Saturday, March 2, 2024
- Advertisment -
- Advertisment -

ለኢትዮጵያዊያን ሰላምና ደኅንነት ጥንቃቄ መደረግ አለበት!

በአራቱም ማዕዘናት የሚኖሩ ኢትዮጵያዊያን እኩልነት፣ ነፃነት፣ ፍትሕ፣ ሰላምና ደኅንነት የሚያስገኝ ዴሞክራሲያዊ ሥርዓት ለመገንባት ያስፈልጋቸዋል፡፡ ይህ በሁሉም ኢትዮጵያዊያን ተሳትፎ መገንባት ያለበት ሥርዓት ዕውን መሆን የሚችለው፣ ኢትዮጵያ ሰላም አግኝታ መረጋጋት ሲፈጠር ብቻ ነው፡፡ ኢትዮጵያዊያን ከድህነት፣ ከኢፍትሐዊና አምባጓሮ ከበዛበት አኗኗር ውስጥ በፍጥነት ለመውጣት ሰላም ማግኘት አለባቸው፡፡ በአንድ አገር ውስጥ እየተኖረ አንዱ ባለቤት ሌላው መጤ የሚሆንበት አስነዋሪ ሥርዓት መገታት አለበት፡፡ ኢትዮጵያዊያንን በብሔራቸው፣ በእምነታቸው፣ በቋንቋቸው፣ በባህላቸው፣ በፖለቲካ አቋማቸውና በመሳሰሉት ልዩነቶች የሚከፋፍል ሥርዓት ፈፅሞ ሊኖር አይገባም፡፡ ማንነትን ከመሬት ባለቤትነት ጋር አዳብሎ አድልኦና መገለል የሚፈጥር ሥርዓት፣ ግጭት ከመቀስቀስ ያለፈ ፋይዳ እንደሌለው በተደጋጋሚ ታይቷል፡፡ ኢትዮጵያዊያንን በየደረሱበት ባለቤትና ባይተዋር የሚያደርግ ሥርዓት ለሰላም ጠንቅ ከመሆን ባለፈ፣ ለዘመናት ከትውልድ ወደ ትውልድ ሲተላለፉ የኖሩ የጋራ ማኅበራዊ እሴቶችን እያፈራረሰ ነው፡፡ ኢትዮጵያውያንን ለአገራቸው በኅብረት ማስቆም የማይችል ሥርዓት ተወግዶ፣ በነፃነትና በእኩልነት የሚኖርባት አገር እንድትኖር የሚያስችል ዴሞክራሲያዊ ሥርዓት መገንባት አለበት፡፡ ለዚህ ደግሞ ሰላምና ደኅንነታቸው አስተማማኝ ሊሆን ይገባል፡፡

በዓለም ላይ የተዋጣለት የፌዴራል ሥርዓት የገነቡ አገሮች አሉ፡፡ በፌዴራል ሥርዓት ግንባታ ስም ‹‹አፓርታይድ›› የሚመስል ነውረኛ ድርጊት ፈጽመው የፈራረሱ አገሮችም አሉ፡፡ ‹‹ብልህ ከሌሎች ስህተት ሲማር ሞኝ ግን ከራሱም አይማርም›› እንዲሉ፣ አገር የሚያፈርስና የሚበታትን የፌዴራል ሥርዓት ቅርፅና ይዘት ላይ ሙጭጭ ማለት አያዋጣም፡፡ በሌላ በኩል ኢትዮጵያዊያንን በእኩልነትና በነፃነት የሚያስተናግድ ፌዴራላዊ ሥርዓት ለመገንባት በርካታ የተሳካላቸው አገሮችን በምሳሌነት መጠቀም ያስፈልጋል፡፡ ነገር ግን እንደ ዩጎዝላቪያ ዓይነት የመበታተን መንገድ ካልያዝን ማለት ትርፉ ውድቀት ነው፡፡ በአሁኗ ኢትዮጵያ ተወደደም ተጠላ አሀዳዊ ሥርዓት ለመገንባት የሚያስችል ምንም ዓይነት አመቺ ሁኔታ የለም፡፡ አለ ብለው የሚከራከሩ ካሉም እነሱ ከዘመኑ ጋር እየተራመዱ አይደሉም፡፡ ለዚህም ነው ኢትዮጵያዊያን ሥልጡን በሆነ ፌዴራላዊ ሥርዓት ራሳቸውን በራሳቸው እያስተዳደሩ፣ በአፍ መፍቻ ቋንቋቸው እየተማሩና እየተዳኙ፣ ከአካባቢያቸው እስከ መላ አገሪቱ በነፃነት እየተንቀሳሱና እየሠሩ፣ ተፈጥሯዊና ሕጋዊ መብቶቻቸው እየተከበሩ፣ ወዘተ በጋራ የሚያኖራቸው ዴሞክራሲያዊ ሥርዓት ለመገንባት የሚያዳግታቸው ምንም ነገር የለም የሚባለው፡፡ ይህ ይሳካ ዘንድ ደግሞ የሕዝባችን ሰላምና ደኅንነት መረጋገጥ አለበት፡፡

በዚህ ወሳኝ ወቅት በጠቅላይ ሚኒስትር ዓብይ አህመድ (ዶ/ር) የሚመራው የብልፅግና ፓርቲም ሆነ ሌሎች ተፎካካሪ ፓርቲዎች፣ ኢትዮጵያውያንን በእኩልነትና በነፃነት ሊያኖር የሚያስችል ሥርዓት ግንባታ ላይ ማተኮር አለባቸው፡፡ ከዚህ ቀደም በፓርቲዎች መካከል ይስተዋል የነበረው የተበላሸ ግንኙነት በፍጥነት ታርሞና ተስተካክሎ፣ ለሰጥቶ መቀበል መርህ የሚያስገዛ ዘመናዊ ግንኙነት መመሥረት ይኖርበታል፡፡ ገዥው ፓርቲ እንዳሻው የሚፈነጭበትና ግለሰባዊ ተክለ ሰብዕና ላይ የሚተኮርበት ኋላቀር የፖለቲካ ባህል መቀየር አለበት፡፡ ሥልጣን ላይ የተቀመጠው ጠያቂ የሌለበት ይመስል እንዳሻው ሥልጣኑን ሲባልግበት፣ ለሥልጣን የሚፎካከረው ደግሞ ምኅዳሩ ተዘጋግቶበት ሳይወድ በግድ ሴራና አሻጥር ውስጥ የሚገባበት ብልሹ አሠራር መወገድ ይኖርበታል፡፡ የፖለቲካ ምኅዳሩ የአምባገነኖችና የከሰሩ ፖለቲከኞች መናኸሪያ ሆኖ የቆየውና አሁንም ከዚያ አባዜው መላቀቅ ያልቻለው፣ ለሥልጡን የፖለቲካ መስተጋብር የተሰጠው አክብሮት በጣም ዝቅተኛ ስለሆነ ነው፡፡ በአጋጣሚ የተገኘን ሥልጣን መከታ በማድረግ አንደበታቸውን መግራት ከማይችሉ እንጭጭ ፖለቲከኞች ጀምሮ፣ ዕድሜ ልካቸውን ካለፉት ስህተቶቻቸው መማር የማይፈልጉ ጎምቱዎች ድረስ እርማት ያስፈልጋቸዋል፡፡ የሕዝባችን ሰላምና ደኅንነት እየተቃወሰ ያለው በዚህ ምክንያት መሆኑን መረዳት የግድ ይላል፡፡

ኢትዮጵያዊያን ለአገራቸው በአንድነት መቆም ግዴታቸው ነው፡፡ ግዴታ የለብንም የሚሉ ካሉ ከሰላማዊው የፖለቲካ ምኅዳር ገለል ሊሉ ይገባል፡፡ የኢትዮጵያ ሕዝብ ከዳር እስከ ዳር በሴረኞች ምክንያት እየደረሰበት ካለው ግድያ፣ መፈናቀል፣ የንብረት ውድመትና የሥነ ልቦና ጉዳት መገላገል ይኖርበታል፡፡ ሰላምና ደኅንነቱ አስተማማኝ ሆኖ ለአገሩ ልማት መሠለፍ አለበት፡፡ በሴረኞች ምክንያት ተስፋው እየደበዘዘ የድህነት መጫወቻ መሆን የለበትም፡፡ የዘመኑ የኢትዮጵያ ፖለቲካ ውስጠ ሚስጥሩ የገባቸው ስክነትንና ብልኃትን ስንቃቸው ሲያደርጉ፣ አርቆ ማየት የተሳናቸው ግን የስህተት አረንቋ ውስጥ ይዳክራሉ፡፡ ከበርካታ ዓመታት ውጣ ውረዶች በኋላ ኢትዮጵያ ውስጥ የሚስተዋለው እጅግ በጣም ጥቂት የሚባሉ ፖለቲከኞች ብስለት ሲሆን፣ እጅግ በጣም ብዙ የሚባሉት ግን አድሮ ቃሪያ እየሆኑ ነው፡፡ ብልሆቹ እንደ ወቅቱ ሁኔታ ረቀቅና ለዘብ እያሉ ምክንያታዊነትን ሲያሳዩ፣ ለዚህ ያልታደሉት ግን ስሜታቸውን መቆጣጠር እያቃታቸው ችግር ይፈጥራሉ፡፡ ብልሆቹ ለዴሞክራሲያዊ ሥርዓት ግንባታ ሲጠቀሙበት፣ እነዚያ ግን ለእንዲህ ዓይነቱ ዕይታም ሆነ ምልከታ ባዕድ ናቸው፡፡ ኢትዮጵያዊያን የሚፈልጉት ግን በእኩልነትና በነፃነት የሚያኖራቸውን ሥርዓት የሚያዋልዱላቸውን ፖለቲከኞች እንደሆነ ግንዛቤ ሊኖር ይገባል፡፡ ሰላምና ደኅንነታቸውን ይፈልጉታልና፡፡

እዚህ ላይ ልብ ሊባል የሚፈለገው ፖለቲካን ከኮረንቲ ጋር እያነፃፀሩ ከሚሸሹት ጀምሮ፣ ፖለቲካን ከቁማር ጋር እያስተሳሰሩ የሴረኞች መጫወቻ ካርድ ለማድረግ እስከሚፈልጉ ድረስ የማያግባቡ ጉዳዮች አሉ፡፡ ነገር ግን ፖለቲካን በሠለጠነ መንገድ ሥራ ላይ በማዋል ለአገር ግንባታ የሚጠቀሙበት እንዳሉ ሁሉ፣ ጽንፈኛ ሆነው አገርን ለአደጋ በማጋለጥ የሕዝብን ሕይወት ማመሰቃቀል የሚፈልጉ መኖራቸው ግልጽ ነው፡፡ እርግጥ ነው ፖለቲካ በመርህ መመራት ቢኖርበትም፣ ለሥልጣን በሚደረግ ፉክክር ሴረኝነት መኖሩ የሚጠበቅ ቢሆንም፣ ነገር ግን አገርን ለግጭትና ለውድመት በማመቻቸት የሕዝቡን ሰላምና ደኅንነት ማቃወስ አደገኛ ነው፡፡ ኢትዮጵያ ውስጥ በተደጋጋሚ ችግሮች እየተፈጠሩ ያሉት፣ ለጋራ ዕድገት ራዕይና ፍላጎት የሌላቸው ፖለቲከኞች በመበራከታቸው ነው፡፡ ለእኩልነትና ለነፃነት የሚተጉ ኢትዮጵያዊያን ፖለቲከኞች በተቻለ መጠን ከፋፋይና በታኝ አስተሳሰቦችን በማሸነፍ፣ ለሁሉም ኢትዮጵያዊያን የምትመች አገር ግንባታ ላይ ቢያተኩሩ ይመረጣል፡፡ የኢትዮጵያ ሕዝብ የአገሪቱ ሥልጣን ሉዓላዊ ባለቤት በመሆኑ ሊከበር ይገባዋል፡፡ ሰላሙንና ደኅንነቱን በማቃወስ በስሙ መነገድና መቆመር፣ ማንነቱንና እምነቱን እየታከኩ ንፁኃንን መግደልም ሆነ ንብረት ማውደም አስነዋሪ ድርጊት ነው፡፡

ኢትዮጵያዊያን በአንድነት መታገል ያለባቸው በእኩልነትና በነፃነት የሚያኖራቸው ሥርዓት እንዲገነባ ነው፡፡ እርስ በርስ እየለያየና እየከፋፈለ የሚያባላቸው የፖለቲካ ሥርዓት አይጠቅማቸውም፡፡ ይህንን በክፋትና በሸፍጥ የተሞላ ሥርዓት በዴሞክራሲያዊ ሥርዓት መተካት ይጠበቅባቸዋል፡፡ ሴረኞች ሕዝቡን በብሔር፣ በእምነት፣ በባህልና በመሳሰሉት ልዩነቶች እየከፋፈሉ የሚያባሉት ሥልጣኑ ላይ ተደላድለው በመቀመጥ ለዘረፋ እንዲመቻቸው ብቻ ነው፡፡ ሕፃናት ምግብ አጥተው በረሃብ የሚሞቱባት፣ በርካታ ሚሊዮን ወጣቶች በሥራ ዕጦት ቁም ስቅላቸውን የሚያዩባት፣ በቀን አንዴ ለመብላት መከራ የሚታይባት፣ ጥቂቶች ተመራርጠው ከብር አልፈው ሚሊዮን ዶላሮችና ዩሮዎች የሚቆጥሩባት የመከራ አገር እንድትኖር የሚጥሩ ጽንፈኞችን በሐሳብ መታገል የግድ ይላል፡፡ ኢትዮጵያ ልጆቿ ጥራት ያለው ትምህርት፣ ጤናማና ንፁህ መኖሪያ፣ ተመጣጣኝ ምግብ፣ ሰብዓዊና ዴሞክራሲያዊ መብቶችና የመሳሰሉት የሚቋደሱባት አገር መሆን ትችላለች፡፡ ዴሞክራት ልጆቿ ለአገር አንድነት በኅብረት ሲነሱ በቀኝና በግራ የተሠለፉ ጽንፈኞች ይከስማሉ፡፡ ኢትዮጵያዊያን ሙሉ ትኩረታቸውን ለዴሞክራሲያዊት አገር ግንባታ ላይ ሲያደርጉና ውጤቱም መታየት ሲጀምር፣ ለሥልጣን ሲሉ ግጭትና ውድመት የሚያነቅኑ ኃይሎች ፋይዳ ቢስ ይሆናሉ፡፡ ኢትዮጵያዊያን በነፃነት፣ በእኩልነትና በፍትሐዊነት የሚኖሩበት ሥርዓት መገንባት አለበት፡፡ አሁን ባለው ሁኔታ አንድ ዕርምጃ መራመድ አይቻልም፡፡ ምክንያቱም የሕዝቡ ሰላምና ደኅንነት እየተቃወሰ ነውና!

በብዛት የተነበቡ ፅሁፎች

- Advertisment -

ትኩስ ፅሁፎች

[ክቡር ሚኒስትሩ ወደ መኖሪያ ቤታቸው ሲገቡ ባለቤታቸው በቴሌቪዥን የሚተላለፈውን ዜና በመደነቅ እየተመለከቱ አገኟቸው]

እንዲያው የሚደንቅ ነው እኮ። ምኑ? ዜና ተብሎ በቴሌቪዥን የሚተላለፈው ነገር ነዋ፡፡ ምኑ...

በኦሮሚያ የሚፈጸሙ ግድያዎችና የተጠያቂነት መጥፋት

የካቲት 11 ቀን 2016 ዓ.ም. ቢሾፍቱ አቅራቢያ በሚገኘው የዝቋላ...

የኢትዮጵያ መዋዕለ ንዋይ ገበያ ከሚያስፈልገው ካፒታል ውስጥ 90 በመቶውን ሰበሰበ

እስካሁን 15 ባንኮች የመዋዕለ ንዋይ ገበያው ባለድርሻ ሆነዋል የኢትዮጵያ መዋዕለ...

አዲሱ የንብ ባንክ ቦርድ የባንኩን ካፒታል በአሥር ቢሊዮን ብር ለማሳደግ ማቀዱ ተሰማ

አዲሱ የንብ ኢንተርናሽናል ባንክ የዳይሬክተሮች ቦርድ የባንኩን ካፒታል በአሥር...

የጋራ ድላችን!

ከፒያሳ ወደ ቄራ ልንጓዝ ነው። ለበርካታ ደቂቃዎች ሠልፍ ይዘን...
spot_img

ተዛማጅ ፅሁፎች

ታላቁ የዓድዋ ድል ሲዘከር የጀግኖቹ የሞራል ልዕልና አይዘንጋ!

የታላቁ ዓድዋ ድል 128ኛ ዓመት ክብረ በዓል ሲዘከር፣ ለአገርና ለሕዝብ ክብር የሚመጥኑ ተግባራት ላይ ማተኮር ይገባል፡፡ በዓድዋ ከወራሪው ኮሎኒያሊስት ኃይል ጋር ተፋልመው ከትውልድ ወደ...

ሰብዓዊ ቀውሶችን ማስቆም ተቀዳሚ ተግባር ይሁን!

በቅርቡ ጠቅላይ ሚኒስትር ዓብይ አህመድ (ዶ/ር) ከአማራ ክልል የተለያዩ አካባቢዎች ተወክለው ከመጡ ሰዎች ጋር ያደረጉት ውይይት፣ በአማራ ክልልም ሆነ በሌሎች ሥፍራዎች የሚካሄዱ ግጭቶች ምን...

የበራሪው የኅብረተሰብአዊት ኢትዮጵያ ጀግና ጄኔራል ለገሠ ተፈራ ቅርሶችን የአዲስ አበባ ዩኒቨርሲቲ ተረከበ

በቀድሞው የኢትዮጵያ መንግሥት (1967-1983) ዘመን የኅብረተሰብአዊት ኢትዮጵያ ጀግና ሜዳይ የየካቲት 1966 1ኛ ደረጃ ኒሻን ተሸላሚ የነበሩ የአየር ኃይል ጀት አብራሪው የብርጋዴር ጄኔራል ለገሠ ተፈራ...