Sunday, March 26, 2023
- Advertisement -
- Advertisement -
ስፖርትየአኖካ ጠቅላላ ጉባዔ በዚህ ወር መጨረሻ በአዲስ አበባ ይካሄዳል

የአኖካ ጠቅላላ ጉባዔ በዚህ ወር መጨረሻ በአዲስ አበባ ይካሄዳል

ቀን:

  • የጠቅላይ ሚኒስትሩ ሽልማት የፕሮግራሙ አንድ አካል ተደርጓል
  • የቶኪዮ 2020 ኦሊምፒክ ዝግጅት ተጀመረ

የኢትዮጵያ ኦሊምፒክ ኮሚቴ ኅዳር 27 ቀን 2013 ዓ.ም. በአዲስ አበባ የሚያካሄደው የአፍሪካ ብሔራዊ ኦሊምፒክ ኮሚቴዎች ማኅበር (አኖካ) ጠቅላላ ጉባዔና የጠቅላይ ሚኒስትር ዓብይ አህመድ (ዶ/ር) ሽልማት እንዲሁም የቶኪዮ 2020 ዝግጅት በተመለከተ ከብሔራዊ ፌዴሬሽኖችና አሶሴሽኖች ጋር መከረ፡፡ የኢትዮጵያ ኦሊምፒክ ቡድን ለመጀመሪያ ጊዜ የኦሊምፒክ ጨዋታዎች ከሚጀመርበት ስምንት ወራት ቀድሞ ዝግጅት ጀምሯል፡፡

ብሔራዊ ኦሊምፒክ ኮሚቴው ባለፈው ዓርብ ኅዳር 4 ቀን ከስፖርት ኮሚሽን ጋር በጋራ በጽሕፈት ቤቱ በሰጠው ጋዜጣዊ መግለጫ፣ ኅዳር 27 ቀን በአዲስ አበባ ለሚካሔደው የአኖካ ጉባዔ እንዲሁም አኖካ ለጠቅላይ ሚኒስትር ዓብይ አህመድ ለሚሰጠው ሽልማት በፕሬዚዳንት ሳህለ ወርቅ ዘውዴ የሚመራ ብሔራዊ ዝግጅት ኮሚቴ ሥራውን በተሳካ መልኩ እያከናወነ ይገኛል፡፡

በኢትዮጵያ በሚካሄደው ከ300 በላይ እንግዶች፣ ከእያንዳንዱ አገር ሦስት ሦስት የልኡካን ቡድን ይሳተፋል ተብሏል፡፡ የዓለም አቀፍ ኦሊምፒክ ኮሚቴ አመራሮችን ጨምሮ አቻ ማኅበራትና ቁጥራቸው እስከ 50 የሚደርሱ የውጭ ሚዲያዎች በጉባዔው የሚታደሙ መሆኑ የብሔራዊ ኦሊምፒክ ኮሚቴ ፕሬዚዳንት አሸብር ወልደ ጊዮርጊስ (ዶ/ር) ተናግረዋል፡፡

በአዲስ አበባ የሚካሄደው የአኖካ ጠቅላላ ጉባዔ ዝግጅት የተሳካ፣ የኢትዮጵያን መልካም ገጽታ የሚያጎላ ይሆን ዘንድ ብሔራዊ ኦሊምፒክ ኮሚቴ ከመንግሥታዊና ሕዝባዊ አካሉ ማለትም ከብሔራዊ ፌዴሬሽኖችና አሶሴሽኖች ጋር የጋራ መድረክ በማመቻቸት መግባባት ላይ መደረሱን ጭምር ፕሬዚዳንቱ አስረድተዋል፡፡

አኖካ በአዲስ አበባ ሊከውነው ካሰበው ዝግጅት አንዱ ለጠቅላይ ሚኒስትር ዓብይ ያዘጋጀው የዕውቅና ሽልማት አንዱ ስለመሆኑም ተናግረዋል፡፡ ‹‹ዝግጅቱ በፕሬዚዳንት ሳህለ ወርቅ ዘውዴ እየተመራ በተሳካ መልኩ እየተጓዘ ነው፤›› ብለው ለዕቅዱ  ስኬት የክልልና የከተማ አስተዳደር አመራሮች በተለያዩ ኮሚቴዎች እንዲካተቱ ተደርጎ ሥራው በከፍተኛ ሁኔታ እየተከናወነ ስለመሆኑ ጭምር ተናግረዋል፡፡ የስፖርት ኮሚሽን አቶ ኤልያስ ሽኩር ይህንኑ በጋዜጣዊ መግለጫው አጠናክረዋል፡፡

የኢትዮጵያ ኦሊምፒክ ከሚቴ የአኖካ ጉባዔ ወደ አዲስ አበባ እንዲመጣ እንዲሁም ጠቅላይ ሚኒስትር ዓብይ የአኖካን ሽልማት እንዲያገኙ በማድረጉ ረገድ የሚያስመሰግነው ነው በማለት የተናገሩት የኢትዮጵያ አትሌቲክስ ፌዴሬሽን የጽሕፈት ቤት ኃላፊ አቶ ቢልልኝ መቆያን ጨምሮ በርካቶች ናቸው፡፡

ሌላው በመግለጫው የተነሳው የኢትዮጵያ ኦሊምፒክ ቡድን ለመጀመሪያ ጊዜ የኦሊምፒክ ጨዋታ ከሚጀመርበት ስምንት ወራት ቀድሞ እንዲጀመር መደረጉ ነው፡፡ የቶኪዮ 2020 ኦሊምፒክ በኮቪድ ምክንያት ተራዝሞ ‹‹ቶኪዮ 2020›› የሚለውን ስያሜ እንደያዘ ከሐምሌ16 እስከ ነሐሴ 2 ድረስ በጃፓኗ ቶኪዮ እንደሚካሔድ ይጠበቃል፡፡

ኢትዮጵያን የሚወክለው ቡድን ከመቼውም ጊዜ በተለየ ቀድሞ እንዲዘጋጅ ውሳኔ ላይ የተደረሰው፣ ጠቅላይ ሚኒስተር ዓብይ ለተሻለ ውጤት ትኩረት ተደርጎ አስቀድሞ ዝግጅት መጀመር እንዳለበት በሰጡት አቅጣጫ መሠረት መሆኑ ተገልጿል፡፡

እንደሚታወቀው በአሊምፒክ ጨዋታዎች ተሳትፎ አትሌቲክስ ተጠቃሽ ነው፡፡ ይሁን እንጅ በኮቪድ-19 ምክንያት አትሌቶች ከውድድር ውጪ መሆናቸውን ተከትሎ፣ የኢትዮጵያ ኦሊምፒክ ኮሚቴ አትሌቶቹ የአቋምና የብቃት ችግር እንዳይገጥማቸው ከዚህ በፊት ትልቁ የዝግጅት ጊዜ ሁለት ወር የነበረውን ዘንድሮ በልዩ ጥንቃቄ ወደ ስምንት ወር ከፍ እንዲል ማድረጉ በፌዴሬሽኑ ኃላፊዎች ተወድሷል፡፡

ከአትሌቲክስ ፌዴሬሽን በተጨማሪ በቶኪዮ 2020 ኦሊምፒክ የሚሳተፉ ብሔራዊ ፌደሬሽኖች ማለትም ብስክሌት ፌዴሬሽን፣ ወርልድ ቴኳንዶና ሌሎችም ብሔራዊ ኦሊምፒክ ኮሚቴው አሁን በጀመረው ዓይነት ከሕዝባዊ አካሉ ጋር በቅንጅት መሥራት ከቻለ በስፖርቱ በአጭር ጊዜ የሚፈለገው ውጤት ላይ መድረስ እንደሚቻል ተናግረዋል፡፡

‹‹ሕዝባችንና መንግሥታችን በቶኪዮ 2020 ኦሊምፒክ ውጤት ይጠብቃሉ፣ ለዚህ ደግሞ ጠንካራ ሥራ ከወዲሁ መሥራት ይጠይቃል፤›› ያሉት ፕሬዚዳንቱ ለቶኪዮ ኦሊምፒክ በአሁኑ ወቅት ከ100 በላይ ብሔራዊ አትሌቶች (በእያንዳንዱ ዲሲፕሊን ከ8 እስከ አሥር) በሆቴል ተይዘው ዝግጅት እንዲጀምሩ ተደርጓል ብለዋል፡፡ ጠቅላይ ሚኒስትር ዓብይም ለዝግጅቱ 45 ሚሊዮን ብር በልዩ ሁኔታ መለገሳቸውን፣ አትሌቶች በመረጡት ሆቴል ማለትም በጥሩነሽ ዲባባና አሰለፈች መርጊያ ሆቴል እንዲገቡ መደረጉንም ሳይጠቅሱ አላለፉም፡፡

ከአየር ጠባይ ጋር በተገናኘ፣ ለቶኪዮ ኦሊምፒክ ዝግጅት የተዋቀረው ብሔራዊ ዝግጅት ኮሚቴ በሚያቀርበው ምክረ ሐሳብ መሠረት፣ የቶኪዮ አየር ጠባይን ታሳቢ ያደረገ ዝግጅት እንደሚደረግ ያስረዱት ፕሬዚዳንቱ ለዚህም ሲባል እሳቸውን ጨምሮ የስፖርት ኮሚሽን አመራሮችና ሙያተኞች ዝቅተኛና ሞቃታማ ተብለው በሚጠቀሱ እንደ አፋርና የመሳሰሉት ቦታዎች ድረስ ሄደው የመስክ ምልከታ ማድረጋቸውን አስረድተዋል፡፡

በሌላ በኩል ከኮቪድ-19 ወረርሽኝ ጋር ተያይዞ ሊመጣ የሚችለው ችግር መከላከልና መቋቋም ይቻል ዘንድ፣ ብሔራዊ ኦሊምፒክ ኮሚቴው በዋናነት ጉዳዩ ከሚመለከተው ጤና ሚኒስቴር ጋር በቅንጅት ለመሥራት ማቀዱ ተነግሯል፡፡

የኢትዮጵያ ኦሊምፒክ ኮሚቴ ፕሬዚዳንት አሸብር ወልደጊዮርጊስ (ዶ/ር) ከጤና ሚኒስትሯ ሊያ ታደሰ (ዶ/ር) ጋር ኅዳር 3 ቀን 2013 ዓ.ም. በሚኒስቴሩ ተገናኝተው፣ በተለይ የስፖርት ሕክምና እንዲሁም ድጋፍ ማሰባሰብን የተመለከቱ ጉዳዮችን አንስተው መነጋገራቸው ታውቋል፡፡

የኦሊምፒክ ቡድን ዝግጅትን ጨምሮ ለአኖካ ጉባዔ ወደ አዲስ አበባ የሚገቡ እንግዶች በኮቪድ ምርመራ እንዲሁም በክትትሉ ከቡድኑ ጋር አብሮ የሚሆን ባለሙያ እንደሚያስፈልግና እስካሁን የተሠራውን ለሚኒስትሯ ያስረዱት አሸብር (ዶ/ር)፣ በዋናነት ክፍተት በሚስተዋልበት በስፖርት ሕክምና ላይ ብሔራዊ ኦሊምፒክ ኮሚቴ ከጤና ሚኒስቴር ጋር በጋራ ለመሥራት ፍላጎት እንዳለው አስገንዝበዋል፡፡

ሚኒስትሯ ሊያ ታደሰ (ዶ/ር) በበኩላቸው፣ ኮቪድን በተመለከተ ከቡድኑ ጋር የሚሠራ ባለሙያ በመመደብ የምርመራ ውጤቶችም በፍጥነት እንዲደርሱ ለማድረግ እንደሚሠራ መናገራቸው ኦሊምፒክ ኮሚቴው በመግለጫው አካቷል፡፡

ሚኒስትሯ ለአኖካ ስብሰባ ወደ ኢትዮጵያ የሚመጡ እንግዶች በልዩ ሁኔታ በፍጥነት ምርመራ ተደርጎ እንደሚስተናገዱ ማረጋገጫ መስጠታቸው፣ እንደ አገር ‹‹ያልሠራንበት ነው›› ባሉት የስፖርት ሕክምና ላይም ባለሙያዎችን የማብቃት ሥራ አብሮ ለመሥራት ዝግጁ መሆናቸውን አስረድተዋል፡፡

የገቢ አሰባሰብን በሚመለከት ሚኒስትሯ በአንድ ጊዜ ከአንድ ተቋም ከመሰብሰብ ይልቅ በየተቋማቱ ለሚገኙ ሚኒስቴሮችን ማካተት እንደሚያስፈልግ፣ የእሳቸው መሥሪያ ቤት በሥሩ ያሉ ተቋማት በቀጥታ የኦሊምፒክ ቡድኑ አባል በመሆን ድጋፍ እንዲያደርጉ የበኩላቸውን እንደሚወጡ ቃል መግባታቸው ጭምር ተነግሯል፡፡

በመጨረሻም ኢትዮጵያ በ2022 በምታስተናግደው የአኖካ የወጣቶች ኦሊምፒክ ዝግጅት የሚወክሏትን ወጣቶች ለማፍራት ይቻል ዘንድ የመላ ኢትዮጵያ ወጣቶች የኦሊምፒክ ጨዋታ በሲዳማ ክልል ለማዘጋጀት መወሰኑ ይታወቃል፡፡

ሁሉም ክልሎችና የከተማ አስተዳደሮች እንደሚሳተፉበት በሚጠበቀው በዚህ የወጣቶች ኦሊምፒክ፣ ክልሎችና የከተማ አስተዳደሮች እንዳለፉት ዓመታት ሜዳሊያን ብቻ ታሳቢ ያደረገ ተሳትፎ እንዳያደርጉ የኢትዮጵያ ኦሊምፒክ ኮሚቴና ክልሎች በጋራ ሊሠሩ እንደሚገባ የአሊምፒክ ኮሚቴው ፕሬዚዳንት አስገንዝበዋል፡፡

መንግሥት ቀደም ባሉት ዓመታት ፕሮጀክት በሚል ለሚቀርብለት ጥያቄ በሚሊዮን የሚቆጠር በጀት ሲያፈስ መቆየቱን ያስረዱት ፕሬዚዳንቱ፣ አሠራሩ በዕቅድና በፕሮግራም ባለመመራቱ ውጤት እንዳላስገኘ ተናግረው፣ ይህ አካሄድ ለአንዴና ለመጨረሻ ጊዜ ሕግና ሥርዓት ሊበጅለት እንደሚገባም ጠቁመዋል፡፡  

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ለፋይናንስ ዘርፉ ብቃት ያለው የሰው ኃይል የማፍራት የቤት ሥራን የማቃለል ጅማሮ

የአገሪቱ የፋይናንስ ዘርፍ እያደገ ለመሆኑ ከሚቀርቡ ማስረጃዎች ውስጥ  የግል...

የምድር ባቡርን የሚያነቃቃው የመንግሥት ውሳኔ

በኢትዮጵያ ወደብ አልባነት ላይ የተደመረውን የሎጀስቲክስ ችግር ለመፍታት ግዙፍ...

የፓርላማ አባላት ስለሰላም ስምምነቱ አፈጻጸም ግልጽ መረጃ የለንም አሉ

‹‹ሕወሓትን ለፍረጃ አብቅተውት የነበሩ ጉዳዮች በአብዛኛው መልክ ይዘዋል›› ሬድዋን...