Thursday, February 2, 2023
- ማስታወቂያ -
- ማስታወቂያ -

ባንኮች ካበደሩት 155 ቢሊዮን ብር 72 በመቶውን የግል ዘርፉ እንደወሰደ ተገለጸ

- ማስታወቂያ -

ተዛማጅ ፅሁፎች

የኢትዮጵያ ባንኮች በግማሽ ሒሳብ ዓመቱ ብቻ የሰጡት አዲስ የብድር መጠን 155.4 ቢሊዮን ብር መሆኑንና ከዚህ ውስጥ 72 በመቶው ለግል ዘርፍ እንደተሰጠ የኢትዮጵያ ብሔራዊ ባንክ ገዥ ገለጹ፡፡

የኢትዮጵያ ብሔራዊ ባንክ ገዥ ይናገር ደሴ (ዶ/ር)፣ ሐሙስ የካቲት 18 ቀን 2013 ዓ.ም. የዳሸን ባንክ 25ኛ ዓመት የብር ኢዮቤልዩ ላይ ባደረጉት ንግግር፣ ባንኮቹ በዓመቱ ስድስት ወራት ውስጥ ከሰጡት ብድር 72 በመቶው ለግል ባለሀብቱ መሰጠቱ ለግል ዘርፉ እየተሰጠ ያለው ብድር በመጠንም ሆነ በብድር ድርሻ እያደገ መሄዱን ያሳያል ብለዋል፡፡ ይህም አገር በቀል የኢኮኖሚ ማሻሻያ ከያዛቸው ሐሳቦች አንዱ ከመሆኑ ጋር የተያያዘ ስለመሆኑም አስታውሰዋል፡፡

መረጃዎች እንደሚያሳዩት፣ የአገሪቱ ባንኮች ከሚሰጧቸው ዓመታዊ አዳዲስ ብድሮች ውስጥ የግል ዘርፉ ድርሻ እያደገ የመጣው ባለፉት ሦስት ዓመታት ሲሆን፣ በ2012 የሒሳብ ዓመት ከተሰጠው ጠቅላላ ብድር ውስጥ የግሉ ዘርፍ ድርሻ ወደ 63 በመቶ ከፍ ብሎ ነበር፡፡    

የባንኮችን አፈጻጸም በተመለከተ በሰጡት መረጃም፣ እስከ መስከረም 2013 ዓ.ም. ድረስ ባንኮች አጠቃላይ ያበደሩት መጠን 1.1 ትሪሊዮን ብር ስለመድረሱ ጠቅሰዋል፡፡ ሆኖም በግማሽ በጀት ዓመቱ የባንኮች ብድር ማስመለስ ዝቅተኛ አፈጻጸም የታየበት ስለመሆኑ የገለጹት ገዥው፣ የብድር ማስመለሱ የቀነሰበት ዋነኛ ምክንያት ከኮሮና ወረርሽኝ ጋር የተያያዘ እንደሆነ  አመላክተዋል፡፡  ዓምናም ተመሳሳይ የብድር አሰባሰብ ክፍተት እንደነበር አይዘነጋም፡፡

ከብድር አመላለስ መቀዛቀዝ ጋር ተያይዞ የኢትዮጵያ ብሔራዊ ባንክ ከባንኮች ጋር የሚሠራው ሥራ እንደሚኖር ከዚህ ቀደም የኢትዮጵያ ብሔራዊ ባንክ የገለጸ ሲሆን፣ የብድር አመላለስ ክፍተትን ባንኮች በጥብቅ ዲሲፕሊን እንዲፈጽሙም  ይናገር (ዶ/ር) አሳስበዋል፡፡

በተለይ በኮሮና ወረርሽኝ ምክንያት ያን ያህል ጉዳት ያልደረሰባቸው ተበዳሪዎች ብድራቸውን መክፈል እንደሚኖርባቸውም ተናግረዋል፡፡

የኢትዮጵያ ብሔራዊ ባንክ ከሚያከናውናቸው ተግባራት መካከል የባንኮችን ጤናማነት መከታተልና ባንኮች ለኅብረተሰቡ ተደራሽ እንዲሆኑ ማድረግ መሆኑን የጠቀሱት  ይናገር (ዶ/ር)፣ ‹‹የተረጋጋ ፋይናንስ እንዲኖር ታሳቢ በማድረግ እየተሠራ ነው፤›› ብለዋል፡፡

በተለይም ከዓምና ወዲህ በተከሰተው ኮሮና ቫይረስ ምክንያት ባንኮችም ሆኑ በአጠቃላይ ኢኮኖሚው አደጋ ላይ እንዳይወድቁ ሰፊ ጥረት ሲደረግ መቆየቱንና የዓለም ኢኮኖሚም በኮሮና እየተፈተነ መሆኑን አስታውሰዋል፡፡  

‹‹ከዚህ አኳያ አገሮች የተለያዩ የኢኮኖሚ ማሻሻያ ዕርምጃዎች በተናጠልም ሆነ በዓለም አቀፍ የፋይናንስ ተቋማት በኩል እየወሰዱ ቢሆንም፣ ከበሽታው መቼ እንደምንገላገል ለመገመት አስቻጋሪ በመሆኑ፣ በሽታውን እየተከላከልን ኢኮኖሚውን የመታደግ ሥራ እየሠራን እንገኛለን፤›› በማለት፣ እስካሁን በተሠራው ሥራም ኮሮና በኢኮኖሚውና በማኅበረሰቡ ላይ ያደርስ የነበረውን ከፍተኛ ጉዳት ለመቀነስ ስለመቻሉም አመልክተዋል፡፡    

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች