Tuesday, January 31, 2023
- Advertisement -
- Advertisement -

‹‹የኮሮና መከላከያ ክትባት በመላው ዓለም ለማሠራጨት ዝግጅታችንን አጠናቀን እየተጠባበቅን ነው›› አቶ ፍፁም አባዲ፣ የኢትዮጵያ አየር መንገድ የካርጎና ሎጂስቲክስ ሥራ አስኪያጅ

የኮሮና ወረርሽኝ በኢትዮጵያ መከሰትን ተከትሎ ጠቅላይ ሚኒስትር ዓብይ አህመድ (/) አፍሪካን ከወረርሽኙ የመታደግ ፕሮግራም በግላቸው በመቅረፅ፣ ወረርሽኙ በመጀመርያ ከተከሰተባት ቻይና ታዋቂ ባለሀብትና የአሊባባ መሥራች ከሆኑት ጃክ ጋር በመተባበር ወረርሽኙን ለመከላከል የሚያስችሉ የአፍና አፍንጫ መሸፈኛና ሌሎች የሕክምና መሣሪያዎችን 52 አገሮች በዕርዳታ የማሠራጨት ሥራ እንዲከናወን አድርገዋል።  ወረርሽኙ በመላው ዓለም መከሰቱን ተከትሎ ከሞላ ጎደል በሁሉም የዓለም አገሮች የአየር በረራና አጠቃላይ የጉዞ ገደብ በመጣሉ፣ በርካታ አየር መንገዶች አደጋ ውስጥ ወድቀዋል። የኢትዮጵያ አየር መንገድም የጉዳቱ ሰለባ የነበረ ቢሆንምጠቅላይ ሚኒስትሩ ከቻይናው ባለሀብት ጋር የቀረፁት አፍሪካን ከወረርሽኙ ለመታደግ ያለመው የዕርዳታ አቅርቦት፣ በኢትዮጵያ አየር መንገድ በኩል ለመላው አፍሪካ እንዲሠራጭ በመወሰኑ የኢትዮጵያ አየር መንገድ ላይ ይደርስ የነበረው ጉዳት ሙሉ በሙሉ እንዳይከሰት በማድረግ የመተንፈሻ ጊዜን ሰጥቷል። የኢትዮጵያ አየር መንገድ የመጀመርያውን ማዕበል በዚህ ሁኔታ ካለፈ በኋላ የጭነት ትራንስፖርት አገልግሎት ላይ በማተኮር የበለጠ ለማንሰራራት ከመቻል አልፎ፣ በወረርሽኙ ወቅት የበርካታ አገሮች አየር መንገዶች በኪሳራ ሲጥለቀለቁና ገሚሶቹም ከሥራ ውጪ ሲሆኑ፣ የኢትዮጵያ አየር መንገድ ግን ወጪውን ችሎ መጠነኛ ትርፍ ማስመዝገብ የቻለ አየር መንገድ ተብሎ በአቪዬሽን ኢንዱስትሪ ውስጥ ዝናን አግኝቷል። በዚህና በጭነት ትራንስፖርት ዘርፍ ባስመዘገበው ስኬት የተነሳም በአሁኑ ወቅት በተለያዩ የዓለም ኃያል አገሮች የተመረቱ የኮሮና ወረርሽኝ ክትባትን በመላው ዓለም ለማሠራጨት ዝግጅቱን አጠናቋል። ከዚህም ባሻገር በቻይና የተመረተውን የኮሮና ክትባት በተለያዩ የዓለም አገሮች ለማቅረብ የተሰናዳው ሳይኖ ስማርት ሎጂስቲክስ የተባለው የአሊባባ ግሩፕ አካል የሆነው ተቋም፣ የኢትዮጵያ አየር መንገድን በመጠቀም ክትባቱን በዋናነት በአፍሪካና በመካከለኛው ምሥራቅ እንዲሁም በሌሎች አገሮች ለማሠራጨት ስምምነት ተፈራርሟል። ይህንን ስምምነትና የኢትዮጵያ አየር መንገድ ክትባቱን ለማሠራጨት ያደረገውን ጠቅላላ ዝግጅት በተመለከተ፣ የኢትዮጵያ አየር መንገድ ካርጎና ሎጂስቲክስ አገልግሎት ሥራ አስኪያጅ አቶ ፍፁም አባዲ ጋር ዮሐንስ አንበርብር ያደረገው ቆይታ እንደሚከተለው ቀርቧል። 

ሪፖርተር:- ኃያላኖቹ የዓለም አገሮች ለኮሮና ወረርሽኝ ክትባት ለማግኘትና ለመፈብረክ እያደረጉት ከሚገኘው ፉክክርና እሽቅድድም በስተጀርባ፣ የኢትዮጵያ አየር መንገድ በእነዚህ አገሮች የሚመረተውን ክትባት ለዓለም አገሮች ለማጓጓዝ ሲዘጋጅ ቆይቷል። ይህ ዝግጅቱና በኮሮና ወረርሽኝ ወቅት ያስመዘገበው ስኬት ተደምሮ፣ በቻይና የሚመረተውን ክትባት ወደ አፍሪካና ሌሎች የዓለም አገሮች ለማሠራጨት የሚያስችለውን የጭነት (የካርጎ) ትራንስፖርት አገልግሎት ስምምነት የአሊባባ ግሩፕ አባል ከሆነው ሲያኖ ስማርት ሎጂስቲክስ ኔትወርክ ጋር ተፈራርሟል። ስለዚህ ስምምነትና በስምምነቱ መሠረት የኢትዮጵያ አየር መንገድ የሥራ ድርሻ ምን እንደሆነ ቢገልጹልን? 

አቶ ፍፁም:- እንደሰማችሁት ስምምነቱ የተፈጸመው በኢትዮጵያ አየር መንገድ፣ የአሊባባ ግሩፕ አካል በሆነው በሲያኖ ስማርት ሎጂስቲክስ ኔትወርክና በደቡባዊው የቻይና ክፍል በሚገኘው ሸንዘን አውሮፕላን ማረፊያ መካከል የተደረገ ነው። እንደሚታወቀው የአሊባባ መሥራች የሆኑት የቻይናው ባለሀብት ጃክ በአሊባባ ፋውንዴሽን በኩል ለአፍሪካ አገሮች የለገሱትን የኮሮና ወረርሽኝ መከላከያ የሕክምና መገልገያዎች የኢትዮጵያ አየር መንገድ ለአገሮቹ እንዲያደርስ በተሰጠው ኃላፊነት መሠረት፣ 52 የአፍሪካ አገሮች አድርሷል። በእርግጥ የኮሮና ወረርሽኝን ለመከላከል የሚያስችሉ የአፍና የአፍንጫ መሸፈኛዎችንና ሌሎች ተመሳሳይ የሕክምና መገልገያዎችን ከአፍሪካ ውጪ ወደ ላቲን አሜሪካ፣ ሰሜን አሜሪካ፣ እስራኤል፣ የተባበሩት ዓረብ ኤምሬትስና ሌሎች የዓለም አገሮችም አጓጉዘናል።

በዚህ ወቅት ባሳየነው ብቃትባለን የሎጂስቲክ መሠረተ ልማት፣ የካርጎ ማመላለሻ አውሮፕላኖቻችን ብዛትና የሎጂስቲክስ ዘርፍ ሠራተኞቻችን የፈጸሙትን ስኬታማ ተግባር፣ እንዲሁም ያላቸውን ዕውቀት ከግምት በማስገባትና በተሠራው ሥራም በመደሰታቸው የዓለም ጤና ድርጅት፣ የዓለም የምግብ ፕሮግራምና የአፍሪካ የበሽታ መከላከያ ማዕከል የኢትዮጵያ አየር መንገድን ወይም አዲስ አበባን የሰብዓዊ ዕርዳታ ማከፋፈያ ማዕከላቸው አድርገው እየተጠቀሙ ይገኛሉ። 

አሊባባ ግሩፕ በፋውንዴሽኑ በኩል ለአፍሪካ የተለገሱ የኮሮና መከላከያ የሕክምና መሣሪያዎችን የኢትዮጵያ አየር መንገድ ያጓጓዘበትን ፈጣንና ስኬታማ የሎጂስቲክስ አገልግሎት ከመታዘባቸው በተጨማሪ፣ ከላይ የጠቀስኳቸው ዓለም አቀፍ ተቋማት የኢትዮጵያ አየር መንገድን የአፍሪካ የሰብዓዊ ዕርዳታ ሎጂስቲክስ ማዕከል ማድረጋቸውን በመመልከታቸው የኮሮና ክትባትን ለአፍሪካና ለሌሎች የዓለም አገሮች ለማሠራጫት መርጠውታል። ስምምነቱ በዚህ መሠረት የተፈጸመና ለአንድ ዓመት የሚቆይ ሲሆን፣ ነገር ግን ሁኔታው ታይቶ ከአንድ ዓመት በላይ ሊራዘም የሚችል ነው። የኢትዮጵያ አየር መንገድ የሥራ ድርሻም የኮሮና ክትባትን ከቻይና ወደ ተለያዩ አገሮችአዲስ አበባን እንደ ሎጂስቲክስ ማዕከል በማድረግምክትባቱ ትዕዛዝ ለሰጡ አገሮች ከአዲስ አበባ የማሠራጨት ተግባር ይሆናል ማለት ነው።

ሪፖርተር:- የኢትዮጵያ አየር መንገድ ይህንን የሎጂስቲክስ ኃላፊነት ለመወጣት ያደረገው ዝግጅት ምን ይመስላል?

አቶ ፍፁም:- በኢትዮጵያ አየር መንገድ በኩል ዓለም አቀፍ ደረጃውን የጠበቀ የሎጂስቲክስ አገልግሎት ለመስጠት አስፈላጊው ዝግጅት ተደርጓል። ከትልልቆቹ የመንገደኛ ማመላለሻ አውሮፕላኖቻችን መካከል 14 የሚሆኑትን ጭነት ብቻ እንዲያነሱ አድርገን ቀይረናቸዋል። ከእነዚህም መካከል የኤርባስ ምርት የሆነው A350 ቦይንግ 777- 300 እና ቦይንግ 777-200 የሚባሉት አውሮፕላኖች እንዲሁም ቦይንግ 787-900 የሚባለውን በጠቅላላ 14 ትልልቅ የመንገደኛ አውሮፕላኖች መቀመጫዎችን አንስተን የካርጎ (የጭነት) ትራንስፖርት እንዲሰጡ አዘጋጅተናቸዋል። ከዚህ በተጨማሪም በአፈጣጠራቸው ለካርጎ ትራንስፖርት እንዲሆኑ ተደርገው የተመረቱ 11 አውሮፕላኖች አሉን። ከዚህ ውስጥ ዘጠኙ ቦይንግ 777 ሲሆኑ፣ እያንዳንዳቸው ከመቶ ቶን በላይ በአንድ በረራ የሚያነሱ ናቸው፡፡ ሁለቱ ደግሞ በይንግ 737-800 የሚባለት እያንዳንዳቸው 22 ቶን ማንሳት የሚችሉ ናቸው። በመሆኑም በአጠቃላይ 25 አውሮፕላኖች ለዚህ የካርጎ ትራንስፖርት ዝግጁ ሆነዋል። 

ሪፖርተር:የክትባት ሥርጭቱ በአጠቃላይ የተመጠነ ቅዝቃዜ የሚፈልግ በመሆኑ አየር መንገዱ ከዚህ አኳያ ምን ያህል ተዘጋጅቷል?

አቶ ፍፁም:- እንደሰማችሁት ሁሉም የኮሮና መከላከያ ክትባት እያመረቱ የሚገኙ ኩባንያዎች የተለያየ የፓኬጂንግ ስፔሲፊኬሽንና የተለያየ የቅዝቃዜ መጠን ነው እያወጡ የሚገኙት። ለምሳሌ ፋይዘር የተባለው ኩባንያ ያወጣው የቅዝቃዜ መጠን ኔጌቲቭ 75 ነው። ይህም ማለት ክትባቱ ይህንን የቅዝቃዜ መጠን ሳይጨምር ሳይቀንስ ተጠብቆ መሠራጨት አለበት ማለት ነው። ሌሎቹ ደግሞ የተለያየ መጠን እያወጡ ነው፡፡ ለምሳሌ ኔጌቲቭ 80 ያለ አለ፣ ኔጌቲቭ 70 ያለ አለ። ይህ የቅዝቃዜ መጠን ክትባቱ ከአምራቹ ሲወጣ የተገለጸውን የቅዝቃዜ መጠን በሚሰጥ ማሸጊያ ውስጥ ሆኖ ማለት ነው። ነገር ግን በአምራቾቹ የተቀመጠውን የቅዝቃዜ መጠን ጠብቆ ክትባቱን ለማጓጓዝ የሚያስችል የቅዝቃዜና የሎጂስቲክስ ስፔስሲፊኬሽን እስካሁን አልወጣም። ይህም ማለት ለምሳሌ ፋይዘር ያወጣው ክትባት በማሸጊያ ውስጥ የሚያገኘውን ኔጌቲቭ 75 የቅዝቃዜ መጠን እንደያዘ ወደ ተፈለገበት ቦታ ለማጓጓዝ፣ ውጪያዊ የአየር ወይም የቅዝቃዜ መጠኑ ምን ያህል መሆን አለበት? ይህ ውጫዊው የቅዝቃዜ መጠን ለምን ያህል ጊዜ ቢቆይ ለክትባቱ የተቀመጠው የቅዝቃዜ መጠን ሳይዋዥቅ ማድረስ ይቻላል? የሚለው ስፔሲፊኬሽን ገና አልወጣም። ነገር ግን የኢትዮጵያ አየር መንገድ ካርጎና ሎጂስቲክስ አገልግሎት የተለያዩ በክፍል የተከፋፈሉ የቅዝቃዜ መጠኖችን የያዘ ትልቅ መጋዘን አዘጋጅቷል።

በተጨማሪም 230 ካሬ ሜትር ስፋት ያለው ዲፕ ፍሪዘር (ማቀዝቀዥ) አዘጋጅተናል። ይህ ዲፕ ፍሪዘር እስከ ኔጌቲቭ 25 ድረስ የሚወርድና የሚወጣ ማቀዝቀዣ ያለው ነው። ከዚህ ውጪም የተለያዩ የቅዝቃዜ መጠን ለምሳሌ ከዜሮ በታች ሁለት እስከ ስምንት፣ እንዲሁም 15 እስከ 25 የቅዝቃዜ መጠን የሚሰጡ ማቀዝቀዣዎች አሉን። ከዚህ በተጨማሪ ቀደም ሲል የገለጽኩልህን አውሮፕላኖች አዘጋጅተናል። በሰው ኃይል ረገድም የሚያስፈልገውን የቅዝቃዜ መጠን ተጠብቆ የሎጂስቲክስ ሥርዓቱን ለመምራት በአያታ (በዓለም አቀፍ የአየር ትራንስፖርት ማኅበር) ደረጃ ሥልጠና የወሰዱ ባለሙያዎች አሉን። የጥራት ማረጋገጫ ኦዲት ሥልጠና የወሰዱ ባለሙያዎችም እንዲሁ አዘጋጅተናል። ከዚህ በተጨማሪም የኮሮና መከላከያ ክትባትን ብቻ በተመለከተ የሚሠራ አሥራ አምስት አባላት ያሉት ግብረ ኃይል ተዋቅሯል። ከዚህ በተጨማሪም ክትባቱ ከማቀዝቀዣ መጋዘን ወጥቶ ወደ አውሮፕላን ለመጫን በሚጓዝበት ወቅት የቅዝቃዜ መጠኑ እንዳይዋዥቅ ቀዝቃዛ ኮንቴይነሮች ተዘጋጅተዋል። እነዚህ ቀዝቃዛ ኮንቴይነሮች የኢትዮጵያ አውሮፕላን መንገድ በሚበርባቸው አየር ማረፊያዎች በሁሉም ማግኘት የሚቻልበትን ሁኔታ አመቻችተናል።

ሪፖርተር:- ቀደም ሲል የገለጿቸው 25 አውሮፕላኖች የኮሮና መከላከያ ክትባት ብቻ ለመጓጓዝ የተዘጋጁ ናቸው?

አቶ ፍፁም:- አይደለም፡፡ እነዚህ አውሮፕላኖች አየር መንገዱ ለሚሰጠው አጠቃላይ የካርጎ ትራንስፖርት አገልግሎት የተዘጋጁ ናቸው። ስለዚህ እነዚህ 25 አውሮፕላኖች የኮሮና መለካከያ ክትባትንም ሆነ ሌሎች የንግድ ጭነቶችን የሚያጓጉዙ ናቸው። አየር መንገዱ 126 የመንገደኞች ማጓጓዣ አውሮፕላኖች አሉት፡፡ እነዚህም ከመንገደኛ መቀመጫ በታች ባለው ‹‹ቤቢ ሆልድ›› በተባለው ክፍላቸው ጭነት ይይዛሉ። 

ሪፖርተር:- ለኮሮና ወረርሽኝ መከላከያ ክትባት ለማጓጓዝ ተብሎ ለብቻ የተለዩ አውሮፕላኖች የሉም ማለት ነው?

አቶ ፍፁም:- እንደዚያ ማድረግ አያስፈልገንም፡፡ ምክንያቱም ለካርጎ ተብለው የተዘጋጁት 25 አውሮፕላኖች ሁሉም የኮሮና ክትባትንም ሆነ ሌሎች መድኃኒቶችን በሚፈለገው የቅዝቃዜ መጠን ማጓጓዝ ይችላሉ። የኮሮና ክትባት በሚጓጓዙበት ወቅት የሚያስፈልገው፣ ክትባቱ የሚጫንበትን አውሮፕላን ለሚያበረው ፓይለት ክትባቱ የሚፈልገውን የቅዝቃዜ መጠን በአውሮፕላኑ ላይ አስተካክሎ መብረር ብቻ ነው። 

ሪፖርተር:- ከቻይና በተጨማሪ ሌሎች አገሮችም የኮሮና ወረርሽኝ ክትባት አምርተው ለዓለም አገሮች ለማሠራጨት ዝግጅት ላይ መሆናቸው ይታወቃል። አየር መንገዱ የኮሮና ክትባት የሚፈልገውን የሎጂስቲክስ አገልግሎት የሚሰጠው በቻይና ለተመረተው ክትባት ብቻ ነው? ወይስ ከሌሎች አምራቾች ጋርም ይሠራል?

አቶ ፍፁም:- በቻይና ብቻ ልንወሰን አንችልም። ይህንን ክትባት የሚያመርቱ አገሮችን ለይተን የገበያ ፍላጎታቸውን እያጠናንና ከአምራቾቹ ጋርም እየተነጋገርን እንገኛለን። ከቻይና በተጨማሪ ካናዳሰሜን አሜሪካና አውሮፓ የኮሮና መከላከያ ክትባትን እያመረቱ ይገኛሉ፡፡ እኛም እነዚህን አምራቾች ለይተን በየአካባቢው የሚገኙ የኢትዮጵያ አየር መንገድ ኤሪያ ማኔጀሮች እንዲያነጋግሯቸው እየተደረገ ነው። ስለዚህ የእኛ ዝግጅት በመላው ዓለም ይህንን የኮሮና ክትባት ማሠራጨት ነው።

ሪፖርተር:- ከቻይናው ኩባንያ ሲያኖ ጋር ያደረጋችሁት ስምምነት ክትባቱን ወደ አፍሪካና ወደ መካከለኛው ምሥራቅ ለማጓጓዝ መሰለኝ?

አቶ ፍፁም :- ከሲያኖ ጋር የገባነው ስምምነት ከቻይና የታዘዘውን ክትባት ወደ የትኛውም አገር ለማጓጓዝ ነው። ስለዚህ መዳረሻችን የሚወሰነው ክትባቱን ከቻይና ባዘዘው አገር ላይ ነው። አፍሪካ ሊሆን ይችላል፣ አውሮፓ ወይም አሜሪካ አልያም የትም ሊሆን ይችላል። እኛ ግን የትም ይሁን የት አገልግሎቱን ለመስጠት ዝግጁ ነን። 

ሪፖርተር፡- አየር መንገዱ የገነባው ዘመናዊ የካርጎ መጋዘን ምን ያህል የኮሮና ክትባቶች የመያዝ አቅም አለው?

አቶ ፍፁም፡- የካርጎ መጋዘኑ ለአጠቃላይ ጭነቶች በሚስማማ ሁኔታ የተዘጋጀ ሲሆን፣ ለኮሮና ክትባትም ሆነ ለሌሎች ክትባቶችና ከሕክምና ጋር የሚገናኙ ጭነቶች የሚስተናገዱበት ራሱን የቻለ ዓለም አቀፍ ደረጃውን የጠበቀ ክፍል አለው። የካርጎ መጋዘኑ አጠቃላይ አቅም 336 ሺሕ ቶን ጭነት በዓመት ማስተናገድ የሚችል ሲሆን፣ በአሁኑ ወቅት 1.5 ሚሊዮን ኪሎ ግራም የተለያዩ ጭነቶችን በየቀኑ ይይዛል። ከዚህ ውስጥ 500 ቶን የሚሆነው ቅዝቃዜያቸው ተጠብቆ መቆየት ያለባቸውን ጭነቶች፣ ክትባቶችንና ሌሎች መድኃኒቶችን ጨምሮ መያዝ የሚችል ነው። ጭነቶቹ በሚፈልጉት የተለያየ የቅዝቃዜ መጠን ማለት ነው። በነገራችን ላይ ክትባቶች በመጋዘን ተከማችተው የሚቀመጡ አይደሉም። በፍጥነት በየጊዜው የሚንቀሳቀሱ ወይም የሚገቡና የሚወጡ ናቸው። የኮሮና ክትባትም እንዲሁ በፍጥነት የሚፈለግ በመሆኑ የሚከማች ሳይሆን በፍጥነት የሚንቀሳቀስ ነው። በመሆኑም የኮሮና ክትባትን በተመለከተ እንደተገኘው ገበያ የሚወሰን ሆኖ፣ በየቀኑ ግን እስከ 500 ቶን ድረስ የኮሮና ክትባትን ማስተናገድ የሚችል የካርጎ መጋዘን አለን ማለት ነው።

ሪፖርተር፡- በተለይ የኮሮና ወረርሽኝ ከተከሰተ በኋላ አየር መንገዱ የካርጎ ትራንስፖርት አገልግሎቱ ላይ ሰፊ ትኩረት ሰጥቶ እየሠራ መሆኑ ይታወቃል፡፡ በዚህም በጣም ውጤታማ እንደሆነ ይነገራል። እርስዎ የካርጎ ትራንስፖርት አገልግሎቱን እንዴት ይገልጹታል?

አቶ ፍፁም፡- የካርጎ ትራንስፖርት አገልግሎታችን በተለይ በአሁኑ ወቅት የኢትዮጵያ አየር መንገድን ሕይወት የታደገ ሆኗል። አየር መንገዱ አሁን ባለንበት አስቸጋሪ የኮሮና ወረርሽኝ ወቅት ካገኘው አጠቃላይ ገቢ ውስጥ 70 በመቶ የሆነውን ያገኘው ከካርጎ ትራንስፖርት አገልግሎቱ ነው፡፡ ምክንያቱም የመንገደኞች ገበያ በኮሮና ምክንያት ከሞላ ጎደል ሙሉ በሙሉ ሊባል በሚችል ሁኔታ ስለቆመ ነው። ይህ ሁኔታ አሁንም ለተወሰነ ጊዜ ይቀጥላል ብለን ነው የምናስበው። በመሆኑም አየር መንገዱ በዚሁ በካርጎ ትራንስፖርት ላይ ትኩረቱን አድርጎ ይሠራል፡፡ በቀጣዮቹ ጊዜያትም ይህ የካርጎ ቢዝነስ 50 እስከ 60 በመቶ የሚሆነውን የአየር መንገዱን ገቢ ይይዛል ብለን ነው የምንገምተው። 

ተዛማጅ ፅሁፎች

- Advertisment -

ትኩስ ፅሁፎች ለማግኘት

በብዛት የተነበቡ ፅሁፎች

ለልማት ፕሮጀክቶች የሚውሉ ተሽከርካሪዎች ከቀረጥ ነፃ እንዲገቡ ተፈቀደ

የገንዘብ ሚኒስቴር በማምረቻ ኢንዱስትሪ፣ በግብርና፣ በሎጀስቲክስ፣ በኮንስትራክሽን፣ የባለኮከብ ሆቴሎች...

የኤክሳይስ ታክስ ረቂቅ አዋጅ ፓርላማው ያፀደቀውን አዋጅ የሚጥሱ ድንጋጌዎችን በማካተቱ እንዳይፀድቅ ተጠየቀ

ሰሞኑን ለሕዝብ ተወካዮች ምክር ቤት የቀረበው የኤክሳይስ ታክስ ማሻሻያ...

የገጠር መሬት ማሻሻያና የመሬት ባለቤትነት ጥያቄ በኢትዮጵያ

በኢትዮጵያ ከቅርብ ወራት ወዲህ መሬትን በተመለከተ ጠንከር ያሉ የለውጥ...

የውጭ ኢንቨስትመንት ባንኮች በኢትዮጵያ የካፒታል ገበያ እንዲሠማሩ የሚፈቅድ መመርያ እየተዘጋጀ ነው

በቅርቡ ወደ ሥራ ይገባል ተብሎ የሚጠበቀው የካፒታል ገበያ ባለሥልጣን፣...