Sunday, November 27, 2022
ሌሎች ዓምዶች
    - ማስታወቂያ -
    - ማስታወቂያ -

    የኢትዮጵያ የውጭ ቀጥተኛ ኢንቨስትመንት ቢቀንስም የኢኮኖሚው ዕድገት አዎንታዊ መሆኑ ተነገረ

    - ማስታወቂያ -

    ተዛማጅ ፅሁፎች

    የኢትዮጵያ የውጭ ቀጥተኛ አንቨስትመንት ቢያሽቆለቁልም፣ የኢኮኖሚ ዕድገቱ ግን አዎንታዊ መሆኑ ተገለጸ፡፡

    ዓለም አቀፉ የኢኮኖሚና ፋይናንስ ግምገማ ተቋም ኧርነስት ኤንድ ያንግ (Ernst and Young) እ.ኤ.አ. 2021 ባቀረበው የአፍሪካ የውጭ ቀጥተኛ ኢንቨስትመንት  ሪፖርት “Africa Attractiveness Report 2021” መሠረት፣ የምሥራቅ አፍሪካ ቀጣና ዝቅተኛ የውጭ ቀጥተኛ ኢንቨስትመንት የሳበ ተብሏል፡፡

    የቀጣናው የውጭ ቀጥተኛ ኢንቨስትመንት ያሽቆለቆለው በኢትዮጵያ በተፈጠረው የፖለቲካ አለመረጋጋት ምክንያት እንደሆነ ሪፖርቱ ይገልጻል፡፡

    የኢትዮጵያ የመንግሥት ኮሙዩኒኬሽን አገልግሎት ሚኒስትር ደኤታ ሰላማዊት ካሳ ሰኞ ታኅሳስ 4 ቀን 2014 ዓ.ም. በሰጡት መግለጫ፣ በ2014 በጀት ዓመት ባለፉት ሦስት ወራት የነበረው የአገሪቱ የኢኮኖሚ አፈጻጸም መልካም ውጤትና ዕድገት የታየበት መሆኑን አመልክተው ነበር፡፡

    በሩብ ዓመቱ የአገሪቱ የዋጋ ግሽበት መቀነስ የታየበት መሆኑን፣ የወጪ ንግድ (ኤክስፖርት) ገቢ መጨመሩን፣ እንዲሁም የውጭ ቀጥታ ኢንቨስትመንት ፍሰት ማደጉንና የአገር ውስጥ ታክስ ገቢም መሻሻሉን ገልጸዋል፡፡

    ዓምና በተመሳሳይ ሦስት ወራት ከተመዘገበው በ10.8 በመቶ ያደገ የታክስ ገቢ ዘንድሮ በሦስት ወራት መሰብሰቡን፣ በኤክስፖርት ንግድ ረገድም 16 በመቶ ብልጫ ያለው 972 ሚሊዮን ዶላር ገቢ መገኘቱን ያስረዱት ሚኒስትር ደኤታዋ፣ የዋጋ ግሽበት መረጋጋቱንና የውጭ ቀጥታ ኢንቨስትመንትም ማደጉን በዋናነት ገልጸዋል፡፡

    የኢትዮጵያ መንግሥት ይህን ቢልም የምሥራቅ አፍሪካ ቀጣና፣ እንዲሁም የኢትዮጵያ የውጭ ቀጥታ ኢንቨስትመንት ፍሰት ዘንድሮ ማሽቆልቆሉን ነው የኧርነስት ኤንድ ያንግ ሪፖርት ያመለከተው፡፡ በኮሮና ወረርሽኝ የተነሳ ክፉኛ የተጎዳው የአፍሪካ ኢኮኖሚ እ.ኤ.አ. በ2020 የውጭ ቀጥታ ኢንቨስትመንት ፍሰቱ 50 በመቶ መውረዱን ሪፖርቱ አመልክቷል፡፡

    ይህ ደግሞ አፍሪካን በወረርሽኙ ክፉኛ የደቀቀች አኅጉር ያደረጋት ሲሆን፣ የአኅጉሩ ጥቅል ኢኮኖሚ (ጂዲፒ) ወደ 2.4 በመቶ መኮማተሩንም ይገልጻል፡፡ ሆኖም በማዕድን ዘርፍ ዕድገት ታግዞ ኢኮኖሚው እ.ኤ.አ. በ2021 መጠነኛ መነቃቃቀት በማሳየት ወደ አራት በመቶ ከፍ እንደሚል ያመለከተው ሪፖርቱ፣ የውጭ ቀጥታ ኢንቨስትመንትና አጠቃላይ ዕድገቱም አንፃራዊ መሻሻል እንደሚታይበት ነው የተነበየው፡፡

    የአፍሪካ ቴሌኮም ዘርፍ ከፍተኛ የውጭ ቀጥታ ኢንቨስትመንት ፍሰት ያገኘ  መሆኑን ሪፖርቱ ይገልጻል፡፡ በአጠቃላይ በዓመቱ ናይጄሪያ 6.6 ቢሊዮን ዶላር የውጭ ቀጥታ ኢንቨስትመንት በመሳብ አንደኛ ስትሆን፣ ደቡብ አፍሪካ 3.8 ቢሊዮን ዶላር፣ አንጎላ 3.1 ቢሊዮን ዶላር እንዲሁም ሞሮኮ 2.4 ቢሊዮን ዶላር ኢንቨስትመንት ከውጭ በመሳብ ይከተሏታል ተብሏል፡፡

    የምሥራቅ አፍሪካ ቀጣና የውጭ ቀጥታ ኢንቨስትመንት በፀጥታ ችግርና በፖለቲካ አለመረጋጋት ቀንሷል ቢልም ሪፖርቱ፣ በአጠቃላይ የውጭ ቀጥታ ኢንቨስትመንት ፍሰቱም ሆነ የኢኮኖሚ ዕድገቱ አዎንታዊ ሆኖ እንደሚቀጥል ተገልጿል፡፡ እንደ ኬንያ፣ ኢትዮጵያና ታንዛኒያ ባሉ የቀጣናው አገሮች የኢኮኖሚ ዕድገትም ሆነ የውጭ ቀጥታ ኢንቨስትመንት ቅናሽ ቢታይባቸውም ኢኮኖሚው ግን ጤናማ ሆኖ ይቀጥላል ይላል ሲል ሪፖርቱ አስረድቷል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች