Saturday, July 13, 2024
- ማስታወቂያ -
- ማስታወቂያ -

በነሐሴ ወር ወደ ውጭ ከተላከ ቡና 123 ሚሊዮን ዶላር ገቢ መገኘቱ ተገለጸ

ተዛማጅ ፅሁፎች

ከፍተኛ የውጭ ገበያ መነቃቃት እያስመዘገበ ባለው የቡና ኤክስፖርት በወርኃ ነሐሴ 2013 ዓ.ም. 123 ሚሊዮን ዶላር ገቢ መገኘቱን፣ የቡናና ሻይ ባለሥልጣን አስታወቀ፡፡

የባለሥልጣኑ ምክትል ዋና ዳይሬክተር አቶ ሻፊ ዑመር ለሪፖርተር እንደተናገሩት፣ በነሐሴ ወር 28,455 ቶን ቡና ለውጭ ገበያ ለማቅረብ ታቅዶ 32,035 ቶን ቡና ተልኳል፡፡ ይህም የ113 በመቶ ዕቅድ አፈጻጸም የታየበት መሆኑን ገልጸው፣ በተለይ የኤክስፖርት ቡና መጠን ካለፈው ዓመት ነሐሴ ወር ጋር ሲነፃፀር የ12,039 ቶን ቡና ብልጫ አለው ብለዋል፡፡ በዚያን ወቅት የተላከው 19,995 ቶን ቡና እንደነበረ አስታውሰዋል፡፡

ከገቢ አንፃር በነሐሴ ወር ወደ ውጭ ከተላከው ቡና 97.7 ሚሊዮን ዶላር ገቢ ለማግኘት ታቅዶ እንደተሠራ፣ ሆኖም የተገኘው ገቢ 123.1 ሚሊዮን ዶላር እንደሆነ አቶ ሻፊ አስታውቀዋል፡፡ በነሐሴ 2013 ዓ.ም የተገኘው ገቢ ካለፈው ዓመት ተመሳሳይ ወር ጋር ሲነፃፀር ሰፊ ልዩነት ያለው እንደሆነ ጠቁመው፣ በነሐሴ 2012 ዓ.ም. ወደ ውጭ ከተላከው ቡና 72.6 ሚሊዮን ዶላር መገኘቱን አክለዋል፡፡

በነሐሴ ወር 2013 ዓ.ም. ለውጭ ገበያ የቀረበው ቡና ወደ ጀርመን፣ አሜሪካ፣ ሳዑዲ ዓረቢያ፣ ቤልጂየምና ሌሎች አገሮች መሆኑን ያስረዱት ምክትል ዋና ዳይሬክተሩ፣ ቡና ወደ ውጭ መላክ ከተጀመረበት ጊዜ ከነበሩት ባለፈው ወር የተላከው ቡና ከፍተኛ ሆኖ መመዝገቡን አስታውቀዋል፡፡

ለተገኘው ውጤት የአቅራቢዎችና የላኪዎች ትስስሩ መጠናከርና በዘርፉ ሪፎርም በአግባቡ ተግባራዊ መሆኑ ዓይነተኛ ሚና መጫወቱ ተጠቁሞ፣ በዚህም የቡና ጥራት በከፍተኛ ሁኔታ ከመጨመሩ ባሻገር፣ በመሀል ያሉ ያልተፈለጉ ሰንሰለቶች እንዲቋረጡ ያስቻለም እንደሆነ ተመላክቷል፡፡ ይህም ግብይቱ የተሳለጠ እንዲሆን አስችሎታል ተብሏል፡፡

ከብሔራዊ ባንክ፣ ከጉምሩክ ኮሚሽን፣ ከአንድ መስኮት አገልግሎት፣ ከማሪታይም ባለሥልጣን፣ ከባህርና ትራንስፖርት አገልግሎት ድርጅት ጋር የተደረገው የቅንጅት ሥራ፣ በቡና ዘርፍ እየታየ ላለው መነቃቃት ትልቅ ሚና እየተጫወተ እንደሚገኝ ያስረዱት አቶ ሻፊ፣ ይህም የቅንጅት ዕቅድ አዘጋጅቶ ችግሮችን እግር በእግር እየተከተሉ ከመቅረፍ አንስቶ እንቅስቃሴዎችን እስከ መገምገም የሚደርስ ሥራዎችን የሚያካትት እንደሆነ ገልጸዋል፡፡

ቀደም ሲል የቡና ዋጋ ወረድ ሲል ቡና አብቃይ አርሶ አደሩ የሚለፋበትን ዋጋ ሳያገኝ እንደቆየ፣ በዚህ ወቅት ግን ቡና በተሻለ ዋጋ እየተሸጠ ስለሆነ የቡና ጥራትን የመጠበቅ፣ ያረጁ የቡና ዝርያዎችን የመጎንደልና አዳዲስ የቡና ዝርያዎችን የመትከልና የቡና እርሻን የማስፋፋት ሥራዎች በስፋት እየተከናወኑ እንደሆነ ተብራርቷል፡፡

በተያያዘም የቡና አምራች አርሶ አደሮችን ተጠቃሚ ሊያደርግ የሚያስችል ቤኔፊት ኮርፖሬሽን ፎር አፍሪካ አሜሪካ የተሰኘ የአፍሪካ-አሜሪካ ዲያስፖራ ኢኒሼቲቭ ረቡዕ መስከረም 5 ቀን 2013 ዓ.ም. በአፍሪካ ኢኮኖሚክ የመሰብሰቢያ አዳራሽ ይፋ ተደርጓል።

በመድረኩ የኢትዮጵያ ቡና አምራች ኅብረት ሥራ ማኅበራትንና የአርሶ አደሮችን ተጠቃሚነት ያረጋግጣል የተባለ ስምምነት ብሌስ ኮፊ አፍሪካ ኢኒሼቲቭ በተባለ ድርጅትና በሁለት ቡና አምራች ኅብረት ሥራ ማኅበራት፣ በፌደራል ኅብረት ሥራ ኤጀንሲና በሚመለከታቸው ባለድርሻ አካላት መሀል ተደርጓል፡፡

በሥነ ሥርዓቱ ላይ የተገኙት የንግድና ኢንዱስትሪ ሚኒስትር ዴኤታ ምሥጋኑ አረጋ (አምባሳደር) ኢትዮጵያ ባላት የቡና ምርት ልክ በዓለም አቀፍ ደረጃ ተጠቃሚ ባለመሆኗ፣ ኢኒሼቲቩ ቡና አምራቹን አርሶ አደር ከመጥቀም ጎን ለጎን አገሪቱ በዓለም አቀፍ ገበያ ተወዳዳሪና ብቁ እንድትሆን ያስችላታል ብለዋል።

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች