Tuesday, January 31, 2023
- ማስታወቂያ -
- ማስታወቂያ -

ሚኒስቴሩ 15 ማዕድናትና የነዳጅ ሀብት ለውጭና ለአገር ውስጥ ኢንቨስተሮች በጨረታ ሊቀርብ ነው

- ማስታወቂያ -

ተዛማጅ ፅሁፎች

ሚድሮክ ወርቅ በሚቀጥለው ወር ምርት ሊጀምር መሆኑ ተጠቆመ

የማዕድንና ነዳጅ ሚኒስቴር አሥራ አምስት ማዕድናትና የነዳጅ ሀብት ለውጭና ለአገር ውስጥ ኢንቨስተሮች ለጨረታ ሊያቀርብ መሆኑን አስታወቀ፡፡

በሚኒስቴሩ ጥናት የተደረገባቸው ለአገር ውስጥ ፍጆታና ለውጭ ንግድ የሚውሉ ሲሚንቶ፣ የከሰል ድንጋይ፣ ማዳበሪያ፣ ብረት፣ ወርቅ፣ ታንታለም፣ ጀምስቶንና የነዳጅ ሀብት ለኢንቨስትመንት ክፍት መደረጋቸውን ታኅሳስ 20 ቀን 2013 ዓ.ም. ለመገናኛ ብዙኃን በተሰጠው መግለጫ ተጠቁሟል፡፡

በትግራይ፣ በአፋር፣ በኦሮሚያ፣ በአማራ፣ በሶማሌና በቤኒሻንጉል ጉምዝ ክልሎች የሚገኙ የማዕድንና የነዳጅ ዕምቅ ሀብቶች ጥናት የተደረገባቸው መሆኑን፣ ሁሉም በመረጃና በጥናት የተደገፉ በመሆናቸው ሥራውን ቀልጣፋ እንደሚያደርግ የማዕድንና ነዳጅ ሚኒስትሩ ታከለ ኡማ (ኢንጂነር) ተናግረዋል፡፡

ለማዕድንና ለነዳጅ ሀብቶች በተለያዩ ጊዜያት የተከናወኑ ጥናቶችን በማደራጀት ለኢንቨስትመንት ዝግጁ የሆኑ ቦታዎች፣ እንዲሁም ብዛትና ዓይነታቸው በጥናቱ መካተቱ ተገልጿል፡፡

የማዕድንና የነዳጅ ሚኒስቴር የፔትሮሊየም ፕላንና ልማት ፈቃድ አሰጣጥ ዳይሬክተር ሰሎሞን ካሳ (ዶ/ር)፣ በሶማሌ ክልል ኦጋዴን በሦስት ቦታዎች በጋምቤላ በአንድ ቦታ፣ በደቡብ ኦሞ በአንድ ቦታ፣ እንዲሁም በማዕከላዊ ስምጥ ሸለቆ ዕምቅ የነዳጅ ሀብት መኖሩን ገልጸዋል፡፡

በዚህም ከፍተኛ ቦታዎችን የያዘ የነዳጅ ሀብት መኖሩን አስረድተው፣ በዚህ ዘርፍ ባለሀብቶች መሰማራት ከፈለጉ ክፍት መሆኑን ተናግረዋል፡፡

በዚህ ዘርፍ ለሚሰማሩ ባለሀብቶች ከታኅሳስ 20 ቀን 2013 ዓ.ም. ጀምሮ ክፍት መደረጉን ሚኒስትሩ ገልጸዋል፡፡

በማዕድንና ነዳጅ ላይ የሚሰማሩ ባለሀብቶች በጨረታ፣ እንዲሁም በዘርፉ የነበራቸው ተሳትፎና ታማኝነት፣ ያስመዘገቡት ካፒታል ትክክለኛ መሆኑ ከታመነበት ዕድሉን እንደሚሰጣቸው ተገልጿል፡፡ ለጨረታ ክፍት የተደረጉት የማዕድንና ነዳጅ ዘርፎች ሥራቸውን በትክክል ማከናወን ባለመቻላቸው ፈቃዳቸውን በተነጠቁ ድርጅቶች የሚተኩ ሲሆን፣ ፕሮጀክቶቹ በቅርብ ጊዜ ለዓለም አቀፍ ጨረታ ክፍት ይደረጋሉ ተብሏል፡፡

የማዕድንና ነዳጅ ዘርፍ ቤተ ሙከራ፣ የማዕድን ቁፋሮና የወርቅ ማጣሪያ ለማቋቋም ከባለሀብቶች ጋር ለመሥራት መታቀዱም ተገልጿል፡፡

እስካሁን በነዳጅ ዘርፍ የተሰማሩ ሦስት ኩባንያዎች ያሉ ሲሆን፣ 63 ያህሉ በተገቢው መንገድ ሥራቸውን ባለማከናወናቸው ፈቃዳቸው መሰረዙ የሚታወስ ነው፡፡ ፈቃድ ስረዛው ማለትም ሥራቸውን በአግባቡ የማያከናውኑ ድርጅቶች ካሉ በቀጣይም ተግባራዊ እንደሚደረግባቸው ተጠቁሟል፡፡    

በተያያዘ ዜና ከአካባቢ ብክለት ጋር በተያያዘ የምርት ፈቃዱ ከሁለት ዓመታት በላይ ታግዶበት የነበረው ሚድሮክ ወርቅ፣ በለገደንቢ የወርቅ ምርት በሚቀጥለው ወር እንደሚጀምር የሪፖርተር ምንጮች ገልጸዋል፡፡ በአካባቢው ማኅበረሰብ በተነሳ ተቃውሞ ምክንያት የማምረት ፈቃዱ ታግዶበት የነበረው ሚድሮክ ወርቅ፣ የተነሱበት ጥያቄዎች ምላሽ በማግኘታቸውና የአካባቢውን ማኅበረሰብ ተጠቃሚ እንደሚያደርግ ማረጋገጥ በመቻሉ፣ ማዕድንና ነዳጅ ሚኒስቴር እግዱን እንዳነሳለትና በቀጣይ ወር (ጥር ወር ውስጥ) የማምረት ሥራውን እንደሚጀምር ሚኒስትሩ ታከለ ኡማ (ኢንጂነር) መናገራቸውን ሪፖርተር ለማወቅ ችሏል፡፡ 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች