Saturday, October 1, 2022
ሌሎች ዓምዶች
    - Advertisement -
    - Advertisement -
    ዓለምየደቡብ አፍሪካ ፀረ አፓርታይድ ታጋይ ሊቀ ጳጳስ ዴዝሞንድ ቱቱ (1924-2014 ዓ.ም.)

    የደቡብ አፍሪካ ፀረ አፓርታይድ ታጋይ ሊቀ ጳጳስ ዴዝሞንድ ቱቱ (1924-2014 ዓ.ም.)

    ቀን:

    የደቡብ አፍሪካ ሊቀ ጳጳስና የፀረ አፓርታይድ አርበኛ ዴዝሞንድ ቱቱ የብዙዎች ድምፅ እንዲሰማና አለመግባባቶች በሰላም እንዲፈቱ ሲታገሉ የኖሩ ስለመሆናቸው ዓለም ይመሰክራል፡፡

    እሳቸው እ.ኤ.አ. ከ1948 እስከ 1991 ድረስ በደቡብ አፍሪካ ተንሰራፍቶ የጥቁር ሕዝብን መብት የነፈገውን አፓርታይ በመታገል ብቻ ሳይሆን፣ ለዓለም ሕዝቦች ሰላም ይሰፍን ዘንድ መሳጭና አሳማኝ ንግግሮችን በማድረግ፣ የሰብዓዊ መብት እንዲከበር ባገኙት መድረክ ሁሉ ሲወተውቱ የኖሩ ናቸው፡፡

    እሑድ ታኅሳስ 17 ቀን 2014 ዓ.ም. በደቡብ አፍሪካ ፕሬዚዳንት ሲረል ራማፎዛ ከዚህ ዓለም በሞት መለየታቸው የተነገረው ሊቀ ጳጳስ ዴዝሞንድ ቱቱ፣ እ.ኤ.አ. ከ1948 እስከ 1994 በደቡብ አፍሪካ የጭቆና አገዛዝን ሲያራምድ የነበረውን የአፓርታይድ ሥርዓት ለማስወገድ በነበራቸው ተሳትፎ በ1984 የኖቤል ሰላም ሽልማትን አግኝተዋል፡፡

    በሰብዓዊ መብት ሥራቸው በዓለም አቀፍ ደረጃ ታዋቂነትን ያተረፉት ሊቀ ጳጳሱ፣ ከአሜሪካ የቀድሞ ፕሬዚዳንት ባራክ ኦባማ እ.ኤ.አ. በ2009 የነፃነት ፕሬዚዳንታዊ ሜዳል ተሸላሚ ሆነዋል፡፡

    የደቡብ አፍሪካ ፀረ አፓርታይድ ታጋይ ሊቀ ጳጳስ ዴዝሞንድ ቱቱ (1924-2014 ዓ.ም.)

     

    የእውነትን ኃይል በዕድሜ ዘመናቸው ሙሉ በመስበካቸው ከሞ ኢብራሂም ፋውንዴሽን በ2012 የአንድ ሚሊዮን ዶላር ድጋፍ ሲያገኙ፣ በሃይማኖታዊ አስተምህሮ መሠረት ፍቅርና ይቅር ባይነትን በመስበካቸው፣ ሰዎች ከመጥፎ ሥራቸውና አስተሳሰባቸው ለማውጣት ለተሠራ ሥራ የሚሰጠውን ‹‹የቴምፕሌሸን ፕራይዝ›› ተሸልመዋል፡፡

    በፕሪቶሪያ ባንቱ ኖርማል ኮሌጅ የመምህርነት ሥልጠና የወሰዱት ቱቱ፣ እ.ኤ.አ. በ1954 ከደቡብ አፍሪካ ዩኒቨርሲቲ ተመርቀው ለሦስት ዓመታት በሁለተኛ ደረጃ ትምህርት ቤት አስተምረዋል፡፡

    በለንደን ቲዮሎጂካል ኢንስቲትዩት ረዳት ዳይሬክተር፣ በጆሀንስበርግ የቅድስት ማርያም ካቴድራል ቤተ ክርስቲያን ዲን ሆነው ያገለገሉት እኝህ ሰው፣ የደቡብ አፍሪካ የአብያተ ክርስቲያናት ካውንስል የመጀመርያው ጥቁር ዋና ጸሐፊ ሆነው አገልግለዋል፡፡

    ከአሜሪካ፣ ጀርመንና ብሪታንያ ከሚገኙ ዩኒቨርሲቲዎች የክብር ዶክተሬት ያገኙት ቱቱ፣ ያለምንም ዘር ልዩነት ለሁሉም እኩል ሰብዓዊ መብት ይከበር፣ በደቡብ አፍሪካ የፓስፖርት ሕግ ይወገድ፣ ለሁሉም አንድ ዓይነት የትምህርት ሥርዓትና የተወለዱበት አገር በሚል ሰበብ የደቡብ አፍሪካውያንን የግዳጅ ጥረዛ እንዲቀር የሚሉትን ዓላማዎች አስረግጠው ለዴሞክራሲና ሕዝቦች ያለምንም ልዩነት መኖር አለባቸው በሚሉ አቋማቸው ይታወቁ እንደነበርም የኖቤል ፕራይዝ ድረ ገጽ አስፍሯል፡፡

    በደቡብ አፍሪካ አፓርታይድ አገዛዝ ይፈጽም የነበረውን ጭቆናና በደል እንዲሁም ኢፍትሐዊነት በመቃወም ከነበረው ፀረ አፓርታይድ ትግል ጀርባ ከነበሩ ግለሰቦች አንዱና ታዋቂው ቱቱ፣ በ90 ዓመታቸው መሞታቸውን ተከትሎ የደቡብ አፍሪካ ፕሬዚዳንት ራማፎዛ፣ ‹‹አርዓያ የሚሆኑ መንፈሳዊ መሪ፣ ዓለም አቀፍ የሰብዓዊ ምብት ተሟጋችና ፀረ አፓርታይድ ታጋይ›› ብለዋቸዋል፡፡

    - Advertisement -

    ይመዝገቡ

    spot_img
    spot_img