Thursday, December 1, 2022
ሌሎች ዓምዶች
    - ማስታወቂያ -
    - ማስታወቂያ -

    በአማራና በአፋር ክልሎች በኤሌክትሪክ መሠረተ ልማቶች ላይ የደረሰው ውድመት ሊጠና ነው

    - ማስታወቂያ -

    ተዛማጅ ፅሁፎች

    በአማራና በአፋር ክልሎች በአሸባሪነት የተፈረጀው የሕወሓት ቡድን ያደረሰውን የኤሌክትሪክ መሠረተ ልማት ውድመት መጠን የሚያጠና ቡድን መቋቋሙን፣ የኢትዮጵያ ኤሌክትሪክ አገልግሎት አስታወቀ፡፡

    የኢትዮጵያ ኤሌክትሪክ አገልግሎት የኮርፖሬት ኮሙዩኒኬሽን ዳይሬክተር አቶ መላኩ ታዬ ለሪፖርተር እንዳስታወቁት፣ ወረራ ተፈጽሞባቸው ነፃ በሆኑ አካባቢዎች በኤሌክትሪክ መሠረተ ልማት ላይ የደረሰው ውድመት መጠን ይጠናል፡፡

    የኤሌክትሪክ አገልግሎት ተቋሙ በንብረትና በአሌክትሪክ መሠረተ ልማት ላይ የደረሰው ዝርፊያና ውድመት መጠን ምን ያህል ነው የሚለውን የሚያጠና ሁለት ቡድን እንዳዋቀረ የተናገሩት አቶ መላኩ፣ በኔትወርክ መስጫ መሠረተ ልማት ላይ ብቻ ሳይሆን አገልግሎቱ የሚሰጥባቸው በርካታ ቢሮዎች በአሸባሪው ቡድን ውድመት እንደ ደረሰባቸው ገልጸዋል፡፡

    ሆኖም በዚህ ወቅት የውድመቱን መጠን ከማጥናት ባሻገር በዋናነት እየተሠራበት ያለው ጉዳይ የጥገና ሥራዎችን ማከናወኑን እንደሆነ የተገለጸ ሲሆን፣ ይህንን ጉዳይ የሚያስፈጽሙ አንድ ቡድን አስቀድሞ እንዳዋቀረ ተገልጿል፡፡ የተቋቋመው ቡድን ዋና ተግባሩም ከተሞች ከወራሪው ቡድን ነፃ ሲሆኑ፣ እግር በእግር አገልግሎት እንዲጀመር የሚያደርግ እንደሆነ አቶ መላኩ ተናግረዋል፡፡

    የኢትዮጵያ ኤሌክትሪክ አገልግሎት ዋና ሥራ አስፈጻሚ አቶ ሽፈራው ተሊላ ሰኞ ታኅሳስ 11 ቀን 2014 ዓ.ም. ለአገር መከላከያ ሚኒስቴር በተደረገ የድጋፍ ፕሮግራም ላይ እንዳስታወቁት፣ በአገሪቱ ያጋጠመው የፀጥታ ችግር በኤሌክትሪክ መሠረተ ልማት ላይ ከፍተኛ ጉዳት አድርሷል፡፡

    ተቋሙ ይህንን ጉዳት በአጭር ጊዜ ውስጥ ዕልባት ለመስጠት ከወራሪው ኃይል ነፃ የወጡ አካባቢዎችን እየተከታተለ ጥገና በማድረግ ላይ እንደሚገኝ ገልጸው፣ በቀጣይም የአገሪቱን ሁለንተናዊ የልማት እንቅስቃሴ ለማስቀጠል ከፍተኛ ርብርብ እንደሚያደርግ አስታውቀዋል፡፡

    በተያያዘም ከጥቅምት 22 ቀን 2014 .ም. ጀምሮ በአሸባሪነት የተፈረጀው ቡድን በአፋር ክልል የኤሌክትሪክ መሠረተ ልማቶች ላይ በደረሰው ውድመት፣ በክልሉ ተቋርጦ የነበረው የኤሌክትሪክ አገልግሎት እንደገና መጀመሩን የኢትዮጵያ ኤሌክትሪክ አገልግሎት አስታውቋል።

    በዚህም መሠረት ከዋናው ግሪድ ኃይል ሳያገኙ የቆዩት ሰመራ፣ ሎጊያ፣ ዱብቲ፣ አይሳኢታ፣ ዲችኦቶ፣ ጋላፊ፣ ሚሌ፣ ኤሎሀ፣ ኤሊዳአር ከተሞችና አካባቢዎቻቸው ተቋርጦባቸው የነበረው ኤሌክትሪክ ኃይል አገልግሎት ዳግም ጀምሯል፡፡

    ከላይ የተዘረዘሩት ከተሞች ከኮምቦልቻ የኃይል ማከፋፈያ ወደ አፋር ክልል በተዘረጋው መስመር ኤሌክትሪክ እንደሚያገኙ ቢታወቅም፣ ከጥቅምት 22 ቀን 2014 .ም. ጀምሮ በሽብር ቡድኑ በከፍተኛ የኃይል ማስተላለፊያ ኤሌክትሪክ መሠረተ ልማቶች ላይ ከፍተኛ ውድመት ካደረሰበት ጊዜ ጀምሮ በከተሞቹ የኤሌክትሪክ አገልግሎት ተቋርጦ ቆይቷል።

    የአፋር ክልል ኤሌክትሪክ አገልግሎት ባለሙያዎች ባደረጉት ከፍተኛ ርብርብና የጥገና ሥራ ከሰኞ ታኅሳስ 11 ቀን 2014 ዓ.ም. ጀምሮ ከተሞቹ የኤሌክትሪክ ኃይል ዳግም ማግኘታቸው የተገለጸ ሲሆን፣ በክልሉ ከኮምቦልቻ ከተማ ሰብስቴሽን የሚያገኙት ሰባት አገልግሎት መስጫ ማዕከላት መሉ በሙሉ የኤሌክትሪክ አገልግሎት ሳያገኙ እንደቀሩ ተገልጿል፡፡

    በከተሞቹ የኤሌክትሪክ አገልግሎቱን ዳግም የማስጀመሩ ሥራ የመዘግየቱ ምክንያት ከኮምቦልቻ ሰብስቴሽን ላይ የኃይል መዋዠቅ በማስከተሉና የኦፕቲካል ፋይበር ጥገና ባለመጠናቀቁ ምክንያት እንደነበር ተገልጾ፣ በቀጣይም ቀሪ የጥገና ሥራዎች ተጠናቀው ሌሎች ከተሞችም የኤሌክትሪክ ኃይል እንደሚያገኙ ተመልክቷል፡፡

    በተጨማሪም ባለፈው ሳምንት ዓርብ ጀምሮ የኤሌክትሪክ ኃይል ተቋርጠባቸው የነበሩት በደብረ ብርሃን ዲስትሪክት የሚገኘው ለሚ ከተማ፣ እንዲሁም በደሴ ዲስትሪክት የሚገኙት ሐይቅና ቢስቲማ ከተሞች የኤሌክትሪክ ኃይል ያገኙ ሲሆን፣ በተመሳሳይ በደሴ ዲስትሪከት ሥር ከሚገኙ 23 አገልግሎት መስጫ ማዕከላት መካከል ከጋሸና ማከፋፈያ ጣቢያ ኃይል ከሚያገኘው ወገል ጤና አገልግሎት መስጫ ማዕከልና ከወልድያ ማከፋፈያ ጣቢያ ኃይል ከሚያገኘው ውጫሌ አገልግሎት መስጫ ማዕከላት በስተቀር፣ በዲስትሪክቱ ሥር የሚገኙ ሌሎች 21 አገልግሎት መስጫ ማዕከላት የኤሌክትሪክ ኃይል እንዳገኙ የኢትዮጵያ ኤሌክትሪክ አገልግሎት አስታውቋል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች