Saturday, January 28, 2023
- ማስታወቂያ -
- ማስታወቂያ -

መንግሥታዊው የልማት ድርጅት የቀንጢቻ ታንታለም ማምረቻ ፈቃድ ተሰረዘ

- ማስታወቂያ -

ተዛማጅ ፅሁፎች

እስከ ሰኔ 30 ከቦታው ለቆ እንዲወጣ ማስጠንቀቂያ ተሰጥቶታል

የመንግሥት ተቋም የሆነው የኢትዮጵያ ማዕድን ነዳጅና ባዮፊውል ኮርፖሬሽን በኦሮሚያ ክልል ጉጂ ዞን ደርሚ ደማ ወረዳ ቀንጢቻ በተባለ ቦታ ታንታለም ለማምረት ወስዶት የነበረውን ፈቃድ መሰረዙን የማዕድንና ነዳጅ ሚኒስቴር አስታወቀ፡፡

የቀንጢቻ ታንታለም ድርጅት ተብሎ የሚጠራውና መንግሥታዊ በሆነው የልማት ድርጅት የሚተዳደረው ከአካባቢ ብክለት ጋር በተገናኘና በምርት ሒደቱ ላይ የታንታለም ምርት ዝቃጭ ማጠራቀሚያ (ቴሊንግ ዳም) ሞልቶ በመፍሰስ፣ በአካባቢው ማኅበረሰብ ሥጋት ሆኖ በመገኘቱ፣ በሕዝብ አቤቱታ ከኦሮሚያ ክልል መንግሥት በተሰጠው ትዕዛዝ መሠረት ሥራውን እንዲያቆሙ የተወሰነው ከሦስት ዓመታት በፊት ነበር፡፡

የማዕድንና ነዳጅ ሚኒስቴር ባለፈው ግንቦት ወር የቀንጢቻ ታንታለምና ቱሉ ካፒ የወርቅ ማምረቻ ኩባንያ በውላቸው መሠረት እንዲሠሩ በልዩ ሁኔታ የጊዜ ገደብ የተሰጣቸው መሆኑን በመጥቀስ፣ በአግባቡ ካልሠሩ መንግሥት አስተዳደራዊ ዕርምጃ እንደሚወስድ ማስጠንቀቁን መዘገባችን ይታወሳል፡፡

ከሰሞኑ ሪፖርተር ያገኘው መረጃ እንደሚያመለክተው፣ በመጨረሻ የቀንጢቻ ታንታለም ማምረቻን ለመዝጋት በዋነኝነት ከአካባቢው ማኅበረሰብና ከሚመለከታቸው አካላት ጋር በተደረገ ውይይትና የማጣራት ሥራ፣ የማዕድን ምርቱ እንዲቀጥል ከተደረገ ዝቃጭ ማጠራቀሚያው (ቱሊንግ ዳም) በአካባቢው ማኅበረሰብ ጤና ላይ ከፍተኛ ጉዳት ሊያመጣ የሚችል በመሆኑና በመረጋገጡ እንደሆነ ተመላክቷል፡፡

በዚህም የታንታለም ማዕድኑ እንዳይመረት አድርጎ ላልተወሰነ ጊዜ ማሰቀጠሉ መንግሥትና ሕዝብ ከተፈጥሮ ሀብት ማግኘት የሚገባውን ጥቅም እንዳያገኝ የሚያደርግ በመሆኑ፣ በማዕድን ሥራዎች ሕግ መሠረት ፈቃዱን በመሰረዝ የተመረተውን ምርት እንዲያነሱና ቦታውን እስከ ሰኔ 30 ቀን 2013 ዓ.ም. ለቆ እንዲወጣ፣ ሰኔ 9 ቀን 2013 ዓ.ም. በተጻፈ ደብዳቤ ለድርጅቱ ማሳወቁን ሪፖርተር ያገኘው መረጃ ያመለክታል፡፡

ከአንድ ወር በፊት ፈቃዳቸው ስለታገደባቸውና ስለተሰረዘባቸው ድርጅቶች አስመልክተው ለጋዜጠኞች መግለጫ የሰጡት የማዕድንና ነዳጅ ሚኒስትሩ ኢንጂነር ታከለ ኡማ፣ ‹‹ፈቃዳቸው የተሰረዘባቸው ተቋማት በአገር ሀብት ሲቀልዱ የነበሩና ከዚህ በኋላ ቢታገዙም ወደ ማምረት ሊመለሱ የማይችሉ ናቸው›› ሲሉ መግለጻቸው ይታወሳል፡፡

ሚኒስቴር መሥሪያ ቤቱ ከአንድ ሳምንት በፊት በምዕራብ ወለጋ ቱሉ ኮር በተባለ አካባቢ የተገኘውን ከፍተኛ የወርቅ ማዕድን አምርቶ ለውጭ ገበያ እንዲልክ ፈቃድ የተሰጠውና በእንግሊዙ ኮፊ ሚኒራል ባለቤትነት ሥር ለተቋቋመው ቱሉ ካፒ የወርቅ ማዕድን አምራች አክሲዮን ማኅበር የመጨረሻ ማስጠንቀቂያ መስጠቱ የሚታወስ ነው፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች