Friday, December 2, 2022
ሌሎች ዓምዶች
    - Advertisement -
    - Advertisement -
    የሳምንቱ ገጠመኝየሳምንቱ ገጠመኝ

    የሳምንቱ ገጠመኝ

    ቀን:

    ባለፈው ክረምት ውስጥ ከስታዲየም ወደ ሽሮሜዳ በሚያመራው ታክሲ ውስጥ ተሳፍሬአለሁ፡፡ የታክሲው ረዳት ውጪ ሆኖ እየተጣራ ተሳፋሪዎችን ያስገባል፡፡ አንድ ተሳፋሪ የሚመስል ሰው በሩ ላይ ቆሞ ወደ ውስጥ እየተመለከተ ቆሟል፡፡ ረዳቱ ወደ ሰውየው ቀረብ ብሎ፣ ‹‹ወንድም በሩን አትዝጋው ከገባህ ግባ፤›› አለው፡፡ ሰውየው ወደ ረዳቱ ፊቱን መልሶ፣ ‹‹የት ነው የምትጭኑት?›› አለው፡፡ ረዳቱም፣ ‹‹አይሰማህም እንዴ አራት ኪሎ፣ ስድስት ኪሎ፣ ሽሮ ሜዳ እያልኩ ስጣራ?›› አለው በተበሳጨ ድምፅ፡፡ ሰውየው ረዳቱንና እኛን እያየ ይስቅ ጀመር፡፡ ታክሲው ውስጥ የተቀመጥነው ጥቂት ሰዎች በመገረም እያየነው ነው፡፡

    በዚህ መሀል ሰውየው፣ ‹‹እኔ እኮ ስድስት ኪሎ ጂኒ ጃንካ መሄዳችሁን መቼ አወቅኩ…›› ሲል ጤነኛ እንዳልሆነ ገባኝ፡፡ ምንም እንኳ እጅግ በጣም ንፁህ ሙሉ ልብስ ከከረባት ጋር ቢለብስና ንፁህና የሚያብረቀርቅ አዲስ ጥቁር ጫማ ቢጫማም የሆነ ችግር አለ አልኩ፡፡ መልኩ ቀላ ብሎ በምቾት የተያዘ ሰው ቢመስልም አንድ ልክ ያልሆነ ነገር ጠረጠርኩ፡፡ አንገቴን ሰገግ አድርጌ፣ ‹‹ወንድም የት መሄድ ነው የፈለግከው?›› አልኩት፡፡ ሰውየው ፈገግ ብሎ እያየኝ፣ ‹‹እኔማ ወደ ማርስ የምትሄዱ መስሎኝ እኮ ነው ልሳፈር የነበረው፤›› ሲል ደነገጥኩ፡፡ እንደኔ ሌሎች ተሳፋሪዎችም ሆኑ ረዳቱ ደንግጠዋል፡፡

    ሰውየውን በሐዘኔታ እያየን ሳለ ድንገት ሁለት ውብ ወጣት ሴቶች መጥተው አጠገቡ ቆሙ፡፡ አንደኛዋ ፈገግታዋን በሚገባ ለግሳው፣ ‹‹ሚኪ ከምኔው እዚህ ጋ መጣህ? እኛ እኮ ከአጠገባችን ስትጠፋ ተጨነቅን፡፡ በል እንሂድ እነ ማሚና ባቢ ይጠብቁናል፤›› ካለችው በኋላ ወገቡን እቅፍ አድርጋ ስትይዘው፣ ሌላኛዋም እጁን  ይዛው መንቀሳቀስ ጀመሩ፡፡ ይኼኔ ምን እንደገፋፋኝ አላውቅም ከታክሲው ወርጄ ተከተልኳቸው፡፡ ግራ የሚያጋባ ድንገተኛ ነገር ሲያጋጥመኝ የማወቅ ፍላጎቴ ስለሚጨምር ነው መሰል ተከትያቸው ሄድኩ፡፡

    ላሊበላ ሬስቶራንት አጠገብ ያለው መኪና ማቆሚያ ሲደርሱ አንደኛዋ ወጣት የጥቁር መርሰዲስ መኪና በር ከፍታ ከገባች በኋላ ለሰውየውና ለልጅቷ እንዲገቡ በሮቹን ከፈተችላቸው፡፡ ሰውየው የፊት በሩን ከፍቶ ሲገባ አጠገቡ የነበረችው ወጣት ጋ ጠጋ ብዬ ሰላምታ አቀረብኩላት፡፡ ማን ይሆን በሚል ስሜት እያየችኝ ሰላም አለችኝ፡፡ ቀረብ አልኳትና ታክሲው ውስጥ ሆኜ የገጠመኝን ትዕይንት ከነገርኳት በኋላ፣ ‹‹ይህን የመሰለ ሰው ምን ሆኖ ነው?›› በማለት ጥያቄ አቀረብኩላት፡፡ ‹‹አንዴ›› አለችኝና መኪናውን ወደምታሽከረክረው ወጣት ዘንድ ሄዳ ጥቂት ከተነጋገረች በኋላ ተመልሳ መጣች፡፡ ያችኛዋም ተከተለቻት፡፡

    ወጣቷ፣ ‹‹ይኼ የምታየው ሰው ታላቅ ወንድማችን ነው፡፡ ቢያንስ ከሃያ ዓመት በላይ ይበልጠናል፡፡ አሜሪካ ከመሄዱ በፊት የተማረው ሴንት ጆሴፍ ትምህርት ቤት ነው፡፡ ከዚያም አዲስ አበባ ዩኒቨርሲቲ ገብቶ በኢንጂነሪንግ በዲግሪ ተመርቋል፡፡ አሜሪካ ደግሞ ማስተርሱንና ዶክትሬት ዲግሪውን አግኝቷል፡፡ በአሜሪካ ታዋቂ ኩባንያዎች ውስጥ በከፍተኛ ኃላፊነት ሠርቷል፡፡ ከቅርብ ጊዜ ወዲህ ግን የአዕምሮ ሕመም ስለገጠመው ሕክምናውን እየተከታተለ ነው፡፡ እዚህ የመጣው ደግሞ ለጠበል ነው፤›› ብላ አስረዳችኝ፡፡ እህትየውም አክላ እንደነገረችኝ አሁን ከበፊቱ በተሻለ ሁኔታ ላይ ይገኛል፡፡ ‹‹ምንም እንኳን እንዳንዴ በመጠኑ ዘብረቅ ቢያደርግም እግዚአብሔር ይመስገን ደህና ነው ፤›› አለች፡፡

    ተሰነባብቻቸው ልንለያይ ስንል አንደኛዋ፣ ‹‹ሰው በጣም ስለሚወድ እስኪ አናግረው፤›› አለችኝ፡፡  ጠጋ ብዬ ‹‹ሰላም እንዴት ነው?›› አልኩት፡፡ በሩን ከፍቶ እየወጣ፣ ‹‹እንዴ ታክሲ ውስጥ አይቼሃለሁ፡፡ ተነጋግረን ነበር አይደል?›› አለኝ፡፡ ትክክል መሆኑን ካረጋገጥኩለት በኋላ፣ ‹‹ታክሲው ወደ ማርስ ስለማይሄድ እኔም ወረድኩ፤›› በማለት እየሳቅኩ ነገርኩት፡፡ እሱም እየሳቀ፣ ‹‹አንተ ቀልደኛ ትመስላለህ፡፡ እኔ እኮ ትንሽ ላዝናናችሁ ብዬ ነው እንጂ ታክሲ ወደ ማርስ እንደማይሄድ አጥቼው አይደለም፤›› ካለኝ በኋላ፣ በነገራችን ላይ፣ ‹‹ምንድነው የተማርከው?›› በማለት ጠየቀኝ፡፡ በሒሳብ ተመርቄ የአስተዳደር ሥራ በግዳጅ እንደምሠራ ነገርኩት፡፡ በመገረም እያየኝ፣ ‹‹አሠሪዎችህ ወፈፍ ሲያደርጋቸው አንተም አብረሃቸው ታብዳለህ?›› ብሎ ሲቆጣኝ የአዕምሮ ታማሚው እኔ ወይስ እሱ አልኩ በልቤ፡፡

    ላለፉት 15 ዓመታት ያባከንኩት ጊዜ ወለል ብሎ እየታየኝ እሱን እንደ ጤነኛ፣ ራሴን ደግሞ እንደ ሕመምተኛ አድርጌ ሰዎቹን ተሰናብቼ ጉዞዬን ቀጠልኩ፡፡ በዚህ አጋጣሚ መነሻ ይኼው አሁን ሁለተኛ ዲግሪዬን በሒሳብ ትምህርት ለማግኘት ትምህርቴን የጀመርኩ ሲሆን፣ የምወደውን ሙያዬንም በትግል አግኝቻለሁ፡፡ ላለፉት ዓመታት ከነበርኩበት አዙሪት ውስጥ ያወጣኝ ያ ሰው አሁን በመልካም ጤንነት ላይ መሆኑንና ሥራ መጀመሩንም ከእህቶቹ ተረድቻለሁ፡፡

    (ወሰንሰገድ ማስረሻ፣ ከስድስት ኪሎ)  

    spot_img
    - Advertisement -

    ይመዝገቡ

    spot_img

    ተዛማጅ ጽሑፎች
    ተዛማጅ

    [በተቋሙ ሠራተኞች የተወከሉ አንድ ባልደረባ ሚኒስትሩን ለማነጋገር ቀጠሮ ይዘው ወደ ቢሯቸው ገቡ]

    ጤና ይስጥልኝ ክቡር ሚኒስትር? ሰላም ሰላም ... ተቀመጥ! አመሠግናለሁ ክቡር ሚኒስትር!...

    የጉራጌ ዞን ጥያቄና የክላስተር አደረጃጀት የገጠመው ተቃውሞ

    መንግሥት የደቡብ ብሔር ብሔረሰቦችና ሕዝቦች ክልል አካል የነበሩ ዞኖችንና...

    አዋሽ ባንክ ካፒታሉን ወደ 55 ቢሊዮን ብር ለማሳደግ ያስገደደው ምክንያት ምንድን ነው?

    ባለፈው ቅዳሜ ጠቅላላ ጉባዔውን ያካሄደው አዋሽ ባንክ የ43 ቢሊዮን...

    አቢሲኒያ ባንክ ካለፈው ዓመት የ127 በመቶ ብልጫ ያለው ትርፍ በማግኘት አዲስ ታሪክ አስመዘገበ

    አቢሲኒያ ባንክ ከቀደሚ የሒሳብ ዓመት የ127 በመቶ ብልጫ ያለው...