Tuesday, October 4, 2022
ሌሎች ዓምዶች
    - Advertisement -
    - Advertisement -
    ስፖርትበፈረንሣይ የነገሡት ኢትዮጵያውያን አትሌቶች

    በፈረንሣይ የነገሡት ኢትዮጵያውያን አትሌቶች

    ቀን:

    ዓለም በኮቪድ-19 ወረርሽኝ እየተናጠ በሚገኝበት በዚህ ወቅት የኢትዮጵያውያን አትሌቶች አሸናፊነት እንደቀጠለ ነው፡፡ በሳምንቱ አጋማሽ ጉዳፍ ፀጋይ በፈረንሣይ ሌቪን 1,500 ሜትር አዲስ የዓለም ክብረ ወሰን በማስመዝገብ አሸናፊ ሆናለች፡፡ ሌሎችም በሁለቱም ፆታ በተወዳደሩባቸው ርቀቶች ያለ ተቀናቃኝ አሸናፊ የሆኑበትን ሳምንት ዕውን አድርገዋል፡፡

    አዲስ የዓለም ክብረ ወሰን ያስመዘገበችው ጉዳፍ ፀጋፕ ለኢትዮጵያውያን አትሌቶች፣ የሳምንቱ ገድ ተደርጋ በምትጠራው ፈረንሣይ ሌቪን በተደረገው 1,500 ሜትር የቤት ውስጥ ውድድር ርቀቱን 3 53. 09 መግባት በመቻሏ እንደሆነ ወርልድ አትሌቲክስ በድረ ገጹ አስታውቋል፡፡

    ሌላዋ ኢትዮጵያዊት እንደ ጉዳፍ ፀጋይ ሁሉ የክብረ ወሰን ባለቤት መሆን ባትችልም፣ 3,000 ሜትር የተወዳደረችው ለምለም ኃይሉ ለአሸናፊነት ትልቅ ግምት የተሰጣትን ሲፋን ሐሰንን አስከትላ አሸናፊ ሆናለች፡፡ አትሌቷ ርቀቱን ለማጠናቀቅ የወሰደባት ጊዜ 8 22. 55 ሆኗል፡፡

    ፋንቱ ወርቁና ጽጌ ገብረሰላም በውድድሩ ተሳትፈው አራተኛና አምስተኛ በወጡበት በዚሁ ውድድር የተወዳደረችው ለምለም ኃይሉ፣ ከቀናት በፊት 1,500 ሜትር ተወዳድራ አዲስ የዓለም ክብረ ወሰን ማስመዝገብ መቻሏ የወርልድ አትሌቲክስ ይፋዊ ድረ ገጽ መግለጹ ይታወሳል፡፡ 

    በፈረንሣይ የነገሡት

    በወንዶች መካከል በተደረገው ተመሳሳይ ውድድር ተቀናቃኞቻቸውን በፍፁም ብልጫ ከፉክክር ውጪ በማድረግ ከአንደኛ እስከ አራተኛ ያለውን ደረጃ በመያዝ ያሸነፉት ደግሞ ጌትነት ዋለ 7 22. 98 አንደኛ፣ ሰለሞን ባረጋ 7 26. 10 ሁለተኛ፣ ለሜቻ ግርማ 727.10 ሦስተኛ ሲሆኑ፣ በሪሁን አረጋዊና ታደሰ ወርቁ አራተኛና ስድስተኛ ያለውን ደረጃ ይዘው ማጠናቀቃቸው ታውቋል፡፡

    ይሁንና በኮቪድ-19 ምክንያት ወደ 2021 የተዘዋወረው የቶኪዮ 2020 ኦሊምፒክ የወራት ጊዜ የቀረው መሆኑ ይታወቃል፡፡ የኢትዮጵያ ኦሊምፒክ ኮሚቴ ከኅዳር 2 ቀን 2013 .. ጀምሮ በርካታ አትሌቶችን ሆቴል እንዲገቡ በማድረግ ዝግጅት እንዲያደርጉ ማድረጉ እንደተጠበቀ ሆኖ፣ ነገር ግን ከአትሌቶች ምርጫ ጋር ተያይዞ ለብሔራዊ ፌዴሬሽኑ ያቀረበው ጥያቄ ተገቢው ምላሽ ማግኘት ሲገባው እስካሁን አለማግኘቱ ግን ብሔራዊ ቡድኑ የተረጋጋ ዝግጅት እንዳያደርግና እንቅፋት እንዳይሆንበት ሥጋት የገባቸው አልጠፉም፡፡

    የኢትዮጵያ አትሌቲክስ ፌዴሬሽን ይባስ ብሎ ከዚሁ ከአትሌቶች ምርጫ ጋር ተያይዞ ለምክትል ጠቅላይ ሚኒስትር ቢሮ የቅሬታ ደብዳቤ ማስገባቱ ነገሩን ወደ አላስፈላጊ ነገር ወስዶት መሰንበቱ ይነገራል፡፡ ለምክትል ጠቅላይ ሚኒስትር ቢሮ የተጻፈውን ደብዳቤ ተከትሎ ስፖርት ኮሚሽን  ፌዴሬሽኑ የሄደበት መንገድ ከተቋማዊ ግንኙነት ውጪ ነው በሚል የማስጠንቀቂያ ደብዳቤ እንደጻፈ ምንጮች ለሪፖርተር ተናግረዋል፡፡

    ዓለም ምንም እንኳ በኮሮና ቫይረስ ወረርሽኝ አጣብቂኝ ውስጥ የገባችበት ጊዜ ቢሆንም፣ በአትሌቲክሱ ዓለም በትውልድ ቅብብሎሽ አይበገሬነታቸውን እያስመሰከሩ የሚገኙት ኢትዮጵያውያን አትሌቶች፣ በአስተዳደራዊ ችግር ውስጥ ቢሆኑም ዛሬም ስምና ዝናቸው በመላው ዓለም መናኘቱን ቀጥሏል፡፡

    ይህም ኢትዮጵያን ከረሃብ፣ ከጦርነትና ከመከራ ጋር አስተሳስረው ለሚመለከቷት ባዕዳን ኢትዮጵያ ያልተነገሩ በርካታ ታሪካዊ ማንነት እንዳላት በማመላከት የተዛባውን አተያይ ሙሉ በሙሉ ባይቀይረውም በተሻለ መልኩ እንዲመለከቱ የሚያስገድዳቸው ታላቅ የማንነት ምንጭ እንደሆነ መቀጠሉን የሚሳይ ነው፡፡ ይህን ማስቀጠል የሚቻለው ደግሞ ተቋማዊ ግንኙነቶች ተጠናክረው ሲቀጥሉ ብቻ እንደሆነ ጭምር የሚናገሩ አልጠፉም፡፡

    - Advertisement -

    ይመዝገቡ

    spot_img
    spot_img