Monday, July 15, 2024
- ማስታወቂያ -
- ማስታወቂያ -

ቡናና ሻይ ባለሥልጣን በአንድ ወር የቡና ኤክስፖርት ከ130 ሚሊዮን ዶላር በላይ ማግኘቱን አስታወቀ

ተዛማጅ ፅሁፎች

ኢትዮጵያ በግንቦት ወር 2013 ዓ.ም. ወደ ውጭ አገሮች ከላከችው 32,669 ቶን የቡና ምርት፣ 130.52 ሚሊዮን የአሜሪካን ዶላር መገኘቱ የኢትዮጵያ ቡናና ሻይ ባለሥልጣን ገለጸ፡፡

ቢው እስከ ዛሬ ድረስ በአንድ ወር ውስጥ ብቻ ለዓለም ገበያ ከተላከው ቡና የተገኘ የላቀ የውጭ ምንዛሪ ግኝት መሆኑም ጠቁሟል፡፡ በተለይም ከጥር ወር ጀምሮ ወደ ገበያ ከተቀላቀለው አዲሱ የቡና ምርት ጋር ተያይዞ ለባለፉት አራት ተከታታይ ወራት የውጭ ምንዛሪ ግኝቱ እያሻቀበና ያለማቋረጥ ጭማሪዎች እየታዩበት መሆኑንም አውስቷል፡፡

በመጋቢት ወር ኢትዮጵያ ለዓለም ገበያ ካቀረበችው 27,200 ቶን የቡና ምርት ላይ በአንድ ወር ብቻ ከ107 ሚሊዮን የአሜሪካን ዶላር በላይ አግኝታ እንደነበር ያስታወሰው ባለሥልጣኑ፣ በሚያዝያ ወር ደግሞ 28.8 ሺሕ ቶን ቡና ተልኮ 114 ሚሊዮን የአሜሪካን ዶላር ገቢ የተመዘገበ መሆኑንና ይኼው የገቢ ግኝት በግንቦት ወርም በጣም ከፍ ብሎ 130.52 ሚሊዮን ዶላር መድረሱን አውስቷል፡፡

በአጠቃላይ በእነዚህ አራት ወራት ለዓለም ገበያ በቀረበው ቡና የነበረው አፈጻጸም ከመቶ ፐርሰንት በላይ መሆኑን፣ አምና ከወጣው ቡና አንፃር መጠኑ በጥቂቱ የቀነሰ ቢሆንም፣ ከዋጋ አንፃር ሲታይ ግን ከፍተኛ ጭማሪ የታየበትና በአንድ ቶን ይገኝ ከነበረው 3,700 ዶላር ወደ 4,000 ዶላር ከፍ ማድረግ እንደተቻለና ጭማሪውም ወደ አሥር በመቶ ከፍ እንዳለ አስተውቋል፡፡

ይህ የሚያመላክተው የቡናዎቹ ጥራት እየተጠበቀ ወደ ገበያ መግባታቸውንና በዋጋ ደረጃ ዓለም አቀፉን ገበያ ከበፊቱ በተሻለ ሁኔታ መቀላቀል መጀመሩን የሚያሳይ ከመሆኑም በተጨማሪ፣ እየተከናወነ የሚገኘው የምርጥ ቡና ውድድርም የኢትዮጵያ ቡና በጥራት እንዲመረት የራሱን አስተዋጽኦ ማድረጉን መገንዘብ እንደሚቻል ባለሥልጣኑ አብራርቷል፡፡

ከዚህ መረዳት የሚቻለው ከግብርና ኤክስፖርት ምርቶች የኢትዮጵያ ቡና የመሪነት ሚናውን እንደያዘ የሚገኝ መሆኑንና እየተገኘ ያለው የውጭ ምንዛሪም አገሪቱ ፈጣን ልማት ለማምጣት የተያያዘችውን ጥረት የሚደግፍ፣ አርሶ አደሩም ከሚያገኘው ገቢ የተሻለ ተጠቃሚ እየሆነ እንደሚሄድ ማሳያ መሆኑን አክሏል፡፡ ለተገኘው ገቢ የአርሶ አደሩና ላኪው፣ እንዲሁም በየደረጃው የሚገኙ ተዋናዮች አስተዋጽኦ የጎላ መሆኑን ባለሥልጣኑ አስረድቷል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች