Saturday, June 15, 2024
- ማስታወቂያ -
- ማስታወቂያ -

ኅብረት ኢንሹራንስ ለኢትዮጵያ መንገዶች ባለሥልጣን 54.7 ሚሊዮን ብር ካሳ ከፈለ

spot_img

ተዛማጅ ፅሁፎች

አገር በቀሉ ጥበብ ኮንስትራክሽን ከኢትዮጵያ መንገዶች ባለሥልጣን (ኢመባ) የተረከበውን የሳንጃ ቀራቀር መንገድ ግንባታ በአግባቡ ባለመወጣቱ፣ ኅብረት ኢንሹራንስ የገባለትን የ54.7 ሚሊዮን ብር ዋስትና ከፈለ፡፡

ኅብረት ኢንሹራንስ እንዳስታወቀው፣ ጥበብ ኮንስትራከሽን ኃላፊነቱ የተወሰነ የግል ማኅበር ከኢመባ ጋር በገባው የመንገድ የግንባታ ውል መሠረት ግንባታውን በጊዜ ባለማከናወኑ ኢንሹራንሱ ለሰጠው የመልካም ሥራ አፈጻጸም ውል ዋስትና መሠረት 54.7 ሚሊዮን ብሩን በዚህ ሳምንት ከፍሏል፡፡

ኢንሹራንስ ኩባንያው ይህንኑ ክፍያ ለኢትዮጵያ መንገዶች ባለሥልጣን ያስረከበ ሲሆን፣ ክፍያውንም የፈጸመው ጉዳዩ በግልግል ዳኝነት ከታየ በኋላ በተሰጠው ውሳኔ መሠረት መሆኑን ለማወቅ ተችሏል፡፡

ለጥበብ ኮንስትራከሽን በተሰጠው ዋስትና ሽፋንና አከፋፈል ላይ የኢመባ ጉዳዩን ወደ ፍርድ ቤት ወስዶት የነበረ ሲሆን፣ በኋላ ላይ ግን በግልግል ዳኝነት እንዲታይ ስምምነት በመደረሱ የግልግል ዳኝነቱ ኢንሹራንስ ኩባንያው በገባው ዋስትና መሠረት ክፍያውን መፈጸም ይኖርበታል ብሎ ሊወስን ችሏል፡፡

በዚህ ጉዳይ ላይ ከኅብረት ኢንሹራንስ የተገኘው መረጃ እንደሚያመለክተው፣ ኅብረት ኢንሹራንስ  ጉዳዩ ወደ ፍርድ ቤት ሲሄድ የጉዳቱን መጠን ሳያውቅ ክፍያ ለመክፈል ስለማይችል ጉዳዩ በግልግል ዳኝነት እንዲታይ በማድረግ፣ የጉዳት መጠኑን ካረጋገጠ በኋላ የግልግል ዳኝነቱ በሰጠው ውሳኔ መሠረት ተገቢውን ክፍያ ሊፈጽም ችሏል፡፡

ጥበብ ኮንስትራክሽን በመንገድ ፕሮጀክቱ ምክንያት ተመሳሳይ በሆነ መልኩ ከኅብረት ኢንሹራንስ የቅድመ ክፍያ ዋስትና ተሰጥቶት ስለነበር፣ በዚህ ውል መሠረት ባለሥልጣኑ ተመሳሳይ ጥያቄ በማቅረቡ ኅብረት ኢንሹራንስ 52.6 ሚሊዮን ብር ለኢትዮጵያ መንገዶች ባለሥልጣን መክፈሉ ይታወሳል፡፡

ይህም በቀጣይ በሁለት የዋስትና ዓይነቶች ኅብረት ኢንሹራንስ ለሰጠው የዋስትና ሽፋን በድምሩ 107.4 ሚሊዮን ብር መክፈሉን ያመለክታል፡፡

ከኢትዮጵያ መንገዶች ባለሥልጣን ያገኘነው ተጨማሪ መረጃ እንደሚያስረዳው፣ ጥበብ ኮንስትራክሽን የሳንጃ ቀራቀር መንገድ ግንባታን በአግባቡ መገንባት ባለመቻሉ ሥራው  ተነጥቆ ለሌላ ኮንትራክተር ተሰጥቷል፡፡  

ከጥበብ ኮንስትራክሽን የተነጠቀው የመንገድ ግንባታ ፕሮጀክቶች ለቻይና ኮንትራክተር በመስጠት ግንባታው ሊጠናቀቅ ችሏል፡፡ ጥበብ ኮንስትራክሽን የግንባታ ውሉ የተቋረጠው ከሰባት ዓመታት በፊት መሆኑ ይታወሳል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች