[ክቡር ሚኒስትሩ አመሻሹን ወደ መኖሪያ ቤታቸው ተመለስው ስለልጆቻቸው ውሎ ባለቤታቸውን እየጠየቁ ነው]

• ለልጆቹ የተቀጠሩት አስጠኚዎች እንዴት ናቸው? 
• ምን ይሆናሉ ብለህ ነው፣ ደህና ናቸው። 
• መቼ ስለጤንነታቸው ጠየቅኩሽ? 
• ውይ የእኔ ነገር…
• ባህሪያቸው እንዴት ነው? እየተከታተልሽ ነው? 
• ውሎ አድሮ ካልተቀየሩ በስተቀር እስካሁን ጥሩ ናቸው፣ ከልጆቹም ጋር ጥሩ ተግባብተዋል፡፡
• ያልኩሽንስ አረጋገጥሽ?
• ምን ነበር ያልከኝ?
• የመታወቂያቸውን ጉዳይ ነዋ?
• አዎ፣ የታደሰ ነው፣ አረጋግጫለሁ!
• ባቢስ ትምህርት ከጀመረ በኋላ እንዴት ነው? 
• እስኪ የእሱን ነገር ትምህርት ቤት ሄጄ ለመጠየቅ አስቤያለሁ?
• ለምን? ምን ተፈጠረ?
• በየቀኑ ከተማሪዎች ጋር እየተጋጨ ነው የሚመጣው። 
• እየተጋጨ? 
• አዎ፣ እከሌ አላጫውት አለኝ… እከሌ መታኝ… እያለ በየቀኑ እያላዘነ ነው የሚመጣው። 
• ይኼማ የተለመደ ነው… ትምህርት ገና መጀመሩ ስለሆነ ነው፡፡
• እኔም እንደዚያ ብዬ ንቄው ነበር።
• እና…
• ሰሞኑን ግን ካልተገዛልኝ ትምህርት ቤት አልሄድም ማለት ጀምሯል።
• ምን ካልተገዛልኝ ነው የሚለው?
• ድሮን፡፡
• ድሮን?
• አዎ፣ መፍትሔ መሆኑ ነዋ! 

[ክቡር ሚኒስትሩ ወቅታዊ ፖለቲካዊ ጉዳዮችን በተመለከተ ከአንድ የአውሮፓ ዲፕሎማት ጋር እየተወያዩ ነው]

• ክቡር ሚኒስትር እንደምን አሉ? 
• ጤና ይስጥልኝ አምባሳደር፡፡
• ዛሬ ለምን ላገኝዎት እንደፈለግኩኝ ሳይገምቱ አይቀርም ብዬ አስባለሁ።
• በጭራሽ አላውቅም… ነገር ግን በሰሜኑ ቀውስ ዙሪያ እንደሚሆን ከቀደሙት ግንኙነቶቻችን መጠርጠር ይቻላል። 
• እርግጥ ነው በዚሁ ጉዳይ ዙሪያ ነው፣ የሰሜኑ ግጭት በቅርቡ ሰላማዊ መፍትሔ እንደሚያገኝ አመላካች ነገሮች በማየታችን ደስተኛ መሆኔንም በዚሁ አጋጣሚ ለመግለጽ ነው።
• አዲስ አመላካች ነገር አለ እንዴ?
• በሰሜኑ ወገን የታያውን የአቋም ለውጥ አልሰሙም እንዴ ክቡር ሚኒስትር?
• አልሰማሁም፣ የአቋም ለውጥ አለ እንዴ?
• ግጭቱ በሰላማዊ መንገድ እንዲቋጭ ፍላጎታቸውን ለተመድ ገልጸዋል፣ ተመድም ግፊት እንዲያደርግ ጠይቀዋል፡፡
• አምባሳደር እነዚህን ሰዎች በደንብ የተረዷቸው አልመሰለኝም። 
• እንዴት?
• ይህ እኮ የተለመደ ተግባራቸው ነው… በተለይ ጥሩ ምት ባረፈባቸው ወቅት ሰላማዊ መፍትሔን ያነሷታል፣ ትንሽ አቅም ያገኙ ጊዜ ደግሞ ሰላማዊ መፍትሔን ይጥሏትና ሌላ ነገር እንደሚሉ ይታወቃል።
• ሌላ ምን ይላሉ?
• ጦርነቱ አልቋል… ከዚህ በኋላ የምታድኑት ከተማ የለም ይላሉ።
• ክቡር ሚኒስትር አሁን ግን ቁርጠኛ ይመስላሉ።
• እንደዚያ ካመኑ ቁርጠኛ መሆናችሁን አሳዩ ይበሉልኝ።
• በይፋ ከመግለጽ በላይ እንዴት አድርገው ሊያሳዩ ይችላሉ ክቡር ሚኒስትር?
• ቢያንስ ሁለት ነገር በማድረግ ቁርጠኝኘታቸውን ሊያሳዩ ይችላሉ?
• ይንገሩኝ ክቡር ሚኒስትር፡፡
• አንደኛውና ቀዳሚው የተኩስ አቁም ማወጅ ነው፣ ሌላው ሰላማዊ መፍትሔ ለመፈለግ በእነርሱ በኩል የሚወክሉትን ሰው ወይም ቡድን ማሳወቅ ነው።
• ክቡር ሚኒስትር እንደዚያ ከሆነ በእናንተ በኩልም አንድ ዕርምጃ በመራመድ ቁርጠኝነታችሁን በተግባር መግለጥ የሚያስፈልግ ይመስለኛል፣ ተሳሳትኩ?
• ተሳስተዋልም… አልተሳሳቱምም ማለት ይቻላል።
• እንዴት?
• አንደኛ አገረ መንግሥቱን የሚመራ አካልን ነፍጥ ካነገቡ ስብስቦች ጋር ማነፃፀር ስህተት ነው፣ ነገር ግን ይህ አካል ለእነሱ ብሎ ሳይሆን ባለበት መንግሥታዊ ኃላፊነት ቁርጠኝነቱን ማሳየት ያለበት በመሆኑ ትክክል ነው። 
• እስማማለሁ ክቡር ሚኒስትር፡፡
• ጥሩ፣ እንደዚያ ከሆነ መንግሥት ሁሉን አቀፍ አገራዊ ምክክር ለማድረግ ረቂቅ አዋጅ ለፓርላማ በመላክ ቁርጠኝነቱን አሳይቷል፣ ጥረቱንም እየቀጠለ ነው። ይህንንም የሚያውቁ ይመስለኛል።
• አውቃለሁ ክቡር ሚኒስትር፣ ነገር ግን በእነሱ በኩል በአገራዊ ምክክሩ መሳተፋቸውን ማረጋገጥ ይፈልጋሉ፣ ይህን ሳያረጋግጡ ተኩስ አቁም ለማወጅ የሚቸገሩ ይመስለኛል፣ ስለዚህ በእናንተ በኩል ማስተማመኛ ቢሰጥ ጥሩ ነው።
• የምን ማስተማመኛ? ሁሉም የፖለቲካ ኃይል በምክክሩ እንደሚሳተፍ በረቂቅ አዋጁ ላይ ከማስቀመጥ በላይ ምን ማስተማመኛ ሊሰጥ ይችላል?
• የሽብር ፍረጃው ካልተነሳ በምክክሩ መሳተፍ እንደማይችሉ የታወቀ ነው፣ ስለዚህ…
• ተው… ተው… አትጨርሰው…
• ለምን ክቡር ሚኒስትር?
• እሱ የሚያሳስብ አይደለም። 
• እንዴት አያሳስብም ክቡር ሚኒስትር?
• መፍትሔ ስለተቀመጠለት አያሳስብም፡፡
• አልገባኝም?
• አንደኛ በምክክሩ የሚሳተፈው የፖለቲካ ሐሳብ ነው፣ ሁለተኛ ምክክሩን የሚመራው ኮሚሽን ያለ መከሰስ መብት እንደሚኖረው በረቂቅ አዋጁ ተቀምጧል። 
• ስለዚህ?
• ስለዚህ የሽብር ፍረጃውን ማንሳት ሳይሆን ተጠያቂ ማድረግ ነው የሚያስፈልገው ለማለት ነው፣ በጣም አስፈላጊ ከሆነ ደግሞ በሕግ አግባብ ለብቻው ማየት ይቻላል። 
• ይህንን ጉዳይ ለብቻው ማየት ይቻላል?
• አዎ፣ በሕጉ መሠረት ለብቻው ማየት ይቻላል?
• እንዴት?
• የአሸባሪነት ፍረጃ የሚነሳበት የሕግ ሥነ ሥርዓትን ተከትሎ ማንሳት ይቻላል፣ ወደዚህ ለመግባት ግን ከእነሱ የሚጠበቀውን መፈጸም አለባቸው።
• ምንድነው በዋናነት የሚጠበቅባቸው?
• እጅ መስጠት ብቻ!