Wednesday, July 24, 2024
- Advertisement -
- Advertisement -
ማኅበራዊየፍጥነት መገደቢያ መሣሪያ የተገጠመላቸው ተሽከርካሪዎች ከሁለት ሺሕ እንደማይበልጡ ተገለጸ

የፍጥነት መገደቢያ መሣሪያ የተገጠመላቸው ተሽከርካሪዎች ከሁለት ሺሕ እንደማይበልጡ ተገለጸ

ቀን:

በአገር አቀፍ ደረጃ ከ30 ሺሕ በላይ መኪኖች የፍጥነት መገደቢያ መሣሪያ ቢገጠምላቸውም፣ በአዲስ አበባ ከተማ የፍጥነት መገደቢያ መሣሪያ የተገጠመላቸው ተሽከርካሪዎች ከ2000 እንደማይበልጡ ተገለጸ፡፡

 

የአዲስ አበባ ትራፊክ ማኔጅመንት ኤጀንሲ ክትል ዋና ዳይሬክተር ብርሃኑ ግርማ (ኢንጂነር) ለሪፖርተር እንዳስታወቁት፣ የፍጥነት መገደቢያን ተግባራዊ ማድረግ  በከተማም ሆነ በፌዴራል ደረጃ ተግባራዊ ለማድረግ ዋነኛ ዓላማ ነው፡፡ ለትራፊክ አደጋና ሞት መንስዔ ከሆኑ ችግሮች አንዱ ከፍጥነት ወሰን በላይ ማሽከርከር መሆኑንና ለመቀነስ እንደሆነ አክለዋል፡፡

የትራፊክ ማኔጅመንት ኤጀንሲ አራት ነገሮች ላይ ትኩረት አድርጎ የሚሠራ ሲሆን፣ ከዚህ ውስጥ በኤጀንሲው የሚከናወኑት የትራፊክ ፍሰትና ደኅንነት ላይ ያተኮሩ ጉዳዮች እንደሆኑ ተጠቁሟል፡፡ ኤጀንሲው በጥናት ባገኘው መረጃ መሠረት በብዛት አደጋዎች እየተፈጠሩ ያሉት ከፍጥነት ወሰን በላይ በማሽከርከር ነው፡፡ በከተማዋ የፍጥነት ወሰን ለማመላከት የተለያዩ ምልክቶችን ከማስቀመጥ በተጨማሪ የፍጥነት ገደብ ጉብታዎች መሠራታቸው ተገልጾ፣ ነገር ግን ከጊዜውና ከቴክኖሎጂ ጋር የተዛመዱ አገልግሎቶች ማቅረብ ስለሚገባ፣ በፌዴራል ትራንስፖርት ባለሥልጣን አማካይነት የፍጥነት መገደቢያ መሣሪያ በተሽርካሪዎች ላይ ለመግጠም ሥራዎች እንደተጀመሩ ተናግረዋል፡፡

በፌዴራል ትራንስፖርት ደረጃ አገልግሎቱን ከእነ ክፍተቱ ተግባራዊ ማድረግ ከተጀመረ ጥቂት ጊዜያት እንደተቆጠሩ ያስታወሱት ምክትል ዋና ዳይሬክተሩ፣ በከተማ ደረጃ ያለውን አቅም አደራጅቶ ወደ ሥራ ለማስገባት ትንሽ ጊዜ እንደወሰደ አስታውቀዋል፡፡

በአገር ዓቀፍ ደረጃ ከ30 ሺሕ በላይ መኪኖች የፍጥነት መገደቢያ መሣሪያ እንደተገጠመላቸው የጠቆሙት ምክትል ዋና ዳይሬክተሩ፣ ነገር ግን የተገጠሙት መሣሪያዎች ሁሉም በሥራ ላይ ናቸው ወይ የሚለው በጥያቄ ምልክት ውስጥ እንደሆነ መሆኑን ተናግረዋል፡፡ በተገኘው መረጃ መሠረት ከገጠሙት ተሸከርካሪዎች 46 በመቶ ብቻ በትክክል ሥራ ላይ እንዳዋሉና ቀሪው አኃዝ እንደሚያሳየው በእነዚህ ተሸከርካሪዎች ላይ የተገጠሙት መሣሪያዎች ወይ እየሠሩ አይደለም፣ ወይም ተነቅለዋል የሚል አረዳድ መፍጠሩን አስረድተዋል፡፡

በአዲስ አበባ ደግሞ ዕውቅና በተሰጣቸው የፍጥነት መገደቢያ መሣሪያ ገጣሚዎች እስካሁን 1,700 መኪኖች ብቻ የፍጥነት መገደቢያው የተገጠመላቸው ሲሆን፣ በአገር አቀፍ ደረጃም የተገለጸውን ቁጥር በድጋሚ መመልከት እንደሚገባና ቁጥጥር በማድረግ የሚፈለገው ደረጃ ላይ ይደርሳል የሚል ተስፋ እንዳለቸው አስረድተዋል፡፡

የአዲስ አበባ ከተማ ትራፊክ ማኔጅመንት ኤጀንሲና ፌዴራል ትራንስፖርት ባለሥልጣን በአዲስ አበባ በሚንቀሳቀሱ ተሸከርካሪዎች ላይ የፍጥነት መገደቢያ መሣሪያ እንዲጠቀሙ የሚያዘውን መመርያ ተግባራዊነት በተመለከተ ከሚመለከታቸው አካላት ጋር፣ ሐሙስ መስከረም 27 ቀን 2014 ዓ.ም. በፍሬንድሺፕ ሆቴል የውይይት መድረክ አዘጋጅቶ ነበር፡፡ በመድረኩ ላይ ከፌዴራል ትራንስፖርት ባለሥልጣን፣ ከትራፊክ ማኔጅመንት ኤጀንሲና ከባለድርሻ አካላት የተወከሉ ባለሙያዎች የተለያዩ የመነሻ ጥናቶችን አቅርበዋል፡፡

በቀረቡት ጽሑፎች ላይ በፍጥነት መገደቢያ መሣሪያ አተገባበር የሚታየው ችግር በተለያዩ የዘርፉ ባለድርሻ አካላት ቅንጅታዊ ጉድለት የሚፈጠር እንደሆነ ተጠቁሟል፡፡ በዚህም መሠረት የመሣሪያ አስመጪዎች ለትርፍ የሚያደርጉት መሽቀዳደም ጥራት ያለው ዕቃ እንዳይገጠም እንዳደረገ፣ በተቆጣጣሪው አካላት የሥራ ክፍተቶች መፈጠር ደግሞ ብዙ እንግልትና ንትርኮች ስለተፈጠሩ ኅብረተሰቡ መሣሪያው አለማስገጠም ምርጫው ማድረግ መጀመሩ ተወስቷል፡፡

በተሽከርካሪዎች ላይ እየተገጠመ ባለው የፍጥነት መገደቢያ መሣሪያ አስገዳጅ መመርያ በማውጣት ተግባራዊ ማድረግ አንዱ ትኩረት የሚሻ እንደሆነ ተገልጿል፡፡ ችግር ፈቺ የሆኑ ሶፍትዌሮችን ማበልፀግና የፍጥነት መገደቢያ አተገባበሩን ተደራሽ ማድረግ እንደሚገባ በመድረኩ የተገለጸ ሲሆን፣ ከዚህ በተጨማሪም የተሻሻለውን የፍጥነት መገደቢያ መመርያ ቁጥር 692/2013 ለሚመለከተው አካል አቅርቦ በአስቸኳይ እንዲፀድቅ ማስደረግ፣ የፍጥነት መገደቢያ ቴክኖሎጂውን የጥራት ደረጃ በፍጥነት እንዲረጋገጥ ማድረግ እንደሚገባ በመድረኩ አፅንኦት ተሰጥቶበታል፡፡

በፌዴራል ትራንስፖርት ባለሥልጣንና በትራፊክ ማኔጅመንት ኤጀንሲ መሥሪያ ቤቶች በኩል ደግሞ የተለያዩ መቆጣጠሪያ ፕላትፎርሞችን በአንድ የዳታ ቤዝ ቋት አለመያዝ፣ የተገጠሙትን መሣሪያዎች በጉግል ማፕ ቼክ ለማድረግ መቸገር፣ በሪሞት ማኔጅመንት ሁሉም ገጣሚ ድርጅቶች የገጠሙዋቸውን መኪኖች ተከታትሎ የፍጥነት ጥሰትን መከታተል አለመቻል ክፍተት እንዳለ በመድረኩ ተነስቷል፡፡ ተገጥመዋል ተብለው የተነቀሉ መሣሪያዎችን ተከታትሎ ዕርምጃ ያለመውሰድ ችግሮች በአተገባበሩ ሒደት የታዩ ክፍተቶች እንደሆኑ ተመልክቷል፡፡

የፍጥነት መገደቢያ መሣሪያ አተገባበሩንም በሁሉም ክልሎቸ በፍጥነት ተግባራዊ እንዲሆን ማስቻል፣ ከትራፊክ ፖሊሶች ጋር ቅንጅታዊ አሠራርን በመፍጠር ተከታታይነትና ቀጣይነት ያለው ቁጥጥር ማድረግ፣ በተሽከርካሪዎች ላይ መለያ ምልክት እንዲዘጋጅ በማድረግ ሥራ ላይ እንዲውል ማድረግ፣ የአገልግሎት መሣሪያ ፍተሻው ከዓመታዊ የተሽከርካሪ ምርመራ ጋር እንዲተሳሰር ማድረግ በተጨማሪ የቀረቡ ምክረ ሐሳቦች ነበሩ፡፡

በከተማ ደረጃ ሁሉም ተሽከርካሪዎች ላይ የፍጥነት መገደቢያዎችን የመግጠም ዓላማ የለንም ያሉት ምክትል ዋና ዳይሬክተሩ፣ ከፍተኛ አደጋ እየፈጠሩ ያሉትን ተሽከርካሪዎች በጥናት በመለየት የሚከናወን እንደሆነና በዚህም ተጠቃሾች ከሆኑት ውስጥ የሕዝብና የጭነት ትራንስፖርት ተሽከርካሪዎች ሆነው በመገኘታቸው፣ በቅደም ተከተል ሌሎቹንም እንዲሁ እየለዩ በተሸከርካሪዎቹ ላይ ተግባራዊ የማድረግ ሥራ እየተከናወነ እንደሚገኝ አስታውቀዋል፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

[ክቡር ሚኒስትሩ ከተቋሙ የሠራተኞች ማኅበር አመራር ጋር እየተወያዩ ነው]

ጤና ይስጥልኝ ክቡር ሚኒስትር? ሰላም! በአስቸኳይ እንደፈለጉኝ መልዕክት ደርሶኝ ነው የመጣሁት። አዎ።...

የሱዳን ጦርነትና የኢትዮጵያ ሥጋት

የሱዳን ጦርነት ከጀመረ አንድ ዓመት ከአራት ወራት አስቆጠረ፡፡ ጦርነቱ...

ግለሰብ ነጋዴዎችን በአስገዳጅነት የንግድ ምክር ቤት አባል ለማድረግ ያለመው ረቂቅ አዋጅ ተከለሰ

በምትኩ የንግድ ተቋማት በአስገዳጅነት የንግድ ምክር ቤት አባል ይሆናሉ...

አሳርና ተስፋ!

ከቱሉ ዲምቱ ወደ ቦሌ ጉዞ ልንጀምር ነው፡፡ ገና ከመንጋቱ...