Saturday, October 1, 2022
ሌሎች ዓምዶች
    - ማስታወቂያ -
    - ማስታወቂያ -

    ኬፊ ሚነራል ለቱሉ ካፒ ፕሮጀክት ልማት የሚሆን 800 ሚሊዮን ብር አገኘ

    - ማስታወቂያ -

    ተዛማጅ ፅሁፎች

    በምሥራቅ ወለጋ ቱሉ ካፒ አካባቢ የተገኘውን የወርቅ ክምችት ለማልማት ፈቃድ ያገኘው የእንግሊዝ ኩባንያ ኬፊ ሚነራልስ፣ ለፕሮጀክት ልማቱ የሚረዳውን የ800 ሚሊዮን ብር ካሉት ባለአክሲዮኖች እንዳገኘ አስታወቀ፡፡

    ኬፊ ሚነራል ለሪፖርተር በላከው መግለጫ እንዳስታወቀው፣ የኬፊ ባለአክሲዮኖች የቱሉ ካፒን ፕሮጀክት ማስጀመርን ጨምሮ፣ ለሌሎችም የልማት ፕሮጀክት ልማት የሚውል  800 ሚሊዮን ብር መድበዋል፡፡የተመደበው ገንዘብ ልማቱ በሚከናወንበት አካባቢ የፀጥታ ሁኔታው በፈቀደ መጠን በፈረንጆቹ አዲስ ዓመት 2022 ተግባራዊ ይሆናል ተብሎ ለሚጠበቀው ፕሮጀከት አጋዥ እንደሆነ ተገልጿል፡፡

    የማዕድን ሚኒስቴር ቀደም ሲል ለኩባንያው በሰጠው የመጨረሻ ማስጠንቀቂያ፣ የወርቅ ልማት ፕሮጀክት ትግበራው እስከ ጥቅምት 21 ቀን 2014 ዓ.ም. ካልተጀመረ  በኩባንያው ላይ ሕጋዊ ዕርምጃ እንደሚወስድ ገልጾ ነበር።

    በሌላ በኩል ኩባንያው የማዕድን ልማቱን ለማከናወን ያልቻለው በገጠመው የፋይናንስ ችግር ሲሆን፣ ይኼውም በአገሪቱ ካለው ወቅታዊ የፖለቲካ ቀውስ ጋር የሚገናኝ እንደሆነ መግለጹ ይታወሳል። 

    የማዕድን ሚኒስቴር፣ ኩባንያው የሚያቀርበውን ምክንያት እንደማይቀበል ካስታወቀ በኋላ፣ የፀጥታ ችግሩ ቢከሰት እንኳን የወርቅ ልማት ፕሮጀክት ትግበራውን ለማደናቀፍ ምክንያት ሊሆን እንደማይችል አስታውቆ፣ ነገር ግን ኩባንያው የሚፈልገውን የፋይናንስ አቅርቦት ችግር እ.ኤ.አ. ጃንዋሪ 31 ቀን 2022 ድረስ እንደሚቀርፍ በእርግጠኛነት በመግለጹ፣ ተጨማሪ አንድ ዕድል ለኩባንያው እንደሰጠ ሚኒስቴሩ አስታውቆ ነበር፡፡

    ኬፊ ሚነራል እንዳስታወቀው የኬፊ ባለአክሲዮኖች የቱሉ ካፒን ፕሮጀክት ለመደገፍ ባሳለፍነው ሳምንት ያደረጉት የገንዘብ ፈሰስ፣ ከቱሉ ካፒ ፕሮጀክት ማስጀመሪያ በተጨማሪ፣ በሳዑዲ ዓረቢያ ላሉት ሌሎች ሁለት የልማት ፕሮጀክቶች የሚውል እንደሆነ ተገልጿል፡፡

    የቱሉ ካፒ ጎልድ ማይንስና ኬፊ ሚኒራልስ ኢትዮጵያ አክስዮን ማኅበርን የሚመራው ኬፊ ጎልድ ኩባንያ በላከው መግለጫ እንዳስታወቀው፣ ኩባንያው የመደበው ገንዘብ በለንደን አክሲዮን ገበያ 5,000 የሚደርሱ ባለአክሲዮኖች የተሰባሰበ እንደሆነ አስታውቆ፣ ይህም ወደ ገንዘብ ሲቀየር 800 ሚሊዮን  ብር የሚደርስ ነው።

    የኬፊ ዳይሬክተሮችና ማኔጅመንቶች በራሳቸው ከሁለት ሚሊዮን ዶላር በላይ ወይም 100 ሚሊዮን ብር የሚጠጋ ገንዘብ በለንደን ካፒታል ማሰባሰብያ ላይ ፈሰስ እንዳደረጉ ተገልጿል። በዚህም ኢንቨስትመንቱ በኬፊ ውስጥ ካለው የአክሲዮን ድርሻ  ከአሥር በመቶ በላይ ድርሻ ጋር ተዳምሮ በዓለም በታላላቅ የማዕድን ኩባንያዎችን የሚያስተዳድሩትና ከፍተኛ ልምድ ያላቸው የድርጅቱ አባሎች ለቱሉ ካፒ ልማት ያላቸውን ቁርጠኝነት የሚያሳይ እንደሆነ የቱሉ ካፒ የወርቅ ማዕድን ኃላፊነቱ የተወሰነ ማኅበር የሥራ ኃላፊ ከበደ ኃይሉ (ዶ/ር) አስታውቀዋል።

    ኬፊ ሚኒራልስ ኢትዮጵያ በቱሉ ካፒ ወርቅ ማዕድን አክሲዮን ማኅበር ከ70 ሚሊዮን ዶላር በላይ ኢንቨስት ያደረገ ሲሆን፣ ለቱሉ ካፒ ፕሮጀክት ልማት ከ300 ሚሊዮን ዶላር ወይም 13 ቢሊዮን የኢትዮጵያ ብር በላይ ኢንቨስት ለማድረግ አቅዷል።

    ከበደ (ዶ/ር) ለሪፖርተር በላኩት የጽሑፍ ምላሽ እንደገለጹት ለቱሉ ካፒ ፕሮጀክት የሚሆነውና ከፋይናንስ አቅራቢዎች የሚገኘው የ300 ሚሊዮን ዶላር አቅም ሲሆን፣ ከፋይናንስ አቅራቢዎቹ ጋር የሚፈጸመው ስምምነት ዕውን የሚሆነው ባንኮቹ በግላቸው ቀጥረዋቸው የአገሪቱቷንና የፕሮጀክቱን ሁኔታ ከፀጥታ አኳያ ሪፖርት በሚያቀርቡ ባለሙያዎች መሠረት እንደሆነ አስታውቀዋል፡፡

    የማዕድን ሚኒስቴር እስከ ጥር 23 ቀን 2014 ዓ.ም. ድርጅቱ ከባንኮቹ ያደረገውን ስምምነት እንዲቀርብለት መጠየቁን ያስታወቁት ኃላፊው፣ ባንኮቹም ከፀጥታ አኳያ የተደረገውን የባለሙያዎች ጥናት ሪፖርት መሠረት አድርገው ደብዳቤውን ለሚኒስቴሩ እንደሚቀርቡ አስታውቀዋል፡፡

    የማዕድን ሚኒስቴር በበኩሉ ለቱሉ ካፒ ፕሮጀክት ልማት የመጀመሪያው ምዕራፍ የሚያስፈልገውን ፋይናንስ እንዲያሟላ ለኬፊ ሚነራል ያስቀመጠውን ጊዜ ከጥር 23 ቀን 2014 ዓ.ም. በኋላ እንደማያራዝም አስታውቋል፡፡

    - Advertisement -spot_img

    የ ጋዜጠኛው ሌሎች ፅሁፎች