[ክቡር ሚኒስትሩ ከአማካሪያቸው ጋር ሆነው የአፍሪካ ኅብረት ልዩ ወኪል የፖለቲካ ቀውሱን ለመፍታት እያደረጉ ያለውን ጥረት በተመለከተ እየተወያዩ ነው]

• ሰውየው በእኛ ወገን ያለውን አቋም ከሰሙ በኋላ ወደ ሰሜን ሄደው ተመልሰዋል። 
  • ምን ይዘው ተመለሱ? 
  • በእነሱ በኩል የተያዘውን አቋም ለመረዳት ሞክረዋል። 
  • የእነሱ አቋም ምን እንደሆነ ማወቅ አልፈልግም፣ ግን ሰውየው የተረዱትን ማወቅ እፈልጋለሁ፣ ምን ተረዳሁ አሉ?
  • ያው ራስን በራስ የማስተዳደር መብታቸውን ለማስከበር የሚያደርጉት ትግል እንደሆነ እንደገለጹላቸው አሳውቀውናል። 
  • እና አመኗቸው? 
  • ሰውየው የእርሳቸው ሚና ሁሉንም ወገን ማናገርና ወደ መፍትሔ የሚያደርሰውን መንገድ መጠቆም እንደሆነ ነው የሚያምኑት። 
  • እሺ ከእነሱ ወገን ያለው አቋም ምንድነው አሉ? ማለቴ ፖለቲካዊ መፍትሔን በተመለከተ? 
  • በፖለቲካዊ መፍትሔ እንደሚስማሙ ነገር ግን ወደዚያ ለመሄድ ሦስት ቅድመ ሁኔታዎችን እንዳስቀመጡ ገልጸውላቸዋል። 
  • ቅድመ ሁኔታዎቹ ምንድናቸው? 
  • አንደኛ ከበባው ይቁም፣ ሁለተኛ ተጠያቂነት መስፈን አለበትና በሦስተኛ ደረጃና በመሠረታዊነት ደግሞ የሽግግር መንግሥት መቋቋም እንዳለበት ነው የነገሯቸው። 
  • የሽግግር መንግሥት መፍትሔ ከራሳቸው መምጣቱ ጥሩ ነው።
  • እንዴት ክቡር ሚኒስትር? ምን እያሉ ነው?
  • ምክንያቱም በሰሜን ያለውን የሥልጣን ክፍተት ለመፍታት ለእኛም አስቸጋሪ ነው የሚሆነው፣ ስለዚህ የሽግግር መንግሥት መፍትሔ ከራሳቸው መምጣቱ ጥሩ ነገር ነው ለማለት ፈልጌ ነው። 
  • ስተዋል፡፡
  • ምን?
  • ክቡር ሚኒስትር ስተዋል፣ እነሱ የሽግግር መንግሥት መቋቋም አለበት ያሉት እዚያ አይደለም። 
  • እና የት ነው?
  • እዚህ፣ ማዕከላዊ መንግሥቱ ፈርሶ የሽግግር መንግሥት ካልተቋቋመ ነው የሚሉት። 
  • እንደዚያ ነው?!
  • እንደዚያ ነው የሚሉት ክቡር ሚኒስትር።
  • ፍላጎታቸው ሌላ ነው አትለኝም እንዴ ታዲያ? ቆይ ቆይ በዚህ ብንስማማ የተቀረውን ምን ሊያደርጉ ነው?
  • አልገባኝም ክቡር ሚኒስትር?
  • ማዕከላዊ መንግሥት ተስማማና የሽግግር መንግሥት ይመሥረት አለ እንበል፣ የክልሎቹን ምን ሊያደርጓቸው ነው?
  • የክልሎቹ ሲሉ?
  • የክልል መንግሥታትን ማለቴ ነው?
  • እዚያም የሽግግር መንግሥት መቋቋም አለበት ነው የሚሉት።
  • እንዴት ሆኖ? ማነው የክልል መንግሥታትን ፍረሱና የሽግግር መንግሥት ይተካ የሚለው?
  • እውነት ብለዋል፣ ማን ነው የክልል መንግሥታት ላይ እንደዚያ የመወሰን ሥልጣን ያለው? የፌዴራል መንግሥት እንደሆነ በክልሎች ላይ ሥልጣን የለውም፣ የፌዴራሉን መንግሥት ያቋቋሙት ክልሎች ራሳቸው ናቸው።
  • ለሰውየው ራስን በራስ ለማስተዳደር ነው የምንታገለው ብለዋል አላልከኝም እንዴ?
  • አዎ ብለዋል።
  • ታዲያ ሌሎች ክልሎችስ ተመሳሳይ መብት እንዳላቸው ዘንግተውት ነው? 
  • ዘንግተውት አይደለም። 
  • እና?
  • ያሉ መስሏቸው ነው፡፡
  • እነ ማን?
  • በክልል ሥልጣን ላይ ድሮ ያስቀመጧቸው።
  • እስካሁን? 

[ክቡር ሚኒስትሩ ከሥራ አስፈጻሚው ስብሰባ በኋላ ወደ መኖሪያ ቤታቸው ሲገቡ ባለቤታቸው በዕልልታ ተቀበሏቸው]

• • ምንድነው? ምን ተገኘ?!
  • ምን ተገኘ? ደስታ ነዋ፣ ደስታ፡፡
  • እኮ የምን ደስታ?
  • ሁሉም አመራር ወደ ጦር ግንባር ብላችሁ በመወሰናችሁ ነዋ፣ የቆየ ቢሆንም ትክክለኛ ውሳኔ ነው። 
  • ለአገርሽ እንዲህ ስትሆኚ አይቼ አላውቅም ነበር?
  • የእኔ ብቻ ስሜት አይመስለኝም፣ የሁሉም አገር ወዳድ ስሜት ነው፣ ቢዘገይም ዛሬም አልረፈደም፡፡ 
  • ከዛሬ ነገ ይታረማሉ ብለን፣ ለሁሉም ጊዜ አለው ብለን ያስታመምነው ውሳኔ ነው። 
  • እሰይ… እሰይ… የከተማው ወጣትም የት መሠለፍ እንዳለበት ከዚህ በኋላ መወሰኑ አይቀርም።
  • ምን ማለትሽ ነው? የት ነበር እስከ ዛሬ የሚሠለፈው?
  • ሲኒማ ቤት! 

[ክቡር ሚኒስትሩ ወደ ቢሯቸው እንደገቡ የእጅ ስልካቸው ጠራ፣ ሰሞኑን ደጋግመው የሚደውሉላቸው አንድ የአውሮፓ አገር ባለሥልጣን ነበሩ የደወሉት]

• • ጤና ይስጥልኝ ክቡር ሚኒስትር፡፡
  • ጤና ይስጥልኝ፣ እንደምን አለህ አምባሳደር?
  • ሰላም ነኝ፣ የአገር ውስጥ ሚዲያዎች የዘገቡትን ተመልክቼ ነበር የደወልኩት ክቡር ሚኒስትር፣ የተባለው እውነት ነው?
  • ምን ተባለ?
  • ጠቅላይ ሚኒስትሩን ጨምሮ አመራሮች እንዲዘምቱ መወሰኑን ነው ያነበብኩት። 
  • ልክ ነው፣ ውሳኔ ብቻ አይደለም እየተገበርነው እንገኛለን።
  • ክቡር ሚኒስትር ይህ ስህተት ነው፣ ወደ ተሳሳተ መንገድ እየሄዳችሁ ነው። 
  • እንዴት ብታስበው ነው አገርን የማዳን ዘመቻን ስህተት ነው ያልከው? 
  • ስህተት ነው ክቡር ሚኒስትር፣ ይህ አካሄዳችሁ ከእኛ ጋር ያላችሁን ግንኙነት የሚጎዳ ነው፡፡
  • እስካሁን ከጎዳችሁን በላይ?
  • እኛና እናንተ ለዓመታት የቆየ መልካም ወዳጅነት ነው ያለን።
  • እሱንማ አቆሸሻችሁት። 
  • ክቡር ሚኒስትር አሁን በወሰናችሁት መንገድ የምትቀጥሉ ከሆነ የምንሰጠውን ዕርዳታና ድጋፍ እንደምናቋርጥ አይጠራጠሩ፣ ይህ ደግሞ በችግር ውስጥ የሚኖረውን ኢትዮጵያዊ የሚጎዳ ነው። 
  • ኢትዮጵያዊን አታውቀውም ማለት ነው? 
  • አውቀዋለሁ እንጂ፣ እንዴት አላውቀውም?
  • ብታውቀውማ ያልከውን ለማለት አትደፍርም ብዬ ነው፣ ለማንኛውም እኔም አንድ ነገር ላረጋግጥልህ እፈልጋለሁ።
  • ምንድነው?
  • ያሻችሁን ብትወስኑ የሚደነቅ ኢትዮጵያዊ እንደማይኖር አረጋግጥልሃለሁ። 
  • ክቡር ሚኒስትር አይምሰልዎት፣ የሰው ልጅ በችግር ውስጥ ሲሆን ምን እንደሚያደርግ አይታወቅም።
  • አትጨነቅ። 
  • ለምን አልጨነቀም? 
  • ምክንያቱም ኢትዮጵያዊነት በልቶ ከማደር በላይ ከፍ ያለ ነው!