Sunday, July 14, 2024
- ማስታወቂያ -
- ማስታወቂያ -

ለትግራይ ክልል የተሰጠው የብር ኖት ቅያሪ መጠናቀቅ

ተዛማጅ ፅሁፎች

በትግራይ ክልል አሮጌ ብር ለመቀየር የተሰጠው የመጨረሻ የጊዜ ገደብ መጠናቀቁንና በክልሉ የሚገኙ ሥራ ላይ ያሉ የባንኮች ቅርንጫፎችም የአሮጌ ብር ቅያሬ አገልግሎታቸውን ማቆማቸው ታውቋል፡፡

ከሌሎች የአገሪቱ ክልሎች በተለየ የብር ኖት ቅያሬው በዘገየበት የትግራይ ክልል ውስጥ የብር ኖት ለመቀየር የተሰጠው የጊዜ ገደብ መጋቢት 10 ቀን 2013 ዓ.ም.  የተጠናቀቀ በመሆኑ፣ በክልሉ የሚገኙ የባንክ ቅርንጫፎች የብር ኖት መቀየር ተግባራቸውን በማጠናቀቅ ቅያሬውን የተመለከተ ሪፖርታቸውን ለኢትዮጵያ ብሔራዊ ባንክ እያቀረቡ ነው፡፡

በክልሉ ለመጨረሻ ጊዜ ተብሎ በተጠቀሰው የጊዜ ገደብ ውስጥ ባንኮች ከ100 ሺሕ ብር በታች አሮጌ ብር ያላቸውን ደንበኞች ቅያሬውን ሲያካሂዱ ቆይተዋል፡፡

የኢትዮጵያ ብሔራዊ ባንክ የካቲት 27 ቀን 2013 ዓ.ም. ባወጣው መግለጫ፣ ከትግራይ ክልል በስተቀር አሮጌ ብር በአዲስ የመቀየሩ ሥራ በተሳካ ሁኔታ መጠናቀቁን ጠቅሶ፣ በትግራይ ክልል ግን ከሕግ ማስከበሩ ምክንያት ተስተጓጉሎ የነበረው የብር ቅያሬ ተጨማሪ ጊዜ እየተሰጠ የብር ቅያሬው ሲካድ የቆየ ሲሆን፣ የመጨረሻ ያለውን የ14 ቀናት የጊዜ ገደብ መስጠቱ ይታወሳል፡፡

ይህ የገንዘብ ቅያሬው የመጨረሻው ምዕራፍ በመሆኑ የኢትዮጵያ ብሔራዊ ባንክ የገንዘብ ቅያሬውን መጠናቀቁን ይፋ ያደርጋል ተብሎ እየተጠበቀ ነው፡፡

የኢትዮጵያ ብሔራዊ ባንክ የመጨረሻ ያለውን የጊዜ ገደብ ካስቀመጠ በኋላ በክልሉ በሚገኙና አገልግሎት በተጀመረባቸው ባንኮች የብር ቅያሬው ቢከናወንም አሁንም የባንክ ቅርንጫፎች ሥራ ባልጀመሩባቸው የክልሉ አካባቢዎች ያልተቀየረ የብር ኖት ያላቸው ሊኖሩ ይችላሉ የሚል ግምት አለ፡፡ የኢትዮጵያ ብሔራዊ ባንክ እንዲህ ጊዜ እያራዘመ መቀጠሉ ለአሠራር የሚያመቸው ባለመሆኑ ለ11 ቀናት የሰጠው የብር ኖት የቅየራ ጊዜ የመጨረሻ ይሆናል ተብሎ ይጠበቃል፡፡

የኢትዮጵያ ብሔራዊ ባንክ አጠቃላይ የብር ለውጡን የተመለከተ ጥቅል ሪፖርት ያልሰጠ ቢሆንም፣ በትናንትናው ዕለት ለፓርላማ ማብራሪያ የሰጡት ጠቅላይ ሚኒስትር ዓብይ አህመድ (ዶ/ር) ብር ለውጡ ካስገኛቸው ተጠቃሚዎች መካከል ከ6.2 ሚሊዮን በላይ አዲስ የባንክ ደንበኞች የቁጠባ ሒሳብ የከፈቱ ሲሆን፣ እነዚህም አዲስ ቆጣቢዎች በየባንኮቹ የቆጠቡት የገንዘብ መጠን 98 ቢሊዮን ብር መሆኑን ገልጸዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች