Tuesday, July 16, 2024
- Advertisement -
- Advertisement -
የሳምንቱ ገጠመኝየሳምንቱ ገጠመኝ

የሳምንቱ ገጠመኝ

ቀን:

ይህንን ገጠመኝ የምጽፈው የወቅቱ ፈተናችን ምክንያት በሆነ መሠረታዊ ጉዳይ ላይ ተመሥርቼ ነው፡፡ ኢትዮጵያ በታሪኳ በርካታ ችግሮች እንዳጋጠሙዋት የታሪክ ድርሳናት ከበቂ በላይ ይናገራሉ፡፡ ዘመናት በተለዋወጡ ቁጥር ያጋጠሙ በርካታ ችግሮችም ነበሩ፡፡ ነገር ግን በዚህ መሀል ሕዝባችን በውስጡ ለዘመናት ያፀናቸው በርካታ አኩሪ እሴቶችም አሉ፡፡ ከእነዚህ እሴቶች መካከል የሚጠቀሱት ሰብዓዊነት፣ ርህራሔ፣ መተሳሰብ፣ ፈጣሪን መፍራት፣ ታላላቆችን ማክበር፣ መልካም ተግባራትን ማከናወንና የመሳሰሉት ናቸው፡፡

እነዚህን እሴቶች ተላልፈው ጥፋት ውስጥ የሚገኙ በአገር ሽማግሌዎች ይገሰፃሉ፣ የበደሉት ካለም ይክሳሉ፣ እነሱም ይቅርታ ይጠይቃሉ፡፡ እነዚህ ለመጠቃቀስ የሞከርኳቸው በጣም በትንሹ የሚያጋጥሙ ናቸው፡፡ ነገር ግን በሕዝብ ትከሻ ላይ ተንፈራጠው አሳዛኝ ተግባራትን ሲፈጽሙ የነበሩ በታሪካችን ይታወቃሉ፡፡ ሁሉም እንደ ፈጸሙት ድርጊትም ይበየናሉ፡፡ እኔ በበኩሌ ኢትዮጵያ ውስጥ በ21ኛው ክፍለ ዘመን እንደ ሕወሓት ሰዎች ጨካኞችና አረመኔዎች ገጥመውኝ አያውቁም፡፡

በ1990 ዓ.ም. ምሽት ላይ ከፒያሳ ወደ ዊንጌት የሚያመራ ሚኒባስ ታክሲ ውስጥ ተሳፍሬ ወደ ቤቴ ስሄድ፣ ከታክሲው የሬዲዮ ስፒከር የሁለት ሰዓት ዜና መጀመሩ ተሰማ፡፡ አርዕስተ ዜና የሆነውም የኤርትራ ወታደሮች ድንበር ተሻግረው በትግራይ ክልል በኩል ወረራ መፈጸማቸው ነበር፡፡ ታክሲው ውስጥ የነበርነው ሁሉ ደነገጥን፡፡

ዝርዝር ዜናው ተሰምቶ እንዳበቃ አንድ ወጣት ልጅ፣ ‹‹የመከላከያ ሚኒስትሩ አቶ ተፈራ ዋልዋ ሠራዊታችን ማንኛውንም ጥቃት ለመመከት በሙሉ ቁመና ላይ ይገኛል ብለው ለፓርላማ ሪፖርት ማድረጋቸውን የሰማሁት ዛሬ ነው፡፡ የእሳቸው ሪፖርት የውሸት ሆኖ ነው እንዴ ድንበር ላይ ያሉ ወታደሮችና ሚሊሻዎች የተገደሉት…›› ይላል፡፡ ይህን ጊዜ አንድ ጥጋብ የወጠረው የሚመስል ጎረምሳ፣ ‹‹ለኤርትራ አግዘህ ነው ወይ የመከላከያ ሚኒስትሩን ውሸታም የምትለው…›› እያለ መጠጥ በተጫነውና የአማርኛ ቃላትን ማሳካት በማይችለው ንግግሩ እየደነፋ ጎኑ ላይ የሻጠውን ሽጉጥ ሲነካካ ሌላ ድንጋጤ ታከለ፡፡

ወጣቱ እሳት ጎርሶ ለብሶ፣ ‹‹ከኤርትራ ሰዎች ጋርማ በአንድ ጉድጓድ… ስትሉ የነበራችሁት እናንተ ናችሁ…›› ሲል ደግሞ ትርምስ ተፈጠረ፡፡ ‹ሾፌር በፈጠረህ ታክሲውን አቁም…› የሚሉ ድምፆች ተሰሙ፡፡ ባለሽጉጡ ክብሬ ተነካ በሚል ዕብሪት እየጮኸ ሽጉጡን ሲመዝና ታክሲው ሲቆም እኩል ሆነ፡፡ ጳውሎስ ሆስፒታል መግቢያ በራፍ ለመድረስ 30 ሜትር የሚሆን ርቀት ላይ ታክሲው በፍጥነት ቆሞ ተሳፋሪዎች ወርደው ለመሸሽ ሲጋፉ፣ የፈጣሪ ፈቃድ ሆኖ ሦስት ጥበቃ ላይ የነበሩ ፖሊሶች በፍጥነት ደረሱ፡፡

ሽጉጡን ወድሮ የነበረው ዕብሪተኛ ደንግጦ ወደ ጎኑ ሲመልሰው ፖሊሶቹ የተፈጠረውን ችግር እየጠየቁ ነበር፡፡ ወዲያው አንደኛው ፖሊስ ጠመንጃውን ወደ ባለሽጉጡ አነጣጥሮ እጁን ወደ ላይ ካሰቀለው በኋላ ሽጉጡን አስፈታው፡፡ ሁላችንም ተያይዘን ወደ አካባቢው ፖሊስ እንድንሄድ ተደርጎ ዕብሪተኛው እንዲታሰር ሲደረግ፣ ከምሽቱ አምስት ሰዓት አካባቢ ቤቴ ደረስኩ፡፡ ፖሊሶች ባይደርሱልን ኖሮ ያ ወጣት የዚያ ዕብሪተኛ ሰለባ ይሆን ነበር፡፡

ይህንን ዱብ ዕዳ የነገርኳቸው ሰዎች በተለያዩ አካባቢዎች የደረሱ አጋጣሚዎችን ሲነግሩኝ፣ በእንዲህ ዓይነቶቹ የሕወሓት ቡችሎች ምክንያት በየመዝናኛውና በሥራ ቦታ ሳይቀር እንደወጡ ቀርተዋል፡፡ በመንግሥት መሥርያ ቤቶች፣ በቀበሌዎችና በክፍላተ ከተሞች፣ በንግድና ኢንቨስትመንት፣ ወዘተ የሕወሓት ሰዎች ከመጠን በላይ የማይገባቸውን ጥቅም ከማግኘት አልፈው ብዙዎችን አንገት ሲያስደፉ ኖረዋል፡፡

የሚጠሉዋቸውን በደኅንነት እያስለቀሙ አሳስረዋል፣ ግፍ እንዲፈጸምባቸው አድርገዋል፡፡ ሕወሓት በሕዝባችን ምሬት ምክንያት በተቀሰቀሰ አመፅ ከአራት ኪሎ ተባሮ መቀሌ ሲከትም፣ የዘረፍከውን ከእነ ቢጤዎችህ አርፈህ እየበላህ የክልልህን ሕዝብ ይቅርታ ጠይቀህ ልማት ላይ ተሰማራ ሲባል ሊሰማ አልቻለም፡፡ ጭራሽ በዘረፈው ሀብት ጀሌዎቹን እያሰማራ ኢትዮጵያን ለማፍረስ በሺዎች የሚቆጠሩ ንፁኃንን ፈጅቷል፡፡

ጥጋቡ እየበረታ ሲሄድም ለሕግ መገዛት እንደማይፈልግ፣ ራሱ አርቅቆ ያፀደቀውን ሕገ መንግሥት በመጣስ ሥርዓተ አልበኛ በመሆን፣ ክልሉን የሌላ አገር በማስመሰል የፌዴራል መንግሥቱን በመናቅና ለልማት ሳይሆን ለውድመት መዘጋጀቱን ይፋ አደረገ፡፡ ለእሱ የተመቸ በመሰለው ጊዜም ሊሞከር የማይገባ ታላቅ ስህተት ሠራ፡፡ የሰሜን ዕዝ የአገር መከላከያ ሠራዊት አባላትን በመፍጀት ራሱን ወደ ቁልቁለት ጎዳና አስገባ፡፡

የኢትዮጵያ ዓርማ የሆነውን ሠራዊት በመድፈርና የኢትዮጵያ ሕዝብ ልጆችን በአረመኔያዊ መንገድ በመግደል፣ ለአንዴና ለመጨረሻ ጊዜ ከኢትዮጵያ ሕዝብ ጋር ተቆራረጠ፡፡ ከሠራዊቱ የወሰዳቸውን መሣሪያዎች አገር ሊያወድምባቸው ቢያቅድም፣ ‹እባብ የልቡን ዓይቶ እግር ነሳው› እንደሚባለው እጁ ላይ እንዳሉ በጀግናው ሠራዊታችን ዶግ አመድ ተደረጉበት፡፡ ያለ እኔ ጀግና የለም ሲል የነበረው ሽፍታ ማይካድራ በምትባል ከተማ በርካታ ንፁኃንን ጨፍጭፎ የአገር ዋና ጠላት ሆኖ አረፈው፡፡

ይህ ሰይጣንን በምግባሩ ያስንቃል የተባለ አረመኔ ኃይል ነው እንግዲህ በርካታ የትግራይ አካባቢዎችን ለጀግናው ሠራዊታችን አስረክቦ፣ መቀሌ ውስጥ መሽጎ ሕዝብ ለማስፈጀት እየዶለተ የነበረው፡፡ የዚህ አረመኔ ድርጅት አመራሮችን ሳስብ ይደንቀኛል፡፡ ለዘመኑ የማይመጥን አስተሳሰብ ውስጥ ሆነው አገር ሲያተራምሱ ኖረው በቃችሁ ሲባሉ እንቢ ብለው ነገር የፈለጉት፣ ከዚህ ቀደም ከትግል ጊዜያቸው ጀምሮ ኢትዮጵያን ለ27 ዓመታት እየቀጠቀጡ ሲገዙ የፈጸሙዋቸው ግፎች ሞልተው በመፍሰሳቸው ነው፡፡

እነሱ ብዙዎችን ያለ ኃጢያታቸው ወደ መቃብር ቢልኩም ሙታኑ ዛሬ ሰማዕት ናቸው፡፡ እነዚህ ግን ውርደት እየተከናነቡ አንዴ ሌባ፣ ነፍሰ ገዳይ፣ የአገር ጠላት፣ አረመኔ… እየተባሉ ወደ መቃብራቸው ይወርዳሉ፡፡ ከሦስተኛው ምዕራፍ ዕርምጃ በሕይወት ከተረፉም እጃቸው በካቴና ታስሮ የናቁት ፍትሕ ፊት ይቀርባሉ፡፡ ለሠሩዋቸው ግፎች ብቻ ሳይሆን ለፈጸሙዋቸው የጅምላ ፍጅቶችና ጭፍጨፋዎች በጦር ወንጀለኝነት ይጠየቃሉ፡፡ በእነሱ መቃብር ላይ ደግሞ ኢትዮጵያ በልጆቿ ትብብር ወደ ሰላም፣ ነፃነት፣ ዕድገትና ዴሞክራሲ በኩራት ትራመዳለች፡፡ ይህ የማይቀር እውነት ነው፡፡

(ገረመው ወልዴ፣ ከዊንጌት)

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ሚዲያው በሕዝብ የህሊና ችሎት ከተዳኘ በቂ ነው!

መሰንበቻውን ድንገት ሳይታሰብ ያለ ማስጠንቀቂያ ጠቅላይ ሚኒስትር ዓብይ አህመድ...

የባህር በር ጉዳይ

በታምሩ ወንድም አገኘሁ ድሮ ድሮ ገና ልጅ ሆኜ ፊደል እንደቆጠርኩ...

አገሩ ፖለቲካዊ ስክነትና መደማማጥ ያስፈልገዋል

በንጉሥ ወዳጀነው    ኢትዮጵያ የሁላችንም የጋራ ቤት ነች፡፡ ‹‹ጥያቄዬ ተመለሰልኝ››፣...

የመንግሥት የሰብዓዊ መብት ተቋም ለምን የመንግሥት ሚዲያን ማስተማር አቃተው

በገነት ዓለሙ የአገራችን የ2016 የበጀት ዓመት መሰናበቻና የአዲሱ የ2017 በጀት...