Wednesday, February 28, 2024
- Advertisement -
- Advertisement -
ዜናአሜሪካና ጀርመን በኤርትራ ላይ የሮኬት ጥቃት መሰንዘሩን አወገዙ

አሜሪካና ጀርመን በኤርትራ ላይ የሮኬት ጥቃት መሰንዘሩን አወገዙ

ቀን:

የትግራይ ክልል በኤርትራ ዋና ከተማ አስመራ በሚገኘው አውሮፕላን ማረፊያ አካባቢ የሮኬት ጥቃት መሰንዘሩን፣ የአሜሪካና የጀርመን መንግሥታት አወገዙ።

የትግራይ ክልል ቅዳሜ ኅዳር 4 ቀን 2013 ዓ.ም. ምሽት በአስመራ ላይ የሮኬት ጥቃት መሰንዘሩን በይፋ ያስታወቀ ሲሆን፣ የኤርትራ ጦር ከኢትዮጵያ መከላከያ ሠራዊት ጋር በመሆን በትግራይ ላይ በተለያዩ ግንባሮች ጥቃት በመክፈቱ የተሰነዘረ የአፀፋ ጥቃት መሆኑንም አስታውቋል። 

የአሜሪካ የውጭ ጉዳይ መሥሪያ ቤት የአፍሪካ ጉዳዮች ኃላፊ ቲቦር ናዥ፣ የሮኬት ጥቃቱን በማውገዝ ቀዳሚ ናቸው። ‹‹ሕወሓት በኤርትራ ላይ የሰነዘረው ጥቃት ተቀባይነት የሌለውና በትግራይ ያለውን ግጭት ዓለም አቀፍ የማድረግ ሙከራ በመሆኑ፣ አሜሪካ አጥብቃ ታወግዛለች፤›› ሲሉ አውግዘዋል። 

- Advertisement -

Video from Enat Bank Youtube Channel.

አክለውም በትግራይ ያለው ግጭት ሰላማዊ ሰዎችን እንዳይጎዳ ጥንቃቄ እንዲደረግ፣ እንዲሁም ሁለቱም ወገኖች በትግራይ ያለውን የግጭት ውጥረት በማርገብ ወደ ሰላማዊ መፍትሔ እንዲመለሱ መንግሥታቸው በድጋሚ እንደሚያሳስብ ገልጸዋል። 

የጀርመን ውጭ ጉዳይ ሚኒስቴር ቃል አቀባይ ክሪስቶፈር ቡርገር በበኩላቸው፣ የትግራይ ክልልን የሚመራው ሕወሓት በአስመራ ላይ ጥቃት በመሰንዘር በትግራይ ያለውን ግጭት ለማስፋትና የጎረቤት አገሮችን ጎትቶ ለማስገባት ያደረገው ሙከራ እንደሆነ በመግለጽ አውግዘዋል።

ቃል አቀባዩ አክለው፣ ‹‹በአማራ ክልል በሚገኙ አውሮፕላን ማረፊያዎችና በኤርትራ የተፈጸሙ ሕወሓት ኃላፊነት የወሰደባቸውን ጥቃቶች ጀርመን አጥብቃ ታወግዛለች። በትግራይ ያለውን ሁኔታ ለማረጋጋትና መፍትሔ ለማበጀት ፖለቲካዊ ሒደት ያስፈልጋል፤›› ብለዋል። 

የትግራይ ክልል ርዕሰ መስተዳድር ደብረ ጽዮን ገብረ ሚካኤል (ዶ/ር) ወደ ኤርትራ ዋና ከተማ አስመራ ሮኬት መተኮሱን በይፋ አረጋግጠዋል፡፡ በምክንያትነትም የኤርትራ ጦር በተለያዩ ግንባሮች ከኢትዮጵያ መከላከያ ሠራዊት ጋር ተሠልፎ እያጠቃ መሆኑን ተናግረዋል። 

የኤርትራ ጦር ጣልቃ መግባቱን እስካላቆመ ድረስ ተጨማሪ ተመሳሳይ ጥቃቶች በኤርትራ ላይ እንደሚሰነዘሩም አስጠንቅቀዋል። 

የትግራይ ጦር ከኤርትራ በተጨማሪ በባህር ዳርና በጎንደር አውሮፕላን ማረፊያዎች ላይም ተመሳሳይ የሮኬት ጥቃት የፈጸመ ሲሆን፣ በዚህም መጠነኛ ጉዳት መድረሱን የፌዴራል መንግሥት አስታውቋል። 

ወደ ኤርትራ የተተኮሱት ሮኬቶች ያነጣጠሩት በአስመራ አውሮፕላን ማረፊያ ላይ እንደሆነ ቢገለጽም፣ በኤርትራ የሚገኘው የአሜሪካ ኤምባሲ በአውሮፕላን ማረፊያው ላይ ጉዳት መድረሱን የሚያመለክቱ ነገሮች እንደሌሉ፣ ነገር ግን ከአውሮፕላን ማረፊያው አቅራቢያ ፍንዳታዎች እንደነበሩ የሚገልጹ መረጃዎች መኖራቸውን በድረ ገጹ አስታውቋል። 

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

[ክቡር ሚኒስትሩ ወደ መኖሪያ ቤታቸው ሲገቡ ባለቤታቸው በቴሌቪዥን የሚተላለፈውን ዜና በመደነቅ እየተመለከቱ አገኟቸው]

እንዲያው የሚደንቅ ነው እኮ። ምኑ? ዜና ተብሎ በቴሌቪዥን የሚተላለፈው ነገር ነዋ፡፡ ምኑ...

በኦሮሚያ የሚፈጸሙ ግድያዎችና የተጠያቂነት መጥፋት

የካቲት 11 ቀን 2016 ዓ.ም. ቢሾፍቱ አቅራቢያ በሚገኘው የዝቋላ...

የኢትዮጵያ መዋዕለ ንዋይ ገበያ ከሚያስፈልገው ካፒታል ውስጥ 90 በመቶውን ሰበሰበ

እስካሁን 15 ባንኮች የመዋዕለ ንዋይ ገበያው ባለድርሻ ሆነዋል የኢትዮጵያ መዋዕለ...

አዲሱ የንብ ባንክ ቦርድ የባንኩን ካፒታል በአሥር ቢሊዮን ብር ለማሳደግ ማቀዱ ተሰማ

አዲሱ የንብ ኢንተርናሽናል ባንክ የዳይሬክተሮች ቦርድ የባንኩን ካፒታል በአሥር...