸው በመሥራች ጉባዔው ላይ ለመገኘት የሚወስኑ፣ እንዲሁም ከፍተኛ አክሲዮን የገዙና የተቋምና የማኅበራት ባለአክሲዮኖች መብት እንደተጠበቀ መሆኑም ተገልጿል፡፡ መመርያው ካስቀመጠው የተሰብሳቢ ቁጥር ገደብ አንፃር መሥራች ባለአክሲዮኖች አደራጆችን ቢወክሉ፣ ጉባዔ ለማካሄድ የሚያስችል እንደሚሆን በመታመኑ፣ ከኅዳር 1 ቀን 2013 ዓ.ም. ጀምሮ ለአንድ ወር ውክልና አሰጣጡ እንደሚካሄድ ተጠቁሟል፡፡ ይህንን ውክልናም ባለአክሲዮኖቹ እንደሚሰጡ አስረድተዋል፡፡

ለአማራ ባንክ አደራጆች ውክልና ለመስጠት ፈቃደኛ የሆኑ ባለአክሲዮኖች፣ የውክልና ሥልጣኑን የሚሰጡበትን አሠራርና የአፈጻጸም ሥርዓት ስለመዘጋጀቱ የገለጹት አቶ መላኩ፣ ከኅዳር 1 እስከ 30 ቀን 2013 ዓ.ም. በፌዴራል ሰነዶች ምዝገባ ኤጀንሲ፣ እንዲሁም በክልል ከተሞች በተመሳሳይ ሰነዶችና ማረጋገጫ ጽሕፈት ቤቶች በመገኘት ውክልናውን መስጠት ይቻላል ብለዋል፡፡

በምሥረታ ላይ ያለው አማራ ባንክ አ.ማ. የአክሲዮን ሽያጭ ከጀመረበት ከነሐሴ 11 ቀን 2011 ዓ.ም. ጀምሮ እስከ ጥቅምት ወር 2013 ዓ.ም. ድረስ ከ6.4 ቢሊዮን ብር በላይ የተፈረመ አክሲዮንና ከ4.8 ቢሊዮን ብር በላይ ደግሞ በጥሬ ገንዘብ የተከፈለ ካፒታል አክሲዮን የሸጠ መሆኑ ታውቋል፡፡ የመሥራች ባለአክሲዮኖቹ ቁጥርም ከ155,000 በላይ ደርሷል ተብሏል፡፡ በአገሪቱ የባንክ ምሥረታ በዚህን ያህል ደረጃ የመነሻ ካፒታልና የባለአክሲዮኖች ቁጥር የያዘ ባንክ አይታወቅም፡፡ የባንኩ የአክሲዮን ሽያጭ እስከ ኅዳር 21 ቀን 2013 ዓ.ም. የሚቀጥል በመሆኑ፣ የባንኩ የመነሻ ካፒታል ከዚህም በላይ ይሆናል ተብሎ ይጠበቃል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች