Wednesday, February 1, 2023

ወጣቶችን አዘውትሮ የሚገፋው የኢትዮጵያ ፖለቲካ

- Advertisement -spot_img

በብዛት የተነበቡ

በኢትዮጵያ የፖለቲካ ፓርቲዎች የምርጫ ውድድር ታሪክ 1997 ዓ.ም. የተካሄደው ምርጫ በዓይነቱ ልዩና የበርካቶችን ቀልብ የማረከ እንደነበር ይነገርለታል። ይህ ምርጫ በልዩነቱ የሚነሳው በቅድመ ምርጫ (እስከ ድምፅ መስጫው ዕለት) ሒደቱ ወቅት ተከናውነው ባለፉት መሳጭ ገቢሮቹ ነው። 

በወቅቱ በነበረው የምርጫ ሒደት ከተማረኩ ታዳጊ ወጣቶች መካከል አንዱ የያኔው የእንጦጦ የቴክኒክና ሙያ ትምህርት ቤት ተማሪ የነበረው ወጣት ይገኝበታል። ታዳጊው ይማርበት የነበረው እንጦጦ የቴክኒክና ሙያ ትምህርት ቤት ከአዲስ አበባ ዩኒቨርሲቲ አቅራቢያ በመሆኑ፣ እዚያ ይማሩ የነበሩ ተማሪዎች የሚያደርጉትን የፖለቲካ እንቅስቃሴ መከታተል የዕለት ተዕለት ሥራው ነበር፡፡ በተለያዩ የሚዲያ ተቋማት መረጃዎችን ይከታተል የነበረው ታዳጊ ወጣትበተለይም በወቅቱ የነበሩ ጋዜጦች ላይ የሚወጡ የፖለቲካ ዘገባዎችን መከታተል ያስደስተው እንደነበር ይናገራል፡፡

ምርጫ 1997 ዓ.ም. ጠባሳውን ጥሎ ካለፈ በኋላም ቢሆን ይህ ወጣት ከፖለቲካና ተያያዥ ጉዳዮች ጋር የሚገናኙ የኅትመት ውጤቶችን በማሳደድ ሥራዬ ብሎ መከታተልና ማንበብ የዕለት ተዕለት ሥራው ነበር፡፡ በዚህ መንገድ ወደ ፖለቲካ የተሳበው ወጣት 2004 ዓ.ም. ገደማ የቡድን ጓደኞቹን ያገኘበትን የማኅበራዊ ትስስር ገጽ (ፌስቡክ) መተዋወቁን ይገልጻል። 

በዚህ የማኅበራዊ ትስስር አማካይነት ከተጎዳኛቸው ሌሎች መሰል ወጣቶቹ ጋር በአካልም መገናኘትና በፖለቲካ ጉዳዮች ላይ ሐሳብ መለዋወጥ ይጀምራል። በዚህ መንገድ የቅርብ ግንኙነት የጀመረው ይህ ወጣት እሱን ጨምሮ አዘውትረው የሚገናኙ ዘጠኝ ወዳጆቹ በጋራ ሆነው ሐሳባቸውን ለተቀረው ወጣት የሚያካፍሉበት መጦመርያ ገጽ (ብሎግ) ለመክፈት በተስማሙት መሠረት፣ ዘጠኙን ጓደኛሞች የሚገልጽ ‹‹ዞን ዘጠኝ›› የሚል ስያሜ ለመጦመርያ ገጻቸው ሰጥተው መንቀሳቀስ ይጀምራሉ። 

በዚህ በበይነ መረብ የፖለቲካ ሐሳቦች የሚንሸራሸሩበትን ርዕሰ ጉዳዮች ላይ ማኅበረሰቡን ማንቃት የሚችሉ፣ የውይይት አጀንዳ ሊሆኑ ይችላሉ የሚባሉ ጉዳዮች ላይ ዘመቻ በማድረግና ሌሎችም ሐሳባቸውን የሚናገሩበት መድረክ በማድረግ እንቅስቃሴያቸው ያቀላጥፋሉ፡፡ 

የፖለቲካና ሌሎች ማኅበራዊ ጉዳዮች ላይ ያላቸውን አመለካከት በመጦመርያ ገጻቸው ላይ ተደራሽ ከማድረግ ባለፈበጊዜው በፖለቲካ አመለካከታቸውና ሐሳባቸውን በመግለጻቸው ምክንያት ለእስር ተዳርገዋል ብለው ያመኗቸውን ሰዎች እስር ቤት በመሄድ መጠየቅና ማበረታት የሥራቸው አንዱ አካል ነበር፡፡ 

በሚያደርጉት እንቅስቃሴያቸው ምክንያት በወቅቱ የነበረው መንግሥት በመጀመርያ ኢትዮጵያ ውስጥ ብሎጉ እንዳይታይ እንዳገደባቸውበኋላም የተለያዩ ማስፈራሪዎችና ዛቻዎች ይደርሷቸው እንደ ጀመረ ይገልጻል። ማዋከቡ በዚህ አላቆመም፡፡ ‹‹ዞን ዘጠኝ›› በተባለው በመጦመርያ ገጽ ላይ ይጽፉ ከነበሩት መካከል ስድስቱ ጓደኛሞችሚያዚያ 2006 ዓ.ም. በፖሊስ ተይዘው ይታሰራሉ።

በኋላም የሽብር ክስ ተመሥርቶባቸው ክሳቸውን በማረሚያ ቤት ሆነው መከታተል ዕጣቸው ሆነ። በእስር ቤት ቆይታቸውም ድብደባን ጨምሮ የተለያዩ ሥነ ልቦናዊ ጥቃቶችን የመሸከም ዕዳ በዚያ የወጣትነት ዕድሜያቸው ይወርድባቸው ያዘ። 

በተከሰሱበት የሽብር ወንጀል ፍርድ ቤት ወንጀል መፈጸማቸውን የሚያስረዳ ማስረጃ የለም ብሎ በነፃ እንዲለቀቁ የወሰነ ቢሆንምበወቅቱ የነበረው የፖለቲካ ሥርዓት እንዲለቀቁ አላደረገም። ፍርዱን ለማስለወጥ ይግባኝ በመጠየቅ የእስር ቆይታቸው እስከ 2008 ዓ.ም. እንዲራዘም አድርጎ መከራቸውን ለማብዛት ጥሯል።  2008 ዓ.ም. በመላ አገሪቱ የተቀሰቀሰው የወጣቶች ተቃውሞ በወቅቱ የነበረውን መንግሥት ያስጨነቀ በመሆኑወጣቶችን እንደሚሰማ ለመግለጽና ተቃውሞውንም ለማርገብ ‹‹ዞን ዘጠኝ›› ጦማሪያን ላይ የመሠረተውን ክስ አቋርጦ እንዲለቀቁ በመወሰኑ ዳግም ወደ ሰፊው ሕይወት ተቀላቀሉ። 

ይህንን ታሪኩን ያወጋን የቀድሞው የእንጦጦ የቴክኒክና ሙያ ትምህርት ቤት ተማሪ፣ የአሁኑ የኢትዮጵያ ዜጎች ለማኅበራዊ ፍትሕ (ኢዜማ) ሕዝብ ግንኙነት ኃላፊ አቶ ናትናኤል ፈለቀ ነው። ናትናኤልና የ‹‹ዞን ዘጠኝ›› ጓደኞቹ በያዙት የፖለቲካ አመለካከት የደረሰባቸው የቅርብ ዓመታት ታሪክ በወጣቶች ላይ የሚደርስ የፖለቲካ በደል አንዱ መገለጫ ብቻ ነው።  ከዚህ ታሪክ የባሰ ግፍ የተፈጸመባቸው ወጣቶች የመኖራቸውን ያህልበደሉ የመንግሥት ሥርዓት በተለወጠ ቁጥር እየተወረሰ የቀጠለ ስለመሆኑ ከንጉሡ ዘመን አንስቶ የአገሪቱ ወጣቶች ያለፉበት መንገድ ማሳያ ነው።

በቀድሞ አጠራሩ የቀዳማዊ ኃይለ ሥላሴ ዩኒቨርሲቲ ተማሪዎች (የአሁኑ የአዲስ አበባ ዩኒቨርሲቲ) በወቅቱ የነበረው ዘውዳዊ ሥርዓት ለሁሉም ኢትዮጵያዊ ፍትሐዊ ተጠቃሚነትን ያላሰፈነአንዱን አገልጋይ፣ አንዱን የበላይ አድርጎ ያስቀመጠ ‹‹የከበርቴ ሥርዓት ነው›› በማለት ሥርዓቱን ለመገርሰስ ‹‹መሬት ላራሹ›› ንቅናቄ አውጀዋል። ይህም በዘመናዊት ኢትዮጵያ የፖለቲካ ታሪክ ውስጥ የተደራጀ የፖለቲካ እንቅስቃሴ እንደ ጅማሮ ተደርጎ ይጠቀሳል።

‹‹መሬት ላራሹ›› የትግል መፈክር ውስጥ ፍትሐዊ የኢኮኖሚ ተጠቃሚነት ጥያቄን አንግቦ የተለኮሰው የወጣት ተማሪዎች የፖለቲካ ንቅናቄ አድማሱን በማስፋት፣ የማንነትና የብሔር እኩልነትን እያካተተ ወደ ርዕዮተ ዓለም ትግል ተሸጋግሯል።  ነገር ግን የፖለቲካ ንቅናቄውን የለኮሱት የወቅቱ ወጣት ተማሪዎች የጀመሩትን ትግል አበርትተው ከማፋፋም በዘለለ፣ ለማሳካት የተለሙት የፖለቲካ ግብ ላይ የሐሳብ አንድነት እንዳልነበራቸው ከታሪክ ድራሳናቶቻቸው መረዳት ይቻላል። 

ወጣቶቹ የለኮሱት ፖለቲካዊ ትግል ዘውዳዊ ሥርዓቱን ገዝግዞ እየጣለው እንደነበር ቢረዱም፣ በቀጣይ ስለሚያቆሙት መንግሥትና ሥርዓት የተሟላ ዝግጅት ያላደረጉ በመሆናቸው ጥረታቸው በሌሎች ተጠልፏል። ለዚህም በዋናነት የሚጠቀሰው ወጣት ተማሪዎቹ ለጀመሩትና ለመሞት የተዘጋጁለት የፖለቲካ ትግልን ከዳር ከማድረስ አንፃር የነበረባቸው የመሪነት ጥበብ ጉድለት አንዱ እንደሆነ፣ ዛሬ በርካቶች የሚስማሙበት ነው። በዚህ ምክንያትም የለኮሱት የፖለቲካ ትግል በወቅቱ በነበረው ወታደራዊ ኃይል ተጠልፏል።

የተማሪዎቹን ትግል ጠልፎ ንጉሡን ከዙፋን በማውረድ አገረ መንግሥቱን የማስተዳደር ሥልጣን ለራሱ የሰጠው ወታደራዊ ኃይል (ደርግ)፣ ሲቪላዊ አስተዳደር መመሥረቱን ወደ ጎን ትቶ ሥልጣኑን በኃይል ይዞ መቀጠሉ የወጣቶቹ የፖለቲካ ትግል እንዲቀጥል አስገድዷል። የቀጠለው የወጣቶች ትግል ግን በዘውዳዊው ሥርዓት ላይ እንደ ማመፅ ዓይነት ሳይሆን እሳት የሚተፋ አፈሙዝ ከጨበጠ ኃይል ጋር የሚደረግ ፍልሚያ ነበር።  ርህራሔ ያልነበረው ወታደራዊው ኃይል በከተሞች ብዙ ወጣቶችን መፍጀት ያዘ። ወታደራዊ ኃይሉ ያወጀውን የለውጥ አብዮት ተቃውመው ቆመዋል የተባሉ በሺዎች የሚቆጠሩ ወጣቶችም ‹‹ቀይ ሽብር›› እና የ‹‹ነጭ ሽብር›› ጥይቶች በለጋ አካላቸው ተርከፍክፎ፣ በሺዎች የሚቆጠሩ ወጣቶች ተረሽነው አልፈዋል፡፡

ይህ ያላቆማቸው የኢትዮጵያ ወጣቶች በየአካባቢው ተሰባስበው ወታደራዊው የደርግ መንግሥትን ለመጣል የትጥቅ ትግል ዘመቻ ለሁለት አሥርት ዓመታት የሚጠጋ ጊዜ አድርገው ስኬትን ተቀዳጅተዋል።  በዚህ የሞት ሽረት ፍልሚያና ውጊያ አልፎ ወደ ሥልጣን የመጣው የኢትዮጵያ ሕዝቦች አብዮታዊ ዴሞክራሲያዊ ግንባር (ኢሕአዴግ) መንበረ ዙፋኑን ከተቆናጠጠ በኋላ፣ ለወጣቱ የተሰጠው የአመራር ቦታ እዚህ ግባ የሚባል እንዳልንበረ የቅርብ ጊዜ ትውስታ ነው፡፡ ከዚያ ይልቅ ወጣቱን በማግለልና በፖለቲካ አመለካከቱ በመጨቆን፣ በማፈንና በመግደል ወጣቱን ወደ ፖለቲካው መንደር እንዳይደርስ አድርጓል። 

የቅድመ ምርጫ ሒደቱ ወደር የማይገኝለት 1997 ዓ.ም. ምርጫ በሥልጣን ቆይታው ላይ ከፍተኛ አደጋ ደቅኖ እንደነበር የገመገመው የወቅቱ የኢሕአዴግ አመራርሥልጣኑን አደጋ ውስጥ ከቶት የነበረው የወጣቱ የፖለቲካ እንቅስቃሴ መሆኑን ቢረዳም፣ ወጣቱን የሚያካትትና ተጠቃሚ የሚያደርግ ፖለቲካዊ መንገድ ለመቅረፅ አላሰበም።  ከዚያ ይልቅ ‹‹አደገኛ ቦዘኔ›› ለመከላከል የሚል የወንጀል አዋጅ በማውጣት፣ ወጣቱን ፀጥ ለጥ ለማድረግ መንቀሳቀስ እንደ መረጠ አዋጁን የሚያጣቅሱ ባለሙያዎች ይናገራሉ።

ከዚህም በኋላ የወጡ የመገናኛ ብዙኃንና የፀረ ሽብር አዋጆች ከዋና ዓላማቸው ውጪ ወጣቱን ፀጥ ለጥ ለማድረግ ጥቅም ላይ ውለዋል። ለዚህም እንደ ማሳያ በተጠቀሱት አዋጆች አማካይነት ጥቂት የማይባሉ ወጣቶች ተከሰው እስር ቤት መወርወራቸውና የተቀሩት አገር ጥለው መሰደዳቸው ይጠቀሳል። ስደትና እስር፣ በእስር ቤት ብዓዊ ጥሰቶች፣ መደፈር፣ ጥፍር መነቀል፣ አካል መጉደልና ሞት፣ እንዲሁም ደብዛቸው የጠፉ ወጣቶች ታሪክም ያለፉት ሁለትና ሦስት አሠርት ዓመታት በኢትዮጵያ ወጣቶች ላይ የተፈጸሙ የፖለቲካ በደሎች ናቸው። ይህም ሆኖ የኢትዮጵያ ወጣቶች የፖለቲካ ፍትሕ ጥያቄዎችን የሚመልስ ባለመኖሩትግላቸው ተፋፍሞ እንዲቀጥል አድርጓል። 

የዚህም መገለጫ ‹‹ቄሮ›› ‹‹ፋኖ›› እና መሰል ወጣቶችን የሚገልጹ አካባቢያዊ መጠሪያዎችን የያዙ የወጣቶች ንቅናቄዎች ባለፉት ዓመታት በመቀጣጠላቸው፣ የኢሕአዴግን ዕድሜ ለማሳጠር ምክንያት ሆነዋል። ዛሬም ጥያቄዎቻቸው ተሟልተው እንዲመለሱ እንደቀጠሉ ናቸው። 

ኢዜማ ግንቦት 2011 .. ሲመሠረት መሥራች ከነበሩት ወጣቶች አንዱ የነበረው ናትናኤል ፈለቀየኢትዮጵያ መሪዎች አብዛኞቹ ሥልጣን ሲይዙ ወጣቶች የነበሩ ቢሆንምበሥልጣን ቆይታቸው ከወጣቶች ጋር ይስማሙ አልነበሩም ይላል። 

አፄ ኃይለ ሥላሴ ሥልጣን ሲይዙሃያዎቹ፣ ሌተና ኰሎኔል መንግሥቱ ኃይለ ማርያም በ30ዎቹ፣ አቶ መለስ ዜናዊ በ30ዎቹ እንደነበሩ የሚያስረዳው አቶ ናትናኤል፣ በየትኛውም አገር ሲታይ በጣም ወጣት የሚባል የዕድሜ ክልል ውስጥ ነበሩ ይላል፡፡

ባለፉት 70 ዓመታት ኢትዮጵያን ሲያስተዳድሩ ከነበሩት በዕድሜ ገፋ ያሉ መሪዎች ሥልጣን ሲይዙ አርባዎቹ የገቡት የቀድሞ ጠቅላይ ሚኒስትር ኃይለ ማርያም ደሳለኝና ዓብይ አህመድ (/) ናቸው ሲል አቶ ናትናኤል ያስረዳል፡፡ 

በጋራ ሁኔታ ላይ የሚወስነውን አካል የተቆጣጠሩት ሰዎች ሥልጣን ላይ እንዴት እንደሚቆዩና ሌላ ሰው ወደ ሥልጣን እንዳይደርስ መከላከያ አጥር በሚያበጁበት ሁኔታ ውስጥ፣ ‹‹የወጣቶች ፖለቲካዊ ተሳትፎ የሚባል ነገር የለምካለም ሊሆን የሚችለው ገዥው ፓርቲ ዘንድ መሆኑ ነው፤ይላል።

በተቃራኒው ለሚቆሙ ሰዎች የፖለቲካ ከባቢው አስቸጋሪና አሥጊ እንዲሆን ሌት ተቀን ሲሠራበት የቆየ በመሆኑ፣ ውጤት ማምጣት አዳጋች ሆኖ መቆየቱን ይገልጻል። በዚህ ምክንያት የፖለቲካው እንቅስቃሴ ለወጣቶች ብቻ ሳይሆን፣ ለሁሉም ሰው አስቸጋሪ እንደነበር ያስረዳል፡፡  ‹‹ለነፃነትና በጋራ በሚወሰኑ ጉዳዮች ላይ እኩል የመሳተፍ መብት ለማግኘት ሲባል የተወሰነ ዋጋ መክፈል የግድ እንደሆነ፣ በየትኛውም የዓለም ታሪክ ያሉ የፖለቲካ ታሪኮች ምስክሮች ናቸው፤›› ብሏል፡፡ 

በኢትዮጵያ የሚመሠረቱ ፓርቲዎች አብዛኛውን ጊዜ በዕድሜ ገፋ ባሉ ሰዎች፣ በፖለቲካ ከዚህ ቀደም በተሳተፉና እርስ በርስ በሚተዋወቁ ሰዎች በመሆኑ ለወጣቶች ቦታ እንደማይሰጡ የሚናገረው አቶ ናትናኤል፣ ‹‹በሌላ በኩል በአጠቃላይ ከደርግ ጀምሮ የነበረው የፖለቲካ ሒደት ወላጆችፖለቲካየሚባለውን ነገር በፍርኃት እንዲመለከቱት አድርጓል፤››ብሏል፡፡ በፖለቲካ መታሰር፣ መገደል፣ መሰደድ፣ ሥልጣን ከያዙ ደግሞ የሕዝብን ሀብት ለራስ ጥቅም የማዋል ልምዶችማኅበረሰቡ ፖለቲካን በሌላ ዕሳቤ እንዲረዳው ምክንያት እንደሆነና በኢፍትሐዊ የፖለቲካ ቀንበር ውስጥ ማኅበረሰቡ እንዲኖር ማድረጉን ይገልጻል።

የባልደራስ ለእውነተኛ ፓርቲ የፖለቲካ ዘርፍ ኃላፊ አቶ ጌታነህ ባልቻ ከተነሳው ሐሳብ ጋር ይስማማሉ። በገዥው ኃይል በሚደረግ ጫና ምክንያት ብቻ ወጣቱ በፖለቲካ እንቅስቃሴ ሳይሳተፍ መቅረቱን የሚገልጹት አቶ ጌታነህ፣ ‹‹ለምሳሌ እኔ በፖለቲካ ስሳተፍ ሥራ ቦታ መቸገርና የትምህርት ዕድሎች መጨናገፍ ደርሶብኛል፡፡ ነገር ግን ይኼን ሁሉ ችዬ ለሌሎቹ ምሳሌ መሆን ከቻልኩ ብዬ ገብቼበታለሁ፤›› ብለዋል።

በብልፅግና ውስጥ ያሉ መሪዎች ቀደም ሲልም የነበሩ በመሆናቸው ወጣት አመራር ማብቃት አለመቻላቸውንአሁን የመጣው ለውጥም የተቀሰቀሰው የወጣቱን ፍላጎት በአግባቡ የሚረዳ አመራር ባለመኖሩ እንደሆነ የጠቆሙት አቶ ጌታነህ፣ ‹‹ስለወጣቶች ብዙ ነገር ይላሉ እንጂ፣ እውነተኛ አመራር እንዲሆኑ ማብቃት ላይ አልሠሩም፤›› ሲሉ ይተቻሉ፡፡

አሁንስ ወጣቶች ወደ ፖለቲካና አመራርነት እየመጡ ነው?

ከኢትዮጵያ ማኅበረሰብ ውስጥ 70 በመቶ የሚሆነውን ወጣት እያገለሉ መቀጠል አደጋ እንዳለው የሚናገረው ናትናኤልወጣቶች በወደፊት ዕጣ ፈንታቸው ላይ የሚወስኑት እነማን ናቸው ብለው መጠየቅና በራሳቸው ጉዳይ ላይ የመወሰንና ባለቤትነት የመሆን መብት እንዳላቸው ማወቅ እንዳለባቸው ይገልጻል።  ጉዳዩ የሚሰጥና የሚከለከል ሳይሆን፣ መብት ስለሆነ የሚተገበር መሆን እንዳለበትም ያስረዳል። 

ይህን ማለማመድ አልጋ በአልጋ አይደለምየተወሰነ ውጣ ውረድን የሚጠይቅ በመሆኑ ወጣቶች ለራሳቸው ሲሉ ይህን ማለፍ እንደሚጠበቅባቸው ይናገራል፡፡  የፖለቲካ ሒደቱ ብቁ ወጣቶች ለማፍራት የሚያስችል ነው ለማለት እንደማያስደፍር የሚገልጸው ናትናኤል፣ ‹‹ለምሳሌ እኔ ከዚህ በፊት ያለፍኩበት በቂ ልምድና ዕውቀት ሰጥቶኛል ብዬ አላምንም፤›› ሲል ተናግሯል፡፡

ነገር ግን የዚህ የፖለቲካ አካሄድ መቀየር እንዳለበት፣ በተለይም ማኅበረሰቡን የማገልገል ፍላጎት ያላቸውን የፖለቲካ ፓርቲዎችን እየተቀላቀሉ ከአባልነት ጀምሮ በሒደት ልምድ፣ ዕውቀት እያገኙ፣ እንዲሁም በየደረጃው ኃላፊነት እየተሰጣቸው የተለማመዱ አገር እንዲረከቡ የማብቃት ሥራ መሥራት እንደሚያስፈልግ ገልጿል፡፡

አሁን ያለው የፖለቲካ ዓውድ ለወጣቶች እጅግ ምቹና ወደ አመራርነት እንዲመጡ የሚያስችል ነው ለማለት አያስደፍርምነገሩን ትንሽ ጊዜ ተሰጥቶ መታየት እንዳለበት ይናገራል።  ነገር ግን ናትናኤል በአመራርነት የሚሳተፍበትን የኢዜማ ጥረቶች ያነሳል።

 በኢዜማ ውስጥ በየቦታው አዳዲስ ወጣቶችን ዕድል ለመስጠት ጥረት እንደሚደረግና ከፓርቲው ሥራ አስፈጻሚዎች ውስጥ ስምንቱ 30 ዓመታት በታች ዕድሜ ያላቸው ወጣቶች መሆናቸውንእንዲሁም በሚቀጥለው ምርጫ የሚተኩ በመኖራቸው ወጣቶች የአመራርነት ሒደትን እየተለማመዱ ስለመሆናቸው ማሳያ እንደሆነ ገልጿል።

የባልደራስ ለእውነተኛ ፓርቲ የፖለቲካ ዘርፍ ኃላፊ አቶ ጌታነህ ባልቻ፣ ከኢትዮጵያ ሕዝብ 70 በመቶ የሚያህለው ወጣት ሆኖ ሳለ ወጣቶችን በጫና ከፖለቲካው ማግለልና ወደ አመራርነት አለማምጣት ውጤት እንደማያስገኝ ይናገራሉ።

ባለፉት 40 እና 50 ዓመታት አንድ ትውልድ አገር ሲመራ እንደነበር አስታውሰው በፖለቲካ ይደክማሉ፣ አዲስ ሐሳብ ማምጣት ያቅታቸዋል፣ ከቴክኖሎጂ ጋር ቶሎ ያለመልመድ ችግር ሊኖር ስለሚችል ለወጣቶች ቦታ መስጠት ከሁሉም ፓርቲ የሚጠበቅና ለአንድ አገር ቀጣይነት አስፈላጊ በመሆኑ የሁሉም ፓርቲ ኃላፊነት ሊሆን እንደሚገባ ያሳስባሉ።

ከዚህ አንፃር በአመራርነት የሚሳተፉበትባልደራስ ፓርቲ አባላትንና የአመራር ስብጥርን በተመለከተምበፓርቲያቸው 80 በመቶ በላይ የሚሆኑት ወጣቶች እንደሆኑና ከፓርቲው 11 ከፍተኛ አመራሮች ውስጥ ከሁለት ሰዎች በስተቀር የተቀሩት በሙሉ ወጣቶች መሆናቸውን ተናግረዋል፡፡ 

በባልደራስ ውስጥ ወጣቶች ባላቸው የፖለቲካ ዕውቀትና ክህሎት በተለያየ መንገድ ዕድል እንዲያገኙ የሚደረግበት መንገድ መኖሩም አቶ ጌታነህ ያክላሉ፡፡ 

የኢዜማ ወጣቶች ተጠሪ አቶ ያሬድ ዓለማየሁ ለሪፖርተር እንደተናገሩት፣ አሁን ባለው ሥራ አስፈጻሚ ውስጥ 40 እስከ 45 በመቶ ወጣቶች ናቸው፡፡ ለመጪው ምርጫ የሚወዳደሩትን ጨምሮ እስከ 50 በመቶ የሚሆኑት ወጣቶች መሆናቸውን ያሬድ ይናገራል፡፡ በዚህ ሴቶችንም ወንዶችንም በአንድ ላይ የሚጠቀልል ሲሆን፣ 20 እስከ 30 በመቶ በሥራ አስፈጻሚነት ደረጃ ሴቶች መሆናቸውን ተናግሯል፡፡ 

በተለያዩ የሥራ ዘርፍ የተሰማሩ ወጣቶች ለሪፖርተር እንደተናገሩት፣ ገዥው ፓርቲም ሆነ ሌሎች ተፎካካሪ ፓርቲዎች ወጣቶችን በፖለቲካ ብቁ ከማድረግ ይልቅ ለአባልነት መመልመል ያስቀድማሉ፡፡ የወጣቶችን የፖለቲካ ዕውቀት ከመገንባት፣ አዲስ ሐሳብ እንዲያፈልቁና ወደ አመራርነት እንዲበቁ ከማገዝ ይልቅ ለተከታይነት እንዲታጩ በመደረጉ፣ ለውጥ ለማምጣት ችግር መሆኑን ያስረዳሉ፡፡

የዚህ የፖለቲካ አካሄድ ቀደምት ብቻ ሳይሆን አሁንም ድረስ ያለ መሆኑንና በተለያዩ የወጣት ማኅበራት፣ የመንግሥት መሥሪያ ቤቶችና ሌሎችም ቦታዎች አባል የሚሆኑት በፖለቲካ ዕውቀት አምነውበት እንዳልሆነ ሪፖርተር ያነጋገራቸው ወጣቶች አስረድተዋል፡፡

በዚህም ምክንያት ወጣቶች ለውጥ አቀጣጣይነት እንጂ በአመራርነት ብቁ የማድረግ ሥራ እጅግ አናሳ መሆኑን ማሳያ ነው ይላሉ፡፡  

spot_img
- Advertisement -

ትኩስ ጽሑፎች

ተዛማጅ ጽሑፎች

- Advertisement -
- Advertisement -