Sunday, June 23, 2024
- ማስታወቂያ -
- ማስታወቂያ -

አሃዱ ባንክ በተከፈለ 540 ሚሊዮን ብር ተመሠረተ

spot_img

ተዛማጅ ፅሁፎች

የኢትዮጵያን የባንክ ኢንዱስትሪ ይቀላቀላሉ ተብለው ከሚጠበቁ ከ20 የሚበልጡ የግል ባንኮች ውስጥ አንዱ የሆነው አሃዱ ባንክ አክሲዮን ማኅበር፣ በ540 ሚሊዮን ብር የተከፈለ ካፒታል ምሥረታውን ይፋ አደረገ፡፡

በአክሲዮን ሽያጭ ላይ የቆየው አሃዱ ባንክ ቅዳሜ ታኅሳስ 24 ቀን 2013 ዓ.ም. በጊዮን ሆቴል ባካሄደው የምሥረታ ጉባዔ እንዳስታወቀው፣ እስካሁን ባካሄደው የአክሲዮን ሽያጭ የ760 ሚሊዮን ብር የተፈረመ ካፒታልና 540 ሚሊዮን ብር የተከፈለ ካፒታል ማሰባሰብ ችሏል፡፡

በኢትዮጵያ ብሔራዊ ባንክ ድንጋጌ መሠረት አንድ ባንክ ለማቋቋም የሚያስፈልገው 500 ሚሊዮን ብር የተከፈለ ካፒታል ነው፡፡ አሃዱ ባንክ ያሰባሰበው የተከፈለ ካፒታል ከ500 ሚሊዮን ብር በላይ በመሆኑ በዚሁ ካፒታል ወደ ሥራ የሚገባ ይሆናል፡፡

የምሥረታ ጉባዔው እስከተካሄደበት ዕለት ድረስ የባንኩን አክስዮኖች የገዙት ባለአክሲዮኖች ቁጥር ከ10,500 በላይ መድረሱ ተገልጿል፡፡ ትውልደ ኢትዮጵያውያን የባንኩን አክሲዮኖች እንዲገዙ በተደረገው ጥረትም እስከ መሥራች ጉባዔው ድረስ ከ190 በላይ ትውልደ ኢትዮጵያውያን የባንኩን አክሲዮን መግዛታቸው ተገልጿል፡፡

የባንኩ አመራሮች ኮሚቴ ቦርድ ሰብሳቢ ኃይለየሱስ ጥጋቡ (ኢንጂነር) እንደገለጹት፣ አዲስ አክሲዮኖችን ለመሸጥ ፈታኝ እንደነበር አመልክተው ይሁንና ባንኩ ከእነዚህ አስቸጋሪ ሁኔታ ውስጥ ወጥቶ ምሥረታውን ዕውን ማድረግ ችሏል፡፡

ምሥረታው መረጋገጡን ተከትሎም ባንኩ በቅርቡ ወደ ሥራ እንደሚገባ የገለጹት የቦርድ ሰብሳቢው፣ ‹‹የባንክ ሥራውን ዘመኑ ባፈራው ቴክኖሎጂ፣ በብቁ ባለሙያ በመታገዝ፣ ተገቢውን የገበያ ድርሻ በመያዝና ለባለድርሻ አካላት ተገቢውን ጥቅም ለማስገኘት የሚሠራ ይሆናል፤›› ብለዋል፡፡

ከአክሲዮን ሽያጭ ከአገልግሎት ክፍያ ከ35 ሚሊዮን ብር በላይ ገቢ ስለመገኘቱ የሚያመለክተው የባንኩ ሪፖርት፣ ከዚህ የአክሲዮን ሽያጭ የአገልግሎት ክፍያ ውስጥ 20 ሚሊዮን ብሩ እስካሁን ወጪ ስለማድረጉ ተገልጿል፡፡ ባንኩን ለመመሥረት የሁለት ቢሊዮን ብር የተፈቀደና የተከፈለ ካፒታል እንዲኖረው ታሳቢ ተደርጎ ፈቃድ ያገኘ መሆኑ ይታወቃል፡፡

ዕቅዱን በተመለከተም ሥራ በሚጀምርበት ዓመት ሦስት ቢሊዮን ብር ተቀማጭ ገንዘብ የሚያሰባስብ ሲሆን፣ ይህንን ተቀማጭ ገንዘብ በየዓመቱ እያሳደገ በሦስተኛ ዓመቱ ላይ 25 ቢሊዮን ብር አደርሳለሁ የሚል ነው፡፡ ከዚህም ሌላ በመጀመርያው ዓመት ላይ 50 ቅርጫፎች ይኖሩታል ተብሎ የታቀደ ሲሆን፣ ይህንን ዕቅድ ሦስተኛ ዓመት ላይ 150 ለማድረስ የሚሠራ ስለመሆኑ አስታውቆ ወደ አክሲዮን ሽያጭ መግባቱ ይታወሳል፡፡

የበለጠ ወጣቶች ላይ ትኩረት በማድረግ የሚሠራ መሆኑን  የሚያመለክተው የባንኩ መረጃ፣ በኢንዱስትሪ ውስጥ አማራጭ የባንክ አገልግሎቶችን በማቅረብ የሚሠራ ይሆናል ተብሏል፡፡

በአሁኑ ወቅት የኢትዮጵያን የባንክ ኢንዱስትሪ ለመቀላቀል ከ20 በላይ ባንኮች አመልክተዋል፡፡ አሃዱ ባንክን ጨምሮ 16 በምሥረታ ላይ የሚገኙ አዳዲስ የግል ባንኮች በአንድ ዓመት ውስጥ ወደ ሥራ ይገባሉ ተብሎ ይጠበቃል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች