Monday, December 5, 2022
ሌሎች ዓምዶች
    - Advertisement -
    - Advertisement -
    ማኅበራዊበኢትዮጵያ ከተመረመሩ አራት ሰዎች መካከል አንዱ በኮቪድ-19 ቫይረስ ተይዟል

    በኢትዮጵያ ከተመረመሩ አራት ሰዎች መካከል አንዱ በኮቪድ-19 ቫይረስ ተይዟል

    ቀን:

    ኢጋድና አጋሮቹ 13 ሚሊዮን ዩሮ የሚያወጣ የኮቪድ-19 መከላከያ ቁሳቁስ ሰጡ

    የዓለም የጤና ሥጋት የሆነው ኮቪድ-19 ቫይረስ በኢትዮጵያ የሥርጭቱ ፍጥነት በርካታ ወገኖችን ለጤና መታወክና ለሕልፈተ ሕይወት ከመዳረጉ አልፎ ከአራት ሰዎች መካከል አንዱ የቫይረሱ ተሸካሚ እንዲሆን ማድረጉን የጤና ሚኒስትር ዴኤታ ደረጀ ድጉማ (ዶ/ር) አስታውቀዋል፡፡

    ኢጋድ በሚለው ምህፃረ ቃሉ የሚታወቀው የምሥራቅ አፍሪካ በይነ መንግሥታት ድርጅት፣ የኮቪድ-19 መከላከያ ልዩ ልዩ የሕክምና መገልገያ ቁሶችን ለጤና ሚኒስቴር መጋቢት 29 ቀን 2013 ዓ.ም. ባስረከበበት ጊዜ ሚኒስትር ዴኤታው በተለይ ለሪፖርተር እንደገለጹት፣ በየቀኑ በአማካይ 10 ሺሕ ሰዎች የኮቪድ-19 ምርምር ያደርጋሉ፡፡ ይህ ዓይነቱ ምርመራ በሕዝብ ደረጃ ሲታይ ወይም ሲለካ ከሚመረመሩት ከአራት ሰዎች አንዱ በቫይረሱ መያዙን ያመለክታል፡፡

    ወደ ገጠሩ ሲኬድ ደግሞ በኮቪድ-19 ቫይረስ የሚያዘው ሰው ቁጥር ሊጨምር እንደሚችል፣ ይህም ሆኖ ግን ቫይረሱ ካለባቸው ሰዎች መካከል አንዳንዱ የሕመም ምልክቶች እንደማይታይበት፣ አንዳንዱ ደግሞ ምልክቶቹ ወዲያውኑ እንደሚታዩበት ነው ሚኒስትር ዴኤታው የተናገሩት፡፡

    በርካታ ሰዎች በቫይረሱ እንደተያዙ፣ በዚህም የተነሳ የጤና ተቋማት በኮቪድ-19 ሕሙማን መጨናነቃቸውንም ገልጸዋል፡፡

    ኢጋድ በኢትዮጵያ የሚደረገውን የኮቪድ-19 ምላሽ የሚያግዙ ከ13 ሚሊዮን ዩሮ በላይ የሚያወጡ የሕክምና መሣርያዎችን ለኢትዮጵያ ሰጥቷል፡፡

    ኢጋድና አጋሮቹ የአውሮፓ ኅብረት የተባበሩት መንግሥታት የፕሮጀክት አገልግሎቶች ጽሕፈት ቤት ለጤና ሚኒስቴር ያበረከቱት የሕክምና መገልገያ ቁሳቁሶች ለአንድ ጊዜ ጥቅም ላይ ከዋሉ በኋላ የሚወገዱ 500 ሺሕ የአፍና የአፍንጫ መሸፈኛዎች፣ ለቀዶ ሕክምና የሚውሉ 1015 ገዋኖች፣ 100 ሺሕ በቀዶ ሕክምና ላይ የሚለበሱ የራስ ፀጉር መሸፈኛዎች፣ እንዲሁም 1000 የእጅ ጓንቶች፣ 1000 መከላከያ መነጽሮች፣ 2000 የጫማ መሸፈኛዎች፣ 5,000 ጭምብሎች፣ 300 ቦት ጫማዎች ከ25 ሺሕ በላይ የሆኑ ቴስቲ ኪቶች ናቸው፡፡ ከነዚህ ውጪ ደግሞ አራት አምቡላንሶችና አንድ ተንቀሳቃሽ ላቦራቶሪ በመንገድ ላይ መሆኑም ተገልጿል፡፡

    በሚኒስትር ዴኤታው አገላለጽ፣ የተፈጸመባቸው እነዚሁ የኮቪድ-19 መከላከያ ቁሳቁሶችና ገና የሚመጡት ተንቀሳቃሽ ላቦራቶሪዎችና አምቡላንሶች አገልግሎት ላይ የሚውሉት መደበኛው ሕክምና በማይደረስባቸው አካባቢዎች ለሚኖሩና ለቫይረሱ በይበልጥ ተጋላጭ ለሆኑ ማኅበረሰቦች ነው፡፡

    በዚህም ተጠቃሚ ከሚሆኑት ማኅበረሰቦች መካከልም በተለያዩ ክልሎች የሚገኙ ተፈናቃዮች፣ ስደተኞች፣ ከቦታ ወደ ቦታ የሚንቀሳቀሱ ከብት አርቢዎች፣ በድንበር ተሻጋሪ አካባቢ ወይም የጎረቤት አገር አዋሳኝ በሆኑ ቦታዎች ላይ የሚኖሩ ሰዎች እንደሚገኙበት ሳይገልጹ አላለፉም፡፡

    የአውሮፓ ኅብረት ተወካይ ሚስተር ኤሪክ የፋይናንስ ድጋፍ ዋና ዓላማ ኮቪድ-19 ወረርሽኝ በኢኮኖሚና በማኅበራዊ ዘርፎች ላይ እያደረገ ያለውን አሉታዊ ተፅዕኖ ለመዋጋት መሆኑን ገልጸው፣ ኅብረቱ ከአሁን ቀደም ኢትዮጵያ ለምታካሂደው የጤና ምላሽ 20 ቢሊዮን ብር መለገሱን አስታውሰዋል፡፡

    የኢጋድ ዋና ፀሐፊ ወርቅነህ ገበየሁ (ዶ/ር) በአፍሪካ ቀንድ የተንሰራፋውን ኮቪድ-19 ወረርሽኝ ለመከላከልና ለመቆጣጠር በሚካሄደው እንቅስቃሴ ላይ ተቋማቸው ኃላፊነት እንደተጣለበት ገልጸው፣ ለዚህም ዕውን መሆን ፕሮጀክት ቀርፆ እየተንቀሳቀሰ መሆኑንና በዚህም ከልማት አጋሮችና ከኢጋድ አባል አገሮች ትብብርና ዕገዛ እየተደረገለት መሆኑን አስረድተዋል፡፡

    የፕሮጀክቱም ዓላማ በቀጣናው የሚገኙ ከአንድ ሚሊዮን በላይ የሚሆኑ ተፈናቃዮችን፣ ስደተኞችንና ድንበር ተሻጋሪ በሆኑ አካባቢዎች የሚኖሩና ለኮቪድ-19 ወረርሽኝ ተጋላጭ የሆኑ ማኅበረሰቦችን መረዳት መሆኑንም አመልክተዋል፡፡

    የተለገሱት የሕክምና ቁሳቁሶች በኢትዮጵያ የኅብረተሰብ ጤና ኢንስቲትዩት በኩል የሚሠራጩ እንደሚሆን ተጠቁሟል፡፡

    የኮሮና ቫይረስ ወቅታዊ መግለጫ

    የኢትዮጵያ ኅብረተሰብ ጤና ኢንስቲትዩት መጋቢት 29 ቀን 2013 ዓ.ም. ባወጣው ዕለታዊ መረጃ 8187 ሰዎች ተመርምረው 2163 ሰዎች ቫይረሱ ተገኝቶባቸዋል፡፡ 33 ሰዎች ሕይወታቸው ሲያልፍ፣ 906 ሰዎች ጽኑ ሕሙማን ክፍል ውስጥ ይገኛሉ፡፡

    እስከ ተጠቀሰው ዕለት ድረስ በጠቅላላው ሕይወታቸውን ያጡት ቁጥር 3058 ሆኗል፡፡

    ‹‹ሁላችንም ራሳችንን እና የምንወዳቸውን ስዎች በኮቪድ-19 ምክንያት እንዳናጣ የመከላከያ መንገዶችን እንተግብር፤›› ሲል ኢንስቲትዩቱ አሳስቧል፡፡

    ‹‹ከኮቪድ ተጠበቁ!››

    እርስዎ የኮቪድ-19 መከላከያ መንገዶችን በአግባቡ እየተገበሩ ነው?

    ማስክ ሳያደርጉ በፍጹም አይንቀሳቀሱ

    የእጅዎን ንፅህና በአግባቡ ይጠብቁ

    በቂ የአየር ዝውውር በሌለበትና ሰው በተሰበሰበበት ቦታ አይገኙ

    ይሄንን በመተግበር ራስዎን እና ቤተሰብዎን ከኮቪድ-19 ወረርሽኝ ይታደጉ።

    አራቱ ‹‹›› ሕጎች

    • መራራቅ አካላዊ ርቀት መጠበቅ፣
    • መታጠብ እጅን በተደጋጋሚ በውኃና በሳሙና መታጠብ፣
    • መቆየት አስገዳጅ ካልሆነ ቤት ውስጥ መቆየት፣
    • መሸፈን ከቤታችን ወጥተን ስንንቀሳቀስ የአፍንና የአፍንጫ መሸፈኛ (የፊት ማስክ) መጠቀም፡፡
    spot_img
    - Advertisement -

    ይመዝገቡ

    spot_img

    ተዛማጅ ጽሑፎች
    ተዛማጅ

    ዳግም ነፍስ የዘራው የተማሪዎች ማርች ባንድ

    የሙያው ፍቅር ያደረባቸው ገና በልጅነታቸው ነው፡፡ በ1970ዎቹ መጀመርያ፣ ለቀለም...

    በስንደዶና ሰበዝ የተቃኘው ጥበብ

    በአንዋር አባቢ ተወልዳ ያደገችው መሀል አዲስ አበባ አራት ኪሎ ነው፡፡...

    አዲስ ጥረት የሚጠይቀው  ኤችአይቪ  ኤድስን  የመግታት  ንቅናቄ

    ‹‹ኤችአይቪ በመላው ዓለም  በሚሊዮን የሚቆጠሩ ሰዎችን የሚያጠቃ ዋነኛ የሕዝብ...

    የኅትመት ብርሃን ያየው ‹‹የቃቄ ወርድዎት›› ቴአትር

    ከአራት ዓመታት በፊት በኢትዮጵያ ብሔራዊ ቴአትር መድረክ ላይ ይታይ...