Friday, September 30, 2022
ሌሎች ዓምዶች
    - ማስታወቂያ -
    - ማስታወቂያ -

    ኅብረት ባንክ ዓመታዊ ትርፋቸውን ከአንድ ቢሊዮን ብር በላይ ካሻገሩ ባንኮች አንዱ ሆኗል

    - ማስታወቂያ -

    ተዛማጅ ፅሁፎች

    ኅብረት ባንክ አክሲዮን ማኅበር በ2012 የሒሳብ ዓመት እጅግ በርካታ ተግዳሮቶች ቢኖሩም በባንኩ ውስጥ በተደረጉ መሠረታዊ ለውጦችና አሠራሮች ለመጀመርያ ጊዜ ከታክስ በፊት ከአንድ ቢሊዮን ብር በላይ በማትረፍ የቻሉ ባንኮችን ቁጥር ወደ ስምንት አሳድጓል፡፡

    ባንኩ የ2012 የሒሳብ ዓመት አፈጻጸሙን ይፋ ባደረገበት የባለአክሲዮኖች ጠቅላላ ጉባዔ ላይ እንደተገለጸው በሒሳብ ዓመቱ ከታክስ በፊት 1.12 ቢሊዮን ብር ያተረፈ ሲሆን ከታክስ በኋላ የተገኘው ትርፍ 893.5 ሚሊዮን ብር መድረሱን ለማወቅ ተችሏል፡፡

    በ2012 ሒሳብ ዓመት ባንኩ ከግብር በፊት ነገር ግን ከመጠባበቂያ ተቀናሽ በኋላ ያስመዘገበው የትርፍ መጠን 1.13 ቢሊዮን ብር በመሆኑ ጥሩ የሚባል ውጤት ለማስመዝገብ ችሏል፡፡ ይህ የትርፍ መጠን ከቀደመው ዓመት ጋር ሲወዳደር የ15.13 በመቶ ጭማሪ አሳይቷል፡፡ በሌላ በኩል የገቢ ግብር ተቀናሽ ከተደረገ በኋላ የባንኩ ትርፍና ኪሳራ ተሰልቶ ለባለ አክሲዮኖች ክፍፍል ብር 615.12 ሚሊዮን የቀረበ ሲሆን፣ ይህም ባለፈው ዓመት ለተመሳሳይ ክፍፍል ከተወሰነው ብር 389.17 ሚሊዮን ጋር ሲነፃፀር የ58.1 በመቶ ብልጫ ስለማስመዝገቡም ተጠቅሷል፡፡

    ሐሙስ ኅዳር 24 ቀን 2013 ዓ.ም. በባንኩ ጠቅላላ ጉባዔ ላይ የባንኩን የ2012 የሒሳብ ዓመት የሥራ አፈጻጸም ሪፖርት ያቀረቡት የኅብረት ባንክ የዳይሬክተሮች ቦርድ ሊቀመንበር አቶ ኢየሱስወርቅ ዛፉ በሒሳብ ዓመቱ ባንኩ በተለያዩ አፈጻጸሞቹ ያገኘው ይህ ያገኘው ውጤት በዓለም እንዲሁም በኢትዮጵያ ደረጃ ከፍተኛ ተፅዕኖ የታየበት ወቅት ስለመሆኑ አስታውሰዋል፡፡

    በባንኩ ዳይሬክተሮች ቦርድ የቀረበው ሪፖርት ላይም በ2012 የሒሳብ ዓመት በዓለም አቀፍ ደረጃ አሉታዊ የኢኮኖሚ ተፅዕኖ ያሳረፉ በርካታ ሁነቶች የተስተናገዱበት መሆኑን ጠቅሷል፡፡ ከዚህም መካከል የዓለም ጤና ድርጅት እ.ኤ.አ. በማርች 2020 ዓለም አቀፍ ወረርሽኝ ሲል የሰየመው ኮቪድ-19 በግንባር ቀደምነት ተጠቅሷል፡፡

    ይህ በሽታ በሰው ሕይወትና ጤና ላይ ከፈጠረው ቀውስ ባሻገር በዓለም አቀፍ ኢኮኖሚ ላይ ከባድ አሉታዊ ተፅዕኖ ማሳረፉንና መቼ እንደሚያበቃ እስካሁን ማረጋገጫ ባልተገኘለት በዚህ ወረርሽኝ ሳቢያም ዓለም ያልተለመደ የአሠራር ዘይቤ እንዲፈጥርና እንዲለምድ መደረጉም ሪፖርቱ አሳይቷል፡፡

    በእንቅርት ላይ ጆሮ ደግፍ እንዲሉ በአሜሪካና በቻይና መካከል በቀጠለው የንግድ ታሪፍ ጦርነት፣ በሸቀጦች ገበያ ላይ በታየው ከፍተኛ የዋጋ መዋዠቅና በፋርስ ባህረ ሰላጤ ተባብሶ በታየው የጂኦፖለቲካዊ ውጥረቶች ሳቢያ የዓለም አቀፉ ኢኮኖሚ የመዳከም አዝማሚያው በበጀት ዓመቱም እንደቀጠለ አሳይቷል፡፡

    ‹‹በሌላ በኩል በበጀት ዓመቱ የአገር ውስጥ ኢኮኖሚውም በብዙ ተግዳሮቶች ሲናጥ ከርሟል፤›› የሚለው የባንኩ ሪፖርት ያለመፍትሔ የቀጠለው የውጭ ምንዛሪ እጥረትና የኮሮና ቫይረስ ሥርጭት በሰዎችና ሸቀጦች ላይ ያስከተለው የእንቅስቃሴ ገደብ የአገርን ምርታማነት እንዲቀንስ ከማድረጉ በተጨማሪ የአገሮችና ተቋሞቻቸው ቀዳሚ ትኩረት በሽታውን በመከላከልና መቆጣጠር ላይ እንዲሆን ማስገደዱንም ጠቁሟል፡፡

    የወረርሽኙ ጫና በአገሪቱ ከታየው ሥጋት ጋር ተደምሮ ኢኮኖሚው ላይ ከፍተኛ ተፅዕኖ መፍጠሩን፣ እንዲሁም በሒሳብ ዓመቱ መንግሥት የግሉን ሴክተር ለማበረታታት እያደረገ ያለውን ጥረት ተከትሎ በባንክ ኢንዱስትሪው የተፈጠረውን መነቃቃት ስናይ በርካታ አዳዲስ ባንኮች ኢንዱስትሪውን ለመቀላቀል በዝግጅት ላይ መሆኑን ሁሉ በሒሳብ ዓመቱ እንደ ተግዳሮት የሚታዩ ጉዳዮች ሆነዋል፡፡

    የተቀማጭ ገንዘብ መጠኑን ካለፈው ዓመት በ19.45 በመቶ ጭማሪ በማሳየት 34.7 ቢሊዮን ብር መድረሱ አንዱ ነው፡፡ በተለይ ከወለድ ነፃ የባንክ አገልግሎት ማሰባሰብ የቻለው የተቀማጭ ገንዘብ መጠን በሒሳብ ዓመቱ በ40.17 በመቶ መጨመሩን አስታውቋል፡፡ ይህም ከወለድ ነፃ የባንክ አገልግሎት ባንኩ 1.23 ቢሊዮን ብር መሰብሰብ ችሏል፡፡

    ‹‹ይኸም ባንኩ በበጀት ዓመቱ ካስመዘገባቸው ስኬቶች አንዱ ነበር›› የሚለው የባንኩ መረጃ የባንኩ አጠቃላይ የብድር ክምችትም ከወለድ ነፃ አገልግሎት ዘርፍ የተሰጠውን ጨምሮ ዓምና ከነበረው የ21.61 ቢሊዮን ብር የ5.48 ቢሊዮን ብር ወይም የ25.83 በመቶ ዕድገት በማሳየት 26.71 ቢሊዮን ብር ደርሷል፡፡

    ባንኩ በሒሳብ ዓመቱ ከሰጠው አጠቃላይ ብድር ውስጥ ከፍተኛውን ድርሻ የያዘው ለማኑፋክቸሪንግ የሰጠው ብድር ነው፡፡ ለዚህ ዘርፍ የሰጠው ብድር 5.4 ቢሊዮን ብር ሲሆን፣ ከገቢ ንግድ ደግሞ 4.9 ቢሊዮን ብር በመስጠት በሁለተኛ ደረጃ ላይ የሚቀመጥ ሆኗል፡፡

    የባንኩ ዓመታዊ አጠቃላይ ገቢ በ1.1 ቢሊዮን ብር መድረሱንና ይህም ከቀዳሚው ዓመት 28.3 በመቶ ዕድገት አሳይቷል፡፡ በአንፃሩ ዓመታዊ ወጪው በ33.5 በመቶ በመጨመር 3.78 ቢሊዮን ብር እንደደረሰም ለማወቅ ተችሏል፡፡

    ከካርድ አገልግሎት ጋር በተያያዘ ኅብረት ባንክ የካርድ ተጠቃሚ ደንበኞቹ ቁጥር ከዓመት ዓመት እየጨመረ መሄዱን ነው፡፡ እስከ ሒሳብ ዓመቱ መጨረሻ ድረስ በኅብር ካርድ የሚጠቀሙ ደንበኞቹ ቁጥር በ23 በመቶ አድጎ 293,856 ደርሶ በእነዚህ ካርዶችም በአንድ ዓመት ከ1.41 ቢሊዮን ብር በላይ ማንቀሳቀስ ችሏል፡፡

    በኤትኤምና በፖዝ አገልግሎቱም በተመሳሳይ መንገድ እየጨመረ መሆኑንም የባንኩ መረጃ የሚያሳይ ሲሆን በነዚህ የባንክ አገልግሎቶቹም ከ1.04 ቢሊዮን ብር ማንቀሳቀስ መቻሉን የባንኩ ዓመታዊ ሪፖርት አመላክቷል፡፡

    በባንኩ ዓመታዊ ጠቅላላ ጉባዔ ላይ የተጠቀሰው ሌላው ጉዳይ የባንኩን የዋና መሥሪያ ቤት ሕንፃ ግንባታ የሚመለከት ነው፡፡ ይህ ሕንፃ ወደ ማጠናቀቂያ ምዕራፍ ላይ መድረሱንና በዚህም መሠረት በመጪው የበጀት ዓመት የመጀመርያ አጋማሽ ላይ የሕንፃ ግንባታው ተጠናቆ ለአገልግሎት ዝግጁ እንደሚሆን ይጠበቃል፡፡

    ‹‹ባንኩ እስካሁን ድረስ ያስመዘገበው ውጤት መልካም የሚባል ቢሆንም፣ በረዥም ጊዜ ዕቅዱ (Vision 2030) ያስቀመጣቸውን ግቦች ከዳር ለማድረስ ገና ብዙ ሥራ ይጠብቀዋል፤›› የሚለው የባንኩ መረጃ ባንኩን ወደ ተሻለ ደረጃ ለማድረስ እየተሠሩ ናቸው የተባሉ የተለያዩ ክንውኖችም በዚሁ ሪፖርት ላይ ተካቷል፡፡

    የባንኩ ዓመታዊ ሪፖርት ሌላው ያመለከተው ነገር በሒሳብ ዓመቱ ከነበሩ ተግዳሮቶች ባሻገር መልካም የሚባሉ ሁኔታዎች መፈጠራቸውን ነው፡፡ ይህንንም ከተጠቀሱት  ተግዳሮቶች መካከል በአገሪቱ ባንኮች የገንዘብ ፍሰት ላይ በፈጠሩት አሉታዊ ጫና ሳቢያ ብሔራዊ ባንክ በአገሪቱ ለሚገኙ ለሁሉም ባንኮች ገንዘብ ማበደር ግድ ሆኖበታል፡፡ ብሔራዊ ባንክ ችግሩን ለመፍታት ያደረገው ይህ ጣልቃ ገብነት ከችግሩ ጥልቀት አንፃር በረዥም ጊዜ ለመጀመርያ ጊዜ የተወሰደ አስፈላጊና የሚያስመሰግነው የመፍትሔ ዕርምጃ ነበር›› የሚለው ይገኝበታል፡፡

    የተጠቀሱትን ሁኔታዎች ታሳቢ ስናደርግ ባንኩ በብዙ መለኪያዎች ያስመዘገበው ውጤት ጥሩ የሚባል ነው፡፡ በዚህ ረገድ መልካም የሚባል የትርፍ መጠን ለማስመዝገብ የቻለ ሲሆን፣ በቀጣይ ዓመታትም የተሻለ ዕድገት ለማስመዝገብ የሚያስችለውን አቅም መገንባት መቻሉ ተገልጿል፡፡  

    የኅብረት ባንክ በአሁኑ ወቅት የተከፈለ ካፒታል መጠኑ 3.12 ቢሊዮን ብር ደርሷል፡፡ በ2011 የሒሳብ ዓመት የባንኩ የተከፈለ ካፒታል መጠን 2.26 ቢሊዮን ብር የነበረ ሲሆን በ2012 የሒሳብ ዓመት መጨረሻ ላይ የደረሰበት ደረጃ የባንኩ የተከፈለ የካፒታል መጠን የ41 በመቶ ጭማሪ ማሳየቱን ነው፡፡

    የኅብረት ባንክ ሠራተኞች ብዛት 6,536 የደረሰ ሲሆን፣ ከዚህም ውስጥ 4,433 ቋሚ፣ 28 በኮንትራት ውል እንዲሁም 2,075 በውጪ ቀጣሪዎች በኩል የተገኙ (አብዛኞቹ የጥበቃ ጓዶች) ናቸው፡፡

    - Advertisement -spot_img

    የ ጋዜጠኛው ሌሎች ፅሁፎች