Monday, October 3, 2022
ሌሎች ዓምዶች
    - Advertisment -
    - Advertisment -

    [ክቡር ሚኒስትሩ ከህዳሴ ግድቡ ተደራዳሪ ቡድን አባላት የቡድን መሪ ጋር ግብፅ ስላነሳችው አዲስ ክርክር እየተወያዩ ነው]

    • እስኪ ካቆምክበት ሐሳብ ጀምርልኝ፡፡ የሰሞኑ ድርድር አዲስ ጉዳይ ምን ነበር?
    • ክቡር ሚኒስትር ለድርድር ብንቀመጥም በዋና ጉዳይ ላይ መወያየት አልቻልንም።
    • ለምን?
    • በግብፅ በኩል አዲስ የክርክር አጀንዳ ተመዟል፡፡
    • ከዚህ ቀደም ያልነበረ ነው?
    • አዎን ክቡር ሚኒስትር፡፡ 
    • አዲሱ ክርክር ምንድነው?
    • ድርሻዬ መነካት የለበትም ነው የምትለው።
    • ግብፅ ነች?
    • አዎ። 
    • የከረምንበት ክርክር አይደለም እንዴ ምኑ ነው አዲስ?
    • አዲስ የድርሻ ጥያቄ ነው የተነሳው ክቡር ሚኒስትር፡፡
    • የምን ድርሻ?
    • የደመና ድርሻ፡፡
    • ምን?
    • በኢትዮጵያ ላይ የደመና ድርሻ አለኝ እያለች ነው።
    • ወይ ግብፅ? እና ምን ይሁን አለች?
    • ስምምነት ሳይደረስ መጀመር የለበትም።
    • ምኑ?
    • ደመና ማዝነቡ።
    • እናንተ ምን ምላሽ ሰጣችሁ?
    • ስለደመና ለመደራደር ሥልጣን እንዳልተሰጠን አሳውቀናል፡፡
    • ሥልጣን ቢሰጣችሁስ? 
    • እንደማይሰጠን እናውቃለን ክቡር ሚኒስትር፡፡ 
    • ለምን?
    • በበላይ አካልጥብቅ የተያዘ መሆኑን እናውቃለን።
    • ሌላ ያነሱት ነገር አለ?
    • ግብፆች ካዳመጧቸው የማያነሱት ነገር የለም፡፡
    • ምን አነሱ?
    • በእረፍት ሰዓት ከደመና ማዝነቡ ጋር በተያያዘ ሲጠይቁን ነበር፡፡
    • ምን አሉ?
    • ደመና እንድታዘንቡ ብንስማማ እንኳን እንዲቀላቀል አንፈቅድላችሁም ይላሉ።
    • ምኑ ከምን እንዳይቀላቀል?
    • የደመናው ዝናብ ከዓባይ ወንዝ ጋር።
    • ለምን?
    • የዓባይ ድርሻችንን ለመለየት እንቸገራለን ነው የሚሉት፡፡
    • ወይ ግብፅ. . .  
    • አንዳንዶቹ ደግሞ የዓባይ ወንዝን የምናውቀው ብቻውን ነው፡፡ ከሰው ሠራሽ ደመና ዝናብ እንዲቀላቀል አንፈልግም ይላሉ።
    • ከሰው ከሠራሽ ደመና አንፈልግም አሉ?
    • አዎ። 
    • ምን ይሁን ይላሉ?
    • ኦርጋኒክ ደመና፡፡
    • ደመና ማዝነቡን ወደፊት ብንሞክረው ሳይሻል አይቀርም?
    • ይኼማ መንበርከክ ነው ክቡር ሚኒስትር. . . መሆን የለበትም፡፡
    • እኔ ከግብፅም ሆነ ከማንም ጋር አታካራ ውስጥ መግባት አልፈልግም፣ ሰላም ነው የምፈልገው፡፡
    • ክቡር ሚኒስትር ይህንን እንዳይወስኑ፡፡
    • ነገርኩህ እኮ ሰላም ነው የምፈልገው። ደመና ማዝነቡን ወደፊት እንደርስበታለን።
    • ክቡር ሚኒስትር ሕዝቡ ምን ይለናል? 
    • ሕዝቡ ያለንበትን ሁኔታ ይረዳል። 
    • እሺ ሕዝቡ ተረዳን እንበል፣ ፓርላማውስ ምን ይለናል?
    • ፓርላማው ምንም አይለንም፡፡
    • እንዴት?
    • ባልፈቀደልን በጀት ሊቆጣጠረን አይችልም፡፡
    • ለነገሩ እሱስ ባልፈቀደው በጀት ምን ብሎ ይጠይቃል ልክ ነዎት!

    [ክቡር ሚኒስትሩ ወደ ቢሯቸው እንደገቡ አጀንዳቸውን ተመልክተው ለዕለቱ ቀጠሮ የተያዘላቸው አንድ የሚዲያ ባለሙያ እንዲገባ አዘዙ]

    • ጤና ይስጥልኝ ክቡር ሚኒስትር፡፡ 
    • እንደምን አለህ? እስኪ አረፍ በል፡፡ 
    • ክቡር ሚኒስትር ለሚዲያ ዘርፉ ዕድገት ባለዎት ቀና አመለካከትና ከእኛ ጋር ለመወያየት ቢሮዎ ዘወትር ክፍት መሆኑን አደንቃለሁ። 
    • ለአገራችንና ለሕዝባችን ዴሞክራሲ አስፈላጊ በመሆኑ ነው ዘርፉን የምንደግፈው። 
    • ዛሬ የመጣሁት ግን ቅሬታ ለማቅረብ ነው ክቡር ሚኒስትር፡፡
    • ምን ገጠመህ?
    • በግሌ ደህና ነኝ፣ ለዘርፉ ዕድገት ትርጉም ያለው አስተዋጽኦ ይኖረዋል ያልነው የሕግ ማሻሻያ በፓርላማ ቢፀድቅም እስካሁን ወደ ሥራ አለመግባቱ አሳስቦናል።
    • ምን አሳሰባችሁ?
    • ክቡር ሚኒስትር ሕጉ ወደ ሥራ ያልገባው በመንግሥት በኩል የአቋም መንሸራተት በመኖሩ ነው የሚሉ መረጃዎች እየደረሱን በመሆኑ ነው ሥጋት የጫረብን። 
    •  ሃሃሃ. . . ሥጋት አይግባችሁ፣ ሕጉ በነጋሪት ጋዜጣ ኅትመት ላይ እያለ መጠነኛ ችግር ስለገጠመን ነው የዘገየው። 
    • ነጋሪት ጋዜጣ ላይም ተበላሽቶ እንዳይሆን?
    • ምኑ?
    • የኅትመት ማሽኑ፣ የኅትመት ሚዲያዎችን ያሰቃየው አንዱ ችግር አንድ ለእናቱ የምንለው የኅትመት ማሽን በተደጋጋሚ መበላሸት ነው።
    • አይ እንደዚያ እንኳን አይደለም።
    • እሱ ካልሆነ ወረቀት ወይም ቀለም አልቆ ነው የሚሆነው፡፡
    • አይደለም ስልህ። 
    • ታዲያ ምን ተፈጥሮ ነው?
    • ኅትመቱ እንዲዘገይ ታዞ ነው። 
    • ለምን ክቡር ሚኒስትር? 
    • አዋጁ በነጋሪት ታትሞ ከመውጣቱ በፊት ሹመቶች ለመስጠት ታስቦ ነው።
    • ሹመት?
    • አዎ፣ ከአዋጁ በፊት የሚዲያ ዘርፉን ለሚቆጣጠረው መሥሪያ ቤት ባለሥልጣናትን ለመሾም ነው።
    • ምን? 
    • ምነው ደነገጥክ?
    • እንዴት ይሆናል ይኼ ክቡር ሚኒስትር? መሆን የለበትም፡፡
    • ለምን? 
    • የሕግ ማሻሻያው ተስፋ የሰጠን አንዱ ጉዳይ እኮ ነው። 
    • የምን ተስፋ?
    • ለባለሥልጣኑ የሚሾሙ ኃላፊዎች በገለልተኛ ቦርድ ታጭተው መቅረብ እንዳለባቸው ነው ፓርላማው ያፀደቀው ሕግ የሚደነግገው።
    • አዎ ልክ ነህ። 
    • ታዲያ የአዋጁ ኅትመት እንዲቆም ተደርጎ ከሕጉ ውጪ ባለሥልጣን መሾም ትክክል ነው ክቡር ሚኒስትር? እንዴት ይሆናል?
    • ግዴለህም ተረጋጋ. . . የሳትከው ነገር አለ፡፡
    • ምንም የሳትኩት የለም ክቡር ሚኒስትር፡፡
    • ይኸውልህ አዋጁ ፀደቀ እንጂ ተፈጻሚ አልሆነም።
    • . . .
    • አድምጠኝ! አዋጁ ተፈጻሚ መሆን የሚጀምረው መቼ እንደሆነ አልተገነዘብክም።
    • እንዴት?
    • አዋጁ ተፈጻሚ የሚሆነው በነጋሪት ጋዜጣ ታትሞ ይፋ ከተደረገበት ቀን አንስቶ እንደሆነ በአዋጁ የመጨረሻ አንቀጽ አልተደነገገም?
    • እውነት ነው ተደንግጓል፡፡
    • ታዲያ በነጋሪት ታትሞ ከመውጣቱ በፊት ሹመት መስጠት ምን ችግር አለው?
    • የሆነው እንደዚያ አይደለማ?
    • ምንድነው የሆነው?
    • የነጋሪት ጋዜጣው ኅትመት ቆሞ ሹመቱ ተካሄደ። 
    • ያው ነው። 
    • እንዴት ያው ይሆናል?
    • አዋጁ ካልታተመ ተፈጻሚ አይሆንም፡፡
    • የተሾሙት ኃላፊዎች እንዴት ናቸው? ልምድ አላቸው ክቡር ሚኒስትር?
    • ስለሱ አታስብ። ዋና ዳይሬክተሩመረጃ መረብ ደኅንነት ባልደረባ የነበሩና ጥሩ ልምድ ያላቸው ናቸው፡፡
    • ከመረጃ መረብ ደኅንነት ነው ያሉኝ?
    • አዎ። 
    • ጉድ ፈላ በሉኛ?
    • ምን አልክ?
    • አለቀልን፡፡
    • ሌላው ያልነገርኩህ. . .
    • ምን?
    • የነጋሪት ጋዜጣው ኅትመትም እንዲፋጠን ተወስኗል፡፡
    • ምን ዋጋ አለው አሁን። ከተበላሸ…
    • ምኑ?
    • ማሽኑ! 

    በብዛት የተነበቡ ፅሁፎች