Tuesday, February 20, 2024
- Advertisement -
- Advertisement -
ዜናየፖለቲካ ፓርቲዎች የምርጫ ማስታወቂያ ቅስቀሳ በክፍያ ማስተላለፍ የሚችሉበት ረቂቅ መመርያ ለውይይት ቀረበ

የፖለቲካ ፓርቲዎች የምርጫ ማስታወቂያ ቅስቀሳ በክፍያ ማስተላለፍ የሚችሉበት ረቂቅ መመርያ ለውይይት ቀረበ

ቀን:

የፖለቲካ ፓርቲዎች ወይም ዕጩ ተወዳዳሪዎች በመገናኛ ብዙኃን በሚደረግ የምርጫ ቅስቀሳ ዘመቻ በክፍያ ማስተላለፍ እንደሚቻል የሚደነግግ ረቂቅ መመርያ፣ በኢትዮጵያ ብሔራዊ ምርጫ ቦርድና በኢትዮጵያ ብሮድካስት ባለሥልጣን አማካይነት ተዘጋጀ፡፡

በረቂቅ መመርያው ላይ የኢትዮጵያ ምርጫ ቦርድ ባለሥልጣን ከፖለቲካ ፓርቲ ተወካዮች፣ ከመገናኛ ብዙኃን እንዲሁም ከሚመለከታቸው አካላት ጋር ኅዳር 11 ቀን 2013 ዓ.ም. በሒልተን ሆቴል ለግብዓት የሚሆኑ ሐሳቦችን ለማስተናገድ ያለመ ውይይት ተካሂዷል፡፡

በረቂቅ መመርያው ማንኛውም የፖለቲካ ፓርቲ ወይም ዕጩ ተወዳዳሪ በመገናኛ ብዙኃን በሚደረግ የምርጫ ቅስቀሳ ዘመቻ ወቅት፣ የምርጫ ማስታወቂያ በክፍያ ማስተላለፍ እንደሚችል ይደነግጋል፡፡

- Advertisement -

Video from Enat Bank Youtube Channel.

በዚህም ገዥው ፓርቲ ብልፅግናን ጨምሮ የፖለቲካ ፓርቲዎች የተወጣጡ ተወካዮች በረቅቅ መመርያው ላይ ያላቸውን ሥጋት የገለጹ ሲሆን፣ ገዥው ፓርቲን ጨምሮ የገንዘብ አቅም ያላቸው ፓርቲዎች ተደራሽ የመሆን ዕድላቸው ከፍ ሊል ይችላል በማለትም ገልጸዋል፡፡

አብዛኛዎቹ የፖለቲካ ፓርቲዎች በተለያዩ የመገናኛ ብዙኃን ከፍሎ ለማስተዋወቅ የአቅም ውስንነት እንዳለባቸው በመግለጽ፣ የምርጫው ሒደት በፍትሐዊ መንገድ ተደራሽ እንዲሆን መመርያው በድጋሚ ቢታይ የሚል አስተያየት ሰንዝረዋል፡፡

ምርጫ ቅስቀሳ ዘመቻ ወቅት የምርጫ ማስታወቂያ በክፍያ አቅም ያለው ገዢው ፓርቲ በከፍተኛ ሁኔታ በሌሎች ፓርቲዎች ላይ ጫና ሊያሳድር ስለሚችል፣ መመርያው ‹‹ፍትሐዊ አልያም የነፃ ዕድል ማስተዋወቅ ቢኖር›› የሚል ሐሳብ በመመርያው እንዲካተት ጥያቄ ቀርቧል፡፡

የረቂቅ መመርያውን ያቀረቡት የሕግ ባለሙያው አቶ ኒቆዲሞስ ጌታሁን ምላሽ የሰጡ ሲሆን፣ በዓለም ላይ በክፍያ የሚተላለፍ ምርጫ ቅስቀሳ ማስታወቂያ መኖሩን ገልጸው፣ የፓርቲዎቹን ዝግጁነትና፣ ቁርጠኝነት መለኪያም መሆኑን ተናግረዋል፡፡

ሌላው በዚህ ረቂቅ መመርያ የፖለቲካ ፓርቲዎች ወይም ዕጩ ተወዳዳሪዎች የመገናኛ ብዙኃን የምርጫ ማስታወቂያ ይዘት፣ ግጭትን የሚያስነሳና የጥላቻ ይዘት አለው ብሎ ካመነ፣ ወዲያውኑ ለፓርቲው ዕጩ ተወዳዳሪና ለባለሥልጣኑ እንዲያሳውቅ ይደነግጋል፡፡

ከዚህ አኳያ በሚዲያ የሚተላለፍ የምርጫ ማስታወቂያ ግጭትን የሚያስነሳና ጥላቻ ይዘት አላቸው የሚለውን ለመለየት በዝርዝር ቢቀመጡ የተሻለ ይሆናል የሚል ሐሳብ ከፖለቲካ ፓርቲዎቹ ተወካዮች ተነስቷል፡፡

በረቂቁ መመርያ በጥላቻና የግጭት ይዘት ያላቸው ማስታወቂያዎች ቢታይ ተብሎ የተነሳው አስተያየት እንደ ግብዓት በድጋሚ የሚታይ መሆኑን አቶ ኒቆዲሞስ ተናግረዋል፡፡

ረቂቅ  መመርያው በአምስት ምዕራፎችና በ25 አንቀጾች የተዘረዘረ ሲሆን፣ ከነዚህም ውስጥ በግል ባለቤት የሚተዳደሩ መገናኛ ብዙኃን በምርጫ ነክ መልክዕትን ለማስተላለፍ ስለሚመድቡት የአየር ሰዓት፣ የጋዜጣ ዓምድ ድልድልና አጠቃቀም በሚመለከት ባለሥልጣኑ  ልዩ መሥፈርቶችን በማውጣት ይወስናል ይላል፡፡

በተጨማሪም ሁሉም የፖለቲካ ፓርቲዎች የአየር ሰዓትና የጋዜጣ ዓምድ አጠቃቀም በረቂቅ መመርያው የተቀመጠ ሲሆን፣ በዚህም መሠረት ሁሉም የፖለቲካ ፓርቲዎች ከተመደበው የአየር ሰዓት (የጋዜጣ ዓምድ) 25 በመቶውን እኩል እንዲከፍሉ ያዛል፡፡

በፌዴራልና የክልል ምክር ቤት በሚቀርቡት ዕጩዎች ብዛት መሠረት ከጠቅላላው የአየር ጊዜ (የጋዜጣ ዓምድ) ውስጥ አርባ በመቶ ይከፍላሉ፡፡

የፖለቲካ ፓርቲዎች ተወካዮችና ለክልል ምክር ቤቶች ባቀረቧቸው የሴት ዕጩ ተወዳዳሪዎች ብዛት መሠረት ከጠቅላላ የአየር ጊዜ (የጋዜጣ ዓምድ) ሃያ በመቶ እንዲከፍሉ መመርያው ያስቀምጣል፡፡

በተጨማሪም የፖለቲካ ፓርቲዎች በሕዝብ ተወካዮችና የክልል ምክር ቤቶች ባቀረቧቸው የአካል ጉዳተኞች ዕጩ ተወዳዳሪዎች ብዛት መሠረት፣ የአየር ሰዓት (የጋዜጣ ዓምድ) አሥር በመቶ እንዲከፋፈሉት ይወስናል፡፡

የዚህ ረቂቅ መመርያ በተሰጠው አስተያየትና ግብዓቶች እንደየአስፈላጊነቱ በድጋሚ የሚቃኝ ሲሆን፣ መመርያው ለስድስተኛው ጠቅላላ አገራዊ ምርጫ ብቻ የሚያገለግል መሆኑን  ተጠቁሟል፡፡

የኢትዮጵያ ብሔራዊ ምርጫ ቦርድ በኮሮና ወረርሽኝ ሳቢያ የተራዘመው ስድስተኛው ጠቅላላ ምርጫ በግንቦት ወር ወጨረሻ አልያም ደግሞ በሰኔ ወር መጀመርያ ለማካሄድ ጊዜያዊ ዕቅዱን ይፋ ማድረጉ ይታወሳል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የካቲት አብዮት – ጥያቄዎችሽ ዛሬም እየወዘወዙን ነው!

በበቀለ ሹሜ አጭር መግቢያ የዚህ ጽሑፍ አቅራቢ ከ1960ዎች ወጣቶች ርዝራዦች አንዱ...

የሰሞኑ የ“መኖሪያ ቤቶች” የጨረታ ሽያጭ ምን ዓይነት ሕጋዊ መሠረት አለው?   

በዳዊት ዮሐንስ ሰሞኑን በአዲስ አበባ ከተማ አየር ላይ ከሚንሸረሸሩ ዜናዎች...

ሁለቱ ወጎች፡ ከሰማየ ሰማያት አድርሶ መላሹ ቋንቋ! እስከ በዓሉ ቤርሙዳ

በተክለ ጻድቅ በላቸው ሰማየ ሰማያት አድርሶ መላሹ ቋንቋ! ከሁለት ሦስት ዓመት...

ለትግራይ ክልል ድርቅ ተፈናቃዮች አፋጣኝና ቀጣይነት ያለው ድጋፍ እንዲደረግ ተጠየቀ

የሕዝብ ተወካዮች ምክር ቤት የውጭ ግንኙነትና የሰላም ጉዳዩች ቋሚ...