[ክቡር ሚኒስትሩ አዲሱን ዓመት ለመቀበል የተዘጋጁ ክብረ በዓላትን በተመለከተ ከአዘጋጅ ኮሚቴው ሰብሳቢ ጋር በስልክ እየተወያዩ ነው]

• ክቡር ሚኒስትር አዲሱን ዓመት ለመቀበል በአምስቱም የጳጉሜን ወር ቀናት ዝክሮች አዘጋጅተን ለሕዝብ ይፋ ተደርገዋል፣ ሚዲያዎችም እያስተዋወቁ ናቸው።
• እኔም የደወልኩት የክብረ በዓላቱን ዝርዝር ተመልክቼ ነው፡፡
• በአምስቱም ዝክረ ቀናት የተዘጋጁትን ፕሮግራሞች እንዴት አገኟቸው ታዲያ ክቡር ሚኒስትር?
• የምን ዝክር ነው የምታወራው? ጥሩ አገላለጽ አይደለም። 
• እሺ፣ ይስተካከላል ክቡር ሚኒስትር፡፡ 
• መስተካከል አለበት፣ ዝክር ምናምን ማለቱን ተውና አዲሱን ዓመት ለመቀበል የተዘጋጁ ቀናት ይባሉ፡፡
• ቀናት? 
• ታዲያ ምን ይሻላል? በዓላት ይባሉ እንዴ?
• በዓል አላዘጋጀንማ ክቡር ሚኒስትር፡፡ 
• ታዲያ ምን ይሻላል? 
• ክቡር ሚኒስትር ፕሮግራሞቹ ኢትዮጵያዊነትን፣ አገልጋይነትን ለመቀስቀስ በመሆናቸው ዝክረ ቀናት ቢባሉ ይሻላል፣ ኢትዮጵያን መዘከር እንደ ማለት ነው።
• ብቻ ቃሉን አልወደድኩትም፣ ሌላ የሚመጥን ከሌለ ምን ይደረጋል? ግን ጥንቃቄ አድርጉ፡፡ 
• የምን ጥንቃቄ?
• እንዘክራለን ብላችሁ መድረኩ ሌላ የፖለቲካ አታካራ መቀስቀሻ እንዳይሆን፡፡ 
• ተሳታፊዎችን በጥንቃቄ ነው የመረጥነው፣ አያስቡ ክቡር ሚኒስትር። 
• ሌላም መስተካከል ያለበት ነገር አለ፣ መስተካከል ብቻ ሳይሆን ማብራሪያም እፈልጋለሁ።
• ምንድነው ጉዳዩ? ይንገሩኝ ማብራሪያ እሰጥበታለሁ ክቡር ሚኒስትር፡፡
• አዎ ማብራሪያ ያስፈልገዋል፣ አልያም መሰረዝ አለበት።
• ምኑ?
• የመጨረሻው ቀን ላይ ይከናወናል ያላችሁት ነገር። 
• እ… በመጨረሻው ቀን ያሰብነው የድል …
• እንዴት ነው በዚህ ተለዋዋጭ ሁኔታ ውስጥ ድል ይበሰራል የምትሉት? እንዴት ነው እርግጠኛ የሆናችሁት?
• ሥጋትዎ ገብቶኛል ክቡር ሚኒስትር፡፡ 
• ቢገባህ ነው እንዲህ ዓይነት መንግሥትን አጣብቂኝ ውስጥ የሚከት ዝግጅት የምታሰናዳው?
• በጥንቃቄ ነው እኮ ፕሮግራሙን ያሰናዳነው ክቡር ሚኒስትር። 
• እኮ አብራራልኛ? እንዴት ተደርጎ በአንድ ሳምንት ሁሉ ነገር እንደሚያልቅና ድል እንደሚበሰር አብራራልኝ፡፡
• በዕለቱ የሚበሰር ድል የሚኖር ከሆነ ብቻ ነው ድሉ የሚበሰረው። 
• ምን ማለት ነው? ድል የሚበሰርበት ቀን ብለህ ድሉ አልደረሰም ብለህ ልታበስር ነው?
• ክቡር ሚኒስትር እንደዚያ አይደለም። 
• እና እንዴት ነው?
• ቃሉን በጥንቃቄ ነው የቀረፅነው ያልኩት ለዚህ ነበር።
• ምንድነው በጥንቃቄ ማለት?
• ለዕለቱ ዝግጅት የመረጥነው ቃል ድል የሚል ቃል ይኑረው እንጂ በዕለቱ ድል ይኖራል ማለት አይደለም፣ በጥንቃቄ ነው የሰየምነው ያልኩት ለዚያ ነው።
• ምንድነው ስያሜው? የድል ብሥራት ቀን አይደለም እንዴ የሚለው?
• አይለም ክቡር ሚኒስትር፡፡
• ምንድን ነው ያላችሁት ታዲያ?
• የድል ቃል ኪዳን ብሥራት ቀን ነው ያልነው።
• ምን ማለት ነው ደግሞ እሱ?
• ድል ከተገኘ ድሉ ይበሰራል። 
• ድል ከሌለ ምን ልታደርጉ ነው?
• ከሌለ ደግሞ ድል ለማድረግ ቃል ኪዳን የምንገባበት ይሆናል።
• ጥሩ ዘዴ ነው የቀየሳችሁት።
• በጥንቃቄ ነው የመረጥነው ያልኩት ለዚህ ነው ክቡር ሚኒስትር፡፡
• ግልጽ ሆኖልኛል አሁን፣ ለማንኛውም ጥንቃቄ ይደረግ።

[የክቡር ሚኒስትሩ የእጅ ስልክ ጠራ፣ የአፍሪካ ቀንድ ልዩ መልዕክተኛ ሆነው የተመደቡት አምባሳደር ናቸው የደወሉት]

• እንደምን አሉ አምባሳደር?
• የተጣበበ ሁኔታ ውስጥ ሆነው እኔን ለማነጋገር ስለፈቀዱ አመሰግናለሁ ክቡር ሚኒስትር። 
• ምንም አይደል፣ አመሠግናለሁ፡፡ 
• ክቡር ሚኒስትር ድርድር እንዲመቻች በመጠየቅ ለዓለም መንግሥታት የተሠራጨውን ደብዳቤ በተመለከተ በእናንተ በኩል የተያዘውን አቋም ለመረዳት ነው የደወልኩት።
• በእኛ በኩል ሰላም ነው የምንፈልገው፣ ሌላ አቋም የለንም።
• እኮ ወደዚያ ለመምጣት በእነሱ በኩል ድርድር እንዲካሄድ ነው የጠየቁት፣ በእናንተ በኩል ለድርድር ዝግጁነት አለ?
• እኛ ወደ ውጊያ ከመግባታችን በፊት ጀምሮ ችግሩ በሰላም እንዲፈታ ከመጠየቅ አልፈን ለምነናል።
• እሱን አውቃለው፣ አሁን ዝግጁ መሆናችሁን ነው ለመረዳት የፈለግኩት?
• አሁንም ነገም ዝግጁ ነን በእኛ በኩል፣ ነገር ግን ያልተረዳነው ነገር አለ።
• ምንድነው ያልተረዳችሁት?
• ከማን ጋር እንደምንደራደር፡፡
• እንዴት? በእነሱ በኩል እኮ ጥያቄው ቀርቧል፡፡
• ገባኝ፣ ግን ከማን ጋር እንደምንደራደር ማወቅ እንፈልጋለን፡፡
• አልገባኝም ክቡር ሚኒስትር? 
• የሚደራደረው የትኛው አካል ነው?
• አመራሩ ነዋ ክቡር ሚኒስትር?
• የተፈረጀው ነው ወይስ ያልተፈረጀው?
• እሱን አልገለጹም።
• ሲገልጹ ብንወያይ አይሻልም?