Tuesday, April 16, 2024
- Advertisement -
- Advertisement -
ዜናየምርጫ ሥልጠና ያልወሰዱ ፖሊሶች በምርጫ ወቅት ሕግ ለማስከበር አይሰማሩም ተባለ

የምርጫ ሥልጠና ያልወሰዱ ፖሊሶች በምርጫ ወቅት ሕግ ለማስከበር አይሰማሩም ተባለ

ቀን:

በምርጫ ወቅት ሰላም ለማስከበር በ55,220 የምርጫ ጣቢያዎች የሚሰማሩ የፀጥታ አካላት ተልዕኳቸውን ሳይረዱና አስፈላጊውን ሥልጠና ሳያገኙ እንደማይመደቡ፣ የፌዴራል ፖሊስ ምክትል ኮሚሽነር አስታወቁ፡፡

የፌዴራል ፖሊስ ኮሚሽን ምክትል ኮሚሽነር ጄኔራል ዘለዓለም መንግሥቴ ሐሙስ ጥር 27 ቀን 2013 ዓ.ም. በጠቅላይ ሚኒስትር ጽሕፈት ቤት ‹‹የኮሙዩኒኬሽን መንገዶቻችን ለምርጫ ሰላምና ደኅንነት›› በሚል ርዕስ በተካሄደ ውይይት ላይ፣ ‹‹ምርጫ በመንግሥት ቅድሚያ የሚያገኝ ተግባር ነው፤›› ብለዋል፡፡ ለምርጫው ሰላምና ደኅንነት መጠበቅ የፀጥታ ኃይሉ ሚናውን ለይቶ ይሰማራ ዘንድ፣ መመርያዎችና የሥልጠና ማኑዋሎች ተዘጋጅተዋል ሲሉ አስረድተዋል፡፡

በእነዚህ መመርያዎችና ማኑዋሎች መሠረት ሥልጠናዎች እየተሰጡ እንደሚገኙ፣ ሥልጠናዎችን ያላለፈና ሚናውን ያልለየ አንድም ፖሊስ ሥምሪት እንደማይሰጠው አስታውቀዋል፡፡

- Advertisement -

Video from Enat Bank Youtube Channel.

የምርጫ ወቅት ደኅንነትን የሚከታተልና የሚመራ ኮሚቴ በጠቅላይ ሚኒስትር ጽሕፈት ቤት መቋቋሙንና በጠቅላይ ሚኒስትሩ የደኅንነት አማካሪ አቶ ገዱ አንዳርጋቸው እንደሚመራ ያስታወቁት ምክትል ኮሚሽነር ጄኔራሉ፣ ‹‹በዚህ ኮሚቴ ውስጥ የአገር መከላከያ ሠራዊት፣ የክልል ፖሊስ ኮሚሽነሮችና የፌዴራል ፖሊስ በአባልነት ይገኛሉ፤›› ብለዋል፡፡

‹‹በምርጫው ወቅት ማንም ሰው ያለ ምንም መዋከብ የሚፈልገውን የመምረጥ መብቱ ሊከበርለት ይገባል፤›› በማለት ያሳሰቡት ምክትል ኮሚሽነር ጄኔራል ዘለዓለም፣ ‹‹በፖሊሶችና በፀጥታ አስከባሪዎች ዘንድ አላውቅም የሚባል ነገር እንዳይኖርም ሥልጠናና የግንዛቤ ማስጨበጫ እየተሰጠ ነው፤›› ሲሉ አክለዋል፡፡

‹‹እየሠለጠነ ሥራውን የሚያውቅ ፖሊስ ወደ ሥራው እየገባ ነው፤›› በማለት የገለጹት ምክትል ኮሚሽነሩ፣ ‹‹ያልሠለጠነ፣ ነፃና ገለልተኛ ያልሆነ ፖሊስ በየትኛውም ደረጃ እንዳይሳተፍ እየተደረገ ነው፤›› ሲሉም አስታውቀዋል፡፡

በተጨማሪም ፍርድ ቤቶችና ዓቃቤ ሕግ ለምርጫው ብቻ የሚያገለግሉ ችሎቶችንና የዓቃቢያነ ሕግ ቡድኖችን ማቋቋማቸውን ተከትሎ፣ ፌዴራል ፖሊስም ለምርጫ ወቅት ወንጀሎች ምርመራ ይረዳ ዘንድ ራሱን የቻለ የምርመራ ክፍል ተቋቁሟል ብለዋል፡፡ የምርጫ ምርመራን ለሚሠሩ የምርመራ ዘርፍ ሹሞችና መርማሪዎችም ደረጃውን የጠበቀ የአሠራርና የሥልጠና ሰነድ ተዘጋጅቶ እየተሠራበትም ነው ብለዋል፡፡

በቀጣይም የምርጫውን ሒደትና ደኅንነት በሚመለከት ከሕዝብ ጋር ውይይቶች እንደሚደረጉ የጠቆሙ ሲሆን፣ በቅድመ ምርጫ መከናወን ያለባቸውን ሥራዎች በሙሉ ለማጠናቀቅ እየሠሩ እንደሚገኙ ተናግረዋል፡፡ በተዘረጋው አደረጃጀትና አሠራር መሠረትም አጥፊዎች ሲገኙ በፍጥነት ወደ ሕግ እንዲቀርቡ ይደረጋልም ብለዋል፡፡

ለምርጫ ሰላምና ደኅንነት አስከባሪነት የሚሰማሩ የፀጥታ አካላት ከደንብ ልብስ በተጨማሪም፣ የታተመላቸውን የተለየ መታወቂያ ማንገት እንደሚኖርባቸውም ምክትል ኮሚሽነር ጄኔራል ዘለዓለም ተናግረዋል፡፡ የደንብ ልብስ ብቻውን በቂ የማይሆንበት ምክንያት በርካታ ችግሮች ያሉበት የደንብ ልብስ በመሆኑ ነው ቢሉም ምክንያቱን ግን አልዘረዘሩም፡፡

‹‹የሕዝባችን ደኅንነት በማንኛውም ሁኔታ አደጋ ላይ የወደቀ እንዳይሆን እየሠራን ነው፤›› ሲሉም አስታውቀዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ቪር ጀነራል ትሬዲንግ ኃ/የተ/የግ/ማኀበር የጨረታ ማስታወቂያ

ቪር ጀነራል ትሬዲንግ ኃ/የተ/የግ/ማኀበር በገቢ እና በውጭ ንግድ እንዲሁም...

ያልተቃናው የልጆች የንባብ ክህሎት

አንብቦና አዳምጦ መረዳት፣ የተረዱትን ከሕይወት ጋር አዋህዶ የተቃና ሕይወት...

እንስተካከል!

ሰላም! ሰላም! ውድ ኢትዮጵያውያን ወገኖቼ እንዲሁም የሰው ዘር በሙሉ፣...

የሙዚቃ ምልክቱ ሙሉቀን መለሰ ስንብት

የኢትዮጵያ ዘመናዊ ሙዚቃ በ1950ዎቹ እና በ1960ዎቹ በኪነ ጥበባትም ሆነ...