Wednesday, June 12, 2024
- Advertisement -
- Advertisement -

የተመረጡ ፅሑፎች

አሸናፊው ፓርቲ የኢትዮጵያን ኢኮኖሚ ለማራመድ ይትጋ!

ሰኔ 14 ቀን 2013 ዓ.ም. የተካሄደው አገር አቀፍ ምርጫ የጎላ ችግር ሳይታይ ሰላማዊ በሆነ ሁኔታ ተጠናቋል፡፡  ምርጫው ከዚህ ቀደም ከተካሄዱ ምርጫዎች አንፃር ሲመዘን በብዙ እጅ የተሻለ መሆኑን የሚያሳዩ እውነቶች አሉ፡፡ እንዲህ ያለውን ምስክርነት በምርጫው የተሳተፉ የፖለቲካ ፓርቲዎችም ሆኑ አብዛኛው መራጭ የሚጋራው መሆኑን መረዳት ተችሏል፡፡

ምርጫውን ለመታዘብ የቻሉ የውጭና አገር ውስጥ ታዛቢዎችም በምርጫው ሒደት ላይ የሰጡት ምስክርነት ኢትዮጵያ የተሻለ ምርጫ ማድረጓን ነው፡፡ ይህ ሲባል ግን ምንም ችግር አልነበረም ለማለት አይደለም፡፡ አንድ ሁለት ተብለው የሚቆጠሩ ችግሮች ታይተዋል፡፡ ተወዳዳሪ ፓርቲዎች በመቶዎች የሚቆጠሩ ግድፈቶች ስለመኖራቸው ያመለከቱበት አቤቱታዎችን አቅርበዋል፡፡ በጥቅል ሲታይ ግን ምርጫው ስኬታማ ስለመሆኑ መግለጽ ይቻላል፡፡  

የኢትዮጵያ ብሔራዊ ምርጫ ቦርድ ለዚህ ምርጫ ስኬት ያደረገው አስተዋጽኦም ቢሆን ነገ ከዚህም የተሻለ ምርጫ ለማካሄድ የሚያስችል ተቋም መፍጠር እንደሚቸል በተግባር ያሳየ ስለመሆኑ መረሳት የለበትም፡፡

ቦርዱ በብዙ ችግሮች መካከል ሆኖ ያካሄደው ምርጫም ከችግር የነፃ ነው ባይባልም፣ ተዓማኒ ምርጫ ለማካሄድ ያደረገው ጥረት ለሌሎች ተቋማትም ምሳሌ የሚሆን ነው፡፡ የዘንድሮ ምርጫ የተለየ ነው ካልን አንዱ ማሳያው ብሔራዊ ምርጫ ቦርድ ያከናወናቸው ተግባራት ናቸው፡፡  

ምርጫው በሰላም አይካሄድም የሚል አመለካከት የነበራቸው ወገኖች ብዙ ያሟረቱበት እንደነበር ሲታሰብና ይህንኑ ተከትሎ ተፈጥሮ የነበረው ሥጋት በምርጫው ዕለት በጨዋነት በተከናወነው ምርጫ ሰላሙ ተረጋግጧል፡፡  ይህ ትልቅ ድል ተደርጎ መወሰድ አለበት፡፡ የቱንም ያህል በምርጫው ሒደት የታዩ ግድፈቶች ቢኖሩም፣ ኢትዮጵያ የተሻለ ምርጫ አድርጋለች፡፡ ይህንን ምርጫ የተለየ የሚያደርገው ሌላው እውነታ የፖለቲካ ፓርቲዎች ሰከን ብለው ሒደቱን በመከታተል ምርጫው በሰላም እንዲጠናቀቅ ያበረከቱት አስተዋጽኦ ነው፡፡

በበጎ ያዩትን ሳይሸሽጉ ተናግረዋል፡፡ ችግሮች ስለመከሰታቸውም አለን የሚሉትን መረጃ ይዘው ሞግተዋል፣ እንሞግታለንም ብለዋል፡፡ በቀጣይ ዕርምጃዎቻቸውም ሕግን ተከትለው የሚጠይቁ ስለመሆኑ አሳውቀዋል፡፡

በዚህ ምርጫ የተሳተፉ ፓርቲዎች ገጠመን ያሉትን ችግር በሕግ አግባብ ብቻ ለመፍታት እያደረጉ ያለውም ጥረትም እጅግ የሚደነቅ ነው፡፡ ከዚህ ቀደም ያደርግ እንደነበረው ችግሮችን በግርግርና በጩኸት ከመፍታት ተላቆ ሕግን በማስቀደም መንቀሳቀሳቸው ለአገራችን ቀጣይ የፖለቲካ ሒደት ተስፋ ፈንጣቂ ሆኖ የሚታይ ነው፡፡ በዚህ ምርጫ ማንም ያሸንፍ ማንም አዲሱን መንግሥት የሚመሠርተው ፓርቲ ከፊት ለፊቱ የሚጠብቁት ብርቱ ጉዳዮች አሉበት፡፡ አሸንፌያለሁ ብሎ ድሉን የሚያጣጥምበት ጊዜ የለውም፡፡

በተለይ የአገሪቱን ኢኮኖሚ ለማራመድ በሚያስችሉ ሥራዎች ላይ መድከም አንዱና ዋነኛው ነው፡፡ ከሁሉም በላይ ደግሞ የዋጋ ንረትን ጉዳይ ቀዳሚ አጀንዳው ሊያደርገው ይገባል፡፡

ዛሬ በከተማም ሆነ በቀጣና ያለው የዋጋ ንረት የሸማቹን ወገብ እያጎበጠና ከአቅም በላይ እየሆነ ነው፡፡ በየጊዜው የሚታየው ዋጋ ንረት ከመቀነስ ይልቅ እየጨመረ መምጣቱ ለቀጣዩ መንግሥት ትልቅ ፈተና መሆኑ አይቀርም፡፡ ስለዚህ የአዲሱ መንግሥት አንዱ አጀንዳ የዋጋ ንረትን መቆጣጠር የሚያስችሉ ተግባራት ላይ መሆን ይገባዋል፡፡ አሁን በአገሪቱ እየታየ ላለው የዋጋ ንረት ደግሞ የተለያዩ ምክንያቶች ቢኖሩም፣ ችግሩን ከሥር መሠረቱ በመፈተሽ ኅብረተሰቡ ላይ የተጫነውን የኑሮ ውድነት ማርገብ ይገባል፡፡  

ዛሬ የትኛውም ቦታ ቢኬድ መጀመርያ የሚነሳው ጉዳይ የኑሮ ውድነት ነው፡፡ መንግሥት ሰላምና ፀጥታ ያስፍንልን ከሚለው ጥያቄ ቀጥሎ የሚቀርብ ጉዳይ ቢኖር ኑሮ ጣራ ነካብን፣ ከበደን የሚለው ሮሮ ነው፡፡

ባለፉት ዓመታት የዋጋ ንረቱን ለመቆጣጠር ተደረጉ የተባሉ ጥረቶች በሚፈለገው ደረጃ ውጤት አለማምጣታቸው በግልጽ መታወቅ አለበት፡፡ ይህ ከሆነ ደግሞ ሌላ ዘዴ ያስፈልጋል ማለት ነው፡፡ ስለዚህ ሕዝብ በነቂስ ወጥቶ ሕጋዊ መንግሥት እንዲመሠርት የሰጠው ድምፅ፣ ፀጥታና ደኅንነት እንዲያስከብርለት በመፈለግ ብቻ አይደለም፡፡ ኑሮው እንዲሻሻልና በተለይም አሁን እየፈተነው ያለው የኑሮ ውድነት እንዲቃለልለት ጭምር በመሆኑ በዚህ ጉዳይ ተመራጩ መንግሥት በተግባር የሚታይ ሥራ መሥራትና በአጠቃይ የግብይት ሥርዓቱ ላይ ካልደከመ ጥያቄ የሚነሳበት ስለመሆኑ ማሰብ ተገቢ ነው፡፡

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት