Monday, October 3, 2022
ሌሎች ዓምዶች
    - ማስታወቂያ -
    - ማስታወቂያ -

    ካፒታላቸውን ወደ አምስት ቢሊዮን ብር ከፍ ማድረግ ያልቻሉ ባንኮች እንዲዋሃዱ ወይም እንዲፈርሱ የሚያስገድድ መመርያ ወጣ

    - ማስታወቂያ -

    ተዛማጅ ፅሁፎች

    በሥራ ላይ የሚገኙም ሆነ በመቋቋም ሒደት ላይ የሚገኙ ባንኮች መመሥረቻ ካፒታላቸው አምስት ቢሊዮን ብር እንዲሆን ተወሰነ፡፡ ይህንን ማድረግ ያልቻሉ ባንኮች ተዋህደው ካፒታላቸውን እንዲያሳድጉ አልያም በሕግ እንዲፈርሱ የሚያስገድድ መመርያው ወጣ።

    የኢትዮጵያ ብሔራዊ ባንክ በተጠናቀቀው ሳምንት ያወጣው መመርያ ከመጋቢት 4 ቀን 2013 ዓ.ም. ጀምሮ ተፈጻሚ እንደሚሆን ይደነግጋል። መመርያው የባንኮች ዝቅተኛ የመመሥረቻ ካፒታልን 500 ሚሊዮን ብር ወደ አምስት ቢሊዮን ብር ከፍ እንዲልና ተፈጻሚነቱም ከመጋቢት 4 ጀምሮ እንደሆን ይደነግጋል።

    ነገር ግን በሥራ ላይ የሚገኙ ባንኮች ካፒታላቸውን ወደ አምስት ቢሊዮን ብር ለማሳደግ የአምስት ዓመት የመሸጋገሪያ ጊዜ የተሰጣቸው ሲሆን፣ በመመሥረት ሒደት ላይ የሚገኙና ይህ መመርያ ከመውጣቱ በፊት የነበረውን የመመሥረቻ ካፒታል አሟልተው የባንክ ሥራ ፈቃድ የጠየቁ እንዲሁም አክሲዮን በመሸጥ ካፒታል ቀማሰባሰብ ላይ ሆነው ከአዲሱ መመርያ አስቀድሞ የነበረውን ዝቅተኛ መመሥረቻ ካፒታል (አምስት መቶ ሚሊዮን ብር) በተናጥል ወይም ተዋህደው ማሟላት የሚችሉ ከሆነ የምሥረታ ሒደቱን እንዲቀጥሉና ወይም በሰባት ዓመት ጊዜ ውስጥ ካፒታላቸውን ወደ አምስት ቢሊዮን ብር ከፍ እንዲያደርጉ የመሸጋገሪያ ጊዜ ይፈቅድላቸዋል።

    ነገር ግን ሁሉም ከአምስት ቢሊዮን ብር በታች ካፒታል ያላቸው ባንኮችም ሆነ በምሥረታ ሒደት ላይ የሚገኙት በመሸጋገሪያ ጊዜ ውስጥ ካፒታላቸውን ወደ አምስት ቢሊዮን ብር ከፍ ለማድረግ የሚያስችላቸውን የድርጊት መርሐ ግብር አስቀድመው ለብሔራዊ ባንክ ማስገባት ይጠበቅባቸዋል። 

    በአሁኑ ወቅት 19 ባንኮች በሥራ ላይ የሚገኙ ሲሆን ከዚህ ውስጥ 17 የግል ባንኮች ሲሆኑ ቀሪዎቹ ሁለቱ ደግሞ የመንግሥት ናቸው። 

    የነዚህ ባንኮች አጠቃላይ ካፒታል 117 ቢሊዮን ብር ሲሆን፣ ከተገለጸው የባንኮቹ አጠቃላይ ካፒታል ውስጥ 50.9 በመቶ የሚሆነው የሁለቱ የመንግሥት ባንኮች ማለትም የኢትዮጵያ ንግድ ባንክና የኢትዮጵያ ልማት ባንክ ድርሻ ሲሆን የኢትዮጵያ ንግድ ባንክ ለብቻው የአጠቃላይ ካፒታሉ 44.3 በመቶ ነው።

    117 ቢሊዮን ብር በላይ ከሆነው አጠቃላይ የባንኮች ካፒታል ውስጥ 41.9 በመቶ የሚሆነው 17 የግል ባንኮች በጋራ ያፈሩት ካፒታል ድርሻ መሆኑን የኢትዮጵያ ብሔራዊ ባንክ መረጃ ያመለክታል። 

    ይሁን እንጂ ከነዚህ የግል ባንኮች ውስጥ ሦስቱ ብቻ ማለትም አዋሽ ባንክ፣ ዳሽን ባንክና ንብ ባንክ ብቻ ከአምስት ቢሊዮን ብር በላይ ካፒታል ሲያስመዘግቡ የተቀሩት የተቀመጠውን አዲስ የካፒታል መጠን አያሟሉም።

    ከተቀሩት የግል ባንኮች ውስጥ ሦስቱ ከአራት ቢሊዮን ብር በላይ ካፒታል ያስመዘገቡ ሲሆንሌሎች ሦስት ባንኮች ደግሞ ከሦስት ቢሊዮን ብር ካፒታል እንዳስመዘገቡ ከብሔራዊ ባንክ የተገኘ መረጃ ያመለክታል።

    በምሥረታ ሒደት ላይ ከሚገኙ ባንኮች መካከል ብሔራዊ ባንክ ያወጣውን አዲስ የመመሥረቻ ካፒታል መጠን አሟልቶ የሚገኘውና የባንክ ዘርፉን ለመቀላቀል ዝግጅቱን ያጠናቀቀው የአማራ ባንክ ሲሆን፣ በቅረቡ ባካሄደው ጠቅላላ ጉባዔ አምስት ቢሊዮን ብር በላይ በሆነ ካፒታል ተመሥርቶ ወደ ሥራ እየገባ መሆኑ ይታወቃል። 

    በአሁኑ ወቅት ሁለት አሥር የሚጠጉ ባንኮች በምሥረታ ሒደት ላይ የሚገኙ መሆናቸውን ይታወቃል። 

    የኢትዮጵያ አንድ ባንክ ለማቋቋም የሚጠየቀው ካፒታል አነስተኛ በመሆኑ አነስተኛ አቅም ያላቸው ባንኮች ገቢያውን እንዲሞሉት ዕድል የፈጠረና መንግሥት ዘርፉን ለውጭ ገበያ ክፍት ቢያደርገው ፈጽሞ መወዳደር እንደማይችሉ በመግለጽ መንግሥት አስገዳጅ ሕግ በማውጣት ያሉት ባንኮች እንዲዋሄዱ ሊያስገድድ ይገባል የሚል ምክረ ሐሳብ የዘርፉ ባለሙያዎች ሲያነሱ መቆየታቸው ይታወቃል።

    መንግሥት አሁን የወሰደው ዕርምጃ አስፈላጊ ቢሆንም የተቀመጠው የጊዜ ገደብ ረዥም በመሆኑ ውጤታማነቱ አጠራጣሪ እንደሆነ ያነጋገርናቸው ባለሙያዎች ይገልጻሉ።

    - Advertisement -spot_img

    የ ጋዜጠኛው ሌሎች ፅሁፎች