Monday, June 24, 2024
- ማስታወቂያ -
- ማስታወቂያ -

ለሆቴልና ቱሪዝም ዘርፍ የተፈቀደው ብድር ለስድስት ወራት ተራዘመ

spot_img

ተዛማጅ ፅሁፎች

የወለድ ምጣኔው 5.5 በመቶ እንደሚሆን ብሔራዊ ባንክ አስታውቋል

ኮቪድ-19 ወረርሽኝ ጫና ከፈጠረባቸው የቢዝነስ ዘርፎች ውስጥ አንዱ ለሆነው የሆቴልና ቱሪዝም ዘርፍ የተፈቀደው ብድር ለስድስት ወራት እንዲራዘም መወሰኑን የኢትዮጵያ ብሔራዊ ባንክ አስታወቀ፡፡

ባንኩ ሰሞኑን እንዳስታወቀው፣ በኮቪድ-19 ወረርሽኝ የተጎዳውን የሆቴልና ቱሪዝም ዘርፍ ለመደገፍ ብሔራዊ ባንክ ለስድስት ወራት ፈቅዶ የነበረውን ብድር ለተጨማሪ ስድስት ወራት ሲያራዝም፣ ለደመወዝ ክፍያና ለሥራ ማስኬጃ የሚውለውን ብድር ባንኮች ከብሔራዊ ባንክ በ4.5 በመቶ ወለድ ተበድረው ለዘርፉ ተዋናዮች በ5.5 በመቶ ወለድ የሚያቀርቡ ይሆናል፡፡

ከዚህ ቀደም ዘርፉን ለመደገፍ ባንኮች በአምስት በመቶ ወለድ ብድር እንዲሰጡ ለባንኮች በተላለፈው መመርያ መሠረት፣ የብድር አቅርቦቱ ተጠቃሚ መሆናቸው አይዘነጋም፡፡

አሁንም ከጫናው ያልወጡ ስለሆነ፣ በአዲስ አሠራር ለደመወዝና ለሥራ ማስኬጃ የሚያስፈልጋቸው ብድር እንዲቀርብላቸው ተደርጓል፡፡ በዚሁ በብሔራዊ ባንክ አዲሱ መመርያ መሠረት፣ ባንኮች ለዘርፉ ተሳታፊዎች ለስድስት ወራት ተፈቅዶ ከነበረው ገንዘብ እ.ኤ.አ. እስከ ኖቬምበር 10 ቀን 2020 ያበደሩት ብድር ተቀንሶ፣ ቀሪው ገንዘብ እ.ኤ.አ. ከዲሴምበር 23 ቀን 2020 ጀምሮ እስከ ጁን 22 ቀን 2021 ድረስ መራዘሙንና የብድሩ የመመለሻ ጊዜ እንደ ከዚህ ቀደሙ አንድ ዓመት ይሆናል፡፡

እ.ኤ.አ. ከኖቬምበር 10 ቀን 2020 በፊት በዚህ ፕሮግራም ለዘርፉ ተሳታፊዎች የተሰጠው የደመወዝና የሥራ ማስኬጃ ብድር መመለሻ ጊዜ ለተጨማሪ ስድስት ወራት እንዲራዘም የተወሰነ መሆኑንም ብሔራዊ ባንክ ገለጿል፡፡

የዚህ ብድር የመጀመርያ ወለድ ክፍያ ቀድሞ በተገባው ጠቅላላ ውል መሠረት ተፈጻሚ እንደሚሆንም አስታውቋል፡፡

እ.ኤ.አ. ከዲሴምበር 23 ቀን 2020 እስከ ጁን 22 ቀን 2021 ለሚሰጡት የደመወዝና የሥራ ማስኬጃ ብድር ከኢትዮጵያ ብሔራዊ ባንክ በ4.5 በመቶ ዓመታዊ ወለድ በመበደር ለዘርፉ ተሳታፊዎች በ5.5 በመቶ ዓመታዊ ወለድ እንዲያበድሩም የኢትዮጵያ ብሔራዊ ባንክ ለባንኮች አሳስቧል፡፡

‹‹የኢትዮጵያ ብሔራዊ ባንክ የዘርፎቹ ጤናማነት ለባንኮች ጤናማነት አስፈላጊ መሆኑን በመረዳት እነዚህን ውሳኔዎች በመገንዘብ አዲስ ጠቅላላ ስምምነት (Master Agreement) ከኢትዮጵያ ብሔራዊ ባንክ ጋር በመፈራረም ተግባራዊ እንድታደርጉ እናሳስባለን፤›› በማለትም፣ በዚሁ መመርያ መሠረት የብድር አሰጣጡን ተግባራዊ እንዲያደርጉ ባንኩ አሳውቋል፡፡

ብሔራዊ ባንክ ከዚህ ቀደም ያለምንም የወለድ ጭማሪ እንዲያበድሩ ያስተላለፈውን መመርያ በማስተካከል 4.5 በመቶ ወለድ ከብሔራዊ ባንክ የሚያገኙትን ገንዘብ በ5.5 በመቶ እንዲያበድሩ የፈቀደው ከአገልግሎት አሰጣጡ ጋር ተያይዞ ባንኮች ሊያወጡ የሚችሉትን ወጪ ለመሸፈን ታስቦ እንደሆነ ለማወቅ ተችሏል፡፡

ከዚህ ቀደም ለዘርፉ ከዋለው ብድር ባንኮች ምንም ዓይነት ጥቅም ያላገኙበት እንደነበር ይታወሳል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች