Friday, September 30, 2022
ሌሎች ዓምዶች
    - ማስታወቂያ -
    - ማስታወቂያ -

    ብሔራዊ ባንክ የፀሐይ ባንክ ፕሬዚዳንት ሹመትን አፀደቀ

    - ማስታወቂያ -

    ተዛማጅ ፅሁፎች

    በቅርቡ የኢትዮጵያን የባንክ ኢንዱስትሪ ለመቀላቀል በዝግጅት ላይ ያለው ጸሐይ ባንክን በፕሬዚዳንትነት እንዲመሩ የታጩት የቀድሞው የዳሸን ባንክ ምክትል ፕሬዚዳንት አቶ ያሬድ መስፍን፣ ሹመታቸው በብሔራዊ ባንክ ፀደቀ፡፡

    ከፀሐይ ባንክ የተገኘው መረጃ እንደሚያመለክተው፣ የኢትዮጵያ ብሔራዊ ባንክ የአቶ ያሬድን ሹመት ማፅደቁን ለባንኩ ያስታወቀው ጥቅምት 29 ቀን 2014 ዓ.ም. ነው፡፡

    የኢትዮጵያ ብሔራዊ ባንክ በአቶ ያሬድ ዙሪያ የቀረበለትን መረጃ መሠረት አድርጎ የማጣራት ሥራውን ካጠናና ካጠናቀቀ በኋላ ሹመቱን ሊፀድቅ መቻሉን ይኼው ከባንኩ የተገኘው መረጃ ያመለክታል፡፡

    አቶ ያሬድ ፀሐይ ባንክን በፕሬዚዳንትነት እንዲመሩ ከመታጨታቸው ቀደም ብሎ በዳሸን ባንክ ውስጥ በምክትል ፕሬዚዳንትነት ሲያገለግሉ ነበር፡፡ ዳሸን ባንክ ከመቀላቀላቸው ቀደም ብሎ በኢትዮጵያ ንግድ ባንክ ከጀማሪ ባንከርነት እስከ ከፍተኛ የሥራ ኃላፊነት አገልግለዋል፡፡

    በኢትዮጵያ ንግድ ባንክ የባህር ዳርና የሰሜን አዲስ አበባ ሥራ አስኪያጅ በመሆን ማገልገላቸውም ይጠቀሳል፡፡

    የኢትዮጵያ ብሔራዊ ባንክ የፀሐይ ባንክ ቦርድ አባላት ሹመትም ማፅደቁን ታውቋል፡፡

    ፀሐይ ባንክ በቅርቡ ገበያውን ይቀላቀላሉ ተብለው ከሚጠበቁ ባንኮች መካከል አንዱ ሲሆን፣ በ734 ሚሊዮን ብር የተከፈለና በ2.83 ቢሊዮን ብር የተፈረመ ካፒታል ምሥረታውን ማካሄዱ ይታወሳል፡፡ ባንኩ 373 ባለአክሲዮኖችም አሉት፡፡  

    ባንኩን ሥራ ላይ ካሉትም ሆነ በምሥረታ ላይ ከቆዩት ባንኮች የተለየ ከሚያደርጉ አንዱ አነስተኛ ቁጥር ያላቸው ባለአክሲዮኖች ያሉት መሆኑ ነው፡፡

     በአሁኑ ወቅት ሥራ ላይ ካሉ ባንኮች አነስተኛ የባለአክሲዮኖች ቁጥር ያላቸው ተብለው የሚጠቀሱ ባንኮች የባለአክሲዮኖቻቸው ቁጥር ከ3,200 እስከ 5,000 ነው፡፡ ከ3,200 እስከ 5,000 የሚደርሱ ባለአክሲዮኖች ካሏቸው መካከል አዋሽ፣ ንብና ወጋገን ባንኮች ይጠቀሳሉ፡፡

    እስካሁን በኢንዱስትሪው ውስጥ አንድ የባንክ አክሲዮን የሚገዛ ሰው ወይም ድርጅት መግዛት አለበት ተብሎ ይጠቀስ የነበረው አነስተኛ የአክሲዮን መጠን 50 ሺሕ ብር ቢሆንም፣ አብዛኞቹ አነስተኛ የአክሲዮን ሽያጭ ብለው የሚያስቀምጡት አሥር ሺሕ ብር ወይም እያንዳንዳቸው 1,000 ብር ዋጋ ያላቸው አሥር አክሲዮኖችን ነው፡፡

    - Advertisement -spot_img

    የ ጋዜጠኛው ሌሎች ፅሁፎች