Wednesday, July 24, 2024
- ማስታወቂያ -
- ማስታወቂያ -

የአጎዋ የንግድ ዕድል ክልከላ የሚያሳድረው ጉልህ ተፅዕኖ እንደማይኖር የኢንቨስትመንት ኮሚሽን አስታወቀ

ተዛማጅ ፅሁፎች

በዮናስ አማረ

የኢትዮጵያ ኢንቨስትመንት ኮሚሽን፣ ሰሞኑን የአሜሪካ መንግሥት ኢትዮጵያን ከአጎዋ ዕድል ተጠቃሚነት ማገዱ በኢንቨስትመንት ፍሰት ላይ ጉልህ ተፅዕኖ እንደማይኖረው አስታወቀ፡፡

ከሰሞኑ የአሜሪካ መንግሥት ኢትዮጵያ ከቀረጥና ከኮታ ነፃ ከሆነው አጎዋ የንግድ ዕድል ተጠቃሚነት እንድትወጣ ማድረጉ ይታወሳል፡፡ አሜሪካ ከሰሃራ በታች ላሉ 39 አገሮች የሰጠችውና 6‚500 ምርቶቻቸውን ወደ ግዛቷ ከቀረጥ ነፃ እንዲያስገቡ የሚፈቅደውን የአጎዋ ንግድ ዕድልን እ.ኤ.አ. ከ2001 ጀምሮ ኢትዮጵያ ስትጠቀም ቆይታለች፡፡ ይሁን እንጂ በትግራይ ክልል በተደረገው ጦርነት ሳቢያ ኢትዮጵያን በሰብዓዊ አያያዝ ሲከስ የቆየው የጆ ባይደን አስተዳደር፣ ከማሊና ከጊኒ ጋር ከዚህ የንግድ ዕድል ተጠቃሚነት እንድትወጣ ማድረጉን ባለፈው ሳምንት ማስታወቁ አይዘነጋም፡፡

ይህንኑ በተመለከተ ሪፖርተር የኢንቨስትመንት ኮሚሽን የሕዝብ ግንኙነት ኃላፊ አቶ ተመስገን ጥላሁንን የአሜሪካ ዕርምጃ የኢትዮጵያን ኢንቨስትመንት ፍሰት ስለመጎዳቱ ለቀረበላቸው ጥያቄ በሰጡት ምላሽ፣ የኢትዮጵያ ኢንቨስትመንት የመሳብ እንቅስቃሴ በዋናነት ትልልቅና አስተማማኝ የኢንቨስትመንት ሥራዎች ላይ የሚሰማሩ ኩባንያዎችን ማምጣት ላይ እንደሚያተኩር አስረድተዋል፡፡ በዚህ ረገድ የአጎዋ ገበያ መዘጋት የሚፈጥረው ጉዳት የጎላ አለመሆኑን ተናግረዋል፡፡

ኢትዮጵያ ኢንቨስተሮችን ለመሳብ አሉኝ ብላ ከምታስተዋውቃቸው አምስት የገበያ ዕድሎች አንዱ አጎዋ መሆኑን የጠቀሱት አቶ ተመስገን፣ ከእነዚህ ውስጥ አንዱ መዘጋቱ ጉልህ ባይሆንም ጉዳት አይኖረውም ማለት እንደማይቻል ገልጸዋል፡፡ ‹‹እኛ ኢትዮጵያ ቅድሚያ በምትሰጣቸው ዘርፎች የሚሰማሩ ኢንቨስተሮችን መሳብ ላይ ነው የምናተኩረው፡፡ በጨርቃ ጨርቅና በአልባሳት ዘርፍ ላይ የሚሰማሩ ኢንዱስትሪዎች የአጎዋ ገበያን መጠቀም ፈልገው ሊመጡ ይችላሉ፡፡ ነገር ግን ጨርቃ ጨርቅና አልባሳት አንዱ እንጂ ብዙ የማኑፋክቸሪንግ ኢንዱስትሪ ዘርፎች አሉ፤›› ብለው፣ የአጎዋ ገበያ መታገድ ጥቂት ዘርፎች ላይ ከሚያሳድረው አንፃራዊ ጉዳት ባለፈ፣ የኢትዮጵያን የኢንቨስትመንት እንቅስቃሴ ይጎዳል ብሎ መደምደም እንደማይቻል አስረድተዋል፡፡

የንግድ ዕድል ክልከላውን ምክንያት በማድረግ ዓለም አቀፍ መገናኛ ብዙኃን፣ የንግድ ዕድሉን በመጠቀም ከአፍሪካ አምስተኛ ደረጃ ላይ የምትገኘዋ አገር ኢትዮጵያ ክፉኛ ኢኮኖሚዋ እንደሚጎዳ ሲዘግቡ ከርመዋል፡፡ ኢትዮጵያ በተለይ በቆዳና በአልባሳት አምራች ኢንዱስትሪ ዘርፍ የተሰማሩ በርካታ ወጣቶች በአጎዋ ክልከላ የተነሳ ሥራ አጥ እንደሚሆኑባት ሲነገር ከርሟል፡፡

የአጎዋ ገበያ ኦፊሴላዊ ድረ ገጽ ላይ የሰፈሩ መረጃዎች እንደሚያመለክቱት ከሆነ፣ ኢትዮጵያ ወደ አሜሪካ ከምትልካቸው ምርቶች የምታገኘው ዓመታዊ ገቢ 523 ሚሊዮን ዶላር ነው፡፡ ከዚህ ውስጥ በአጎዋ የንግድ ዕድል የሚሸፈነው ገቢ 238 ሚሊዮን ዶላር እንደሆነ ያስረዳል፡፡

‹‹የኢንቨስትመንት መሳብና ማስተዋወቅ ስትራቴጂያችን እንደ አጎዋ ዓይነት የገበያ ዕድልን ለመጠቀም ፈልገው የሚመጡትን ሳይሆን፣ ትልልቅ ኢንዱስትሪዎችን መሳብ ላይ ያተኩራል፤›› የሚሉት የአቶ ተመስገን፣ በዚህ ረገድ አጎዋ ትርጉም የሌለው የገበያ ዕድል መሆኑን አስረድተዋል፡፡

‹‹ኢትዮጵያ የኢንቨስትመንት ዕድልም ሆነ ምቹ ሁኔታዎች በርካታ ናቸው፡፡ ኢትዮጵያ ማምረት የሚችል ከፍተኛ ቁጥር ያለው ወጣት የሰው ኃይል አላት፡፡ ትልልቅ ማበረታቻዎችና ምቹ ፖሊሲዎች አሏት፡፡ ለታላላቅ የዓለም ገበያዎች አገሪቱ ቅርብ ናት፣ ሰፊ ገበያም አላት፤›› ሲሉ የዘረዘሩት አቶ ተመስገን፣ አጎዋ በመዘጋቱ ሊከሰት የሚችለው የኢንቨስትመንት እንቅስቃሴ ተፅዕኖ ዝቅተኛ መሆኑን አስምረውበታል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች