Sunday, June 23, 2024
- ማስታወቂያ -
- ማስታወቂያ -

የኅብረት ሥራ ኤጀንሲ በአደጋ ለተጎዱ አካባቢዎች ምርት ለማቅረብ እየሠራሁ ነው አለ

spot_img

ተዛማጅ ፅሁፎች

በኤልያስ ተገኝ

የፌዴራል ኅብረት ሥራ ኤጀንሲ በያዝነው ዓመት በተከሰቱት ተፈጠሯዊና ሰው ሠራሽ በሆኑ ችግሮች ሳቢያ ያጋጥማል ተብሎ የሚጠበቀውን የምርት እጥረትና የዋጋ ንረትን ለማረጋጋት፣ ሁሉንም የክልል የከተማ የኅብረት ሥራ ኤጀንሲዎች በማስተባበር የገበያ ማረጋጋት ሥራ እያከናወኑ መሆኑን አስታወቀ፡፡

የአንበጣ መንጋ፣ ጎርፍና በቅርቡ የተከሰተውን የሰላም መደፈረስ ችግሩ በተፈጠረባቸው ቦታዎች ብቻም ሳይሆን፣ በሌሎች አካባቢዎችም በገበያ ውስጥ ችግር መፍጠሩ አይቀሬ ናቸው ያሉት የኤጀንሲው የኮሙዩኒኬሽን ዳይሬክተር አያልሰው ወርቅነህ፣ ምርት በተሻለ መንገድ ከተመረተባቸው አካባቢዎች፣ ምርት መቀነስ በተፈጠረባቸው አካባቢዎች በኅብረት ሥራ ማኅበራት አማካይነት ለማቅረብ፣ የሚመለከታቸውን አካላት ያሳተፈ የስምምነት ሐሳብ ላይ ተደርሷል ብለዋል፡፡

ኤጀንሲው በተያዘው የበጀት ዓመት ከሚሰበስበው ምርት 423,600 ሜትሪክ ቶን የሚሆኑ የሰብልና የጥራጥሬ እህሎችን በተለይም ጤፍን በኅብረት ሥራ ማኅበራት አማካይነት ለማቅረብ እየተሠራ መሆኑን ዳይሬክተሩ ገልጸው፣ ወቅቱም የምርት መሰብሰቢያ እንደ መሆኑ መጠን በመጪዎቹ ሁለት ወራት ይህንን ተግባር ያከናወናል ብለዋል፡፡

የኅብረት ሥራ ማኅበራት ገበያ ለማረጋጋት ሲሠሩ የገንዘብ እጥረት ችግር እንዳያጋጥማቸው፣ ከኢትዮጵያ ልማት ባንክ ጋር በተደረሰ ስምምነት መሠረት 800 ሚሊዮን ብር ለኅብረት ሥራ ማኅበራት የተፈቀደ መሆኑን፣ እስካሁንም 80 ማኅበራት 350 ሚሊዮን ብር መውሰዳቸው ተገልጿል፡፡

የኮሮና ወረርሽኝ መልካም ዕድል ከፈጠረላቸው ዘርፎች አንዱ የኅብረት ሥራ ማኅበራት ናቸው የሚሉት አቶ አያልሰው፣ በተለይም በሸማች ማኅበራት አማካይነት በመላው አገሪቱ የግብርናና የኢንዱስትሪ ውጤቶችን ለዝቅተኛው ኅብረተሰብ ክፍል ለማዳረስ የተከናወነ ሥራና የተገኘው ውጤት ትልቅ ነው ብለዋል፡፡

በአቅርቦት ላይ ብቻ መመርኮዝ የሸማቹን ፍላጎት የሚያረካ ስላልሆነ የኅብረት ሥራ ማኅበራት በሚያቀርቡት የምርት ውጤቶች ላይ የሚታየውን የጥራት ችግር ለመቅረፍ ኤጀንሲው የተለያዩ ሥራዎችን እያከናወነ ይገኛል ተብሏል፡፡ በዚህም መሠረት ማኅበራቱ ከአደረጃጀታቸው ጀምሮ በሠለጠነ የሰው ኃይል መታገዝ እንደሚገባቸውና ተዛማች ጉዳዮችን የሚያብራራ መመርያ እየተዘጋጀ ይገኛል ብለዋል፡፡

አቶ አያልሰው ለሪፖርተር እንደገለጹት፣ ባለፈው ወር የሕዝብ ተወካዮች ምክር ቤት የግብርና አርብቶ አደርና አካባቢ ጥበቃ ጉዳዮች ቋሚ ኮሚቴ የበረሃ አንበጣ፣ የጎርፍ አደጋና የፀጥታ መደፍረስ በታየባቸው የኦሮሚያ፣ የአማራና የአፋር ክልሎች፣ እንዲሁም የድሬዳዋ አስተዳደር ምልከታ አድርጓል፡፡

በምልከታውም በኦሮሚያ ክልል በዝናብና በመስኖ በለማ ምርት ላይ በደረሰ ጉዳት 92,630 ኩንታል የምርት መቀነስ ሊያጋጥም እንደሚችል በጥናት የተለየ መሆኑን፣ በአማራ ክልል በአንበጣ ምክንያት 392,996 ሔክታር መሬትና 795,774 አርሶ አደሮች ማሳቸው እንደ ወደመባቸውና በአፋር ክልል በተከሰተው የጎርፍ አደጋ በሁለት ዞኖች 17,610 ሔክታር መሬት ላይ ጉዳት መድረሱን ለምክር ቤቱ ማስታወቁ ይታወሳል፡፡

የፌዴራል ኅብረት ሥራ ኤጀንሲ ከላይ ከተጠቀሰው የገበያ ማረጋጋት ሥራ ባሻገር፣ ሁሉንም የኅብረት ሥራ ኤጀንሲዎችና አባል ማኅበራት በማስተባበር እስከ 100 ሚሊዮን የሚደርስ ድጋፍ ለተጎጂ ክልሎች ለመስጠት የሀብት ማሰባሰብ እንቅስቃሴ መጀመሩን አስታውቋል፡፡   

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች