Sunday, September 25, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    የፋይናንስ ተቋማት ራሳቸው ኮሜርስን ሊታደጉት ይገባል!

    ከሰሞኑ ከተሰሙ አነጋጋሪ ዜናዎች ውስጥ አዲስ አበባ ዩኒቨርስቲ ንግድ ሥራ ኮሌጅ (ኮሜርስ) ይፈርሳል መባሉ ይጠቀሳል፡፡ በአገራችን ቀዳሚ ከፍተኛ የትምህርት ተቋም የሆነው የአዲስ አበባ ንግድ ሥራ ኮሌጅ ይፈርሳል የሚለው ዜና ጎልቶ ይውጣ እንጂ፣ ‹‹ለምን ይፈርሳል?›› ለሚለው ጥያቄ እየተሰጠ ያለው ምላሽ ‹የፋይናንስ ተቋማት በቦታው ላይ ትልልቅ ሕንፃዎችን እንዲገነቡበት ታስቦ ነው› ተብሏል፡፡

    በእርግጥ የኢትዮጵያ ንግድ ሥራ ኮሌጅ ያለበት አካባቢ የአገሪቱ የፋይናንስ ተቋማት ዋና መሥሪያ ቤቶቻቸውን እየገነቡበትና ለመገንባትም እየተዘጋጁ ያሉበት ስለመሆኑ ይታወቃል፡፡  

    እዚያ አካባቢ ተመሳሳይ ግንባታዎችን ለማካሄድ ቦታ የተረከቡ ያሉም ሲሆን፣ ግንባታቸውን ለማካሄድ በተለያዩ የዝግጅት ምዕራፎች ላይ ይገኛሉ፡፡ ነገር ግን አሁንም ተመሳሳይ ግንባታ ለማካሄድ የሚሹ የፋይናንስ ተቋማት ለሚገነቧቸው ዋና መሥሪያ ቤቶች የንግድ ሥራ ኮሌጁ ያረፈበትን ቦታ እንዲጠቀሙበት ለማድረግ ታስቦ ኮሌጁ ይፍረስ መባሉ ግን እጅግ አሳዛኝ ውሳኔ ነው፡፡

    ዜናው ከተሰማ በኋላ ኅብረተሰቡ እየሰጠ ያለውም አስተያየት ይህንኑ የሚያመላክት ነው፡፡ ባልጠፋ ቦታ አንጋፋውን ትምህርት ተቋም ማፍረስ ለምን አስፈለገ? የሚል ጥያቄም እየቀረበ ነው፡፡ ይህ የሚያሳየው ለምንም አገልግሎት ይሁን እንደ ቅርስ የሚታየውን ተቋም ለማፍረስ መነሳሳቱ ተገቢ ያለመሆኑን ነው፡፡

    ከአንዳንድ የመንግሥት ተቋማትም እየተሰጡ ያሉ አስተያየቶች ተቋሙ ቅርስ በመሆኑ መፍረስ የለበትም የሚል መሆኑንም ልብ ይሏል፡፡

    ከ80 ዓመታት በላይ የቆየው ይህ አንጋፋ የትምህርት ተቋም እንደ ቅርስ የሚታይ ከመሆኑም በላይ፣ ሌላ ቦታ ሳይጠፋ ይህንን ቦታ ለማፍረስ መነሳት ታሪክ ማጠልሸት ይሆናል፡፡

    ከሁሉም በላይ ደግሞ ዛሬ በአገሪቱ የፋይናንስ ኢንዱስትሪ ውስጥ ከታች እስከ ላይ ያሉ አብዛኞቹ ሠራተኞች የዚሁ ተቋም ፍሬዎች መሆናቸው ሲታሰብና ኮሌጁ ይፈርሳል የተባለው ደግሞ ለፋይናንስ ተቋማት ግንባታ ነው መባሉን ስናመዛዝን ኮሌጁን ውለታ ቢስ ማድረግ ይሆናል፡፡

    ሰንጋ ተራ አካባቢ እየተሰባሰቡ ያሉት የአገሪቱ የፋይናንስ ተቋማት ኢኮኖሚያዊ ጠቀሜታ የማይታበል ቢሆንም ግንባታዎቹ ግን ቅርስን እያወደሙ መሆን አይኖርባቸውም፡፡ ባይሆን ሊሆን የሚገባው ይህ ኮሌጅ በዙሪያው እየተገነቡ ላሉ የፋይናንስ ተቋማት ተጨማሪ የሰው ኃይል ማፍሪያ በማድረግ ኮሌጁ እስካሁን ለአጠቃላይ ለፋይናንስ ዘርፉ እያበረከተ ያለውን አስተዋጽኦ እንዲያጎላ ማድረግ ነው፡፡   

    ምክንያቱም ዛሬ የአገሪቱን ኢኮኖሚ የያዙት የፋይናንስ ተቋማት የራሴ የሚሉት የሰው ኃይል ማፍሪያ ወይም ማሠልጠኛ የሌላቸው መሆኑ ይታወቃልና፣ የፋይናንስ ተቋማቱ ይህንን ኮሌጅ በዘርፉ የሚሠለጥኑ ባለሙያዎች የሚያፈሩበት በማድረግ የተሻለ ማሰብ በተገባ ነበር፡፡

    አሁን ካለው አካሄድ ደግሞ የአገሪቱ የፋይናንስ ተቋማት በተለይ ባንኮች በዚህ አካባቢ ዋና መሥሪያ ቤታቸውን እየሰበሰቡ ከመሆናቸው አንፃርም ኮሌጁ እዚየው መሆኑ ዘርፉን ያስተሳስረው እንደሆን እንጂ ጉድለት አይሆንም ነበር፡፡ ስለዚህ ይህ ኮሌጅ ይፍረስ ከሚለው ዕሳቤ በመውጣት ኮሌጁ በአካባቢው እየተሰባሰቡ ላሉ የፋይናንስ ተቋማት ባለሙያ እንዲመግብ ማድረግ የተሻለ ይሆናል፡፡  

    በሌላ በኩል ደግሞ የኮሌጁ መፍረስ ለፋይናንስ ተቋማት ግንባታ የሚሆን ቦታ ለማግኘት ነው የሚለው ነገር በእርግጥም ትክክል ሆኖ ቢገኝ እንኳን ለተቋማቱ ቅርስን ታሪካዊነትን ማጥፋት የሞራል ውድቀት ነው፡፡ ምክንያቱም ቅርስ የጋራ ሀብት እንደመሆኑ መጠን እንዲህ ባሉ ቦታዎች ላይ ግንባታ ማድረግ አይመለከተኝም የሚለውን ያሳያልና፡፡

    እንዲህ ያሉ ተቋማትን መንከባከብ ታሪካዊ እውነታቸውን ይዘው እንዲቀጥሉ፣ ብሎም የተሻለ አገልግሎት እንዲሰጡ ማድረግም ማኅበራዊ ኃላፊነትን መወጣት ጭምር ነውና የአዲስ አበባ ንግድ ሥራ ኮሌጅን ተንከባክቦ በማቆየቱ ረገድ ከፋይናንስ ተቋማት ብዙ እንጠብቃለን እንጂ እንዲፈርስ ምክንያት መሆን የለባቸውም፡፡  

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት