Monday, June 24, 2024
- ማስታወቂያ -
- ማስታወቂያ -

ኢንዱስትሪዎች የሚፈተኑበት ጊዜና የአገሪቱ የወጪ ንግድ

spot_img

ተዛማጅ ፅሁፎች

የኢትዮጵያ የወጪ ንግድ ገቢን ለማሳደግ የተለያዩ አማራጮች እየታዩ ነው፡፡ በቅርቡ ይፋ በተደረገው የመንግሥት ውጥን መሠረት በአሥር ዓመቱ መጨረሻ ላይ የኢትዮጵያ ዓመታዊ የወጪ ንግድ ገቢ መጠን ከአሥር ቢሊዮን ዶላር በላይ ማድረስ ነው፡፡

በዚህ መሪ ዕቅድ የአገሪቱ ዋነኛ የወጪ ንግድ ምርቶች በመሆን ከሚታወቁት የግብርና ምርቶች ባሻገር፣ ሌሎች የንግድ ዘርፎችም የወጪ ንግድ ገቢ መገኛ እንዲሆኑ ታሳቢ ተደርጓል፡፡

ከወጪ ንግድ ገቢ ዕቅዱ ባሻገር ከውጭ የሚገቡ ምርቶችን በአገር ውስጥ ምርት የመተካቱ ተግባርም ከዚሁ ጋር የተያያዘ ነው፡፡ በዋነኛነት ግን የአገሪቱ የወጪ ንግድ ገቢን ማሳደጉ ላይ በብርቱ መሠራት እንደሚኖርበት ታምኖ፣ በአሥር ዓመታት ዕቅድ ውስጥ እስካሁን የውጭ ምንዛሪ በማስገኘት ረገድ እምብዛም የማይታወቁ ምርቶችን ለዓለም ገበያ ለማቅረብ እየተሠራ መሆኑ ታውቋል፡፡  

አገሪቱን የወጪ ንግድ ገቢ ያሳድጋሉ፣ በአግባቡ ከተሠራም የውጭ ምንዛሪ ያስገኛሉ ተብለው ከተለዩት ውስጥ የኬሚካልና የኮንስትራክሽን ግብዓቶች ዘርፍ ተጠቃሽ ነው፡፡ ባለፈው ሐሙስ የኬሚካልና ኮንስትራክሽን ግብዓቶች ኢንዱስትሪ ልማት ኢንስቲትዩት አገር አቀፍ የኤክስፖት ንቅናቄ ላይ በተሰናዳ መድረክ ላይ እንደተገለጸው፣ የኬሚካልና የኮንስትራክሽን ግብዓቶች ዘርፍ በቀጣዩ አሥር ዓመታት 1.1 ቢሊዮን ዶላር ያህል የውጭ ምንዛሪ ለማግኘት ዕቅድ ተይዟል፡፡

በኢንስቲትዩቱ የጎማና የፕላስቲክ ኢንዱስትሪ ልማት ዳይሬክቶሬት ዳይሬክተር ኢንጂነር ዮናስ ባቀረቡት የዳሰሳ ጽሑፍ፣ የኬሚካልና የኮንስትራክሽን ዘርፍ የአገር ውስጥ ፍላጎቶችን ከማሟላት ባለፈ፣ ለውጭ ምንዛሪ ግኝት ምቹ የሆነ ዕድል ያለው በመሆኑ ይህ ታሳቢ ተደርጎ ዕቅድ መያዙን ጠቁመዋል፡፡

የንግድና ኢንዱስትሪ ሚኒስትር ዴኤታው አምባሳደር ምሥጋናው አረጋም፣  ዘርፉ ከፍተኛ አቅም ያለው እንደሆነ በመጥቀስ፣ በአፍሪካ ደረጃ ተወዳዳሪ በመሆን ትልቅ ሚና መጫወት እንደሚችል ተናግረዋል፡፡ በመሆኑም ዘርፉ የአገር ውስጥ ፍላጎት ከማሟላት ባሻገር ለውጭ ምንዛሪ ግኝት አቅም ያለው በመሆኑ ዘርፉ በቀጣይ አሥር ዓመታት 1.1 ቢሊዮን ዶላር ማስገኘት ይጠበቅበታል፡፡ በተለይም በኢትዮጵያ የኮንስትራክሽን ዘርፉ እያደገና እየሰፋ በመሄድ ላይ ቢሆንም የኮንስትራክሽን ግብዓት ምርቶች ግን ባለፉት 10 እና 20 ዓመታት አገሪቱ ታስገባ ከነበረው በከፍተኛ ደረጃ እየጨመረ እንጂ በአገር ውስጥ እየተመረተ እንዳልነበር ተገልጿል፡፡ በመሆኑም የኮንስትራክሽን ግብዓት ዘርፍን በአገር ውስጥ እንዲመረት ማበረታታት እንደ ስትራቴጂክ የሚታይ መሆኑን ጠቅሰዋል፡፡ ይህንን ዘርፍ ማሳደግ የቅድሚያ ቅድሚያ የሚሰጠው መሆኑንም በማመልከት፣ ይህንን ውጥን ለማሳካት በዘርፉ የተሰማሩ አምራቾች ጉልህ ሚና የሚጠበቅባቸው ይሆናልም ብለዋል፡፡ በዕለቱ የተዘጋጀው ንቅናቄ መድረክ አንዱ ዓላማ ይህ ስለመሆኑም አመልክተዋል፡፡

ኢንጂነር ዮናስ በሰጡት ተጨማሪ ማብራሪያ ደግሞ፣ ዘርፉ የሚጠበቅበትን የውጭ ምንዛሪ ለማስገኘት በዚህ ዘርፍ ያሉ ኢንዱስትሪዎች ከሚያመርቱት ምርት በየዓመቱ ከአምስት እስከ አሥር በመቶ ኤክስፖርት ማድረግ እንዲችሉ ለማለማመድ ሥራዎች እየተሠሩ መሆኑን ጠቅሰዋል፡፡ ‹‹ምንም እንኳን ከ40-60 በመቶ ከሚያመርቱት ምርት ኤክስፖርት ለማድረግ የኢንቨስትመንት ፈቃድ ያወጡ ባለሀብቶች እንዳሉ ብናውቅም፣ ቀስ በቀስ ከ5-10 በመቶ ለውጭ ገበያ ማቅረብ ግድ ስለመሆኑም አመልክተዋል፡፡

ለዘርፉ በተቀመጠው ግብ መሠረት ኢንዱስትሪዎቹ በየዓመቱ በአማካይ 120 ሚሊዮን ዶላር ማስገኘት ይጠበቅባቸዋል፡፡ በአሁኑ ወቅት ከዚህ ዘርፍ በዓመት በአማካይ እየተገኘ ያለው ወደ 20 ሚሊዮን ዶላር ሲሆን፣ በአዲሱ ዕቅድ መሠረት ዓመታዊ የውጭ ምንዛሪ ገበያቸው በአምስት እጅ ወይም በመቶ ሚሊዮን ብር ጨምሮ 120 ሚሊዮን ዶላር ማስገኘት ይጠበቅባቸዋል፡፡

‹‹ይህ ዕቅድ የቱንም ያህል የተለጠጠ ቢሆንም፣ ይህንን ማሳካት ግድ የሚለን አስገዳጅ ሁኔታ ላይ ነን›› ያሉት ኢንጂነር ዮናስ፣ ይህንን ማሳካት እንደ ሞት ሽረት የሚታይ ስለመሆኑም ከሰጡት ማብራሪያ ለመገንዘብ ተችሏል፡፡ ባለፉት አምስት ዓመታት በዘርፉ ያሉ ኢንዱስትሪዎች 196 ቢሊዮን ብር ዋጋ ያላቸው ምርቶች ማምረታቸውን ያስታወሱት ዳይሬክተሩ፣ ይህ ማለት በየዓመቱ በአማካይ 39.2 ቢሊዮን ዋጋ ያላቸው ምርቶች በዚህ ዘርፍ ብቻ መመረታቸውን ያሳያል ብለዋል፡፡ ወደፊት በዘርፉ የምርት ጭማሪ የሚጠበቅ በመሆኑ በዓመት 120 ሚሊዮን ዶላር መላክ እንደሚቻልና አጽንኦት ሰጥተው ገልጸዋል፡፡ በገበያ መድረሻ ረገድም ወደ ምሥራቅ አውሮፓ ጭምር ለመላክ የሚቻልባቸው ዕድሎች መኖራቸውን ጠቅሰዋል፡፡ ለዚህም ተፈላጊ የሚባሉ ምርቶች ገበያ ስለመኖሩ የተደረጉ የዳሰሳ ጥናቶች አመላክተዋል፡፡

በዚህ ዘርፍ ውስጥ ከተካተቱት ንዑስ ዘርፎች ያስገኛሉ የተባለው የውጭ ምንዛሪ ተለይቶ የተመቀመጠ ሲሆን፣ በኬሚካል ንዑስ ዘርፍ የውጭ ንግድ ዕቅድ በሚቀጥሉት አሥር ዓመታት ውስጥ ከመሠረታዊ ኬሚካልና ማዳበሪያ የ35 ሚሊዮን ዶላር ለማግኘት ታሳቢ ተደርጓል፡፡ ከመሠረታዊ ኬሚካል ምርቶች ደግሞ ወደ 11 ሚሊዮን ዶላር፣ ከሳሙናና ከቀለም ምርቶች ሦስት ሚሊዮን ዶላር፣ በጎማና ፕላስቲክ 105 ሚሊዮን ዶላር፣ ወረቀትና የወረቀት ውጤቶች 29 ሚሊዮን ዶላር እንደሚያስገኙ ታሳቢ መደረጉን የኢንጂነር ዮናስ ማብራሪያ ያመለክታል፡፡

በኮንስትራክሽንና ግብዓቶች ንዑስ ዘርፍ በኩልም እንደ ሲሚንቶና ተያያዥ ምርቶችን የሚያመርቱ ኢንዱስትሪዎች በአሥር ዓመት ውስጥ 908 ሚሊዮን ዶላር የውጭ ምንዛሪ ያስገኛሉ ተብሎ ዕቅድ የተያዘ ሲሆን፣ በዚህ ንዑስ ዘርፍ ከሲሚንቶ ብቻ 695 ሚሊዮን ዶላር ገቢ የሚጠበቅ መሆኑን ለማወቅ ተችሏል፡፡

ከመስታወትና ተዛማች ውጤቶች 115 ሚሊዮን ዶላር፣ በእንጨትና ተዛማች ውጤቶች አምራቾች ደግሞ 49 ሚሊዮን ዶላር ያስገኛሉ ተብሎ ታሳቢ ተደርጎ እየተሠራ ነው፡፡  በኢንስቲትዩቱ ደረጃ ደግሞ ከኬሚካልና ከኮንስትራክሽን ግብዓቶች 1.1 ቢሊዮን ዶላር ኤክስፖርት ለማድረግ መታቀዱንም ኢንጂነር ዮናስ ገልጸዋል፡፡ የኬሚካልና የኮንስትራክሽን ዘርፍ ግብዓቶችን ለማስገባትና ለመለዋወጫ ዕቃዎች በየዓመቱ አንድ ቢሊዮን ዶላር የውጭ ምንዛሪ እንደሚወጣ ያስታወሱት ኢንጂነሩ፣ ከዘርፉ በአሥር ዓመት ይገኛል ተብሎ ከታቀደው 1.1 ቢሊዮን ዶላር በተጨማሪ፣ የዘርፉን ገቢ በእጅጉ የሚያሳድግ ዕድል ስለመኖሩም ጠቅሰዋል፡፡ እንደ እሳቸው ገለጻ፣ የብረት ኢንዱስትሪ፣ የማዳበሪያና የኬሚካል ኮምፕሌክሶች፣ የተፈጥሮ ጋዝ ግኝት ወደ ምርት ቀይሮ ለገበያ ማቅረብ ከተቻለ በየዓመቱ እስከ ሁለት ቢሊዮን ዶላር ድረስ የኤክስፖርት ገቢ ለማግኘት እንደሚቻል ገልጸዋል፡፡

ይህም ከዚህ ዘርፍ በአሥር ዓመት 1.1 ቢሊዮን ዶላር የሚለውን ታሪክ ቀይሮ በየዓመቱ ሁለት ቢሊዮን ዶላር ተጨማሪ የውጭ ምንዛሪ ሊገኝ የሚቻበት ዕድል ነው ብለዋል፡፡ ይህም ‹‹በመንግሥትና በግሉ ዘርፍ አጋርነት ከተፈጥሮ ጋዝ ተነስተን መሠረታዊ ኬሚካልና የኬሚካል ኮምፕሌክስ በፍጥነት አምርተን ለምርት ካደረሰን በእርግጠኝነት በየዓመቱ ሁለት ቢሊዮን ዶላር ኤክስፖርት እናደርጋለን፤›› ሲሉ ተናግረዋል፡፡ ይህ ዕቅድ በአሥር ዓመት ዕቅድ ውስጥ ባይካተትም በቀጣይ ዓመታት ተግባራዊ ለማድረግ እየተሠራበት መሆኑን ጠቅሰዋል፡፡ ይህም በዓመት እስከ አንድ ሚሊዮን ቶን ማምረት የሚችል የኢንዱስትሪ ኮምፕሌክስ በማቋቋም አብላጫውን እጅ ኤክስፖርት በማድረግ የሚሠራ ይሆናል፡፡

በኬሚካልና ኮንስትራክሽን ግብዓቶች ዘርፍ ኢንዱስትሪዎች መስፋፋት የግድ የሚልበት ሌላው ምክንያት ደግሞ በየጊዜው እየጨመረ ያለውን ፍላጎት በአገር ውስጥ በማምረት ከውጭ የሚገባውን መተካት አስፈላጊ በመሆኑ ነው፡፡ ለዚህም እንደ ምሳሌ የተጠቀሱት፣ ባለፉት አምስት ዓመታት ለኬሚካልና ለኮንስትራሽን ግብዓቶች ለሚሆኑ ምርቶች ከፍተኛ ወጪ መውጣቱን ነው፡፡ በተገለጸው ጊዜ ውስጥ ኬሚካል ለማስገባት 8.7 ቢሊዮን ዶላር ወጪ የተደረገ ሲሆን፣ 2.1 ቶን የሚሆን የኮንስትራክሽን ግብዓቶችን ለማስገባት ደግሞ 1.2 ቢሊዮን ዶላር ወጪ ተደርጓል፡፡ በአጠቃላይ ሲታይ ለዘርፉ ግብዓት 9.8 ቢሊዮን ዶላር ወጪ መውጣቱን ነው፡፡ ወደፊትም ለዘርፉ የሚያስፈልገው ግብዓት የሚጨምር ሲሆን፣ በዚያው ልክ ደግሞ አምርቶ ለውጭ ገበያ መላክ የግድ መሆኑንም ያሳያል፡፡ ከዚህ በኋላም ለኬሚካል ውጤቶች ዘርፍ ወደ 45 ሚሊዮን ቶን ግብዓቶች ሊገቡ እንደሚችሉና 46.6 ቢሊዮን ዶላር ወጪ ሊጠይቅ እንደሚችልም ታሳቢ ተደርጓል፡፡ የኮንስትራክሽን ግብዓቶች 4.1 ቶን ይገባል ተብሎ የተገመተ ሲሆን፣ ይህም 3.6 ቢሊዮን ዶላር ይጠይቃል፡፡ ይህም 50 ቢሊዮን ዶላር ይሆናል፡፡ ስለዚህ አምራቾች የአገር ውስጥ ፍላጎትን ከማርካትና ከውጭ የሚገባውን ምርት ከመተካት ሌላ ምርትን ለውጭ ገበያ ማቅረብ የግድ ስለሚሆን ከአሁኑ ማለማመድ ያስፈልጋል ተብሏል፡፡

‹‹ከምርቶቻችሁ ከ5 እስከ 10 በመቶ የሚሆነውን ቅርብ ለሆኑ ለጎረቤት አገሮች በመላክ ተወዳዳሪ መሆን ትችላላችሁ፤›› ያሉት ኢንጂነር ዮናስ፣ ‹‹ይህንን እየተገበሩ አለመሄድም ዋጋ ሊያስከፍል ይችላል፤›› ሲሉ ጠቁመዋል፡፡ ለዚህ አባባላቸው እንደ ምክንያት ከጠቀሱት ውስጥ፣ ‹‹ኢትዮጵያ የዓለም አባል ድርጅት ስትሆን ከመንግሥት የሚደረግ የተለየ ድጋፍ እንደማይኖርና ሁሉም በየራሱ ተወዳዳሪ መሆን የሚጠበቅበት ነው፤›› የሚለው ይገኝበታል፡፡ ተወዳዳሪ መሆን ካልተቻለ ግን ከገበያ የሚወጣ መሆኑንም በመግለጽ የአገር ውስጥ አምራቾች ካልበረቱና ወደ ውጭ የመላክ ልምዳቸውን ካላዳበሩ ከጨዋታ ውጪ ሊሆኑ የሚችሉ መሆኑንም አመልክተዋል፡፡ ‹‹ይህ ማስፈራሪያ አይደለም፡፡ የምታውቁትና የምታዩት ጉዳይ ነው፤›› በማለትም፣ ሁኔታው አማራጭ የሌለው መሆኑን ገልጸዋል፡፡ ኢንዱስትሪዎች በወጪ ንግድ ላይ ያላቸውን ተሳትፎ እያሳደጉ መምጣትና ተወዳዳሪ ሆኖ መውጣት አስፈላጊ የሚሆንበት ሌላው ምክንያት ደግሞ በሚቀጥለው ወር በይፋ ሥራ የሚጀምረው የአፍሪካ ነፃ የንግድ ቀጣና ስምምነት መተግበር መሆኑን ደግሞ አምባሳደር ምሥጋናው ገልጸዋል፡፡ በመሆኑም አሁን ባለው ሁኔታ ኢንዱስትሪዎች ምርት ጨምረው፣ ጥራት አክለው ለመዝለቅ ደግሞ ዘርፉ ያለበትን ችግሮች በሙሉ ለመፍታት መንግሥት ዕገዛ ያደርጋልም ተብሏል፡፡    

ኢንጂነር ዮናስም በዚህ ዘርፍ የተሰማሩ አምራቾች ያለባቸውን ችግሮች በጋራ ለማፍታት የሚሠራ መሆኑን ነው፡፡ ተወዳዳሪ ሆኖ ለመቀጠል ከአሁኑ መለማመድ ግድ የሚሆንም በተለያዩ አቅጣጫዎች ተወዳዳሪነትን የሚጠይቁ ገፊ ጉዳዮች እየጨመሩ በመሆኑ ጭምር ነው፡፡ በቅርቡ አገራችን የአፍሪካ ነፃ የንግድ ቀጣና ሙሉ ለሙሉ አባል የምትሆንና ከሌሎች የአፍሪካ አገሮች በኬሚካል በፕላስቲክ፣ በኮንስትራክሽን ኢንዱስትሪ ተወዳዳሪ ኩባንያዎች ገበያውን ለመቀላቀል ትልቅ ምቹ ሁኔታ ስለሚፈጥርላቸው ይህንን ማሰብ ተገቢ መሆኑ አምባሳደር ምሥጋናው አክለዋል፡፡ አያይዘውም፣ ‹‹የአገራችን ኢንዱስትሪዎች አሁን የምትወዳደሩት አገር ውስጥ ካሉ ኢንዱስትዎች ጋር ሳይሆን ከሌሎች አገሮች ጋር ጭምር በመሆኑ በዚህ ረገድ አቅማችሁን ማሳደግ ይኖርባችኋል፡፡ በአፍረካ ደረጃ ያሉ የገበያ ዕድሎችንም መጠቀም ይኖርባችኋል፤›› ብለዋል፡፡

ዘርፉ አሉበት የተባሉትን ችግሮች ሁሉ በሚኒስቴር መሥሪያ ቤታቸው በኩል ስለመጠናቱ የገለጹት አምባሳደር ምሥጋናው፣ ችግሮቹን በመለየትም ቅድሚያ ሰጥተን የምንፈታቸው ችግሮችንም ለይተናል ብለዋል፡፡

በተለይም ከውጭ ምንዛሪ እጥረት ጋር በተያያዙ ያሉ ችግችን ለመፍታት ሚኒስቴሩ ከብሔራዊ ማክሮ ኢኮኖሚ ቡድን ጋር በመሆን የተለያዩ ዕርምጃዎች እየወሰደ ነው፡፡ የግብዓት እጥረታቸውን ለመቅረፍ እንዲሁም ለመፍታት የሚያስችሉ ዝግጅቶች ስለመደረጋቸው አስታውሰው፣ ለዚህ ዘርፍ እንቅፋት የሆኑ ችሮችን እያረሙ መሄድ ብዙ ጠቀሜታ እንዳለውም ተናግረዋል፡፡ በተለይ የኮንስትራክሽን ዘርፉን በማነቃቃቱ ረገድ ዘርፉ ትልቅ ሚና ስለሚኖረው ከመንግሥት ጋር ተቀናጅቶ መሥራት ከዚህ ኢንዱስትሪ የሚጠበቅ መሆኑን ገልጸዋል፡፡ የግልና የመንግሥት አጋርነት መጠናከር እንዳለበትም ገልጸዋል፡፡ መንግሥት ለዚህ ዘርፍ ያለው አመለካከት በዚህ መልኩ ቢገለጽም፣ ይህን የመንግሥት ውጥን አሁን ባለው አሠራር ለመተግበር የሚከብድ ስለመሆኑ በዕለቱ በመድረኩ የተገኙ የተለያዩ ኢንዱስትሪ ባለቤቶች ሳይጠቁሙ አላለፉም፡፡ በተለይ በሳሙናና ተያያዥ ምርቶቻችን የሚያመርቱ ኢንዱስትሪ ባለንብረቶች በተለይ በአፍሪካ ደረጃ ተወዳዳሪ መሆን ይችላል የሚለውን ሐሳብ መንግሥት ድጋሚ መፈተሽ እንዳለበት ጠቅሰዋል፡፡

‹‹ከዓመታዊ ምርታቸው ከ5-10 በመቶ ቢያንስ ለጎረቤት አገሮች መላክ ይኖባችኋል መባሉ በትክክል ስለመተግበሩ ጥርጣሬ አሳድሮብናል፤›› ያሉት የዘርፉ ተዋናዮች፣ ተመሳሳይ ምርት የሚያመርቱ ፋብሪካዎች በአጎራባች አገሮች በስፋት መኖራቸው እየታወቀ ይሳሳል ብሎ ለመገመት አስቸጋሪ መሆኑን ጠቅሰዋል፡፡ ምናልባት በደቡብ ሱዳን ካልሆነ በቀር በሌሎች አገሮች ተመሳሳይ ምርት የሚያመርቱ ኢንዱስትሪዎች በስፋት እየተንቀሳቀሱ በመሆኑ፣ እነሱን ሰብሮ በገበያው ተወዳዳሪ መሆን እንደሚያሳስባቸው ጠቁመዋል፡፡ ስለዚህ ተወዳዳሪ ለመሆን አሁንም መንግሥት ማሻሻያዎችን ማድረግ አለበት ብለዋል፡፡

በእንጨትና በእንጨት ውጤቶች ሥራ ላይ ከተሰማሩ ኩባንያዎችን በመወከል አስተያየት የተሰነዘረ ሲሆን፣ በዚህ ዘርፍ የሚያመርቱ የፈርኒቸር ምርቶችን ለመላክ የተደረጉ ሙከራዎች አሁን ባለው አሠራር አትራፊ እንዳላደረጋቸው ጠቅሰዋል፡፡ የገበያ ዕድሉ ቢኖርም ከውጭ ምንዛሪ እጥረት ጀምሮ ያለው ጫና ከዚህ አምርቶ ከመላክ፣ ከውጭ አምጥቶ ከዚህ ውስጥ አዋጭ እንዲሆን አድርጎታል በማለት ያላቸውን ሥጋት ገልጸዋል፡፡ በመንግሥት በኩል ግን ያሉ ችግሮች የተለዩ በመሆኑና በዕለቱ የተነሱ ሥጋቶችም ታሳቢ ተደርገው የቅድሚያ ቅድሚያ የሚሰጣቸውን በመለየት፣ ችግሮቹን ለመቅረፍ ዝግጁ መሆኑን የሚያመለክት ነው፡፡ አሁን ባለው ሁኔታ በዚህ ዘርፍም ሆነ በሌሎች ዘርፎች በኢንዱስትሪ ውስጥ ይደርስበታል የተባለውን ውጭ ምንዛሪ ገቢ ለመድረስ ብቻ ሳይሆን፣ የአገሪቱ ኢንዱስትሪዎች ውስጥ ተወዳዳሪ ሆኖ ለመዝለቅ የግድ በወጪ ንግድ ላይ መሰማራት ግድ እያለ መሆኑ ነው፡፡ በተለይ የአፍሪካ ነፃ የንግድ ቀጣና መተግበርና በቀጣይም የዓለም ንግድ ድርጅት አባል ሲሆን፣ እንደ ከዚህ ቀደሙ በአገር ውስጥ ብቻ በመወዳደር፣ እንዲሁም በአነስተኛ አቅም በማምረት ብቻ ገበያ ላይ መቆየት አስቸጋሪ ስለመሆኑ በዕለቱ ከቀረቡት የተለያዩ ሐሳቦች ለመረዳት ተችሏል፡፡ ይህም የአገር ውስጥ ኢንዱስትሪዎች ህልውና በውድድር ላይ መመሥረት ያለበት እንደሆነና በእስካሁኑ አካሄድ መቀጠል ከባድ መሆኑ ነው፡፡

መንግሥት ግን በራሱ የያዘውን ውጥን ለማሳካት እነዚህን ኢንዱስትሪዎች በመያዝ ብቻ የሚፈጸም በመሆኑ፣ አሉ የተባሉ ችግሮችን ለመፍታት ዝግጁ ነኝ የሚለውን አመለካከት በንግድ ኢንዱስትሪ የሥራ ኃላፊዎች በኩል ተደጋግሞ ተጠቅሷል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች