Tuesday, October 4, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    ‹‹ቴሌ ብር››ን ለተገልጋዮች

    የኢትዮጵያን የፋይናንስ ዘርፉ በዲጂታል ቴክኖሎጂ ለማጎልበት መንግሥት ከወሰዳቸው ዕርምጃዎች መካከል በኢትዮ ቴሌኮም በኩል ‹‹ቴሌ ብር›› የሚል አገልግሎት መጀመሩ ተጠቃሽ ነው፡፡

    የሞባይል ስልኮችን ብቻ በመጠቀም ገንዘብ ለማንቀሳቀስ የሚያስችለው ይህ አገልግሎት፣ ከፍተኛ ገንዘብ የሚንቀሳቀስበት፣ ከጉሊት ነጋዴ እስከ ከፍተኛ ባለሀብት ሊያስጠቅም የሚችልና ኢትዮጵያንም ተጠቃሚ የሚያደርግ ነው፡፡

    በዚህ አገልግሎት ላይ ሌሎች ዘመናዊ አሠራሮችን ቢያክል፣ ኢትዮ ቴሌኮም ተጠቃሽ ግዙፍ አገራዊ ኩባንያ ሆኖ እንዲወጣ ያግዘዋል ተብሎም ይታመናል፡፡  

    ከኢትዮ ቴሌኮም እንደሰማነው ‹‹ቴሌ ብር›› አገልግሎት በጀመረ በ27 ቀናት ውስጥ ደረስኩበት ያለው የደንበኞች ቁጥር እውነትም ተስፋ ስለመኖሩ ያመላከተ ነው፡፡

    እንደ ከባንያው መረጃ፣ በ27 ቀናት ውስጥ 3.8 ሚሊዮን ደንበኞችን ማፍራት ችሏል፡፡ አንድ ወር ባልሞላ ጊዜ ውስጥ ለአንድ አገልግሎት የዚህን ያህል ደንበኛ ማፍራት የቻለው ኩባንያው፣ በ3.8 ሚሊዮን አዲስ ደንበኞቹ ወደ 360 ሚሊዮን ብር በ‹‹ቴሌ ብር›› መዘዋወር መቻሉንም አጀማመሩን መልካም ያደርገዋል፡፡  

    በአገሪቱ በፋይናንስ ኢንዱስትሪው አንድ ወር ባልሞላ ጊዜ ውስጥ የዚህን ያህል ገንዘብ በዲጂታል ቴክኖሎጂ ያስተላለፈ መሆኑ ሲታሰብ፣ የቴሌ ብር አገልግሎት በዲጂታል የፋይናንስ ዘርፍ አዲስ ታሪክ ጽፏል ማለት ይቻላል፡፡

    በዚህ ጊዜ ውስጥ የኅብረተሰቡ ተሳትፎም ቢሆን ቀላል የሚባል አይደለም፡፡ ወደ ዲጂታል የፋይናንስ እንቅስቃሴ ለመግባት የተጀመረውን ውጥን በአጭር ጊዜ ለማሳካት ፍንጭ የሰጠ መሆኑን ያሳያል፡፡

    ቃል በተገባው መሠረት በፍጥነት ወደ ኅብረተሰቡ ውስጥ ለማስረፅ የተደረገው ርብርብ ቴሌ ለመለወጥ ብቻ ሳይሆን ነገ፣ ከነገ ወዲያ ተወዳዳሪዎች ቢመጡበት በአሸናፊነት ለመወጣት የሚያስችል አቅም እየገነባ፣ ይህንንም በተግባር እያሳየ መሆኑን ያመላክታል፡፡ ለዚህ ደግሞ የቴሌ ሥራ አስፈጻሚንና የሥራ ባልደረቦቻቸውን ጥረት ሳያደንቁ ማለፉ ንፉግነት ይሆናል፡፡

    ሰሞኑን የቴሌ ብርን የበለጠ ለማስተዋወቅ ዋና ሥራ አስፋጻሚዋ ከቢሯቸው ወጣ ብለው በመንገድ ላይ ከሚሸቅጡ ነጋዴዎች ጋር ሳይቀር በመገናኘት አገልግሎቱን በማስተዋወቅ ብቻ ሳይሆን በ‹‹ቴሌ ብር›› ሲገበያዩ ዓይተናል፡፡

    እንደ አንድ አገልጋይ ደንበኞችን ለማግኘትና አገልግሎቱን ለማስፋት ከቢሮ ውጪ በመንቀሳቀስ የመሥራት ተነሳሽነትን ማየቱ ሌሎቹም አገልግሎት ሰጪዎች የሚማሩበት ነው፡፡ የአገልግሎት አሰጣጥ ላይ እንዲህም በማድረግ በመሥራት ደንበኞችን ማብዛት በቀጥታ ወደ ተገልጋይ በመሄድ ራስን መሸጥ ትልቅ ትርጉም ያለው መሆኑን የሚያሳይ ነው፡፡

    ሥራ አስፈጻሚዋ ከቢሮ ወጥተው ደንበኞችን በግንባር በማግኘት ሥራቸውን ማስተዋወቅና ደንበኞችን ለማብዛት ያደረጉት ጥረት ውጤት እንዳስገኘላቸውም ይታመናል፡፡

    ኢትዮ ቴሌኮም ከሰሞኑ በአደባባይ እየተገበያየ ጭምር አዲሱን አገልግሎት ለማስተዋወቅ የሄደበት መንገድ በመልካም የሚነሳና ውጤት የተገኘበት፣ መንግሥታዊ ተቋማትም በተመሳሳይ መንገድ ወደ ደንበኞቻቸው በመጠጋት የመሥራት ልምድ ቢያዳብሩ ብዙ ችግሮችን መፍታትና ደንበኛን ማፍራት እንደሚቻል የታየበት ነው፡፡ በአጭሩ ጥሩ መማሪያ ነው፡፡

    ሥራ በቢሮ ብቻ የሚወሰን ያለመሆኑን እንዲህ ወጣ ብሎ ደንበኞችን ማነጋገር ለተቋሙ ጭምር ትልቅ መሠረት ይሆናል፡፡ የሥራ መሪዎች ከታች ወደ ላይ ከሚቀርብላቸው ሪፖርት በላይ በቀጥታ ከደንበኞች የሚያገኙት አስተያየትና አመለካከት አሠራራቸውን የበለጠ ለማሻሻል የሚረዳ ስለመሆኑ መታሰብ አለበትና የወ/ሪት ፍሬሕይወት ታምሩ ሰሞነኛ እንቅስቃሴ ይበል የሚያሰኝ ነው፡፡ ነገር ግን እንዲህ ዓይነቱ አሠራር የአንድ ሰሞን ብቻ እንዳይሆን መጠንቀቅ ያስፈልጋል፣ የበለጠ ሥራም ይጠይቃል፡፡

    የቴሌ ብር የበለጠ ውጤት የሚያመጣውም እንዲህ ያሉ ልፋቶችና አዳዲስ አሠራሮች ሲታከልበት ነው፡፡ ዘርፉ ነገ በሚጠብቀውን ተወዳዳሪነት ለመወጣትና አገሬው የእኔ የሚለው አገር በቀል ቴሌኮም ተቋምን ይዞ እስከ ወዲያኛው ለመዝለቅ ዛሬ ላይ ከልብ መድከምና እንደ ሰሞኑ ዓይነት ጥረት ይጠይቃል፡፡

    ከዚህ ባሻገር ግን በቴሌ ብር በአገር ውስጥ የገንዘብ እንቅስቃሴ ላይ ብቻ ሳይሆን ከውጭ ወደ አገር የሚላክ ገንዘብንም በሕጋዊ መንገድ እንዲላክ ለማድረግ በብርቱ መሠራት አለበት፡፡ ከውጭ ወደ አገር የሚላክ ገንዘብ በአብዛኛው ሕጋዊ መንገድን ተከትሎ የማይመጣ በመሆኑ ይህንን ክፍተት ለማጥበብ ቴሌ በነካ እጁ ይትጋ፡፡