Friday, December 1, 2023
- Advertisement -
- Advertisement -
ስፖርትአዲስ አበባ በቤትኪንግ ፕሪሚየር ሊግ በአራት ክለቦች ትወከላለች

አዲስ አበባ በቤትኪንግ ፕሪሚየር ሊግ በአራት ክለቦች ትወከላለች

ቀን:

በኢትዮጵያ እግር ኳስ ውስጥ ቀደምት ታሪክ ካላቸው ቡድኖች መካከል በንጉሡ ዘመነ መንግሥት ‹‹መቻል››፣ በደርግ ሥርዓት ‹‹ምድር ጦር››፣ አሁን ደግሞ ‹‹መከላከያ›› ተብሎ የሚታወቀውና የኢትዮጵያ ፕሪሚየር ሊግ ሲመሠረት ጀምሮ ላለፉት ሁለት አሠርታት በነበረው ቆይታ፣ በእግር ኳሱ ስማቸው ከፍ ብሎ ከሚጠቀሱ ክለቦች አንዱ ሆኖ ቆይቷል፡፡ መዛግብት እንደሚያስረዱት ከሆነ በ1938 ዓ.ም. እንደተመሠረተ የሚነገርለትና አገር በቀል ተጨዋቾችን በማሠለፍ የሚታወቀው መከላከያ፣ በ2011 ዓ.ም. የውድድር ዓመት በአሠልጣኝ ሥዩም ከበደ እየተመራ ያልተጠበቀ ውጤት አስመዝግቦ ወደ ታችኛው ሊግ የወረደበትን ታሪክ አስመዘገበ፡፡

ሊጉ ‹‹ፕሪሚየር ሊግ›› የሚለውን ስያሜ ይዞ በቀጠለበት በሁለት አሠርታት ዕድሜው መከላከያ የዋንጫ ባለቤት መሆን ባይችልም፣ ከተፎካካሪዎቹ ተርታ ውጪ የሆነበት አጋጣሚ ብዙም አልነበረም፡፡ እግር ኳሱን ጨምሮ በርካታ የስፖርት ዓይነቶችን በመያዝ የሚታወቀው ክለቡ በውጤት ደረጃ በኢትዮጵያ ክለቦች ሻምፒዮናም ሆነ በኢትዮጵያ ጥሎ ማለፍ ዋንጫ ላይ ከአንጋፋው ቅዱስ ጊዮርጊስ ቀጥሎ ተጠቃሽ ነው፡፡

አዲስ አበባ በቤትኪንግ ፕሪሚየር ሊግ በአራት ክለቦች ትወከላለች

 

አንጋፋው የመከላከያ እግር ኳስ ክለብ ሃቻምና ሲወርድ፣ ከዚያ በፊት እንደ ወረዱት ኢትዮጵያ መድን፣ መብራት፣ በአሁኑ ኤሌክትሪክና ሌሎችም በርካታ ክለቦች ወደ ፕሪሚየር ሊጉ ለመመለስ የገጠማቸው ዓይነት ዕጣ እንዳይገጥመው ተፈርቶም ነበር፡፡ ጠንካራ የፋይናንስ መሠረት ካላቸው ቡድኖች በግንባር ቀደምትነት የሚጠቀሰው መከላከያ በአስቸጋሪው ኮቪድ-19 ወረርሽኝ ውስጥ ሆኖ አሠልጣኝ ዮሐንስ ሳህሌና ረዳታቸው ዮርዳኖስ ዓባይን የመረጠበት መንገድ ትክክለኛ ለመሆኑ ውጤቱ ማሳያ ነው፡፡ ለዚህም ከፕሪሚየር ሊጉ የሚወርዱ ቡድኖች ተመልሰው ወደ ነበሩበት ለመመለስ በከፍተኛ ሊግ የሚጠብቃቸው ፉክክር ቀላል አለመሆኑ በሚታመንበት በዚህ ወቅት መከላከያ ከሁለት ዓመት በኋላ ወደ ፕሪሚየር ሊጉ መመለሱ ምክንያታዊነቱን አሳማኝ ያደርገዋል፡፡

በከፍተኛ ሊግ ምድብ “ሐ” የተደለደለው መከላከያ ባለፈው ረቡዕ ሚያዝያ 13 ቀን 2013 ዓ.ም. አንድ ጨዋታ እየቀረው፣ ከደብረ ብርሃን ከነማ ጋር ተጫውቶ 1 ለ 0 በሆነ ውጤት ማሸነፉን ተከትሎ ከሁለት ዓመት በኋላ ፕሪሚየር ሊጉን ተቀላቅሏል፡፡

በሌላ በኩል በወጣቱ አሠልጣኝ እስማኤል አቡበክር የሚሠለጥነው የአዲስ አበባ ከነማ ቡድን የምድብ ጨዋታው መርሐ ግብር ሳይጠናቀቅ እንደ መከላከያ ሁሉ ፕሪሚየር ሊጉን የተቀላቀለ ክለብ ሆኗል፡፡ ይህ ዘገባ እስከተጠናቀረበት ድረስ ወደ ፕሪሚየር ሊጉ ለመግባት ሁለት ጨዋታ እየቀረው አንድ ነጥብ ብቻ የሚበቃውና በአሠልጣኝ መሳይ ተፈሪ የሚሠለጥነው አርባ ምንጭ ከነማም ለፕሪሚየር ሊጉ ተጠባቂ ነው፡፡

የመከላከያ እግር ኳስ ክለብ አሠልጣኝ ዮሐንስ ሳህሌ ቡድናቸው በውድድር ዓመቱ ያሳየውን አጠቃላይ ብቃትና እንቅስቃሴ አስመልክቶ ሲናገሩ፣ ‹‹ስሜቱ ለእኔም ሆነ ለረዳቶቼ እንዲሁም ለተጨዋቾቼ ይህ ነው ተብሎ በቃላት የሚገለጽ አይደለም፤›› በማለት ነው የገለጹት፡፡ ቀድሞ በመብራት ኃይል፣ በኢትዮጵያ ቡናና በኢትዮጵያ ብሔራዊ ቡድን በነበረው ድንቅ ብቃቱ ብዙዎች የሚያስታውሱት ዮርዳኖስ ዓባይ የዋናው አሠልጣኝ ዮሐንስ ሳህሌ ረዳት በመሆን መከላከያ ለዚህ ውጤት እንዲበቃ የበኩሉን እንደተወጣ አሠልጣኝ ዮሐንስ ያምናሉ፡፡

አሠልጣኝ ዮርዳኖስ በበኩሉ የመከላከያን ውጤት ተከትሎ ለተለያዩ መገናኛ ብዙኃን ከሰጣቸው አስተያየቶች፣ ‹‹መከላከያ ከደብረ ብርሃኑ ጨዋታ ቀደም ብሎ በርካታ ጨዋታዎችን አድርጓል፡፡ ብዙዎቹን ጨዋታዎች በውጤት ያጠናቀቀው በብቃት ነው፡፡ ከደብረ ብርሃን ከነማ ጋር ያደረግነው ጨዋታ ግን ስሜቱ ከባድ ነበር፡፡ ምክንያቱ ደግሞ ተጋጣሚያችን የሚጫወተው ከከፍተኛ ሊግ ወደ ብሔራዊ ሊግ ላለመውረድ ሲሆን፣ እኛ ደግሞ ወደ ፕሪሚየር ሊግ መግባት አለመግባታችን የሚረጋገጥበት በመሆኑ ነው፤›› ብሎ፣ ‹‹ከመጀመርያው ቡድኑን በኃላፊነት ስንረከብ ወደ ፕሪሚየር ሊጉ ለመመለስ አቅደናል፣ ዕቅድ በሥራ ሲታገዝ ደግሞ ድሉን የበለጠ ከፍ እንዲል ያደርገዋል፤›› ብሏል፡፡

አዲስ አበባ በቤትኪንግ ፕሪሚየር ሊግ በአራት ክለቦች ትወከላለች

 

የመከላከያ የቀድሞ ተጨዋቾችን ጨምሮ በርካቶች ቡድኑ ወደ ቀድሞ ቦታው መመለሱ ካስደሰታቸው መካከል በአውሮፓ የቀድሞ ተጨዋቾች ማኅበር አቶ አሳዬ ጥላሁን ይጠቀሳሉ፡፡ እንደ አስተያየት ሰጪው ከሆነ፣ ‹‹መከላከያ ሠርተው በሚያሠሩ ሙያተኞች ታግዞ ወደ ቀድሞ ሥፍራው መመለሱ ደስ ብሎናል፤›› ብለዋል፡፡

ሌላው በምድብ “ለ” ተደልድሎ በወጣቱ አሠልጣኝ እስማኤል አቡበክር የሚሠለጥነው የአዲስ አበባ ከተማ እግር ኳስ ቡድን ፕሪሚየር ሊጉን የተቀላቀለው የምድብ ጨዋታው ሳይጠናቀቅ ነበር፡፡ የአዲስ አበባ ከተማ አስተዳደር በበላይነት የሚያስተዳድረው የአዲስ አበባ ቡድን፣ ለዚህ ውጤት የበቃው በብዙ ውጣ ውረድ ውስጥ አልፎ እንደሆነ ይነገራል፡፡

መረጃዎች እንደሚያሳዩት ከሆነ ኮቪድ-19 ባስከተለው ችግር ምክንያት የውድድር ዓመቱ እንዲራዘም መደረጉ፣ በዚህ መሀል ከተጨዋቾች ምልመላና ተያያዥ ሥራዎች ላይ ተጨማሪ የማስተካከያ ሥራዎች እንዲሠሩ ምክንያት ስለመሆኑ ጭምር የሚናገሩ አሉ፡፡ ይህ ባይሆን ኖሮ ቡድኑ አሁን ያገኘውን ውጤት ለማስመዝገብ መቸገሩ እንደማይቀር ሳይታለም የተፈታ መሆኑም እንዲሁ፡፡

የቡድኑ ዋና አሠልጣኝ እስማኤል አቡበክር ስለዚሁ ጉዳይ ሲናገሩ፣ ቡድናቸው የነበረበትን አቋምና ከዚሁ ጋር ተያይዞ በሚቀርብበት አስተያየት ይስማማሉ፡፡ ‹‹ክለቡ በቂ ነበር ባይባልም የሚችለውን ሁሉ ጥረት አድርጓል፡፡ ይሁንና ክለቡ አሁን ላይ ወደ ፕሪሚየር ሊግ አድጓል፡፡ ደረጃውን በሚመጥን መልኩ ድጋፍና ክትትል ያስፈልገዋል፡፡ እንደሚታወቀው ቡድኑ ሜዳ የለውም፣ ዝግጅት ሲያደርግ የነበረው ሱልልታ ነው፡፡ ከተጨዋቾች አያያዝ ጋር ሊስተካከሉ የሚገባቸው አሠራሮች ከወዲሁ ሊስተካከሉ ይገባል፡፡ ሁሉም እንደሚያውቀው የቡድኑ አባላት አራት ኪሎ በሚገኘው ወወክማ ከምግቡ እስከ መኝታው ሲደረግላቸው የነበረበት ሁኔታ ለተጨዋቾች የሚመች አልነበረም፤›› በማለት አሠልጣኙ ይናገራሉ፡፡

ቡድኑ በከፍተኛ ሊግ የነበሩበትን ችግሮች ሁሉ ተቋቁሞ ወደ ፕሪሚየር ሊጉ እንዲያድግ ከተማ አስተዳደሩ ያደረገው ጥረት የሚደገፍ መሆኑ እንደተጠበቀ፣ ነገር ግን ደግሞ የተፎካካሪነት አቅሙን አጠናክሮ ማስቀጠል ይችል ዘንድ ከተፈለገ፣ ለዚያ የሚመጥን ቁመና ሊኖረው እንደሚገባ አሠልጣኙ ያምናሉ፡፡

አሠልጣኝ እስማኤል ሌላው መስተካከል ይኖርበታል ብለው የሚያምኑት፣ ‹‹የቡድኑን የአስተዳደር ሥራ የሚሠሩ ሙያተኞች በትርፍ ጊዜ ካልሆነ በቋሚነት የሚሠሩ ሙያተኞች የሉትም፡፡ ያሉትም ቢሆኑ መደበኛ ሥራ ያላቸው በመሆኑ የቡድኑን የዕለት ተዕለት እንቅስቃሴ በመከታተል የሚጎድሉ ነገሮችን በጊዜና በሰዓቱ ለማስተካከል አስቸጋሪ አድርጎት ቆይቷል፡፡ ስለሆነም በቋሚነት የሚሠሩ ሙያተኞች ያስፈልጋሉ፤›› ብለዋል፡፡

ከክፍያ ጋር ተያይዞ በቡድኑ ውስጥ የቤተሰብ አስተዳዳሪ የሆኑ ተጨዋቾች ያሉ በመሆኑ ክለቡ አሁን ባለበት ደረጃ ልክ አሠራሩን ሊያስተካክል እንደሚገባ የሚናገሩት አሠልጣኙ፣ ‹‹በነበረው ሁኔታ ክፍያ በወቅቱና በሰዓቱ ሲከፈል ያልነበረበት ሁኔታ ግልጽ ነው፡፡ የነበረው አሠራር በፕሪሚየር ሊጉ የሚቀጥል ከሆነ ግን የቡድኑ ቀጣይነት አስቸጋሪ ነው፤›› ብለዋል፡፡

ይህ ዘገባ እስከተጠናቀረበት ድረስ ሦስተኛው ወደ ፕሪሚየር ሊጉ ኃላፊ እንደሚሆን የሚጠበቀው ቡድን በምድብ “ሀ” የሚገኘው የአርባ ምንጭ ከነማ ቡድን ነው፡፡ ቡድኑ ሁለት ጨዋታ እየቀረው ወደ ፕሪሚየር ሊጉ ለማለፍ ማግኘት የሚጠበቅበት አንድ ነጥብ ሲሆን፣ ይህን ማሳካት እንደማይከብደው የቡድኑ ዋና አሠልጣኝ መሳይ ተፈሪ ማረጋገጫ ሲሰጡ ተደምጠዋል፡፡ 

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የመቃወም ነፃነት ውዝግብ በኢትዮጵያ

ስሟ እንዳይገለጽ የጠየቀችው በአዲስ አበባ ከተማ በተለምዶ የሾላ አካባቢ...

የሲሚንቶን እጥረትና ችግር ታሪክ ለማድረግ የተጀመረው አጓጊ ጥረት

በኢትዮጵያ በገበያ ውስጥ ለዓመታት ከፍተኛ ተግዳሮት በመሆን ከሚጠቀሱ ምርቶች...

የብሔር ፖለቲካው ጡዘት የእርስ በርስ ግጭት እንዳያባብስ ጥንቃቄ ይደረግ

በያሲን ባህሩ በሪፖርተር የኅዳር 9 ቀን 2016 ዓ.ም. ዕትም “እኔ...