Thursday, February 29, 2024
- Advertisement -
- Advertisement -

የተመረጡ ፅሑፎች

ኢትዮጵያውያንን በመውጋትና ንብረቶቻቸውን በማውደም ኢትዮጵያን ማፍረስ አይቻልም!

ጤነኛ አዕምሮ ያለው የአሸባሪውን የሕወሓት ቡድን አረመኔያዊ ተግባር ማውገዝ ብቻ ሳይሆን እንዲህ ያለው ድርጊት ዳግሞ በዚህች አገር እንዳይፈጠር በብርቱ መታገል አለበት፡፡ የቡድኑን ድርጊት አበጀህ ማለትም ፈጽሞ የጤንነት አይደለም፡፡

አንዳንድ ምዕራባውያን አገሮች ግን በሕወሓት የተፈጸመውን አረመኔያዊ ተግባር ከማውገዝ ይልቅ እንዳላዩ በመሆን በቀጥታም ሆነ በተዘዋዋሪ ድርጊቱን ሲደግፉ መቆየታቸው፣ የዓለምን ፍርደ ገምድልነት የታዘብንበትም ነው፡፡ ይህም የኢትዮጵያውያንን በራስ ኃይል የአገርን ሉዓላዊነት ማስከበርና እኛን መሰል ኢኮኖሚ በማራመድ አገራችንን ለማስቀጠል ቆርጠን እንድንነሳ የሚያደርገን ነው፡፡

የጥፋት ቡድኑ ለኢትዮጵያና ለኢትዮጵያውያን ያለውን ፍፁም ወደር የሌለው ጥላቻ አሳይቷል፡፡ እያንዳንዱ ድርጊት ሲታይ ‹‹በዕውን ኢትዮጵያን ሲመራ የነበረው ይህ ቡድን ነው?›› የሚል ጥያቄ እንድናነሳ ሁሉ ያስገደደም ነው፡፡ ቀድሞውኑ የኢትዮጵያዊነት ስሜት ያልነበረው ስለመሆኑ፣ በሥልጣን በቆየበት ዘመን የፈጸመውን ሥውርና ግልጽ ደባ ለአንዳንዶች ቢጋረድም ዛሬ ላይ ግን ሁሉም ማንነቱን ሊገነዘብ ችሏል ማለት ይቻላል፡፡

የዘመናት ታሪክ ያላትን አገር ክብሯን በመግፈፍ፣ ሀብቷን ዘርፎ፣ ሕዝቦቿን አባልቶ፣ እንደ አገር እንዳትቀጥል ሲሸርብ የነበረው ሴራ ሳያንስ፣ ዛሬ ያወረደባት የበደል ጦር ‹‹ለምን ይህ ሁሉ›› ያስብላል፡፡

ኢትዮጵያ በዚህ ቡድን መዘረፏና መበደሏ ሳያንስ ከራሷ በተዘረፈ ገንዘብ ስትወጋ መስማትና ማየት ሕመሙ ከባድ ነው፡፡ ሕዝቤ፣ ወገኔ ብሎ የትግራይን ሕዝብ ሲጠብቅ የነበረን የኢትዮጵያ ሰሜን ዕዝ ጦር፣ ወገኔ ያለውን ሕዝብ ሰብል ባጨደበት ማጭድ መታረድ አቻ የሌለው ጭካኔ በምን ሊካስ እንደሚችል ባይታወቅም ኢትዮጵያውያን ግን ይህንን ታሪክ የመለወጥ ኃላፊነት አለባቸው፡፡

ከሰሞኑ እንደ ኮምቦልቻ ያሉ ከተሞች ላይ ሕወሓት በተለያዩ የማምረቻ ተቋማት ላይ የፈጸመው ዝርፊያ በረቀቀ መልኩ ስለመከናወኑ በግልጽ እየታወቀ ነው፡፡ የፋብሪካ ማምረቻዎችን በባለሙያ በመታገዝ ፈታትቶ ዘረፋውን ያከናወነ ሲሆን፣ ምቀኝነት በተጠናወተው አመለካከቱ ደግሞ መዝረፍ ያልቻለውን እዚያው አውድሞ ሄዷል፡፡ ይህ ትንሹ መገለጫው ሲሆን፣ በጥቅል ሲታይ ግን ይህ ቡድን ኢትዮጵያውያንን ወደ ለየለት ድህነት ለመክተት ያልፈነቀለው ድንጋይ አልነበረም፡፡

ጠላትነቱ ልክ የለውም የሚባልበቱ ሌላው መገለጫ የጤናና የትምህርት ተቋማት ላይ የፈጸመው ጥፋት ነው፡፡ በመሆኑም ወደ ግማሽ ምዕተ ዓመት ዕድሜ ያለው ሕወሓት፣ ከውልደት እስከ ጉልምስናው ድረስ ኢትዮጵያን ጠል ድርጊቶቹን አለ ብሎ ባመነው የትኛውም ዓይነት ድርጊት አሳይቷል፡፡

በደም የተጨማለቀ እጃቸውን፣ በተንኮል የታጨቀ የተጠና ድርጊታቸውን ኢትዮጵያና ኢትዮጵያውያን ላይ ማሳረፋቸው ሳያንስ፣ ዛሬም ኢትዮጵያን ለጠላቶቿ አሳልፎ ለመስጠት ጥረት የተጓዙበት መንገድ ከዚህ በኋላ የኢትዮጵያ የችግርና የስቃይ ምንጭ እንዳይሆን በማድረግ አገር የምትገነባበትን ታሪክ መሥራት የዚህ ትውልድ ትልቅ ኃላፊነት ነው፡፡

በሕወሓት ቡድን ኢትዮጵያ ያየችው አበሳ፣ ከአራት ኪሎ ተባሮ፣ በትግራይ ከመሸገበት ጊዜ አንስቶ እስካሁን የታየው ድርጊት ሁሉ የሚነግረን እንዲህ ያሉ ቡድኖች በዚህች አገር ውስጥ ነገም እንዳይፈጠሩ ማድረግ እንደሚገባን ነው፡፡

ኢትዮጵያን ማፍረስ ባይሳካላቸውም ለኢትዮጵያውያን የዓመታት የቤት ሥራ ሰጥተዋል፡፡ በደሃ አገር ጉልበትና በመከራ የተገነቡ ሆስፒታሎች፣ ትምህርት ቤቶችና ሌሎች መሠረተ ልማቶችን በተጠና ሁኔታ በማውደምና በመዝረፍ አገርን ለማቆርቆዝ የተሠራውን ውንብድና ተባብሮ ወደ ቦታው መመለስም ጊዜ የማይሰጠው ጉዳይ ነው፡፡

የትምህርት፣ የጤናና የሌሎች ወሳኝ የሚባሉ ማኅደሮች ያለበትን ቦታ ሁሉ ፈልጎ በማውደም የሚረካ፣ ይህንን በማድረጉ የሚያቅራራ ቡድን በምንም ሁኔታ የዚህን አገር ፖለቲካ አይመጥንም፡፡

ሕወሓት በትግራይ ሕዝብ ላይ ያሰረፀውን መርዛማ አመለካከቱን ጭምር ማጥፋት ያስፈልጋል፡፡ የትግራይም ሕዝብ ከዚህ ቡድን ራሱን ማራቅ ይኖርበታል፡፡ ለጥቂት ግለሰቦች እብሪት ራሱን ማሰቃየትም አይገባውም፡፡    

የሕወሓት መወገድ ለኢትዮጵያ ሕዝብ መጪው ጊዜ ብሩህ ስለመሆኑ ማመላከቱ ብቻ ሳይሆን፣ በእርሱ አምሳል ተቀርፀው ድክ ድክ የሚሉ ቡድኖችም መቀጣጫ መሆን አለበት፡፡ ለማንኛውም አሁን ላይ የተያዙ አካባቢዎች ነፃ በማድረግ የመጀመርያውን ምዕራፍ በድል ማጠናቀቁን መንግሥት ያሳወቀ ሲሆን፣ ከዚሁ መልዕክት ጋር ተያይዞ የኢትዮጵያ ጦር ባለበት እንዲቆይም ወስኗል፡፡ ይህ ውሳኔ የሚያሳየው ለጊዜውም ቢሆን ወደ ትግራይ የማይገባ መሆኑን ነው፡፡ በሌላ አነጋገር የትግራይ ክልል ነዋሪዎች አሁንም የጥሞና ጊዜ የተሰጣቸው መሆኑን ያሳያል፡፡ ስለዚህ ሕዝቡ ሕወሓት ለእሱም የማይበጅ መሆኑን አውቆ፣ ይህንን ቡድን ለመደምሰስ ሊተባበር ይገባል፡፡

Latest Posts

- Advertisement -

ወቅታዊ ፅሑፎች

ትኩስ ዜናዎች ለማግኘት