Thursday, December 1, 2022
ሌሎች ዓምዶች
    - ማስታወቂያ -
    - ማስታወቂያ -

    ብሔራዊ ባንክ የመጀመርያውን የክፍያ ሥርዓት ኦፕሬተር ፈቃድ ሰጠ

    - ማስታወቂያ -

    ተዛማጅ ፅሁፎች

    የኢትዮጵያ ብሔራዊ ባንክ የመጀመርያውን የክፍያ ሥርዓት ኦፕሬተርነትና የጌትዌይ አገልግሎት አቅራቢነት ፈቃድ፣ ለአሪፍፔይ ዲጂታል ቴክኖሎጂ ድርጅት ሰጠ፡፡ በብሔራዊ ባንክ የክፍያ ሥርዓትና ሴትልመንት ዳይሬክተር ወ/ሮ ማርታ ኃይለ ማርያም ለሪፖርተር እንዳረጋገጡት፣ ብሔራዊ ባንክ የብሔራዊ ዲጂታል ፔይመንት ስትራቴጂና መመርያ ካወጣበት ካለፈው ዓመት አንስቶ፣ በርካታ የቴክኖሎጂ አቅራቢ ድርጅቶች ፈቃድ ለማግኘት አመልክተዋል።

    መመርያውን መሠረት በማድረግ ባንኩ የክፍያ ሥርዓት ኦፕሬተርነትና የጌትዌይ አገልግሎት አቅራቢነትን ፈቃድ ለአሪፍፔይ ዲጂታል ቴክኖሎጂ መሰጠቱን፣ በሞባይል ገንዘብ አገልግሎት ደግሞ ለኢትዮ ቴሌኮም የቴሌ ብር አገልግሎት እንዲሰጥ በተጠናቀቀው ዓመት መፈቀዱ ተገልጿል፡፡ ከዚህ በተጨማሪም በቅርቡ ሌሎች ድርጅቶችም እንደ አሪፍፔይ የዲጂታል ክፍያ አግልግሎቶችን እንዲሰጡ የሚያስችላቸው ፈቃድ እንደሚሰጣቸው ወ/ሮ ማርታ አስታውቀዋል፡፡

    የአሪፍፔይ መሥራችና ዋና ሥራ አስፈጻሚ አቶ ሀብታሙ ታደሰ ለሪፖርተር እንደገለጹት፣ የኢትዮጵያ ብሔራዊ ባንክ ለአሪፍፔይ ሁለት የዲጂታል ክፍያ ሥርዓት አገልግሎቶችን እንዲያቀርብ የመጀመርያ ነው የተባለለትን ፈቃድ ሰጥቷል።

    እንደ አቶ ሀብታሙ ገለጻ፣ የኢትዮጵያ ብሔራዊ ባንክ ይፋ ያደረገውን የብሔራዊ ዲጂታል ፔይመንት ስትራቴጂና መመርያ መሠረት በማድረግ ደርጅቱ ፈቃዱን ለማግኘት ከአሥር ወራት በላይ ምላሽ ሲጠብቅ ቆይቷል፡፡

    ድርጅቱ ለመጀመርያ ጊዜ ፈቃድ ሲጠይቅ፣ በመመርያው ላይ የተቀመጡትን ቅድመ ሁኔታዎች በዝርዝር ማሟላት እንደነበረበት ዋና ሥራ አስፈጻሚው ገልጸዋል፡፡ 

    ካፒታል ማሟላት የሚለው የመጀመርያው ቅድመ ሁኔታ ሲሆን፣ ከዚያ ውጪ ደግሞ ኢንቨስት የሚያደርጉት ሰዎች ግዴታ ኢትዮጵያውያንና ትውልደ ኢትዮጵያውያን ሊሆኑ ይገባል የሚለው ነው፡፡ በሌላ በኩል ከፋይናንስ ጋር በተገናኘ ያለውን አሠራር ኅብረተሰቡ ያውቀው እንደሆነ፣ ከፋይናንስ ወንጀል ጋር በተገናኘ ያለውን የድርጅቱን የቀደመ እንቅስቃሴ መመልከት ሌላው የሚታይ ጉዳይ መሆኑ ተጠቁሟል፡፡

    ከዚህም በተጨማሪም የድርጅቱን ቢዝነስ ዕቅድ ማስገምገም ሌላው በመመርያው ላይ የተቀመጠ መሥፈርት ነው፡፡ ዘርፉ አዲስ እንደ መሆኑ የሚቀጥራቸውን ሰዎችን እንዴት ነው ብቁ ማድረግ የሚቻለው የሚለው ሌላው ሒደት እንደሆነ ተገልጿል፡፡

    አቶ ሀብታሙ እንዳብራሩት፣ በመመርያው ውስጥ ከሦስት እስከ አራት የሚደርሱ የክፍያ ሥርዓት ኦፕሬተርነት አማራጭ ፈቃዶች አሉ። አንድ ድርጅት ማግኘት የፈለገው የዋሌት ወይም የሞባይል ገንዘብ አገልግሎት ከሆነ፣ እስከ 50 ሚሊዮን ብር የሚደርስ ዝቅተኛ የተከፈለ ካፒታል መጠን ሊኖረው ይገባል፡፡ ከዚህ ውስጥ አሪፍፔይ የተሰጠው ፈቃድ የክፍያ ሥርዓት ኦፕሬተርነትና የጌትዌይ አገልግሎት አቅራቢነት አገልግሎቶችን ለመስጠት ነው፡፡ ይህም የፖስ ማሽኖችን የሚተካ ሲስተምና የኦንላይን ቢዝነሶችንና በቤት ውስጥ የሚከናወኑ ግብይቶችን በኤሌክትሮኒክ ክፍያቸውን የሚሳለጥበትን አገልግሎት፣ ወይም በሌላ አገላለጽ የኦንላይን ሱቆች ክፍያን ማከናወን የሚቻልባቸው ሲስተሞች ናቸው፡፡

    አቶ ሀብታሙ አሪፊፔይ የክፍያ ሥርዓት ኦፕሬተር ፈቃድና የክፍያ ጌትዌይ ኦፕሬተር ፈቃድ እንዳገኘ ገልጸው፣ የሁለቱን አገልግሎቶች ፈቃድ ለማግኘት የሚጠበቀው ዝቅተኛ የተከፈለ ካፒታል ብር መጠን በአጠቃላይ 13 ሚሊዮን ብር ቢሆንም፣ እንደ እሳቸው እምነት ይህ የገንዘብ መጠን አገልግሎቱን ለመተግበር በቂ ሊሆን አይችልም። ይህንን ግምት ውስጥ በማስገባት 42 ባለአክሲዮኖች ያሉት አሪፍፔይ ኩባንያ፣ በ140 ሚሊዮን ብር የተከፈለ ካፒታል እንደተቋቋመ አስታውቀዋል።

    አሪፍፔይ ዲጂታል ዋሌት ቢዝነስን ለመሥራት ሳይሆ ካርድ ፕሮሰስ ወደ ማድረግ አገልግሎት የሚገባ እንደሆነ ያስታወቁት አቶ ሀብታሙ፣ ይህም ኤቲኤም ካርድን በመጠቀም በኦንላይንም ሆነ በአካል የሚፈጸሙ ክፍያዎችን ለማስተናገድ የሚያስችል አገልግሎት ነው፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች